1 มืง อาราม ฆาย มืง อีซาเรลัะ อาว ฮู ลาย กาโฆห อาดา โอย ซีนัม. 2 ดอ ดี โนะ โอย ซีนัม ตึอน, อายอซาพาด อี มูห คูนดีคัม อี อึบ มืง ยูดา บอ ฮาว โดง กอย คูนดีคัม อีซาเรลัะ.

3 คูนดีคัม อีซาเรลัะ บอ กาลาง ดี เฆ ดูอี อัน บอ ดีแบ อัน เฆ ตึอน ต็อห, “เบ นับ ลอง มืง ราโมด แคง กาดาย มืง ฆีเลอาด ตึอน, อึณ มูห มืง เอ. เอ ยี ตู ดึห วีว ดี คูนดีคัม อาราม. เอ กอย หนีม หนีม ปาย ตี.” 4 คูนดีคัม อีซาเรลัะ ตึอน, อัน วี กามวน ดี อายอซาพาด. อัน ต็อห, “แม ซี ฮาว ดี มืง ราโมด แคง กาดาย มืง ฆีเลอาด ตึอน โดบ โอว, กาโฆห ดี เฆ?” 5 อายอซาพาด วี ต็อห, “อึร, อาว ลืก. โอว แฮะ แบน ปี แม. ดูอี โอว มืร แฮะ ปี ดูอี แม. อึณปร็อง โอว แฮะ ปี อึณปร็อง แม.” อายอซาพาด ปี วี ต็อห, “อึณ ยี โลว ดีหมอด เฌาพรา ดี อาต.”

6 คูนดีคัม อีซาเรลัะ ตึอน บอ แดะ ดี กามวน ดี เฆ ดูอี บยาน โฆรห เฌาพรา กาบัก พวน มาย็อห วี. อัน บอ ดีหมอด เฆ ต็อห, “อึณ หมึอม อาว หมึอม แตห เย ฮาว ดี มืง ราโมด ตึอน?” เฆ วี กาโพรม ดี ต็อห ดี อัน, “แตห แม ฮาว. เฌาพรา ดี ดัว มืง ตี ดี แม เฌา.”

7 อายอซาพาด วี ต็อห, “อึณ ซี มึห ดูอี บยาน โฆรห เฌาพรา ปอ อึณ ปัว, แตห เอ ปึอน ดีหมอด?”

8 อัน แฮะ ฮอต ต็อห ปาย ตี คูนดีคัม อีซาเรลัะ วี ต็อห ดี อายอซาพาด, “อึณ มึห อีมาย อู วี. อัน จืร อามีคายา อี มูห ฆอน อามีลัะ ตึอน, อัน แฮะ ปึอน ดีหมอด ดี เฌาพรา. มาแล โอว ฌ็อง อัน. โคว, อัน กาลาง มี ลอง นา ตู หมึอม ดี โอว. อัน ตู กาลาง ลอง นา หมึอม ดี โอว.” อายอซาพาด ปี วี ต็อห, “แม คูนดีคัม, แม แกวะ กาลาง โฆรห ปาย ตี.”

9 วาย อัน ตี คูนดีคัม อีซาเรลัะ ตึอน วี แดะ ดา อี อึบ ดา ซึก อู วี, ต็อห ดี อัน, “แม ฮาว แดะ อามีคายา อี มูห ฆอน อามีลัะ ตึอน, แตห อัน ตัห ครัน ครัน.”

10 ดอ อัน ตี คูนดีคัม อีซาเรลัะ บอ คูนดีคัม ยูดา ตึอน ฆาย บอ ชึบ ครึง คูนดีคัม บอ ตูต ดี กอย แดง มาลาง ราง เซ ราง อัน. เฆ กอย ปาย ตี กาซืร โดง ฆลัง บาง มาโลห มืง ซามารี ตึอน. แคะ กอย ดูอี บยาน โฆรห เฌาพรา ตึอน บอ กาลาง นา อาต ฆาย ตึอน. 11 อี มูห อาเฌเดกี ฆอน อาเคนานา ตึอน, อัน บอ โบง ดึห ฮีน บัต โบง แบน นึง อัน, บอ กาลาง โฆรห ต็อห, “เฌาพรา แฮะ กาลาง ต็อห, ‘แม คูนดีคัม ดี ดึห นึง บัต นี, บลูห เฆ ดูอี อาราม, แตห เฆ กอ ชึม โตต.’”

12 แคะ กอย เฆ ดอน อี ดูอี บยาน โฆรห เฌาพรา ตึอน, เฆ บอ กาโพรม ดี ต็อห, “แม คูนดีคัม, แตห แม แรน ซึก แม, ฮาว ดี มืง ราโมด แคง กาดาย มืง ฆีเลอาด, แตห แม แป เฆ. เฌาพรา ดี อาบ ดัว เฆ ดี แม.”

13 เฆ ดาลาม ปี จัร คูนดีคัม ฮาว แดะ อามีคายา ตึอน วี กาลาง ต็อห, “ดูอี อี บยาน โฆรห เฌาพรา เฆ นี เฆ กาลาง มี โฆรห หมึอม ดี คูนดีคัม. แม มืร วี โลว กาลาง โฆรห หมึอม แตห อึณ ปี ปี ต็อห เฆ.”

14 อามีคายา ยี ต็อห, “โอว ต็อห อาคัร ดี แม, โอว ดี กาลาง มี แคะ ปี ต็อห เฌาพรา.”

15 อัน บอ ฮาว ฌัม โดง กอย คูนดีคัม ตึอน, คูนดีคัม วี ต็อห ดี อัน, “อึย อามีคายา, เซ ดา ซึก เอ ฮาว ดี มืง ราโมด อี กอย แคง กาดาย มืง ฆีเลอาด ตึอน, อึณ แหนน ดี หมึอม อาว หมึอม?” อามีคายา ตึอน วี ต็อห, “แฮะ ปึอน ฮาว, แม ดี แป เฆ. เฌาพรา ดี ดัว เฆ ดี แม, แม คูนดีคัม ตาง.”

16 ปัน ตี คูนดีคัม วี ต็อห ดี อัน, “โอว แฮะ ดึอม แตห แม คัม กาดีก ซัดฌา ดี อาต เฌาพรา, แตห แม กาลาง โฆรห อี หมาน อาคาคัร ดี โอว. บอ ดอ ตี นี โอว ซี แตห แม กาลาง มี โฆรห เฌาพรา.”

17 อัน วี ต็อห. “โอว แฮะ ยึร เฆ ดูอี อีซาเรลัะ บอกาเฆลียด อี กอย ดี นอน ตี. เฆ แฮะ ลาย กาย็อห โตต, แฮะ แหนน มาบู อี ตู มึห ดา กาณา อี ยอด แมน เฆ.” เฌาพรา วี ต็อห, “เฆ ดูอี อี ตู มึห ดา กาณา นี, แตห เฆ วี เวณ ดี กาง ดอน อี.”

18 ปัน ตี คูนดีคัม อีซาเรลัะ วี กาลาง ดี คูนดีคัม อายอซาพาด ต็อห, “โอว แยะ แฮะ กาลาง ดี แม, อัน ตึอน, อัน ตู กาลาง โฆรห นา หมึอม ลอง โอว. อัน กาลาง มี นา ตู หมึอม.”

19 อามีคายา ตึอน วี ต็อห, “โกบ อึณ ปาย นี, แตห แม วี โทม โฆรห เฌาพรา. โอว แฮะ ดึอม ยึร เฌาพรา กอย แดง มาลาง อัน. อามู อามาด อัน เฆ แฮะ กอย บลาก อาฆัะ บอ บลาก อาอัห อัน เฌา ดอน บลาก. 20 เฌาพรา มืร ต็อห, ‘อาเซ อี ดี กาซูห คูนดีคัม อาฮับ, แตห อัน ฮาว กาโฆห ดี มืง ราโมด แคง กาดาย มืง ฆีเลอาด ตึอน, แตห อัน ยัม ดี ตี?’ เฆ อามู อามาด เฌาพรา ตึอน บอ ต็อห อู วี อู โมยว. 21 ปัน ตี อึณ มึห อู กาดัง ตัห ฌัม ดี อาต เฌาพรา, อัน ต็อห, ‘โอว อี ดี กาซูห อัน.’ 22 เฌาพรา วี ดีหมอด อัน ต็อห, ‘แม ดี โบง ปาย เหมา?’ อัน วี ต็อห, ‘โอว ดี จัร กานัม ซีมา กาโลว กาซูห เฆ ดูอี บยาน โฆรห เฌาพรา, แตห เฆ วี กาลาง มี โฆรห ตู หมาน.’ เฌาพรา วี ต็อห, ‘แตห แม ฮาว โบง ปาย ตี. ปี ดี โบง แม ฌึร ตี ดี ออง.’

23 โคว อัน ตี, เฌาพรา มืร แฮะ จัร กานัม ซีมา กาโลว, แตห อัน วี กาโลว เฆ ดูอี อี บยาน โฆรห เฌาพรา. เฌาพรา แฮะ ฮอต ซูงพยาด แตห แม ฌัม ดูก.”

24 แฮะ ฮอต, อึณ มึห อาเฌเดกี อี มูห ฆอน อาเคนานา ตึอน. อัน บอ ตัห กาตัด อามีคายา ตึอน, กาทัะ นา อัน ต็อห, “น็อห พึอม เฌาพรา ฮาว นา เหมา ดอ เลห อัน ดี โอว, วี ฮาว กาลาง ดี แม?”

25 อามีคายา ตึอน วี กาลาง ดี อัน ต็อห, “แม ดี นับ ลอง อัน ตี ซีแง ดี ฮาว เครียง แม แคง โฮง อีด อี กอย นา แคง ตึอน.”

26 ปัน ตี คูนดีคัม อีซาเรลัะ ตึอน วี กาลาง ต็อห, “แตห เบ เหมต อามีคายา ดัว ฮาว อัน โดง กอย อาโมน อี อึบ มืง นี บอ ดี อาโยวอาด อี มูห ฆอน คูนดีคัม. แตห เบ กาลาง ดี ดา กาณา ต็อห, 27 ‘คูนดีคัม แฮะ ดัม ต็อห, ดึห ดูอี วี นี คร็อง อัน แคง กาปึม, แตห อัน โฮม มี คามูน ฆาย อึม, แตห อัน ยึร ปี ปาย ดี ดูก, แตห กอ ฌัม ปัน ดี วี ตัห ดาคึย โอว.’”

28 อามีคายา ปี วี ต็อห, “เซ แม เฌา ฮี ปึอน ดี วี ตัห ดาคึย ตี, โฆรห แปะ แฮะ กาลาง โอว ตู มูห โฆรห เฌาพรา.” อัน แฮะ ฮอต กาลาง, อัน วี ต็อห, “อึย เบ ดูอี บอกาเฆลียด แตห เบ โทม โฆรห ตี.”

29 ปัน ตี คูนดีคัม อีซาเรลัะ ฆาย คูนดีคัม อายอซาพาด อี อึบ มืง ยูดา ตึอน, ฆาย บอ กาโพรม ดี แรน ซึก ฆาย, ฮาว ดี มืง ราโมด แคง กาดาย มืง ฆีเลอาด ตึอน.

30 คูนดีคัม อีซาเรลัะ กาลาง ดี คูนดีคัม อายอซาพาด. อัน ต็อห, “โอว ดี ตา ครึง กาปยาต, ฮาว กาโฆห ดี รันซู ตี. อี มูห แม, แตห แม ชึบ ครึง คูนดีคัม แม.” แฮะ ฮอต, คูนดีคัม อีซาเรลัะ บอ กาปลูะ ครึง อัน, บอ ฮาว กาโฆห ดี รันซู อู เฌณ.

31 คูนดีคัม อี อึบ มืง อาราม ยี กาลาง อูน ดี ดา โบว อัน โอย ฆึร ดี อา วี อี อึบ ดา ซึก อี ป็อะ ลักเลา เฆ ตึอน. อัน ต็อห, “อาว โลว กาโฆห ดี เฆ ดา ตาง บอ ดี เฆ ดา ซึก. เบ ยอด มี คูนดีคัม อีซาเรลัะ ตึอน.” 32 ปัน ตี ดา โบว ตาง อี อึบ ดา ซึก อี ป็อะ ลักเลา เฆ ตึอน, อัน วี ยึร อายอซาพาด ตึอน. อัน วี ต็อห, “อี ดอย แฮะ มูห คูนดีคัม อีซาเรลัะ อาคัร หมาน.” เฆ บอ วี กาโพรม ดี ตัห ต็อห ดี วี กาโฆห ดี อัน. อายอซาพาด ตึอน บอ กาดูห ดี ดัด ตาง. 33 ดอ อัน ตี เฆ ดา โบว อี อึบ ดา ซึก อี ป็อะ ลักเลา เฆ ตึอน, เฆ บอ วี นับ วี ยึร, อาว มูห คูนดีคัม อีซาเรลัะ. เฆ อาว ฮู วี กาโฆห ดี อัน. เฆ บอ วี วัห อัน.

34 อึณ ยี มึห ดูอี อู วี, อัน บอ ดึห อัะ อัน ลาม บัณ. บลา อัะ อัน บอ ฮาว ล็อะ ยัะ ซืร ดี โคบ ซีโตว ฮีน คูนดีคัม อีซาเรลัะ ตึอน. แฮะ ฮอต, คูนดีคัม อีซาเรลัะ ตึอน บอ ต็อห ดี ดีแบ อัน, “ดึห เลห โอว โดง กาโฆห นี. โอว แฮะ ยึร เซา กาเซา.” 35 ซีแง ตี, เฆ บอ แว กาโฆห กืน, เฆ กาบัณ หลึอม อาต ตี. คูนดีคัม ตึอน บอ กอย แคง ลักเลา, ฮาว กอย บลาก ดี อาต ดูอี อาราม เฆ ตึอน. หนาม อัน บอ เลห จอด แคง ลักเลา ตึอน. บอ ฌัม บา ดี อับ, พึอม อัน บอ โตต. 36 ซีแง บอ เฆต ตึอน, เฆ บอ ดัด กาลาง กาแต เฆ ตึอน ต็อห, “อึย เบ ดูอี ดอน อี, อาเซ มืร วี เวณ มืง โดง กอย อัน, อัน กอย มืง เหมา มืร, ฮาว มืง ตี.”

37 ปาย ตี คูนดีคัม มืร แฮะ ยัม. เฆ บอ ดึห ตัห อัน มืง ซามารี. เฆ บอ เบลห อัน แคง บาเรว แคง มืง ซามารี ตี. 38 เฆ บอ บาย ลักเลา ตึอน ดี อึม ดึง ปี โบง ดูอี อี กอย แคง มืง ซามารี ตึอน. อึณ มูห โดง ดี ตัห ตา ยา มาลัม ดี อึม. มาโซว บอ เลียะ หนาม คูนดีคัม ดี ตี. อึณ บอ หมาน แคะ ปี ดึอม ต็อห เฌาพรา ตึอน.

39 ลอง แปะ แฮะ โบง คูนดีคัม อาฮับ อี ซี ฆีด, อึณ แฮะ แดม อูน แคง บับ ลอง คูนดีคัม อี อึบ ดูอี อีซาเรลัะ. บอ โฮว ปี ซัม อัน, ปี แฮะ ปีด แปละ ซาง บอ แรง มืง เฆ ตึอน ปี ซัม อัน, แกวะ แตห รันซู ปึอน ดี ลึบ, อึณ แฮะ แดม อูน โตต แคง บับ ตี. 40 คูนดีคัม อาฮับ ตึอน แฮะ ฮอต ยัม โดบ ฆูณ ดา อัน เฆ ตึอน, อึณ มูห ฆอน อีมาย อัน อี จืร อาฮาฌียา, อัน บอ วี ปลูะ ฆูณ อัน.

41 อาฮับ แฮะ แบน คูนดีคัม แคง มืง อีซาเรลัะ อาดา พวน ซีนัม, 42 อายอซาพาด อี มูห ฆอน อาซา ตึอน บอ วี แบน คูนดีคัม แคง มืง ยูดา. ดอ แบน อัน คูนดีคัม, อาซาก อัน แฮะ โนะ โอย ฆึร ดี พัน ซีนัม. อัน กอย มืง เยรูซาแลม อาดา อา ฆึร ดี พัน ซีนัม. มา อัน จืร นาง เอจูพัะ. อัน มูห ฆอน อีบึณ อาซีลัะวี. 43 อัน ตึอน อัน ตู บลืง ปี ปาย อึณเตณ ฆูณ อัน อี จืร อาซา ตึอน. อัน โดบ โตต ดอน โมยว. อัน บอ โบง อี บอด อี หมึอม, แตห อึณ ล็อะ น็อห เฌาพรา. อัน ยี ตู ปยาต แวน โดง ปี กรึบ เฆ อารึบ แดง นอน ดอน โปละ. เฆ ดูอี ซี ปึอน ดี โดะ ปี หลู อี อูห หงูน บอ โดว ซัดดาวา ดอน โมยว ดี เฌา บาลัะ ตึอน. 44 อายอซาพาด ตึอน บอ แตห ดา ซึก จู กาโฆห, บอ แตห อึณ วี ลาย แบน อู ฆึก ดี คูนดีคัม อีซาเรลัะ ตึอน.

45 ลอง แปะ แฮะ โบง อายอซาพาด, ลอง แปะ แฮะ กาโฆห อัน ดี อี เฮา, แฮะ แดม อูน แคง บับ ลอง เฆ คูนดีคัม ดูอี อายูดา. 46 อึณ บอ มูห เฆ ดา มาลัม อี หลู โดว เฆ ดี อารึบ ตึอน, เฆ อี ซี ฆีด ซีณ ดอ มูห โจว ฆูณ อัน อี จืร อาซา ตึอน, อัน บอ ง็อห แวน โตต เฆ ตี แคง มืง อัน.

47 ดอ อัน ตี อาว ฮู มึห คูนดีคัม แคง มืง เอโดม ตึอน. อึณ มึห มี ดา ตาง อี อึบ กาดาง คูนดีคัม.

48 อายอซาพาด ตึอน บอ โบง รึร ซังโพว, แตห เฆ ปึอน ดี ฮาว ดึห ตัห ครีว ดี มืง โอพี. เฆ ยี ตู ปึอน ฮาว โกบ รึร ตึอน แฮะ กาปยาต ดี โดง จืร เอจาโยนกาบา.

49 ดอ อัน ตี อาฮาฌียา อี มูห ฆอน คูนดีคัม อาฮับ ตึอน อัน บอ หมาณ ดี อายอซาพาด. อัน ต็อห, “แตห ดูอี โอว เฆ นี ป็อะ รึร โดบ ดูอี แม เฌา.” อายอซาพาด ยี ตู แตห.

50 อายอซาพาด ตึอน บอ ยัม โดบ ฆูณ ดา อัน. เฆ บอ ดีบ อัน แคง มืง ดา ดา อัน อี จืร มืง อาดาวีด ตึอน. อาเยโฮวรัม อี มูห ฆอน อัน บอ วี ปลูะ อายอซาพาด.

51 อายอซาพาด แฮะ แบน คูนดีคัม อี อึบ มืง ยูดา อาดา ฆึร ดี บู ซีนัม. ดอ อัน ตี อาฮาฌียา อี มูห ฆอน อาฮับ ตึอน, อัน แฮะ วี แบน คูนดีคัม แคง มืง อีซาเรลัะ. อัน บอ อึบ มืง อีซาเรลัะ อาดา อา ซีนัม. 52 อาฮาฌียา ตึอน โบง อี ตู บอด อี ตู หมึอม ดี อาต เฌาพรา. อัน โดบ ปี ปาย อาฆยาง ฆูณ มา อัน. อัน โดบ บอ อาเยโรวโบว อี มูห ฆอน อาเนบัด, อี แยต ดูอี อีซาเรลัะ, แตห เฆ โบง หมาบ แบน โมยว แบน โมยว. 53 อาฮาฌียา วี โบง โฌง กรึบ เฌา บาลัะ, แตห เฌาพรา วี รู ดี อัน. อัน โดบ ปี ปาย ฆูณ อัน ดี โบง ตึอน.