1 วาย อัน ตี อึณ มึห อานาโบด อี กอย แคง มืง เยจาเรลัะ. อัน มึห มาน อางูน แคง มืง ตี. อึณ กอย โคบ แวง โฮว คูนดีคัม อาฮับ อี กอย มืง ซามารี ตึอน. 2 อู ซีแง คูนดีคัม อาฮับ กาลาง ดี อานาโบด ตึอน ต็อห, “ซี แม แตห มาน แม นี ดี โอว. โกบ อึณ กาตัด แวง โฮว โอว, โอว ซี โบง มาน เดา. โอว ดี วี แตห มาน อี บอด หลึอม นี ดัว ดี แม. เซ แม บอ ซี ปึอน รึอน, โอว ดี ดัว. แตห อึณ กาดาน แคะ ง็อห มาน แม ตี.”

3 อานาโบด วี ต็อห ดี คูนดีคัม อาฮับ, “อึย แม เฌา, แม แกวะ โบง แตห โอว กาดูห ดี กาโทะ โดง มูห คาฆูน ซีณ โจว ดา ดา โอว แปะ แฮะ ดัว เฌาพรา ดี เฆ. แกวะ แตห โอว วี ดัว ดี แม เฌา.”

4 คูนดีคัม อาฮับ บอ แบน น็อห กลึร, น็อห ดีแตด โกบ โฆรห ปี กาลาง อานาโบด ตึอน ต็อห, “โอว ตู คัม ดี แตห. อานี แฮะ มูห กาดาย ซีณ โจว ดา ดา โอว,” อัน บอ เวณ แคง โฮว อัน, ตัห ฌัม กาโช็ง อีด อัน บอ อีด, ตู โฮม มาเซ.

5 อีบึณ อัน อี มูห นาง เยจาเบน บอ ตัห ดีหมอด อัน ต็อห, “น็อห แม เฌา บอ ลึร โกบ มาเซ, แม ปี ฮู โฮม โบม ปี ฮู เดียง อึม.”

6 คูนดีคัม วี ต็อห, “โอว แฮะ ต็อห ดี อานาโบด อี กอย แคง มืง เยจาเรลัะ ตึอน, แตห อัน ย็อง มาน อางูน อัน ดัว ดี โอว. โอว แฮะ ต็อห, แม ซี ปึอน รึอน, โอว ดี แตห ง็อห อัน ดี แม. เซ แม ซี ปึอน มาน อางูน, โอว ดี เหรต ปอ อู โปละ ดัว ดี แม. อานาโบด ยี ต็อห, ‘โอว ตู แตห มาน อางูน ตี ดี แม เฌา.’ อึณ ปาย ตี น็อห โอว บอ ดีแตด กลึร กาเซา.”

7 อีบึณ อัน อี มูห นาง เยจาเบน วี ต็อห, “เซ แม เฌา มูห ดา กาณา อี อึบ มาน มืง ดูอี อีซาเรลัะ, แตห แม วี ยีต ปีดาคึย น็อห แม, วี โฮม โบม, เดียง อึม. โอว แดเจณ แม ดี ดึห มาน อางูน อานาโบด ตี, อาบ ดัว ดี แม เฌา.”

8 อีบึณ อัน ตึอน บอ ดึห จืร คูนดีคัม อาฮับ, แดม แปะ, ดอก ฌึม อัน, ตึย ฮาว ดี เฆ อี มูห ดา ตาง, บอ เฆ อามู อามาด อี กอย แคง มืง เยเรเอน ตึอน. 9 แคง แปะ ปี แดม ตี อึณ ต็อห, “แตห เบ กาลาง ดี ดอน อี อู ซีแง อี โลว ยืน ปี ดี โฮม. ดอ อัน ตี เบ โลว แตห อานาโบด กอย โดง กอย ดา ตาง อี ตาง หลึอม อี เฮา. 10 แตห เบ บอ ดึห ดูอี ตู หมึอม อา วี, แตห ฆาย กอย นา อาต อัน. แตห เบ บอ คาหนาบ ฆาย แตห ฆาย ต็อห ดี อานาโบด, ‘แม นี, แม แฮะ เอห แฮะ ดืง เฌาพรา บอ คูนดีคัม.’ ฆาย แฮะ ฮอต โบง ปาย ตี แตห เบ บอ ดึห เลห อานาโบด ตึอน, บอ ดึห มาว วึณ, แตห อัน ยัม.”

11 เฆ แฮะ ฮอต ตีห แปะ ตี, ดูอี อี กอย แคง มืง ตึอน, เฆ อี แบน ดา ตาง, อี มูห บอ อามู อามาด แคง มืง ตึอน, เฆ มืร โบง ปี จัร นาง เยจาเบน. 12 เฆ กาโพรม ดี แดะ ดี กาลาง โลว ยืน ปี ดี โฮม. ดอ กอย รึม เฆ, เฆ บอ แตห อานาโบด กอย โดง กอย ดา ตาง อี ตาง หลึอม ดูอี กืน ตึอน. 13 ดูอี อา วี บอ ตัห ตูต นา อาต อัน. อึณ มูห ดูอี ปี คาหนาบ เฆ ตึอน, แตห ฆาย แบน ซักเซ, กอย นา อาต อานาโบด ตึอน. ฆาย วี กาลาง ต็อห, “แม นี, แม แฮะ เอห แฮะ ดืง บอ เฌาพรา บอ คูนดีคัม.” แฮะ ฮอต, เฆ บอ ดึห เลห อัน นา เรต มืง, บอ ดึห มาว, วึณ แตห อัน กอ ยัม. 14 ปัน ตี เฆ ตึย อี กาลาง ดี นาง เยจาเบน ต็อห, “อานาโบด, เฆ แฮะ วึณ มาว. อัน แฮะ ฮอต ยัม.”

15 นาง เยจาเบน บอ ยึร ลอง อานาโบด แฮะ ฮอต ยัม ดี มาว ปี วึณ เฆ, อัน บอ วี กาลาง ดี อาฮับ ตึอน ต็อห, “แม โฮะ ดึห มาน อางูน อานาโบด, อี มูห ดูอี เยจาเรลัะ ตึอน. โกบ อัน ตู ซี ย็อง ดัว ดี แม เฌา, ดอ ตี นี อัน ฮู กอย, แฮะ ฮอต ยัม.” 16 อาฮับ ตึอน บอ ยึร ลอง อานาโบด แฮะ ฮอต ยัม, อัน บอ ฮาว โดง กอย มาน อานาโบด อี มูห ดูอี เยจาเรลัะ ตึอน, แตห อัน ปึอน ดี ดึห ดี อัน.

17 ปัน ตี เฌาพรา กาลาง โฆรห ดี อาเอลียา อี มูห ดูอี ทีซาบี ตึอน. อัน ต็อห, 18 “แตห แม ฮาว โดง กอย คูนดีคัม อาฮับ อี อึบ ดูอี อีซาเรลัะ, อี กอย แคง มืง ซามารี ตึอน. อัน กอย ดี มาน อางูน ปี พาด อัน ดี อานาโบด ตึอน. 19 แม กาลาง ดี อัน ต็อห, ‘เฌาพรา แฮะ ต็อห, แม แฮะ ง็อห ยัม อี, วี พาด บอ คาฆูน อี, แตห อึณ วี แบน โกรว แม.’ โคว, เฌาพรา ปี วี ต็อห, ‘มาโซว อี เลียะ หนาม อานาโบด อี โจห ดี ตี, เฆ ปี ดี วี เลียะ บอ หนาม แม ดี ตี.’”

20 ปัน ตี คูนดีคัม อาฮับ วี ต็อห ดี อาเอลียา, “แม รันซู โอว, แม โลว มาเซ ดี โอว?” อาเอลียา วี ต็อห, “แม แฮะ คัม ดี โบง นา ตู หมึอม ดี อาต เฌาพรา. โคว, อาย วี โลว ลาย กาตูณ.” 21 เฌาพรา ปี วี ต็อห ดี แม, “โอว ดี ดัม หมาบ ดี แม, แตห บอ หลูกหลาน แม ยัม โตต. บอ ดูอี อี แบน หมาย, บอ ดูอี อี ตู แบน หมาย, แคะ กอย อีมาย โมยว อาฮับ แคง มืง อีซาเรลัะ โอว ดี แวน โตต เฆ. 22 โอว ดี แตห แม บอ ปี โมยว อาเยโรวโบว, อี มูห ฆอน อาเนบัด, แตห แม ปี บอ โมยว อาบาซา อี มูห ฆอน อาฮียา ตึอน. แม แฮะ โบง หมาบ แตห โอว รู. แม มืร แฮะ โบง แตห บอ ดูอี อีซาเรลัะ โบง หมาบ โดบ แม. โกบ แปะ แฮะ โบง แม ตี, แม โลว คัม ฌึร ตี.”

23 เฌาพรา บอ ต็อห, “บอ นาง เยจาเบน, มาโซว ดี โฮม บอ ยัง อัน โคบ แรง มืง เยจาเรลัะ.”

24 ดูอี อาโมยว อาฮับ อี ยัม แคง มืง ตี, มาโซว ดี โฮม. เฆ อี ยัม นา เรต มืง, มาซีม อี กอย แคง เบลณ อี ดี โฮม.

25 อึณ ตู ดึอม มึห อาเซ อี ปี อาฮับ, อี คัม ดี โบง นา ตู หมึอม ดี อาต เฌาพรา. อึณ ยี มูห อีบึณ อัน นาง เยจาเบน, อัน แฮะ แยต อัน โบง ฌึร ตี. 26 อัน ตึอน บึง กรึบ อารึบ, ต็อห อึณ มูห เฌาพรา, โบง อี หมึอม กาอีห, แตห อึณ ปี ปี โบง ดูอี อาโมวรีด ปี ณอน เลห เฌาพรา แคง มืง เฆ ดอ ตัห ดูอี อีซาเรลัะ ตึอน.

27 คูนดีคัม อาฮับ ตึอน บอ ยึร โฆรห อาเอลียา ตี, อัน บอ กายาต ครึง ปี ตา อัน โกบ กลึร น็อห อัน, บอ วี ชึบ ดี ตา ครึง จาน. แฮะ ฮอต, อัน บอ ยืน ปี ดี โฮม, อีด แคง ครึง จาน อัน ตึอน. อัน บอ ฮาว นา เหมา มืร, ชึบ ครึง จาน อัน ตี, ปีเตียม น็อห อัน. 28 เฌาพรา วี ต็อห ดี อาเอลียา, อี มูห ดูอี ทีซาบี ตึอน, 29 “แม แฮะ ยึร ลอง อาฮับ, อัน ฮู ปีคึก อัน. อัน แฮะ เบลห โดว บรีม เตียม ดี อาต โอว. โกบ แฮะ ปีเตียม อัน โดว อัน ดี อาต โอว, โอว ตู ดัม หมาบ ตึอน ดี อัน ดอ มูห โจว อัน นี. โอว ดี วี แตห อึณ ฌัม โจว บาน ฆอน อัน.”