1 อาเบนฮาดาด อี มูห คูนดีคัม อี อึบ มืง อาราม ตึอน, อัน บอ แดะ ดา โบว อัน, แตห เฆ ตัห กาฌูะ. บอ ดา ตาง โอย ฆึร ดี อา วี บอ ดา ซึก อี ป็อะ อึณปร็อง บอ ดา ซึก อี ป็อะ ลักเลา, เฆ มืร โฮะ โรบ มืง ซามารี. เฆ ดี ตึก มืง ตี. 2 อัน บอ จัร ดาลาม อัน, แตห เฆ ลึบ ฮาว แคง มืง อาฮับ อี มูห คูนดีคัม อี อึบ ดูอี อีซาเรลัะ, แตห เฆ กาลาง ฮาว โฆรห ต็อห, 3 “รึอน แม เฆ ครีว แม ดี แบน โกรว โอว. บอ ฆอน แม, อีบึณ แม อี แฮะ ชีด หลึอม อี เฮา, เฆ ดี แบน โกรว โอว.”

4 คูนดีคัม อีซาเรลัะ วี ต็อห, “อึย แม เฌา, แม ดา โบว ตาง, แคะ ปี ต็อห แม เฌา ตี, แคะ ปี มึห โอว โกรวกราม, อึณ ดี แบน โกรว แม เฌา.”

5 ดาลาม เฆ ตึอน ปี วี ตัห ปอ อู เฌณ, ปี วี ต็อห, “อาเบนฮาดาด ดัม ฮาว โฆรห นี. อัน ต็อห, ‘รึอน แม เฆ ครีว แม, อีบึณ แม เฆ ฆอน แม, อาฌัะ ตี อึณ ปี แม แฮะ อาบ ดัว ดี โอว. 6 ปา แคหณา ฮี ฌัม อาคราว นี, โอว ดี แตห เฆ ดีแบ โอว ฮาว โดง กอย แม, แตห เฆ โครห แคง กาง แม บอ แคง กาง ดีแบ แม. แคะ ปี ยึร เฆ อี ล็อะ น็อห เฆ, เฆ ดี ดึห ฮาว โตต.’”

7 ปัน ตี คูนดีคัม อีซาเรลัะ ตึอน บอ แดะ ดูอี เรา ดูอี กาง, ดูอี กัด ดูอี แฆ, แตห เฆ บอกาเฆลียด ตัห กาฌูะ. อัน บอ กาลาง ดี เฆ ต็อห, “แตห เบ ยอด ลอง แปะ แฮะ โบง ดูอี วี นี, อัน ซี เหรต ดี กาลูต ดี โอว. ดอ แฮะ หมาณ อัน บอ อีบึณ เฆ ฆอน โอว, บอ รึอน เฆ ครีว โอว, โอว ตู ต็อห มาเซ, ตู แทณ อัน.”

8 อัน แฮะ ฮอต กาลาง โฆรห ตี, เฆ ดา ตาง ตึอน ดอน อี บอ กาโพรม ดี ต็อห ดี อัน, “แม คูนดีคัม อาว โลว โทม โฆรห อัน.”

9 โกบ อัน ตี, คูนดีคัม อาฮับ วี กาลาง ดี ดาลาม คูนดีคัม อาเบนฮาดาด เฆ ตึอน ต็อห, “เบ วี เวณ กาลาง ต็อห ดี คูนดีคัม เบ, ‘แคะ ปี ต็อห แม เฌา ดอ โฆว ตึอน, โอว แฮะ ซีเพา. มาแล, แคะ หมาณ แม ดอ ตี นี, โอว ตู ปึอน แตห แม โบง.’” ดาลาม เฆ ตึอน บอ วี เวณ กาลาง โฆรห ตึอน ดี คูนดีคัม เฆ.

10 ปัน ตี อาเบนฮาดาด ตึอน วี จัร เฆ ฮาว ปอ อู เฌณ, แตห เฆ วี กาลาง ดี คูนดีคัม อาฮับ ต็อห, “โอว ดี ดึห โตต โกรว แม. บอ กาดาย บอ กาปูห แคง มืง อีซาเรลัะ, อู วี อู กาเนียม โอว มืร ตู แตห อึณ ฆีด อาดา เฆ อี โดบ โอว. เซ โอว ตู โบง ปาย ตี แตห เฆ เฌา ปี กรึบ โอว ดัม หมาบ ดี โอว.”

11 คูนดีคัม แคง มืง อีซาเรลัะ วี ต็อห, “แตห เบ กาลาง ดี คูนดีคัม ต็อห, ‘ดอ ชึบ เบ ครึง ซึก, อาว โลว อืบ โดว บรีม เบ ปี เฆ ดา ซึก อี แฮะ วี บูต ครึง วาย แฮะ ออง เฆ.’”

12 คูนดีคัม อาเบนฮาดาด บอ ยึร โฆรห ตี ดอ ซีงยา โฮม เฆ โบม แคง ทึบ อัน. บอ อัน บอ เฆ อี อึบ มืง, เฆ กอย ดี ตี. อัน มืร วี กาลาง ดี ดูอี อัน ต็อห, “แรน ซึก เอ, อึณปราย โดว เบ.” เฆ ตึอน มืร อึณปราย โดว เฆ, แรน แบน โมยว แบน โมยว แตห เฆ ปึอน ดี ตึก มืง อีซาเรลัะ.

13 ดอ อัน ตี ดูอี บยาน โฆรห เฌาพรา อู วี บอ ตัห โดง กอย คูนดีคัม อาฮับ. อัน ต็อห, “เฌาพรา แฮะ กาลาง ต็อห ปาย นี, ‘แม แฮะ ยึร ดา ซึก กืน เฆ นี, โอว ดี แตห แม แป เฆ อาตึร นี. โอว ดี แตห แม นับ, โอว มูห เฌาพรา.’”

14 คูนดีคัม อาฮับ วี ต็อห, “อัน เฌา ดี แตห อาเซ โบง ฌึร ตี?” อัน วี ต็อห, “เฌาพรา ต็อห, ‘อึณ มูห ดา ซึก อี แยต อี เฮา, เฆ อี หณัม ตาง, เฆ ดี โบง ปาย ตี.’” คูนดีคัม ปี วี ดีหมอด อึณปัว ต็อห, “อาเซ ดี กาโฆห ดี อาต.” ดูอี บยาน โฆรห เฌาพรา ตึอน วี ต็อห, 15 “แม ดี กาโฆห ดี อาต.”

ปัน ตี คูนดีคัม อาฮับ บอ แดะ ดา ซึก อี แยต อี เฮา ตึอน. อึณ มึห อา มาย็อห ดี โอย ฆึร ดี อา วี. แฮะ ฮอต, อัน ปี วี แดะ แคะ กอย ดูอี อีซาเรลัะ. เฆ บอกาเฆลียด มึห บู แหรณ วี. 16 เฆ บอ กาโพรม ดี เลห ดอ กาแต ซีแง. อี มูห อาเบนฮาดาด เฆ ตึอน, เฆ ซี เดียง ป็อห กอย แคง ทึบ เฆ ดา ตาง อี จอย อัน, อี มูห โอย ฆึร ดี อา วี ตึอน. เฆ กอ ยึต กาเซา ป็อห. 17 ดา ซึก อีซาเรลัะ อี แยต เฆ ตึอน, เฆ บอ เลห ฮาว ดี อาต. อี มูห อาเบนฮาดาด ตึอน, อัน แฮะ จัร ดูอี อัน มัง อี ฮาว คยอง ดี ยอด. เฆ วี กาลาง ดี อาเบนฮาดาด ต็อห, “ดูอี แคง มืง ซามารี แฮะ ตัห.”

18 อัน วี ต็อห ดี เฆ, “เซ เฆ บอ ตัห ดาคึย, แตห เบ เหมต โดว อีม เฆ. เซ เฆ บอ ตัห ต็อห ดี กาโฆห, แตห เบ มืร เหมต โดว อีม เฆ.”

19 ปัน ตี ดา ซึก คูนดีคัม อาฮับ อี แยต ตึอน บอ ดา โบว ดา ซึก อี โดบ เฆ ตึอน, เฆ กาโพรม ดี เลห แคง มืง เฆ. เฆ วี กาโฆห ดี รันซู เฆ อู วี โดว อู วี. 20 ดูอี อาราม เฆ ตึอน บอ เตา. ดูอี อีซาเรลัะ บอ คูงครัห โดบ เฆ. อี มูห คูนดีคัม อาเบนฮาดาด บอ เฆ ดูอี อาราม บอ ดา ซึก อี ป็อะ อึณปร็อง เฆ ตึอน, เฆ บอ กาโดบ เตา, แตห เฆ ลอด. 21 คูนดีคัม อีซาเรลัะ บอ ตัห ปยาต แวน ดับ เฆ บอ มังปร็อง บอ ลักเลา เฆ. อัน บอ ง็อห ยัม กืน กาเซา เฆ.

22 แฮะ ฮอต, ดูอี บยาน โฆรห เฌาพรา ตึอน บอ วี ตัห โดง กอย คูนดีคัม อีซาเรลัะ. อัน ต็อห, “แม ฮาว อึณปราย โดว แม, แตห แม มึห แฮณ กามาย. แม โลว ซาดีก, เฌาพรา ดี วี โบง ปาย เหมา. ฮี ฌัม คราว ดียาง นา อาต นี, คูนดีคัม อาราม ดี วี ตัห กาโฆห ปอ อู เฌณ.”

23 ดอ อัน ตี เฆ ดีแบ คูนดีคัม อาราม ตึอน วี ตัห กาลาง ดี อัน ต็อห, “เฌาพรา เฆ ดูอี อีซาเรลัะ, อัน มูห เฌาพรา อี อึบ ดี นอน. โคว, แฮณ เฆ กืน หลึอม เอ. เอ วี ฮาว กาโฆห ดี เฆ โดง ฆลัง ปอ อู เฌณ. เซ เอ กาโฆห ปาย ตี เอ ดี มึห แฮณ กืน หลึอม เฆ อาคัร หมาน. หมาณ, แตห เอ โบง ปาย ตี. 24 หมาณ ดี บลัวะ โลง อายา ดา กาณา ดอน อี, วี ดาง ดา ซึก ปลูะ โดว เฆ, 25 วี แรน ดับ แตห อึณ กืน การัม อี แฮะ ชึม คา อาต. แตห อึณปร็อง กาดาง อึณปร็อง อี แฮะ ชึม, ลักเลา กาดาง ลักเลา. เอ กาโฆห ดี เฆ โดง ฆลัง คา นี. เอ ดี แฮณ หลึอม เฆ อาคัร หมาน.” อัน มืร โทม ปี ต็อห เฆ ตึอน. เฆ มืร ต็อห ดี โบง ปาย ตี.

26 วาย อัน ตี บอ โนะ อู ซีนัม, อาเบนฮาดาด ตึอน บอ แรน ดา ซึก อัน, ฮาว มืง อาแฟก, แตห เฆ ฮาว กาโฆห ดี เฆ ดูอี อีซาเรลัะ ตึอน. 27 เฆ ดา ซึก อีซาเรลัะ มืร แรน ดา ซึก เฆ บอ แรน จารีะ จาคัะ ปี ดี โฮม เฆ. ดา ซึก เฆ บอ ฮาว. ดูอี อีซาเรลัะ เฆ ตึอน ยี มึห เปรต บอ แหนน พึง มาแป อา พึง อี คยัะ นา อาต รันซู เฆ ตึอน. อี มูห ดูอี อาราม เฆ ตึอน, เฆ กืน แฮะ กอย ดอน โปละ.

28 ดอ อัน ตี ดูอี ปี ตึย เฌาพรา อู วี บอ ตัห กาลาง โฆรห ดี คูนดีคัม อาฮับ. อัน ต็อห, “เฌาพรา ต็อห, ‘เฆ ดูอี อาราม ต็อห, เฌาพรา เอ อัน มูห อี อึบ ดี นอน. อัน ตู มูห เฌาพรา อี อึบ โดง ฆลัง. โคว, โอว ดี แตห แม แป เฆ ดูอี กืน ตี, แตห แม นับ, โอว มูห เฌาพรา.’”

29 เฆ ดา ซึก มืร คยัะ แตห อึณ ลาย กาซืร. เฆ บอ กอย กอ โนะ บู ซีแง. แฮะ โนะ บู ซีแง ตึอน, เฆ บอ กาโฆห. ซีแง ตี ดูอี อีซาเรลัะ บอ ง็อห ยัม ดูอี อาราม ตึอน อู แซณ วี. 30 เฆ ดูอี อี ซี ฆีด ตึอน, เฆ บอ เตา ฮาว มืง อาแฟก ตึอน. ดอ ลึบ ฮาว เฆ แคง มืง ตึอน, แรง มืง บอ เกห ทีบ เฆ ดูอี อา หมึณ ดี บู แหรณ วี. อี มูห อาเบนฮาดาด ตึอน, อัน บอ เตา ฮาว แคง มืง, บอ ฮาว เครียง อัน แคง โฮง อีด อี กอย อี แคง.

31 ดีแบ อัน เฆ ตึอน วี ต็อห ดี อัน, “แม เฌา แฮะ ยึร ลอง คูนดีคัม ดูอี อีซาเรลัะ, อัน มูห คูนดีคัม อี มึห น็อห กาเว อี. แตห เย ดึห ครึง จาน ชึบ ดี ณอย เย, ดึห บอ วัน เกียน ดี ฆีณ เย. เซ เย วี ฮาว โดง กอย คูนดีคัม อาฮับ ตี, เย ทาง อัน ดี แคร อาซาก แม, แตห อึณ ดาคึย.”

32 เฆ บอ กาโพรม ดี ดึห ครึง จาน ชึบ ดี ณอย เฆ, บอ ดึห วัน เกียน ดี ฆีณ เฆ. บอ ฌัม โดง กอย คูนดีคัม อีซาเรลัะ, เฆ บอ กาลาง ต็อห ดี อัน, “อึย แม เฌา, แดเจณ แม อี มูห อาเบนฮาดาด ตึอน, อัน บอ ต็อห, ‘โอว ดองบาน แม เฌา, หมาณ แตห แม แตห โอว กอย ดาคึย ฆัด เยน ฆยามซา.’” ปัน ตี คูนดีคัม อีซาเรลัะ ตึอน วี ดีหมอด ต็อห, “อัน ซี อีม, อัน หณัม ยัม? เซ อึณ ปาย ตี อัน ดี ปี อูกัด อูวา โอว.”

33 เฆ ตึอน มืร ปีครัน ดี โทม โฆรห อัน. แตห เฆ นับ ซีคยา โฆรห อัน ดอน แด. เฆ มืร วี ต็อห, “อูกัด อูวา แม เฌา ตี, ซี อีม.” คูนดีคัม อาฮับ วี ดัม ต็อห, “แตห เบ ฮาว, แดะ ตัห อัน.” อาเบนฮาดาด ตึอน บอ ตัห ณืร โดง กอย อัน. อัน บอ แตห อาเบนฮาดาด ตึอน ลึบ ป็อะ ลักเลา รึม โดบ อัน.

34 อาเบนฮาดาด บอ กาลาง ต็อห, “มืง ปี พาด ฆูณ โอว ดี ฆูณ แม ตึอน มืร, โอว ดี วี ดัว วีว ดี แม. แม เฌา บอ ซี โบง อึณเตณ ปาย เหมา แคง มืง ดามาคู ตี, แฮะ ปึอน. แตห อึณ กอ ปี แปะ แฮะ ดึอม โบง อูน ฆูณ โอว แคง มืง ซามารี.” คูนดีคัม อาฮับ วี ต็อห, “โอว ดี โบง แตห อาย แบน อู ฆึก.” อัน บอ โบง แปะ แตห ฆาย ลาย กาแซณ. แฮะ ฮอต บอ เบลห อัน ฮาว.

35 อึณ ยี มึห ดีแบ ดูอี บยาน โฆรห เฌาพรา อู วี, อัน แฮะ ฮอต โทม โฆรห เฌาพรา. อัน ต็อห ดี ฆึก อัน, “หมาณ แม มัห โอว.” ฆึก อัน ตึอน วี ต็อห, “โอว ตู คัม ดี มัห แม.”

36 อัน วี ต็อห ดี ฆึก อัน ตึอน, “โกบ ตู โทม แม โฆรห เฌาพรา, แม ฮี กาย็อห ดี โอว ดี นี, มา มาครังซี ดี ก็อะ ยัม แม.” ปัน ตี อัน บอ ฮาว. มาครังซี บอ กาตูณ อัน, บอ ก็อะ ยัม อัน.

37 ดูอี บยาน โฆรห เฌาพรา ตึอน ปี วี กาตูณ ปอ อู วี. อัน ปี วี ต็อห, “แตห แม มัห โอว.” อี ตึอน บอ มัห อัน แตห อึณ กอ เซา กาเซา. 38 ดูอี บยาน โฆรห เฌาพรา ตึอน, บอ ฮาว ตูต กอย โคบ อึณเตณ, บัร คูนดีคัม, บอ ดึห กามัยะ กาโหมะ นา อัน. 39 ปัน ตี คูนดีคัม บอ ตัห ฮาว โดบ อึณเตณ ตึอน. อัน บอ กาลาง โฆรห ดี คูนดีคัม ต็อห, “โอว นี แฮะ ตัห กาโฆห.” ดอ อัน ตี ดา ซึก อู วี แฮะ ตัห, จัร โอว บัร ดูอี ปี เหมต เฆ. อัน แฮะ ต็อห, “โลว ซาดีก บัร ซีคยา. เซ อัน ฮี หราย บอ มูห โกบ มาเซ, อาซาก แม ดี ชึม. เซ อาว ปาย ตี มืร, แม ดี กาดูห ดี เยา รึอน บรีม อู ทาเลน.^a 40 ดอ อัน ตี โอว บอ มึห ฆาน ปี โลว ฮาว แบน โปละ แบน โปละ. ดูอี ตึอน บอ หราย.” อัน แฮะ ฮอต ต็อห ปาย ตี คูนดีคัม อาฮับ วี ต็อห ดี อัน, “แม โลว คัม หมาบ แม ปาย ตี.”

41 อัน ตึอน บอ ปีครัน ดี ดึห แวน กามัยะ ปี กาโหมะ อัน นา อัน ตึอน. ปัน ตี คูนดีคัม อีซาเรลัะ บอ นับ, อัน มูห ดูอี บยาน โฆรห เฌาพรา. 42 อัน วี กาลาง ดี คูนดีคัม ต็อห, “เฌาพรา ต็อห, ‘โกบ แฮะ เบลห แม ดูอี ปี ต็อห โอว, แตห อัน ลึร, แตห อัน ชึม, โกบ แตห แม วี ตี ลอด, อาซาก แม ดี ชึม. บอ ดูอี แม ดี ชึม โกบ ตู โบง แม แตห เฆ ดูอี โดบ อัน ชึม.’” 43 ปัน ตี คูนดีคัม อีซาเรลัะ บอ กลึร. น็อห อัน บอ ดีแตด. อัน บอ วี เวณ บอ ตัห ฌัม โดง กอย โฮว อัน แคง มืง ซามารี ตึอน.