1 คูนดีคัม อาฮับ บอ กาลาง ลอง แปะ แฮะ โบง อาเอลียา บอ ลอง แปะ แฮะ ง็อห แวน อัน ดูอี บยาน โฆรห เฌา บาลัะ ตึอน, 2 นาง เยจาเบน บอ จัร ดาลาม อัน อู วี ฮาว โดง กอย อาเอลียา, กาลาง ดี อัน ต็อห, “แคหณา อาคราว นี, เซ โอว ตู โบง แตห แม ยัม ปี ดูอี แปะ แฮะ ง็อห แวน แม ตึอน, โอว ดี แตห เฌา ดอน กาดัง ดัม หมาบ ดี โอว.”

3 ดอ อัน ตี อาเอลียา บอ โยว. อัน บอ เตา ฮาว ฌัม โดง จืร บีราเซบา แคง มืง ยูดา. อัน ต็อห, แตห อัน ลอด ยัม. อัน บอ อูน ดีแบ อัน ดี ตี. 4 อัน ยี ฮาว แคง แปร กาฮ็อห อาดา อู ซีแง. อัน บอ ฮาว ฌัม ครึม เฮ ราทาม, ตูต กอย ดี ตี, ซาคึร หมาณ ดี เฌาพรา ต็อห, “อึย แม เฌา, หมาณ แตห แม แตห โอว ยัม ดอ ตี นี. โอว แฮะ ปึร แบน ดูอี. แตห โอว ยัม. โอว มืร ตู หมึอม หลึอม เฆ ฆูณ ดัง โอว.” 5 แฮะ ฮอต ซาคึร ปาย ตี อัน บอ ปึอน ดี อีด ครึม เฮ ราทาม ตึอน.

ดอ อัน ตี อามู อามาด เฌาพรา บอ ตัห ดูห อัน. อัน ต็อห, “ยีต, โฮม ปี ดี โฮม แม.” 6 อาเอลียา วี บลาง งาย อัน, ยอด. อัน ยึร คามูน แฮะ ฮอต ตาด แดง เงา. บอ อึม อู กาเปา กอย นา แดง ฆีณ อัน. อัน บอ โฮม. แฮะ ฮอต, อัน ปี วี อีด.

7 อามู อามาด เฌาพรา ตึอน ปี วี ตัห ปอ อู เฌณ, ดูห อัน, กาลาง ดี อัน ต็อห, “อึณเตณ โดง โลว ฮาว แม, อึณ ซี โต็ง กาเซา. แตห แม ยีต โฮม ปอ อึณ ปัว.” 8 อัน บอ วี ยีต โฮม ปอ อู เฌณ. ปี ดี โฮม ตี, แตห อึณ แบน โปลม แบน แฮณ ดี อัน, แตห อัน ปึอน ดี ฮาว คราว อึณเตณ อาดา พวน ฆึร ซีแง ดี พวน ฆึร หมึร. อัน กอ ฌัม ดี นอน โฮวเรบ อี มูห นอน โดง กอย เฌาพรา. 9 อัน บอ ลึบ ฮาว แคง กาเดา มาว, กอย ดี ตี.

เฌาพรา วี ตัห ฌัม โดง กอย อัน, กาลาง โฆรห ดี อัน. เฌาพรา ต็อห, “อึย อาเอลียา, มาเซ ปี โบง แม ดี นี?”

10 อาเอลียา บอ วี ต็อห. “น็อห โอว แฮะ โฆยวฆยา ดี โบง แบน โมยว แบน โมยว, แตห เฆ ดูอี อีซาเรลัะ โดบ แม เฌาพรา. เฆ ยี แฮะ แวน ดารา แม เฌา. เฆ แฮะ ปยาต แวน บอ กาโช็ง หลู เฆ ดี แม เฌา. บอ ดูอี หลู ดี แม เฌา, เฆ แฮะ ง็อห แวน. อึณ ฆีด มี โอว อู วี. เฆ แฮะ เหรต บอ โอว แตห เฆ ปึอน ดี ง็อห.”

11 เฌาพรา วี ต็อห ดี อัน, “แตห แม เลห นา เรต กาเดา มาว, จ็อง กอย ดี อาต โอว. แม ดี ยึร โอว ดอ ว็อะ ฮาว โอว นา อาต แม.”

ปัน ตี อึณ บอ มึห คูน ตาง บูด. นอน ดาอาง มาว เฆ ตึอน บอ กาลาต แบน โบ็ง แบน โบ็ง อาต ตัห เฌาพรา. เฌาพรา ยี ตู กอย แคง คูน ตึอน. วาย คูน ตาง ตึอน ปี วี มึห มาอีม เยณ. เฌาพรา ยี ตู ตัห ดอ เยณ มาอีม ตี. 12 วาย มาอีม เยณ ตึอน, ปี วี มึห เงา. เฌาพรา ยี ตู กอย แคง เงา. วาย เงา ตี ปี วี มึห โฆรห พูพาบ อึณจูะ อึณจัม. 13 อาเอลียา บอ ยึร โฆรห ตี, อัน บอ ดึห ฮึบ, กาโหมะ ฆีณ อัน, เลห จ็อง บาง กาเดา มาว. ดอ อัน ตี อัน บอ ยึร โฆรห ตัห ต็อห ดี อัน, “มาเซ ปี โบง แม ดี นี?”

14 อัน มืร วี ต็อห, “โอว แฮะ โฆยวฆยา กาเซา ดี โบง แบน โมยว แบน โมยว, แตห ดูอี โดบ แม เฌาพรา. เฆ ดูอี อีซาเรลัะ, เฆ ยี แฮะ แวน ปี กาแซณ เฆ ดี แม เฌาพรา. เฆ แฮะ ปยาต แวน บอ กาโช็ง หลู ดี แม เฌา, แฮะ ง็อห แวน เฆ ดูอี หลู ดี แม เฌา. แฮะ ฆีด มี โอว อู วี. บอ โอว, เฆ แฮะ ซี ง็อห ยัม.”

15 เฌาพรา วี ต็อห ดี อัน, “แม ฮาว วี เวณ โดบ อึณเตณ นี, แตห แม ฌัม โดง แปร กาฮ็อห กาตัด มืง ดามาคู. แม ฮี ฮอต ฌัม, แม พ็อห นามัน ดี ฆีณ อาฮาเจลัะ, แตห อัน แบน คูนดีคัม อึบ มืง อาราม. 16 แม บอ พ็อห นามัน ดี ฆีณ อาเยฮู อี มูห ฆอน อานีมซี ตึอน, แตห อัน แบน คูนดีคัม อี อึบ ดูอี อีซาเรลัะ. แม บอ พ็อห นามัน ดี ฆีณ อาเอลีซา, อี มูห ฆอน อาซาพัด, อี กอย มืง อาเบลัะมาฮาลัะ ตึอน, แตห อัน แบน ดูอี บยาน โฆรห เฌาพรา กาดาง แม. 17 เฆ อี ลอด ยัม ดี มาปัวะ อาฮาเจลัะ ตึอน, อาเยฮู ดี ง็อห ยัม. เฆ อี ลอด ยัม ดี มาปัวะ อาเยฮู ตึอน, อาเอลีซา ดี วี ง็อห ยัม. 18 แคง ดูอี อีซาเรลัะ โอว ยี แตห อึณ ซี ฆีด บู แหรณ วี, เฆ ตู ดึอม ครึบเครา นา อาต เฌา บาลัะ บอ ตู ดึอม อูห อัน.”

19 เฌาพรา แฮะ ฮอต กาลาง โฆรห ดี อาเอลียา ตึอน, อัน บอ ยีต ดี ตี, ฮาว บอ กาตูณ อาเอลีซา อี มูห ฆอน อาซาพัด ตึอน. อาเอลีซา แฮะ ดึห มามัก, แท โดง นา อัน. อัน ฮาว โดบ มัก อี มูห ฆึร ดี อา ฆู ตึอน. อาเอลียา บอ ฮาว กาตัด อัน, บอ ดึห ฮึบ ดีพ็อะ ดี อัน. 20 อาเอลีซา บอ เบลห อูน มัก อัน, บอ ฮาว โดบ อาเอลียา ตึอน. อัน วี หมาณ ดี อาเอลียา ต็อห, “แตห โอว ปึอน ดี เวณ อูห ปูต ฆูณ มา โอว อู กาจัน. แฮะ ฮอต, โอว ดี บอ โดบ แม ซารา.”

อาเอลียา วี ต็อห ดี อาเอลีซา, “แตห แม เวณ. แม บอ วี ตัห, อาว ลืก.”

21 อัน บอ ยีต โดง กอย อาเอลียา, วี เวณ. อัน บอ เวณ, ง็อห มัก อัน อู ฆู, อัน บอ ดึห ครึง แท อัน เฆ ตึอน, โดะ แตห อัน ปึอน ดี ดัง ยัง มัก อัน ตึอน. อัน บอ เบลห เฆ ดอน อี โฮม. อัน แฮะ ฮอต โบง ปาย ตี อัน บอ โดบ อาเอลียา ตึอน, บอ แบน แดเจณ อัน.