1 วาย อัน ตี แฮะ ปวน ฮาว ราม เหลณ, เฌาพรา วี กาลาง โฆรห ดี อาเอลียา ตึอน. ดอ ดี โนะ โอย ซีนัม ตึอน อัน ต็อห, “แม ฮาว โดง กอย คูนดีคัม อาฮับ. โอว ดี วี แตห ฆลาย โจห แดง กาดาย นี.” 2 อาเอลียา บอ ฮาว โดง กอย คูนดีคัม อาฮับ ตึอน.

ดอ อัน ตี อึณ มึห ดูก ตาง แคง มืง ซามารี ตึอน. เฆ ดูอี เอต ปี ดี โฮม. โหงว เฆ เบล แบน โมยว แบน โมยว แฮะ ง็อห กาเซา. 3 คูนดีคัม อาฮับ บอ แดะ ดา อู วี, อัน จืร อาออบาดี. อัน มูห ดา อี อึบ โฮว คูนดีคัม ตึอน. อัน บอ มูห ดูอี อี กรึบ ซีคยา เฌาพรา. 4 นาง เยจาเบน ตึอน แฮะ ง็อห แวน ดูอี อี บยาน โฆรห เฌาพรา. ดอ อัน ตี อาโอบาดี บอ ดึห ดูอี อี บยาน โฆรห เฌาพรา อู มาย็อห วี, เครียง อูน เฆ แคง กาเดา มาว. อัน เครียง อู กาเดา พัน ฆึร วี. อัน บอ ดึห คามูน บอ อึม, เฮียง ลึมลา เฆ. 5 ปัน ตี คูนดีคัม อาฮับ ตึอน บอ กาลาง ดี อาออบาดี ต็อห, “แม ฮาว ดอน โปละ แลบ ดี ยอด แคง มืง นี. แม ฮาว ยอด โดง โตห อึม. แม โดบ ดีลัยะ ดอน โปละ. แม เหรต ดี ยอด เปต แตห มังปร็อง เฆ มาโลว ปึอน ดี โฮม, แกวะ แตห เอ กาดูห ดี ง็อห ยัม โดว ซัดดาวา เอ.” 6 อัน แฮะ ฮอต ต็อห ปาย ตี เฆ บอ ลาย กาย็อห, ฮาว อู วี อู บลาก, แตห อึณ กอ กาลัต ดอน โปละ แคง มืง บอ มืง. คูนดีคัม อาฮับ บอ ฮาว อู อึณเตณ, อาออบาดี บอ ฮาว ปอ อู อึณเตณ. อาเซ มืร บอ ฮาว, ราง อาเซ ราง อัน.

7 ดอ ฮาว อาออบาดี โดบ อึณเตณ ตึอน, อัน บอ กาตูณ อาเอลียา. อัน แฮะ นับ อึณ มูห อาเอลียา ตึอน, อัน บอ มูด ครึบเครา ดีหมอด อัน ต็อห, “อึย แม ดา ซารา, อึณ หมาน มูห แม ดา ซารา โอว, อี มูห อาเอลียา ตึอน?”

8 อาเอลียา วี ต็อห ดี อัน, “อึร, แฮะ มูห โอว. แม ฮาว กาลาง ดี ดา กาณา แม ต็อห, อาเอลียา กอย ดี นี.”

9 อาออบาดี วี ต็อห, “เหมา อึณ ปาย ปี จัร แม โอว โบง ฌึร ตี? โอว มึห หมาบ มาเซ, อี แตห แม อาบ โอว ดี คูนดีคัม อาฮับ? เหมา อึณ ปาย ปี ซี แตห แม อัน ปึอน ดี ง็อห โอว? 10 บอ เฌาพรา แฮะ นับ, โฆรห โอว แฮะ หมาน. อาว มึห คอ อู มืง, อาว มึห ดูอี อาโมยว เหมา โดง ตู จัร คูนดีคัม แดเจณ อัน ฮาว เหรต แม. เซ เฆ ฮี ต็อห, ‘อัน ตู กอย ดี ตี,’ เฆ ดี กาดูห ดี คัม กาดีก ซัดฌา โกบ ตู ยึร เฆ ดี แม. 11 ดอ ตี นี แม แฮะ ต็อห, ‘ฮาว กาลาง ดี ดา กาณา แม ต็อห, อาเอลียา กอย ดี นี.’ 12 ดอ ฮาว โอว ตี, โอว โยว น็อห พึอม เฌาพรา ปี กรึบ แม วี ดึห ฮาว แม ปอ อู โปละ โดง ตู นับ โอว. เซ โอว ฮี วี ฮาว โดง กอย คูนดีคัม, เซ อัน ตู ยึร แม, อัน ดี ง็อห ยัม โอว. โอว ยี แฮะ โรวเซ บอ กรึบ เฌาพรา ซีณ ดีแตด โอว. 13 แม มืร หณัม นับ ลอง แปะ แฮะ โบง โอว? ดอ ดึห นาง เยจาเบน ดูอี บยาน โฆรห เฌาพรา, ง็อห แวน เฆ, โอว ดึห ดูอี บยาน โฆรห เฌาพรา อู มาย็อห วี, เครียง อูน เฆ แคง กาเดา มาว, อู โปละ พัน ฆึร วี. โอว มืร แฮะ ดึห คามูน เฆ อึม, เฮียง ลึมลา เฆ. 14 ดอ ตี นี, แม จัร โอว ต็อห, ‘ฮาว กาลาง ดี ดา กาณา แม, อาเอลียา กอย ดี นี.’ เซ โอว โบง ปาย ตี อัน ดี ง็อห โอว.”

15 อาเอลียา ปี วี ต็อห, “บอ เฌาพรา ปี กรึบ โอว อี มูห เฌาพรา อี อึบ โตต ดอน โมยว, อัน แฮะ นับ, โอว กาลาง โฆรห หมาน. อาตึร นี โอว ดี ตัห ฌัม โดง กอย คูนดีคัม อาฮับ.”

16 อาเอลียา แฮะ ฮอต ต็อห ปาย ตี อาออบาดี ตึอน บอ ฮาว กาลาง ดี คูนดีคัม อาฮับ. คูนดีคัม บอ ฮาว ลาย กาตูณ ดี อาเอลียา. 17 คูนดีคัม อาฮับ บอ ต็อห ดี อัน, “แฮะ มูห แม, อี ปยาต ดูอี อีซาเรลัะ?”

18 อาเอลียา วี ต็อห, “โอว ตู มึห ดี ปยาต ดูอี อีซาเรลัะ. บอ แม บอ ดูอี แม, เบ แฮะ แวน ดารา ปี ดัม อูน เฌาพรา. เบ แฮะ วี โดบ กรึบ อารึบ เฌา บาลัะ, ต็อห อัน มูห เฌาพรา. อาตี อี ปยาต ดูอี อีซาเรลัะ. 19 โคว, ดอ ตี นี แตห แม แดะ ตัห เฆ ดูอี อีซาเรลัะ บอกาเฆลียด. บอ เฆ ดูอี อี บยาน โฆรห เฌา บาลัะ ตึอน, เฆ พวน มาย็อห ดี พัน ฆึร วี, บอ เฆ ดูอี อี บยาน โฆรห นาง กานัม เอซูรา พวน มาย็อห วี, บอ เฆ อี โฮม กาโดบ ดี กาโช็ง โฮม นาง เยจาเบน ตึอน, แตห เฆ ตัห กาฌูะ โตต แดง นอน ฆาเมลัะ ตึอน.”

20 อัน แฮะ ฮอต กาลาง ปาย ตี คูนดีคัม อาฮับ บอ จัร เฆ แดะ ดูอี อีซาเรลัะ บอ เฆ ดูอี อี บยาน โฆรห เฌา ปี กรึบ เฆ ตึอน ดอน อี, แตห เฆ ตัห กาฌูะ ดี นอน ฆาเมลัะ ตึอน. 21 บอ อาเอลียา ตัห โดง กอย เฆ แดง นอน ตึอน. อัน ต็อห ดี เฆ, “น็อห เบ หณึม อู กาแต, ตู หณึม อู กาแต. เบ ซี กอย เหลณ แคะ เหมา ดี กาแต อา โมยว ตี? เซ เฌาพรา มูห เฌาพรา คาคัร, แตห เบ บึง กรึบ มี เฌาพรา. เซ เฌา บาลัะ แฮะ มูห เฌาพรา, แตห เบ บึง กรึบ มี อัน.” แฮะ ฮอต โทม โฆรห ตี, ดูอี เฆ ตึอน ยี ตู ต็อห มาเซ.

22 ปัน ตี อาเอลียา วี ต็อห ดี เฆ, “ดูอี อี บยาน โฆรห เฌาพรา คาคัร, อึณ ฆีด มี โอว อู วี. ดูอี อี บยาน โฆรห เฌา บาลัะ ยี มึห พวน มาย็อห ดี พัน ฆึร วี. 23 แตห เบ ดึห ร็อห มัก อาโล็ง อา โดว อาดา เอ, แตห เอ หลู, แตห เงา กาซึม. แตห เบ ดึห อู โดว อาดา เฆ, แตห เฆ โบง กาแดบ แบน ปอด แบน ปอด, ดึห เบลห แดง เฮ. ยี ตู ปึอน ดึห เงา ปีด็อะ. โอว มืร ดี โบง ปาย ตี. มัก อาโล็ง อาดา อู โดว โอว ดี ดึห เบลห แดง เฮ, ยี ตู ดึห เงา ปีด็อะ. 24 ปัน ตี แตห เบ กาโพรม ดี แดะ เฌา ปี กรึบ เบ ตี. โอว มืร ดี แดะ อี มูห เฌาพรา ปี กรึบ โอว. เฌาพรา อี ดี แตห เงา ตัห โลง ดี ตี, อัน แฮะ มูห เฌาพรา อาคาคัร.” อาเอลียา แฮะ ฮอต ต็อห ปาย ตี, เฆ ดูอี ตึอน กาโพรม ดี ต็อห, “อึร, โฆรห อัน นี แฮะ มูห, แฮะ กยัะ, แฮะ หมาน.”

25 ปัน ตี อาเอลียา ต็อห ดี เฆ, “ดูอี อี หลู ดี เฌา บาลัะ ตึอน, โกบ เบ กืน, แตห เบ ร็อห มัก อู โดว อาดา เบ, แตห เบ แรน ดี อาต. อึณ ปาว ปีด็อะ เงา.”

26 ปัน ตี เฆ ตึอน มืร กาโพรม ดี โบง, แรน อึณปราย แตห อึณ ซีคยา. แฮะ ฮอต, เฆ มืร บอ แดะ เฌา บาลัะ. เฆ ต็อห, “จอย เย, จอย เย.” ยี ตู มึห โฆรห มาเซ, ยี ตู มึห อาเซ เวียะ โฆรห เฆ. เฆ ยี กาโพรม ดี ฆา โคบ โดง เบลห เฆ ปี ดี หลู เฆ ตึอน.

27 กอ ฌัม ซีแง กาแต, อาเอลียา ปี วาณาก ดี เฆ. อัน ต็อห, “เซ เบ กาโพรม ดี ดัด แฮณ แฮณ, ดัด ตาง ตาง, เฌาพรา เบ ตี แฮะ นัมโหลห เบ. เซ อาว ปาย ตี โยว อัน หณัม ดัน โทม. อาว ปาย ตี มืร, โยว อัน แปะ แฮะ ฮาว โดบ อึณเตณ โต็ง. อาว ปาย ตี, โยว อัน แปะ แฮะ อีด. โคว, อึณ โลว อู วี ฮาว บยีต อัน.” 28 ปัน ตี เฆ วี แว กาโพรม ดี ดัด ตาง. บอ ดึห อาตึม บอ ฮีน บัต กรีห ดี โดว เฆ. แตห อึณ โดบ ฮีด ทูงฆยาม เฆ. แตห หนาม เลห ดี โดว เฆ. 29 ซีแง แฮะ ฮอต กาแต มืร, อาว มึห อาเซ เวียะ โฆรห เฆ. เฆ วี กาโพรม ดี บัร ดี หลู กอ ฌัม บา ดี อับ มืร, อาว มึห อาเซ อี โทม โฆรห เฆ.

30 แฮะ ฮอต, อาเอลียา วี ต็อห ดี ดูอี เฆ ตึอน, “แตห เบ ตัห เครียะ โอว.” เฆ ดูอี เฆ ตึอน บอ ตัห เครียะ อัน. ดอ อัน ตี อัน บอ วี อึณปราย กาโช็ง หลู ดี เฌาพรา อี แฮะ ลึร ตึอน. 31 อาเอลียา บอ ดึห มาว ฆึร ดี อา โบ็ง. อัน ตีห โดบ ฆอน อาโกบ อี แฮะ ปึอน กาดีก ซัดฌา ดี เฌาพรา, อี มูห ดูอี อีซาเรลัะ. 32 อัน ดึห มาว เฆ ตึอน, แตห แบน กาโช็ง หลู ดี เฌาพรา. อัน ฆึห โรง โรบ, แตห อึณ ว็อห แคะ ปึอน ดี ฮับ โหงว อาดา อา คอน. อัน บอ ดึห เฮ, เบลห แตห อึณ ซีคยา. 33 อัน บอ กาแดบ มัก อาโล็ง ตึอน, แบน ปอด แบน ปอด, เบลห แดง เฮ ตึอน. อัน วี ต็อห, “ดึห กาโละ ตาง พวน โบ็ง, ฮัร อึม แตห อึณ โนะ. เบ ฮูห ดี ปี ดี หลู. บอ ดี เฮ ตี.”

34 เฆ แฮะ ฮอต โบง, อัน ปี วี ต็อห, “แตห เบ วี ฮูห ปอ อู เฌณ.” เฆ ปี วี ฮูห ปอ อู เฌณ. แฮะ ฮอต, อัน ปี วี ต็อห, “แตห เบ วี ฮูห ปอ อู เฌณ.” เฆ ปี วี ฮูห บอ โนะ โอย เฌณ. 35 อึม บอ แหล โรบ กาโช็ง หลู, แตห อึณ กอ โนะ แคง โรง ตึอน.

36 ดอ ฌัม คราว ดี หลู บา ดี อับ, อาเอลียา บอ ตัห กอย เครียะ. อัน บอ ซาคึร หมาณ ดี เฌาพรา, “อึย แม เฌา อี มูห เฌาพรา ปี กรึบ อาบราฮัม บอ อาแซก บอ อาอีซาเรลัะ.^a โอว หมาณ แตห เฆ ดอน อี นับ ลอง แม เฌา, แม มูห เฌาพรา อี อึบ เฆ ดูอี อีซาเรลัะ. บอ โอว แตห เฆ นับ, โอว มูห แดเจณ แม เฌา. แปะ แฮะ โบง โอว, โอว แฮะ โบง ดอน โมยว โกบ แฮะ จัร แม โอว โบง. โอว ฆาว ปวน แม เฌา โบง ปี หมาณ โอว อาตึร นี. 37 อึย แม เฌาพรา, โอว หมาณ แตห แม เฌา โทม โฆรห ปี ซาคึร โอว นี, แตห ดูอี เฆ นี นับ ลอง แม เฌา, แม มูห เฌาพรา. แม เฌา แตห เฆ กาปลูะ น็อห เฆ.”

38 อัน แฮะ ฮอต ซาคึร ปาย ตี เฌาพรา บอ แตห เงา โจห โลง กาซึม บอ ปี หลู อัน บอ เฮ. บอ มาว บอ กาดาย ดี ตึอน บอ อึม แคง โรง ตึอน, อึณ บอ ฮีด เฮณ โตต.

39 ดูอี เฆ ตึอน แฮะ ฮอต ยึร, เฆ บอ กาโพรม ดี ครึบเครา กรึบ ต็อห, “เฌาพรา นี แฮะ มูห เฌาพรา. เฌาพรา นี แฮะ มูห เฌาพรา คาคัร.”

40 อาเอลียา วี กาลาง ดี เฆ ต็อห, “แตห เบ เหมต ปา เฆ ดูอี อี หลู ดี เฌา บาลัะ ตี. คอ อู วี มืร, แกวะ แตห อึณ ลอด.” ปัน ตี เฆ อี กอย โคบ อาเอลียา วี กาโพรม ดี เหมต เฆ. อาเอลียา บอ ดึห ฮาว เฆ บาง แบลง อึม อี จืร กีโซน ตึอน บอ ง็อห ยัม โตต เฆ ดี ตี.

41 วาย อัน ตี อาเอลียา วี ต็อห ดี คูนดีคัม อาฮับ, “หมาณ, แตห แม เวณ โฮม ดี กาง แม, อึณ แฮะ มึห กานัม, อึณ ดี ฆลาย ตาง.” 42 คูนดีคัม อาฮับ ตึอน บอ เวณ ดี กาง อัน. อาเอลียา บอ วี โฮะ ดี นอน ฆาเมลัะ, อัน บอ ซาคึร บอ มูด ฆึบ แดง กาดาย, แตห นา อัน จู ดี ฆีณโกร็ง อัน. อัน วี ต็อห ดี หมาย อัน. “แม โฮะ ยอด, นา กอย อึม นัมมูกซารา ดอย.”

43 หมาย อัน ตึอน มืร โฮะ ยอด. อัน วี ตัห ต็อห, “อาว ปึอน ยึร มาเซ.” อาเอลียา ปี วี ต็อห ปอ บู เฌณ, “แม ฮาว ยอด ปอ อู เฌณ.” หมาย ตึอน บอ ฮาว แฮะ โนะ บู เฌณ ตึอน, 44 อัน บอ ยึร กามึก ฆลาย ดีแตด ม็อก แคะ กาบา แด ดูอี, อึณ บอ โฮะ นา กอย อึม นัมมูกซารา. อาเอลียา วี กาลาง ดี อัน ต็อห, “แตห แม เวณ กาลาง ดี คูนดีคัม อาฮับ, แตห อัน อึณปราย ลักเลา อัน, แตห อัน ฮาว อาต โจห ฆลาย, แกวะ แตห อัน ดัน อัม ณัะ.”

45 กอย อู กาจัน อึณ บอ มึห อึณอูะ ว็อง แคง ฆางหราว. บอ คูน บอ ฆลาย บอ โจห ตาง กาเซา. คูนดีคัม อาฮับ มืร บอ ป็อะ ลักเลา อัน, เวณ มืง เยจาเรลัะ. 46 ปัน ตี เฌาพรา ดัว ปวน อัน ดี อาเอลียา. อัน บอ ดึห ซีโตว อัน, เชียบ ดี แซะ อัน, แตห อัน ปึอน ดี กาแบลบ แยต นา อาต อาฮับ ตึอน, แตห อัน ตัห ฌัม บาง มาโลห มืง เยจาเรลัะ ตึอน.