1 อึณ มึห ดูอี อู วี อัน ตัห มืง ทีซาบี อี กอย แคง กาดาย มืง ฆีเลอาด อี จืร อาเอลียา. อัน กาลาง โฆรห ดี คูนดีคัม อาฮับ ต็อห, “เฌาพรา อี อีม เซเซ ปี กรึบ เอ ดูอี อีซาเรลัะ, อัน บอ มูห เฌาพรา อี จัร โอว. โคว, เซ โอว ตู ต็อห แตห ฆลาย โจห นัม นี, ฆลาย มืร ตู โจห. อึม ดีงาน มืร ตู โจห.”

2 วาย อัน ตี เฌาพรา วี กาลาง ดี อาเอลียา ตึอน. 3 อัน ต็อห, “แตห แม เลห โดง กอย แม นี, แตห แม ฮาว นา เลห ซีแง. แม ฮาว เครียง แม โคบ ดีลัยะ อึม เครีด, อี มูห ตัะ แบลง ยอดาน ตึอน. 4 แม โลว เดียง อึม ดี แบลง ตี. โอว มืร แฮะ จัร มากาอัะ แตห เฆ ดึห ตัห ตึย ปี ดี โฮม ดี แม ดี ตี.”

5 อัน บอ ฮาว โบง โดบ ปี ต็อห เฌาพรา ตี. ปัน ตี อัน บอ ฮาว กอย โคบ ดีลัยะ อึม เครีด อี กอย นา ตัะ แบลง อึม ยอดาน ตึอน. 6 อึณ บอ มึห มากาอัะ, เฆ ดึห ตัห คามูน บอ ยัง ซีณวัห อู เฌณ บอ บา ดี อับ อู เฌณ. อี มูห อึม, อัน บอ เดียง ดี แบลง ตึอน.

7 วาย ตี โกบ ฆลาย ตู โจห ดี มืง ตี, อึม แคง แบลง ตี บอ ฮีด โตต. 8 ดอ อัน ตี น็อห พึอม เฌาพรา ปี วี ตัห กาลาง ดี อาเอลียา ต็อห, 9 “แตห แม ยีต ฮาว ดี มืง จาเรพัด อี มูห แคง กาดาย มืง ซีโดน ตึอน. แตห แม ฮาว กอย ดี ตี. โอว แฮะ จัร ยา ซีปรัห อู วี อี กอย แคง มืง ตี, แตห อัน ลึมลา แม.” 10 อัน บอ ฮาว ดี มืง จาเรพัด ตี. ดอ ฮาว ฌัม อัน บาง มาโลห มืง ตี, อึณ มึห ยา ซีปรัห อู วี อี ดึห เฮ กาฮ็อห อี กอย ดี ตี. อัน บอ แดะ ยา ซีปรัห ตี ต็อห, “ดึห กาเปา อึม แม, แตห โอว เดียง คอ อี แจก.” 11 ดอ ต็อห ยา ซีปรัห ดี ฮาว ดึห อึม ตี อัน ปี วี แดะ ปอ อู เฌณ, วี ต็อห, “แตห แม ดึห บอ คามูน คอ อี แจก ตัห.”

12 ปัน ตี ยา ซีปรัห วี ต็อห ดี อัน, “เฌาพรา แฮะ นับ, โอว ตู กาโลว. โอว ตู มึห คามูน มาเซ, มึห มี กาแปะ ซี กอย แคง กาโละ. บอ นามัน ซี กอย แคง กาเปา อี แจก. โอว ดี ดึห เวณ เฮ คอ อี แจก, แตห โอว โบง คามูน กานาย ยาย ฆอน โอว. ยาย ฮี ฮอต โฮม, ยาย ดี ยัม.”

13 อาเอลียา วี ต็อห, “แกวะ แตห น็อห แม แหม. ฮาว โบง โดบ ปี ต็อห โอว ดี แม ตี. แตห แม โบง คามูน ดีแตด อาดา โอว ดี อาต, แตห แม บอ ดึห ตัห. วาย ตี แม บอ วี โบง อาดา บาย ฆอน แม. 14 เฌาพรา ปี กรึบ ดูอี อีซาเรลัะ อัน แฮะ ต็อห, “กาแปะ คามูน อี กอย แคง กาโละ ตึอน, อัน ตู นับ ดี โตต. บอ นามัน อี กอย แคง กาเปา ตึอน อึณ ตู นับ ดี โยม ดอ เหมา, แตห อึณ กอ ฌัม ซีแง ดี แตห เฌาพรา ฆลาย โจห.”

15 อาเอลียา แฮะ ฮอต ต็อห ปาย ตี ยา ซีปรัห ตึอน บอ ฮาว โบง ปี ต็อห อาเอลียา ตึอน. บอ อาเอลียา บอ อึณโฮม ยา ซีปรัห ตึอน บอ ปึอน ดี โฮม เหลณ กาแปะ คามูน อี กอย แคง กาโละ ตึอน, อาว ฮู นับ ดี โตต. 16 บอ นามัน อี กอย แคง กาเปา ตึอน, อาว นับ ดี โยม. แฮะ หมาน แคะ ปี ต็อห เฌาพรา ดี อาเอลียา ตึอน.

17 วาย ตี ฆอน อีมาย แคง กาง ตึอน วี มึห เซา. เซา อัน แฮะ ราม กาเซา, กอ รีน ดี ยัม. 18 มา อัน บอ ดีหมอด อาเอลียา ตึอน ต็อห, “อึย แม ดา อี ปี ตึย เฌาพรา, โอว อาว ฮู นับ ปี บอ มูห. โกบ ตัห แม โดง กอย โอว, แม แฮะ แตห โอว โหลห หมาบ โอว. โยว อึณ มูห โกบ แม, ฆอน โอว ปี ซอ รีน ดี ยัม.” 19 อาเอลียา วี ต็อห ดี มา อัน ตึอน, “ดึห ตัห ฆอน แม ตี ดี โอว.” อัน บอ โจะ ฆอน ตึอน แดง บึม มา อัน, วี โฮะ โดง อีด อัน คร็อง แดง ตึอน. อัน บอ เบลห แดง กาโช็ง อีด อัน. 20 ปัน ตี อาเอลียา บอ ซาคึร เฌาพรา ต็อห, “อึย แม เฌา, แม มูห เฌาพรา ปี กรึบ โอว. แม เฌา แฮะ โบง แตห อึณ แบน ดูก ดี กาง ยา ซีปรัห โดง ตัห บึง โอว นี. แม แฮะ แตห ฆอน อีมาย อัน ยัม.” 21 ปัน ตี อัน บอ อีด กาตับ แดง โดว ฆอน อีมาย ตึอน โอย เฌณ. อัน ปี วี หมาณ ดี เฌาพรา วี ต็อห, “อึย เฌาพรา, แม มูห เฌาพรา ปี กรึบ โอว. โอว หมาณ, แตห น็อห พึอม ฆอน อีมาย นี วี ตัห ลึบ แคง โดว อัน.”

22 ปัน ตี เฌาพรา บอ ยึร โฆรห อาเอลียา ตึอน บอ แตห น็อห พึอม ฆอน อีมาย ตึอน วี ลึบ แคง โดว อัน. อาซาก อัน วี อีม ปี บรีม. 23 อาเอลียา บอ ดึห ฆอน อีมาย ตึอน ดี โดง อีด อัน คร็อง แดง, โลง คร็อง ครึม, วี อาบ ดี มา อัน. อัน ต็อห ดี มา อัน, “แตห แม ยอด, ฆอน แม แฮะ วี อีม.”

24 ปาย ตี มา ฆอน ตึอน วี ต็อห, “ดอ ตี นี โอว แฮะ นับ, แม มูห ดา อี ปี ตึย เฌาพรา. บอ โฆรห เฌาพรา อี เลห แคง โมต แม ตี แฮะ หมาน อาคาคัร.”