เฌาพรา วี กาลาง ดี อาเยฮู อี มูห ฆอน อาฮานานี, กาลาง ลอง หมาบ อาบาซา ตึอน. อัน ต็อห, 2 “อึณ ปี โอว แฮะ ดึห เลห แม แคง กาปูห. โอว แฮะ วี แตห แม แบน คูนดีคัม, วี อึบ ดูอี อีซาเรลัะ. แม ยี วี โบง โดบ ปี โบง อาเยโรวโบว ตึอน, แตห บอ เฆ ดูอี อีซาเรลัะ อี มูห ดูอี ปี อึบ โอว วี โบง หมาบ. แม แฮะ โบง แตห โอว รู กาเซา โกบ หมาบ เฆ ตี. 3 โคว, โอว ดี แวน อาบาซา บอ หลูกหลาน อัน, แตห อึณ ปี หลูกหลาน อาเยโรวโบว ตึอน. 4 หลูกหลาน อาบาซา ตึอน, อาเซ บอ ยัม แคง มืง, มาโซว ดี ตัห โฮม. อาเซ บอ ยัม นา เรต มืง, มาซีม ดี ตัห โฮม.” แคะ ตี อาเยฮู โลว ต็อห ดี อาบาซา.

5 ลอง ปี โบง อาบาซา อี หณัม ดึอม กาลาง, ลอง แปะ แฮะ โบง อัน บอ ลอง อาพูง ดังโคว อัน, อึณ แฮะ แดม อูน แคง บับ คูนดีคัม อีซาเรลัะ. 6 อาบาซา บอ ยัม โดบ ดา ดา อัน. เฆ บอ ดีบ อัน แคง มืง ดีราจา. ฆอน อีมาย อัน อี จืร อาเอลาฮา บอ วี ปลูะ อัน, แบน คูนดีคัม.

7 แดง ตี เฌาพรา แฮะ กาลาง โฆรห ดี อาเยฮู อี มูห ฆอน อาฮานานี, กาลาง ลอง หมาบ แปะ แฮะ โบง อาบาซา บอ ดูอี อัน. โกบ หมาบ แปะ แฮะ โบง อัน ตี, อึณ แฮะ แตห เฌาพรา รู ดี อัน. อัน แฮะ โบง ปี อาเยโรวโบว ตึอน. โกบ แปะ แฮะ โบง อัน ตี, เฌาพรา แฮะ แวน โตต อาโมยว อัน.

8 ดอ มูห อาซา คูนดีคัม อี อึบ มืง ยูดา อาดา อา ฆึร ดี เดา ซีนัม, อาเอลาฮา อี มูห ฆอน อาบาซา ตึอน วี แบน คูนดีคัม แคง มืง อีซาเรลัะ, กอย ดี มืง ดีราจา. อัน บอ อึบ มืง ตี อาดา โอย ซีนัม.

9 อึณ ยี มูห อามู อามาด อัน, อี อึบ ลักเลา อัน อู กาแต ตึอน, อัน จืร อาฌีมารี. อัน วี คราม ดี ง็อห อาเอลาฮา. ดอ อัน ตี อาเอลาฮา กอย แคง มืง ดีราจา, เดียง ป็อห แคง กาง อาจา อี มูห ดา อี อึบ โฮว อัน. 10 อาฌีมารี บอ ตัห ง็อห ยัม อัน ดี ตี. อาฌีมารี แฮะ ฮอต ง็อห ยัม อาเอลาฮา, อัน วี แบน คูนดีคัม. ดอ อัน ตี คูนดีคัม อาซา แฮะ อึบ มืง ยูดา อาดา อา ฆึร ดี บู ซีนัม.

11 ดอ แบน อาฌีมารี คูนดีคัม, กอย แดง มาลาง ตึอน, อู เฌณ อัน บอ ง็อห ดูอี อาบาซา บอกาเฆลียด, แตห เฆ ยัม. อีมาย อู วี มืร อัน ตู อูน. บอ วอแว อาบาซา บอ ฆึก อาบาซา อาว ต็อห, อัน ง็อห แวน โตต. 12 ปาย ตี อาฌีมารี บอ ง็อห ยัม ดูอี อาโมยว อาบาซา บอกาเฆลียด, แตห อึณ แบน ปี ดึอม กาลาง เฌาพรา ลอง หมาบ อาบาซา ดี อาเยฮู อี มูห ดูอี บยาน โฆรห เฌาพรา. 13 หมาบ อาบาซา บอ หมาบ ฆอน อัน อี จืร อาเอลาฮา ตึอน, อึณ วี แตห บอ เฆ ดูอี อีซาเรลัะ โบง หมาบ โดบ. โคว, เฌาพรา อี อึบ ดูอี อีซาเรลัะ, อัน แฮะ วี รู ดี เฆ โกบ กรึบ เฆ อารึบ ราง อี ตู มึห ดีโคว มาเซ.

14 ลอง ปี โบง อาเอลาฮา อี หณัม ดึอม กาลาง, ลอง แปะ แฮะ โบง อัน โตต ดอน โมยว, อึณ แฮะ แดม อูน แคง บับ คูนดีคัม อีซาเรลัะ.

15 อาซา แฮะ แบน คูนดีคัม แคง มืง ยูดา อาดา อา ฆึร ดี บู ซีนัม, อาฌีมารี วี แบน คูนดีคัม แคง มืง อีซาเรลัะ, กอย แคง มืง ดีราจา. อัน บอ วี อึบ บึง อาดา บู ซีแง. ดอ อัน ตี เฆ ดา ซึก บอกาเฆลียด แฮะ คยัะ ดี มืง ฆีเบโซน โดง กอย ดูอี พีลีที. 16 ดา ซึก แฮะ ฮอต คยัะ โดง ตึอน, ดอ ยึร เฆ ลอง อาฌีมารี แฮะ ง็อห คูนดีคัม เฆ, อู เฌณ เฆ บอ กาโพรม ดี โจะ ดา โบว อี อึบ เฆ, อี จืร อาโอวมารี, แตห อัน แบน คูนดีคัม อี อึย ดูอี อีซาเรลัะ.

17 อาโอวมารี ตึอน บอ เฆ ดา ซึก ดูอี อีซาเรลัะ อี กอย โดบ อัน, เฆ บอ เลห ดี มืง ฆีเบโซน, วี โฮะ โรบ มืง ดีราจา ตึอน. 18 อาฌีมารี บอ นับ, เฆ แฮะ ฮอต ปึอน มืง ตี, อัน บอ ลึบ ฮาว แคง โฮว อัน. อัน บอ ดึห เงา โดะ โดว อัน, แตห อัน บอ ยัม แคง เงา ตี.

19 อึณ แบน ปาย ตี โกบ หมาบ ปี โบง อัน, ปี ตู อึง เฌาพรา, โกบ ณึง อัน ปี โบง อาเยโรวโบว ตึอน, บอ โกบ หมาบ แปะ แฮะ โบง ดูอี อีซาเรลัะ โดบ อาเยโรวโบว.

20 ลอง ปี โบง อาฌีมารี อี หณัม ดึอม กาลาง บอ ลอง แฮะ แวน อัน อาเอลาฮา ตึอน, อึณ แฮะ แดม อูน แคง บับ คูนดีคัม อีซาเรลัะ.

21 วาย อัน ตี ดูอี อีซาเรลัะ บอ แบน อา พึง. อู กาแต โดบ อาตีบานี อี มูห ฆอน อากีนาด, ซี แตห อัน แบน คูนดีคัม. ปอ อู กาแต โดบ อาโอวมารี. 22 เฆ อี โดบ อาโอวมารี ตึอน บอ แป เฆ อี โดบ อาตีบานี อี มูห ฆอน อากีนาด ตึอน. โคว, อาตีบานี บอ ยัม. อาโอวมารี บอ วี แบน คูนดีคัม.

23 ดอ แฮะ แบน อาซา คูนดีคัม แคง มืง ยูดา อาดา โอย ฆึร ดี อู ซีนัม, อาโอวมารี บอ วี แบน คูนดีคัม อี อึบ มืง อีซาเรลัะ. อัน อึบ บึง มืง อาดา ฆึร ดี อา ซีนัม. อาดา เดา ซีนัม อัน กอย แคง มืง ดีราจา. 24 อัน บอ ดึห รึอน อา ทาเลน บอ จึห นอน ซามารี ดี อาซามารา อี มูห กาณา กาดาย ตี.^a อัน บอ แด มืง แดง นอน ตี บอ แตห มืง ตี จืร มืง ซามารี, แตห อึณ โดบ จืร ดา กาณา นอน ตี.

25 อาโอวมารี วี โบง หมาบ ปี ตู อึง เฌาพรา, วี โบง นา ตู หมึอม หลึอม เฆ อี กอย ดี อาต อัน. 26 อัน วี โบง โดบ ปี โบง อาเยโรวโบว อี มูห ฆอน อาเนบัด ตึอน. หมาบ ปี โบง อัน ตี, อัน วี แตห บอ เฆ ดูอี อีซาเรลัะ โดบ, วี แตห เฌาพรา อี อึบ ดูอี อีซาเรลัะ วี รู ดี เฆ. โคว, เฆ แฮะ โบง อารึบ อี ตู มึห ดีโคว, วี ต็อห อึณ มูห เฌาพรา.

27 ลอง ปี โบง อาโอวมารี อี หณัม ดึอม กาลาง บอ ลอง อาพูง ดังโคว อัน, อึณ แฮะ แดม อูน แคง บับ คูนดีคัม อีซาเรลัะ. 28 อาโอวมารี ตึอน บอ ยัม โดบ ดา ดา อัน. เฆ บอ ดีบ อัน แคง มืง ซามารี. ฆอน อีมาย อัน อี จืร อาฮับ บอ วี ปลูะ อัน, วี แบน คูนดีคัม.

29 ดอ แฮะ แบน อาซา คูนดีคัม อี อึบ มืง ยูดา อาดา โอย ฆึร ดี ดา ซีนัม, อาฮับ อี มูห ฆอน อาโอวมารี ตึอน บอ วี แบน คูนดีคัม บอ อึบ มืง อีซาเรลัะ. อาฮับ อี มูห ฆอน อาโอวมารี ตี, อัน บอ วี อึบ มืง อีซาเรลัะ, กอย แคง มืง ซามารี อาดา อา ฆึร ดี อา ซีนัม. 30 อัน วี แว โบง หมาบ ปี ตู อึง เฌาพรา หลึอม เฆ อี กอย ดี อาต อัน ตึอน. 31 หมาบ ปี โบง อัน, อึณ ปี แปะ แฮะ โบง อาเยโรวโบว อี มูห ฆอน อาเนบัด ตึอน. อาว วัน แคะ ตี. อัน วี คัด ดึห นาง เยจาเบน อี มูห ฆอน อาฮีเอน อี อึบ มืง ซีโดน ตึอน. อีบึณ อัน ตี วี ลึมลา วี กรึบ เฌา บาลัะ. 32 อาฮับ บอ ซัม โฮว ดี กรึบ เฌา บาลัะ แคง มืง ซามารี, บอ โบง กาโช็ง หลู, เบลห อูน แคง โฮว ตี. 33 อัน บอ โบง กันทอน ดี กรึบ นาง กานัม เอซูรา. อัน วี แว โบง, แตห เฌาพรา อี อึบ ดูอี อีซาเรลัะ รู ดี อัน. อัน วี โบง หลึอม เฆ อี แบน คูนดีคัม ดี อาต อัน ตึอน.

34 ดอ มูห โจว บาน อัน ตี, อาฮีเอน อี กอย แคง มืง เบดาเอน, อัน วี อึณปราย มืง เยรีโคว. ดอ โบง อัน แรง มืง ตึอน, อัน ชึม ฆอน อีมาย อี มูห ฆอน ฆีณ อัน, อี จืร อาพีรัม. ฆอน ตี บอ ยัม. ดอ โบง อัน มาโลห มืง, ฆอน เตียะ อัน อี จืร อาเซโกบ บอ ยัม. อึณ ปี แปะ แฮะ ดึอม กาลาง อูน เฌาพรา ดี อาโยวซูอา อี มูห ฆอน อานูน ตึอน.