1 อาเยโรวโบว อี มูห ฆอน อาเนบัด แฮะ แบน คูนดีคัม อี อึบ มืง อีซาเรลัะ อาดา ฆึร ดี ดา ซีนัม. ซีนัม อัน ตี อาพียัะ บอ จูห ดี อึบ บึง มืง ยูดา. อัน อึบ กอย แคง มืง เยรูซาแลม อาดา โอย ซีนัม. 2 มา อัน มูห ฆอน อาบีซาโลม อี จืร นาง มาคา.

3 บอ อาพียัะ โบง หมาบ ปี ฆูณ อัน. น็อห อัน ตู โดบ ซีคยา เฌาพรา อี มูห เฌาพรา ปี กรึบ อัน. อาว ปี น็อห อาดาวีด อี มูห ดา อัน. 4 โกบ โหลห เฌาพรา อาดาวีด, อัน แตห หลูกหลาน อัน ปลูะ อาดาวีด, แตห มืง เยรูซาแลม กอย ซีคยา. อึณ ปี อัน แตห อึณ มึห เงา ราง อี บลาง, แตห อึณ กอย แคง มืง เยรูซาแลม เซเซ. 5 เซเซ อาดาวีด แฮะ โบง นา บอด นา หมึอม ปี อึง เฌาพรา. อัน ตู วัห คอ อู โมยว แคะ ปี กาลาง เฌาพรา ดี อัน. อึณ ยี มึห แปะ แฮะ โบง อัน ดี อาอูรียา อี มูห ดูอี เฮทีด ตึอน. อู โมยว ตี อัน แฮะ กาลึบ. 6 อาพียัะ อี มูห ฆอน อาเรโบม ตึอน, อัน แตห ดา ซึก อัน วี ลาย กาโฆห ดี อาเยโรวโบว ดอ มูห โจว อัน. 7 ลอง แปะ แฮะ โบง อาพียัะ อี หณัม ดึอม กาลาง, บอ ลอง แปะ แฮะ โบง อัน ดอน โมยว อึณ แฮะ แดม อูน แคง บับ คูนดีคัม ยูดา. อาพียัะ ฆาย อาเยโรวโบว แฮะ ลาย กาโฆห ปาย ตี. 8 อาพียัะ บอ ยัม โดบ ดา ดา อัน. เฆ บอ ดึห ดีบ อัน แคง มืง อาดาวีด ตึอน. อาซา อี มูห ฆอน อาพียัะ บอ วี ปลูะ ฆูณ อัน, แบน คูนดีคัม.

9 ดอ แบน อาเยโรวโบว คูนดีคัม อี อึบ มืง อีซาเรลัะ อาดา อา ฆึร ซีนัม, อาซา วี อึบ บึง มืง ยูดา.

10 อาซา ตึอน อึบ แคง มืง เยรูซาแลม อาดา พวน ฆึร ดี อู ซีนัม. ยา อัน มูห นาง มาคา, อี มูห ฆอน อาบีซาโลม ตึอน.

11 คูนดีคัม อาซา วี โบง นา บอด นา หมึอม ปี อึง เฌาพรา แตห อึณ ปี ปี โบง อาดาวีด อี มูห ดา อัน. 12 อัน บอ โฮว แวน เฆ อีมาย อี ลาย ลาย, ลาย ลูต ตึอน, แตห เฆ เลห ตัะ มืง อัน. อัน บอ ปยาต แวน อารึบ แปะ แฮะ โบง ฆูณ เฆ ดา อัน. 13 บอ นาง มาคา, อี มูห ยา อัน, อาซา อาว ฮู แตห อัน แบน นาง ฮอคัม โกบ โบง อัน กันทอน ดี กรึบ นาง กานัม เอซูรา อี หมึอม กาอีห. อาซา บอ ฆัร กันทอน แตห อึณ เกห, บอ โดะ แวน แคง เงา โคบ แบลง คีดาโรน ตึอน. 14 อัน ยี ตู ปยาต แวน โตต กาโช็ง อี กอย โดง จา เฆ ตึอน. มาแล, น็อห อาซา ยี โหลห เฌาพรา เซเซ บอ โจว อัน. 15 บอ โกรวกราม แปะ แฮะ ดึอม หลู ฆูณ อัน อี มูห ครึง ตา รึอน เฆ ครีว, อัน วี ฮาว อูน แคง โฮว เฌาพรา.

16 อาซา ฆาย อาบาซา อี มูห คูนดีคัม แคง มืง อีซาเรลัะ ตึอน, ฆาย ลาย กาโฆห ดอ โจว ฆาย บอ โจว.

17 อาบาซา อี อึบ ดูอี อีซาเรลัะ, อัน ฮาว กาโฆห ดี มืง ยูดา. อัน บอ ซัม แรง ดี มืง รามา, ตู แตห อึณ มึห คอ อู วี อี ปึอน ดี ลึบ ดี เลห โดง กอย อาซา อี มูห คูนดีคัม ดูอี อายูดา ตึอน.

18 ปัน ตี อาซา บอ ดึห รึอน เฆ ครีว อัน อี ซี ฆีด, ปี อูน อัน แคง โฮว เฌาพรา บอ แคง โฮว อัน ตึอน. อัน วี อาบ ดัว โตต ดี อามู อามาด อัน, แตห เฆ ฮาว ดัว ดี อาเบนฮาดาด อี มูห คูนดีคัม อาราม, อี กอย ดี มืง ดามาคู. อาเบนฮาดาด มูห ฆอน อาดาบีโมน. อาดาบีโมน วี มูห ฆอน อาเรจูน. 19 อัน วี จัร อามู อามาด อัน ต็อห, “แตห อาย ลาย แบน อู ฆึก, แตห อึณ ปี ดอ มูห โจว ฆูณ โอว ฆาย ฆูณ แม. บอ ฆาย แฮะ แบน อู ฆึก. โอว แฮะ ดึห รึอน เฆ ครีว, ดัว ดี แม. โอว หมาณ, แกวะ แตห แม แบน ฆึก อาบาซา อี มูห คูนดีคัม ดูอี อีซาเรลัะ ตึอน, แตห อัน กาดูห ดี เลห เตา โดง กอย โอว.”

20 แฮะ ฮอต, หมาณ ปาย ตี อาเบนฮาดาด บอ โทม โฆรห ปี ต็อห คูนดีคัม อาซา ตี. อัน บอ จัร ดา โบว อัน เฆ ดา ซึก อัน ฮาว ดี มืง อีซาเรลัะ ตึอน. เฆ บอ กาโฆห บอ แป มืง อีโยน บอ มืง ดาน, มืง อาเบนเบดมาคา, มืง กีนาเรด บอ มืง บอ มืง นาบทาลี บอ มืง. 21 อาบาซา บอ ยึร ลอง อัน ตี. อัน อาว ฮู ดัน โบง แตห อึณ ฮอต แรง มืง รามา ตึอน. อัน บอ วี กาดูห ดี ฮาว กอย ดี มืง ดีราจา. 22 ปัน ตี คูนดีคัม อาซา ตึอน บอ ดัม โฆรห แตห เฆ ดูอี แคง มืง ยูดา โทม บอ มืง, แกวะ แตห อึณ ลอด คอ อู วี, แตห เฆ ฮาว ดึห มาว เฆ เฮ แปะ แฮะ ตา อาบาซา ดี ซัม แรง มืง ตึอน. อัน บอ ดึห โกรว เฆ ตี, วี โบง แบน โมยว แบน โมยว แคง มืง ฆีบา อี กอย แคง กาดาย ดูอี อาเบนยาม บอ แคง มืง มีฌาพา.

23 ลอง แปะ แฮะ โบง อาซา อี หณัม ดึอม กาลาง, ลอง ปวน อัน, แปะ แฮะ โบง อัน บอ ลอง มืง แปะ แฮะ อึณปราย อัน, อึณ แฮะ แดม อูน แคง บับ คูนดีคัม ยูดา. อัน บอ ราม กัด, อัน บอ มึห เซา ดี เปลา อัน. 24 ปัน ตี อัน บอ ยัม โดบ ดา ดา อัน. เฆ บอ ดีบ อัน แคง มืง อาดาวีด อี มูห ดา ดา อัน. ฆอน อัน อี จืร อายอซาพาด บอ วี ปลูะ อัน, แบน คูนดีคัม.

25 ดอ มูห อาซา คูนดีคัม แคง มืง ยูดา อาดา อา ซีนัม, อานาดาบ อี มูห ฆอน อาเยโรวโบว ตึอน, อัน วี แบน คูนดีคัม อี อึบ ดูอี อีซาเรลัะ. อัน อึบ บึง มืง อีซาเรลัะ อาดา อา ซีนัม. 26 อัน โบง นา ตู หมึอม ปี ตู อึง เฌาพรา, โบง ณึง ปี ปาย ฆูณ อัน ดี โบง, บอ โบง หมาบ แปะ แฮะ กาซูห ฆูณ อัน แตห บอ เฆ ดูอี อีซาเรลัะ โบง.

27 อึณ ยี มูห อาบาซา อี มูห ฆอน อาฮียา, อี มูห ครึร ดูอี อาอีซาคา ตึอน, อัน บอ คราม ดี แวน อานาดาบ. อานาดาบ เฆ ดา ซึก อัน, เฆ บอกาเฆลียด แฮะ กอย ดี มืง ฆีเบโซน, อี มูห มืง ดูอี พีลีที. เฆ แฮะ ตัห โรบ มืง ตี, บัร ดี กาโฆห. ดอ อัน ตี อาบาซา ง็อห ยัม อานาดาบ. 28 ดอ มูห อาซา คูนดีคัม อาดา โอย ซีนัม, อาบาซา แฮะ ง็อห ยัม อานาดาบ ตึอน, บอ วี ปลูะ อัน แบน คูนดีคัม.

29 อาบาซา แฮะ ฮอต แบน คูนดีคัม, อู เฌณ อัน บอ ง็อห แวน โตต แคะ กอย อาโมยว อาเยโรวโบว, ตู แตห อึณ มึห คอ อู วี อี ซี อีม. ปาย ตี อึณ บอ แบน ปี ดึอม กาลาง เฌาพรา ดี อาฮียา อี มูห ดูอี อี กอย ดี มืง ซีโลว ตึอน. 30 เฆ บอกาเฆลียด ยัม โกบ หมาบ ปี โบง อาเยโรวโบว ตึอน. บอ หมาบ แปะ แฮะ กาซูห อัน เฆ ดูอี อีซาเรลัะ โบง. อึณ แฮะ แตห เฌาพรา อี มูห เฌาพรา อี อึบ ดูอี อีซาเรลัะ วี แบน น็อห รู กาเซา.

31 ลอง ปี โบง อานาดาบ อี หณัม ดึอม กาลาง, แปะ แฮะ โบง อัน ดอน โมยว แฮะ แดม อูน แคง บับ คูนดีคัม อีซาเรลัะ. 32 คูนดีคัม อาซา ฆาย อาบาซา อี มูห คูนดีคัม ดูอี อีซาเรลัะ ตึอน ฆาย ลาย กาโฆห บอ โจว ฆาย.

33 อาซา แฮะ แบน คูนดีคัม แคง มืง ยูดา อาดา โอย ซีนัม. ดอ อัน ตี อาบาซา อี มูห ฆอน อาฮียา ตึอน วี แบน คูนดีคัม แคง มืง อีซาเรลัะ, กอย ดี มืง ดีราจา. อาดา อา ฆึร ดี พวน ซีนัม อัน บอ อึบ มืง ตี.

34 อัน โบง นา ตู หมึอม ปี ตู อึง เฌาพรา. อัน ณึง ปี ปาย อาเยโรวโบว ดี โบง หมาบ บอ แตห เฆ อาโมยว ดูอี อีซาเรลัะ วี โบง หมาบ.