1 ดอ อัน ตี ฆอน อีมาย อาเยโรวโบว อี จืร อาพียัะ วี มึห เซา. 2 อาเยโรวโบว วี ต็อห ดี อีบึณ อัน, “แตห แม อึณปราย อารึบ แม, แตห อึณ บลืง, แกวะ แตห อี นับ แม มูห อีบึณ อาเยโรวโบว. แตห แม ฮาว ดี มืง ซีโลว ตึอน. ดา อี บยาน โฆรห เฌาพรา อี จืร อาฮียา, อัน กอย ดี ตี. อัน แฮะ ดึอม บยัะ ลอง โอว ดี ปึอน ดี อึบ ดูอี อีซาเรลัะ. 3 แตห แม ดึห ดี โฆ็ง คามูน ฆึร โบ็ง บอ คามูน อี ดีแคลบ กาล็อะ บอ กาเปา งาม มาเพียน, แตห แม ฮาว โดง กอย อัน. อัน ดี กาลาง ลอง ฆอน ตี อึณ ปาย เหมา.” 4 อีบึณ อาเยโรวโบว ตึอน บอ โบง โดบ ปี ต็อห อีมาย อัน ตี. อัน บอ ฮาว ดี มืง ซีโลว บอ ฮาว ฌัม โดง กอย กาง อาฮียา ตึอน.

ดอ อัน ตี อาฮียา แฮะ กัด กาเซา. งาย อัน แฮะ โมว, อาว ฮู ลึห ซีคยา. 5 เฌาพรา วี ต็อห ดี อาฮียา, “บัร แม ยอด, อีบึณ อาเยโรวโบว ดี ตัห ดีหมอด ลอง ฆอน อีมาย อัน อี แฮะ เซา. แม โลว กาลาง ปาย นี ปาย นี ดี อัน. ปาย ดี ตัห อัน, อัน แฮะ อึณปราย อารึบ อัน, แตห อัน ปี อีบึณ ปอ อู วี.”

6 อาฮียา แฮะ ยึร ฆรัณ ซีณ ตัห ฌัม อีบึณ ตี บาง มาโลห. อัน ต็อห, “อึย อีบึณ อาเยโรวโบว, ตัห ลึบ ลึบ. เหมา อึณ ปาย ปี ณึงราง แม ดี แบน อีบึณ ปอ อู วี? เฌาพรา แฮะ จัร โอว กาลาง ลอง อี ดูก อี หณาบ ดี น็อห แม ตี. 7 แม ฮาว กาลาง ดี อาเยโรวโบว ต็อห, ‘เฌาพรา อี มูห เฌาพรา อี อึบ ดูอี อีซาเรลัะ, อัน ต็อห, “โอว แฮะ ร็อห แม, แฮะ แตห แม แบน อี อึบ ดูอี อีซาเรลัะ อี มูห ดูอี อาโมยว โอว.’ 8 โอว ปี บอ ดึห มาน มืง อาดาวีด, ดัว ดี แม มืร, แม ตู ปี แดเจณ โอว อี จืร อาดาวีด, อี แฮะ โดบ ดารา โอว ดอน โมยว บอ โบง ซีคยา อี บอด อี หมึอม ปี อึง โอว. 9 แม แฮะ โบง หมาบ หลึอม เฆ อี กอย ซีณ อาต กอย แม. แม แฮะ แวน โอว, วี โบง อารึบ, ต็อห อึณ มูห เฌาพรา ปอ อู กาดัง อี มูห อารึบ ปี โหลว อี ตา ครีว. ปี โบง แม ตี แฮะ แตห โอว แบน น็อห รู. 10 โคว, โอว ดี ดัม หมาบ ดี อาเยโรวโบว. โอว ดี แวน โตต แคะ กอย อีมาย แคง หลูกหลาน อาเยโรวโบว ดอน วี. บอ เฆ อีมาย แปะ แฮะ เหมต เบ, แตห เฆ แบน หมาย เบ บอ เฆ อี ตู ดึอม มึห ดา กาณา อี อึบ เฆ, โอว ดี แวน โตต เฆ แคง มืง อีซาเรลัะ. โอว ดี ดึห แวน หลูกหลาน อาเยโรวโบว, แตห อึณ กอ ปี อี ฆีด แวน อึณปึม เอียง มัก, แตห อึณ กอ โตต โตต. 11 หลูกหลาน อาเยโรวโบว อี ยัม แคง มืง เฆ มาโซว อี ดี โฮม. เฆ อี ยัม นา เรต มืง มาซีม อี ดี ตัห โฮม.” เฌาพรา แฮะ กาลาง ปาย ตี.

12 โคว, แตห แม วี เวณ ดี กาง แม. เซ แม ฮี เวณ ฌัม แคง มืง, ฆอน แม ตี อัน ดี ยัม อู เฌณ. 13 ดูอี อีซาเรลัะ บอกาเฆลียด, เฆ ดี กาโพรม ดี ยาม บอ ดีบ อัน. แคะ กอย หลูกหลาน อาเยโรวโบว ตึอน, อัน อู วี ตี อี ปึอน ดี ดีบ. โคว, แคง หลูกหลาน อาเยโรวโบว ตึอน, อึณ มูห อัน อู วี อี แฮะ โบง นา บอด นา หมึอม อี ล็อะ น็อห เฌาพรา อี มูห เฌาพรา อี อึบ ดูอี อีซาเรลัะ.

14 โกบ อึณ ปาย ตี เฌาพรา บอ แตห อึณ มึห คูนดีคัม ปอ อู กาดัง อี ดี อึบ ดูอี อีซาเรลัะ. อัน ดี ปึอน ดี แวน หลูกหลาน อาเยโรวโบว ดอ อัน ตี. แฮะ แบน ปาย ตี ดอ ตี นี อู เฌณ.

15 เฌาพรา ดี บอ ดัม หมาบ ดี ดูอี อีซาเรลัะ, แตห อึณ กอ ปี กาบาง โฆ็ลง อี รัร แคง อึม. อัน ดี บอ ดึห เลห ดูอี อีซาเรลัะ แคง มืง แปะ แฮะ อาบ อัน ดี ดา ดา เฆ. มืง ตี มูห มืง อี บอด อี หมึอม. อัน บอ แตห เฆ ฮาว กอย นา ตัะ แบลง อึม ตาง ตึอน. อัน ดี โบง ปาย ตี โกบ โบง เฆ กันทอน ปี หลู เบ ดี นาง กานัม เอซูรา. อาตี แตห เฌาพรา รู ดี เฆ. 16 อัน เฌา ดี แวน ดูอี อีซาเรลัะ โกบ หมาบ แปะ แฮะ โบง อาเยโรวโบว บอ โกบ หมาบ แปะ แฮะ กาซูห อัน เฆ ดูอี อีซาเรลัะ โบง.” แคะ ตี อาฮียา กาลาง ดี อีบึณ อาเยโรวโบว.

17 ปัน ตี นาง ตึอน บอ วี เวณ ฌัม ดี มืง ดีราจา. อัน บอ ตัห ฌัม บาง มาโลห โฮว อัน, ฆอน อัน ตึอน บอ ยัม อู เฌณ. 18 เฆ ดูอี อีซาเรลัะ บอกาเฆลียด บอ กาโพรม ดี กลึร บอ ยาม, บอ ดึห ฮาว ดีบ อัน, แตห อึณ ปี ปี ต็อห เฌาพรา ดี แดเจณ อัน อี มูห ดูอี บยาน โฆรห เฌาพรา อี จืร อาฮียา ตึอน.

19 ลอง แปะ แฮะ โบง อาเยโรวโบว ดอ มูห โจว อัน อี หณัม ดึอม กาลาง, ลอง กาโฆห อัน ดี รันซู อัน บอ ลอง ปี อึบ อัน มืง เฆ ตึอน, อึณ แฮะ แดม อูน แคง บับ ปี แดม เฆ ลอง คูนดีคัม เฆ อี อึบ มืง อีซาเรลัะ.

20 อาเยโรวโบว แฮะ อึบ บึง มืง อาดา อา ฆึร ดี อา ซีนัม, อัน บอ ยัม โดบ ดา ดา อัน เฆ ตึอน. อานาดาบ อี มูห ฆอน อีมาย อาเยโรวโบว บอ วี ปลูะ ฆูณ อัน, วี แบน คูนดีคัม.

21 อึณ ยี มูห ฆอน อาซาโลวโมว ตึอน อี จืร อาเรโบม, อัน อึบ มืง ยูดา. ดอ แบน อัน คูนดีคัม, อาซาก อัน แฮะ โนะ พวน ฆึร ดี อู ซีนัม. อัน บอ อึบ บึง มืง, กอย แคง มืง เยรูซาแลม ฆึร ดี บู ซีนัม. อึณ มูห มืง ปี ร็อห เฌาพรา แคง กาดาย มืง ดูอี อีซาเรลัะ, แตห อัน กอย ดี ตี. มา อาเรโบม จืร นาง นามา อี มูห อาโมยว อัมโมน. 22 ดูอี อายูดา, เฆ โบง นา ตู หมึอม ปี ตู อึง เฌาพรา, โบง หมาบ กืน หลึอม ดอ มูห โจว ดา ดา เฆ, แตห เฌาพรา รู ดี เฆ หลึอม ปี ดึอม รู อัน ดี ดา ดา เฆ ตึอน. 23 เฆ บอ โบง กาโช็ง ดี โดง จา บอ กรึบ แคะ อึง เฆ. เฆ โบง กันทอน, กรึบ นาง กานัม เอซูรา แดง นอน จา ดอน โปละ บอ ดี ดัง เฮ ตาง ดอน กาดัง. 24 อึณ บอ มึห เฆ อีมาย อี ลาย ลูต ปี เฆ แคง มืง โซวโดม ตึอน. เฆ มืร กอย แคง มืง ยูดา ตี. เฆ โบง อี หมึอม กาอีห ดอน โมยว แปะ แฮะ โบง เฆ ดูอี อาโมยว เฮา, อี แฮะ กอย แคง มืง กานัณ แปะ แฮะ โฮว แวน เฌาพรา อาต ตัห ลึบ ดูอี อีซาเรลัะ แคง มืง เฆ ตึอน.

25 คูนดีคัม อาเรโบม แฮะ อึบ มืง อัน อาดา พัน ซีนัม, คูนดีคัม อาซีซัก อี อึบ มืง แอฆึบ บอ ตัห กาโฆห ดี มืง เยรูซาแลม. 26 อัน บอ ดึห ฮาว โตต โกรวกราม ดอน โมยว แคง โฮว เฌาพรา บอ โกรวกราม แคง โฮว คูนดีคัม. อี มูห มัง ฆ็อง ครีว แปะ แฮะ โบง อาซาโลวโมว ตึอน, อัน บอ ดึห ฮาว โตต. 27 คูนดีคัม อาเรโบม วี โบง มัง ฆ็อง บ็อง, แตห อึณ กาดาง มัง ฆ็อง ครีว, วี อาบ ดี ดา ตาง อี อึบ ดา ซึก เฆ อี บัร บาง มาโลห โฮว อัน. 28 ดอน เฌณ ดอ ฮาว คูนดีคัม ดี โฮว เฌาพรา, เฆ อี บัร โฮว อัน ตึอน, เฆ ดึห โฆ็ง มัง ฆ็อง ตี. แฮะ ฮอต, เฆ ปี วี อูน โดง กอย เฆ ตึอน.

29 ลอง ปี โบง อาเรโบม อี หณัม ดึอม กาลาง, อึณ แฮะ แดม อูน แคง บับ คูนดีคัม ดูอี อายูดา. 30 อาเรโบม ฆาย อาเยโรวโบว ตึอน, ฆาย กาโฆห เซเซ. 31 ปัน ตี อาเรโบม บอ ยัม โดบ ดา ดา อัน. เฆ บอ ดีบ อัน โดบ ดา ดา อัน แคง มืง อาดาวีด ตึอน. มา อัน จืร นาง นามา, อี มูห ดูอี อาโมยว อัมโมน. ฆอน อีมาย อัน อี จืร อาพียัะ บอ วี ปลูะ ฆูณ อัน, แบน คูนดีคัม.