1 ดอ ซี กอย อาเยโรวโบว โคบ กาโช็ง หลู, ดอ ต็อห อัน ดี โดะ ปี ดี หลู, อึณ มึห ดูอี ปี ตึย เฌาพรา อู วี. อัน ตัห มืง ยูดา, ตัห ฌัม ดี มืง เบดาเอน. 2 ดูอี วี ตี กาลาง ลอง กาโช็ง หลู, กาลาง โฆรห ปี กาลาง เฌาพรา ดี อัน. อัน ต็อห, “อึย กาโช็ง, อึย กาโช็ง, เฌาพรา แฮะ ต็อห, ‘แตห เบ บัร ดี ยอด, อึณ ดี มึห ฆอน อู วี, อัน ดี ฆึอด ตัห แคง หลูกหลาน อาดาวีด. เฆ ดี แตห อัน จืร อาโยวซียา. วี ตี, อัน ดี วี ดึห เฆ อี หลู ดี กาโช็ง นี, วี โดะ เฆ แดง กาโช็ง นี. เฆ ดี บอ ดึห กาอาง ดูอี ยัม, วี โดะ นา แดง.’” 3 ซีแง อัน ตี อัน บอ กาลาง ดี เฆ ลอง ลักซานา ปี ดี ดัว เฌาพรา, แตห เฆ นับ, โฆรห อัน แฮะ หมาน. อัน ต็อห, “เฌาพรา แฮะ ต็อห, ‘กาโช็ง หลู นี อัน ดี กาลาต ลึร. กาฟาง อี กอย นา แดง, อัน มืร ดี โจห.’”

4 อาเยโรวโบว บอ ยึร โฆรห ปี กาลาง ดูอี ปี ตึย เฌาพรา ลอง กาโช็ง อี กอย ดี มืง เบดาเอน ตึอน, อัน บอ โซ็ง แด อัน กาโรย กาโช็ง ตึอน ต็อห, “เหมต อัน.” แฮะ ฮอต, แด อัน บอ เฮียะ อู เฌณ. อาว ฮู ปึอน วี ดึห วีว. 5 กาโช็ง ตึอน บอ กาลาต ลึร. กาฟาง อี กอย แดง กาโช็ง บอ โจห อู เฌณ. ปาย ตี อึณ บอ แบน แคะ ปี ต็อห ดูอี ปี ตึย เฌาพรา, ปี จัร เฌาพรา อัน กาลาง.

6 คูนดีคัม อาเยโรวโบว วี กาลาง ดี ดูอี ปี ตึย เฌาพรา ตึอน ต็อห, “หมาณ แม, ซาคึร ดาง โอว ดี เฌาพรา อี มูห เฌาพรา ปี กรึบ แม, แตห แด โอว วี แกน.” ดูอี ปี ตึย เฌาพรา ตึอน, อัน บอ ซาคึร หมาณ ดี เฌาพรา. แฮะ ฮอต, แด คูนดีคัม วี แกน ปี บรีม.

7 ปัน ตี คูนดีคัม วี ต็อห ดี ดูอี ปี ตึย เฌาพรา ตึอน, “ฮาว แม เวณ, โฮม โบม แคง กาง โอว. โอว ซี ดัว บอ ลักซอง ดี แม.”

8 ดูอี ปี ตึย เฌาพรา ตึอน ยี ต็อห, “เซ แม ปี บอ ดัว โกรว แม อู กาแต ดี โอว มืร, โอว ตู ปึอน เวณ โดบ แม. คามูน เฆ อึม มืร, โอว ตู ปึอน โฮม, ตู ปึอน เดียง ดี นี. 9 เฌาพรา แฮะ ต็อห ดี โอว, ‘อาว โลว โฮม คามูน. อาว โลว เดียง อึม. อาว โลว วี เวณ โดบ อึณเตณ บรีม แม.’” 10 อัน แฮะ ฮอต กาลาง โฆรห ตี, อัน บอ วี เวณ ปอ อู อึณเตณ. อัน อาว ฮู โดบ อึณเตณ อี ตัห มืง เบดาเอน ตึอน.

11 ปัน ตี อึณ วี มึห ดูอี บยาน โฆรห เฌาพรา อู วี, อี แฮะ ราม กัด. อัน กอย แคง มืง เบดาเอน ตึอน. ฆอน อีมาย อัน เฆ ตัห กาลาง ดี อัน ลอง แปะ แฮะ โบง ดูอี ปี ตึย เฌาพรา ตึอน บอ ปี ต็อห อัน ดี คูนดีคัม. 12 ฆูณ เฆ ดีหมอด เฆ ต็อห, “อัน ว็อะ อึณเตณ เหมา?” โกบ ยึร เฆ อึณเตณ ว็อะ อัน, เฆ วี แค ดี ฆูณ เฆ. 13 อัน ปี วี ต็อห ดี ฆอน เฆ ตึอน, “ครึง กอบ มาลา, ดัว ดี โอว.” เฆ บอ ครึง กอบ มาลา ตึอน, แตห อัน ป็อะ. 14 อัน บอ ป็อะ ฮาว โดบ ดูอี ปี ตึย เฌาพรา ตึอน, บอ ฮาว ยึร ดูอี ตึอน ดอ กอย อัน ครึม เฮ เทเรบ. อัน บอ ดีหมอด ต็อห, “แม มูห ดูอี ปี ตึย เฌาพรา, อี ตัห มืง ยูดา?” ดูอี ตึอน วี ต็อห, “แฮะ มูห โอว.”

15 อัน บอ บาง ดูอี ตึอน ต็อห, “ฮาว เวณ โดบ โอว. เวณ โฮม คามูน แคง กาง โอว.”

16 ดูอี ปี ตึย เฌาพรา ตึอน วี ต็อห, “โอว ตู ปึอน เวณ โดบ แม. โอว ตู ปึอน เวณ ลึบ แคง กาง แม. โอว ตู ปึอน โฮม คามูน. โอว ตู ปึอน เดียง อึม ดี นี.

17 เฌาพรา แฮะ กาลาง ดี โอว ต็อห, ‘แม ตู ปึอน โฮม คามูน, ตู ปึอน เดียง อึม. แม ตู ปึอน วี เวณ โดบ อึณเตณ บรีม แม.’”

18 อัน วี ต็อห ดี ดูอี ปี ตึย เฌาพรา ตึอน, “โอว มืร มูห ดูอี บยาน โฆรห เฌาพรา ปี แม. อามู อามาด เฌาพรา แฮะ กาลาง โฆรห เฌาพรา ดี โอว ต็อห, ‘แตห แม แดะ อัน ตัห โฮม คามูน, เดียง อึม ดี กาง แม.’” อัน ยี กาโลว ดี ดูอี ปี ตึย เฌาพรา ตึอน. 19 โคว, ดูอี ปี ตึย เฌาพรา ตึอน บอ เวณ โฮม คามูน, เดียง อึม ดี กาง อัน.

20 ดอ ซี ตูต โฮม ฆาย, เฌาพรา วี กาลาง ดี ดูอี บยาน โฆรห เฌาพรา อี แฮะ แดะ แตห อัน เวณ. 21 อัน บอ ดัด ดี ดูอี ปี ตึย เฌาพรา อี ตัห มืง ยูดา ตึอน ต็อห, “เฌาพรา ต็อห, แม ตู โทม โฆรห เฌาพรา, แม ตู โทม ปี ต็อห เฌาพรา ดี แม. อัน มูห เฌาพรา ปี กรึบ แม. 22 แม แฮะ เวณ, โฮม คามูน, เดียง อึม. โอว ยี ต็อห ดี แม, ‘แกวะ โฮม คามูน. แกวะ เดียง อึม.’ โคว อัน ตี, แม ตู ยัม โดง มึห บาเรว ดา ดา แม เฆ ตึอน. เฆ ตู ปึอน ดี ดีบ โดว แม แคง บาเรว ตี.”

23 ดูอี ปี ตึย เฌาพรา ตึอน แฮะ ฮอต โฮม คามูน, แฮะ ฮอต เดียง อึม. ปัน ตี ดูอี บยาน โฆรห เฌาพรา ตึอน บอ ครึง กอบ มาลา อัน, ดัว ดี ดูอี ปี ตึย เฌาพรา ปี แดะ ตัห อัน ตึอน. 24 ดูอี ปี แดะ ตัห อัน ตึอน บอ เลห เวณ. อัน บอ ฮาว โดบ อึณเตณ, อึณ บอ มึห มาครังซี ก็อะ ยัม อัน. อัน บอ เกห ยัม โดบ อึณเตณ ตี. มาลา บอ มาครังซี ตึอน วี กอย โคบ อัน, ยอด อัน. 25 เฆ ดูอี เฮา อี ฮาว โดบ อึณเตณ ตึอน, เฆ บอ ยึร ดูอี ยัม โดบ อึณเตณ, บอ ยึร บอ มาครังซี กอย โคบ อัน ดี ตี. เฆ บอ เวณ กาลาง แคง มืง โดง กอย ดูอี บยาน โฆรห เฌาพรา อี แฮะ ราม กัด ตึอน.

26 ดูอี บยาน โฆรห เฌาพรา อี แดะ ตัห อัน ตึอน, อัน บอ ยึร ลอง อัน ตี, อัน วี ต็อห, “อัน มูห ดูอี ปี ตึย เฌาพรา, อี ตู โทม ปี จัร เฌาพรา ดี อัน. โคว, เฌาพรา แตห มาครังซี ก็อะ ยัม อัน, แตห อึณ ปี ปี ต็อห เฌาพรา ดี อัน.”

27 อัน วี ต็อห ดี ฆอน อัน, “เบ ครึง กอบ มาลา ดี โอว.” เฆ บอ ครึง ดัว ดี อัน. 28 อัน บอ ฮาว ยึร โดว ดูอี ยัม กอย โดบ อึณเตณ ตึอน. มาลา ฆาย มาครังซี ซี กอย โคบ ดูอี ยัม ตี. มาครังซี ยี ตู โฮม ดูอี ยัม. มาลา มืร อัน ตู ก็อะ. 29 ดูอี บยาน โฆรห เฌาพรา บอ โจะ ดูอี ยัม ตึอน, เบลห แดง กาตูะ มาลา อัน, ตึย เวณ อัน ฌัม มืง อัน, แตห เฆ ปึอน ดี กลึร, ปึอน ดี ยาม โกบ อัน, แตห เฆ ปึอน ดี ดีบ อัน. 30 อัน บอ ดึห โดว ดูอี ยัม ตึอน, ฮาว เบลห แคง บาเรว อัน. อัน บอ ยาม ต็อห, “อึย แม วา โอว.”

31 อัน แฮะ ฮอต เบลห โดว ยัม ตี แคง บาเรว, อัน วี ต็อห ดี ฆอน อัน, “เซ โอว ฮี ยัม, เบ โลว ดีบ บอ โอว แคง บาเรว ตี, แตห โดว โอว กอย โคบ ดูอี ปี ตึย เฌาพรา นี. 32 โคว, โฆรห ปี กาลาง ดูอี ปี ตึย เฌาพรา นี, อึณ แฮะ หมาน โตต ดอน โมยว. ปี ต็อห อัน ลอง กาโช็ง หลู อี กอย ดี มืง เบดาเอน บอ ลอง กาโช็ง แบน โปละ แบน โปละ ปี โบง เฆ ดี โดง จา บอ แคง มืง ซามารี ตึอน, อึณ ดี แบน โตต ปาย ตี.”

33 วาย ตี อาเยโรวโบว แฮะ ยึร ปาย ตี, อัน ยี โบง ฮาว นา ตู หมึอม. อัน ปี วี ดึห ดูอี แบน โมยว แบน โมยว, แตห เฆ แบน ดูอี หลู ดี เฌาพรา. อาเซ มึห น็อห ซี โบง ฌึร ตี, อาเยโรวโบว บอ แตห เฆ แบน ดูอี หลู ดี เฌา ดี โดง จา แบน โปละ แบน โปละ แปะ แฮะ เบลห อูน อัน. 34 โกบ หมาบ ปี โบง อัน ตี, แคะ กอย ดูอี อาโมยว อัน, เฆ วี โลว คัม หมาบ, โลว ยัม โตต, แกวะ แตห เฆ ปึอน ดี กอย แดง กาดาย นี.