1 อาเรโบม ตึอน บอ ฮาว ดี มืง เซเคม. บอ เฆ ดูอี อีซาเรลัะ แฮะ ฮาว ดี มืง เซเคม, แตห เฆ ปึอน ดี โจะ อัน แบน คูนดีคัม. 2 ดอ อัน ตี อาเยโรวโบว, อี มูห ฆอน อาเนบัด ตึอน ยี ซี กอย แคง มืง แอฆึบ ซีณ เตา อัน ดี อาซาโลวโมว. อัน บอ วี นับ ลอง อาเรโบม, อัน บอ วี เวณ. 3 เฆ แฮะ แดะ ตัห อัน. ปัน ตี อาเยโรวโบว บอ ดูอี อีซาเรลัะ บอ กาโพรม ดี ตัห โดง กอย อาเรโบม, วี ต็อห ดี อัน, 4 “ฆูณ แม แฮะ แตห อึณ หณาบ กาเซา ดี เย. เย วี หมาณ ดี แม, แกวะ แตห อึณ หณาบ แคะ ตี ดี เย. เซ แม โบง ปาย ตี, เย ดี แบน แดเจณ แม, แตห แม อึบ เย.” 5 อัน วี ต็อห ดี เฆ, “แตห เบ วี เวณ. ปอ โอย ซีแง, เบ วี ตัห.” ดูอี เฆ ตึอน บอ วี เวณ.

6 ปัน ตี คูนดีคัม อาเรโบม บอ กามวน ดี เฆ ดูอี กัด อี ดึอม กอย รึม โดบ อาซาโลวโมว อาต ยัม อัน. อัน ดีหมอด เฆ ต็อห, “เบ ดี แตห อากยาม อางยาน มาเซ ดี โอว, แตห โอว ปึอน ดี กาลาง ดี ดูอี อีซาเรลัะ ตึอน?” 7 เฆ วี ต็อห ดี อัน, “เซ แม คัม ดี แบน ดา อี จอย เฆ อาตึร นี, เซ แม โพรม ปี หมาณ เฆ, กาลาง โฆรห ชีด โฆรห หมึอม ดี เฆ, เฆ ดี วี แบน แดเจณ แม เซเซ.”

8 อัน ยี ตู โดบ อากยาม อางยาน ปี กาลาง ดูอี กัด เฆ ตึอน. อัน วี ซังคยาง กามวน ดี เฆ ดูอี หนึม, อี มูห ฆึก อัน, อี กอย รึม โดบ อัน, จอย อัน. 9 อัน วี ต็อห, “เบ ดี แตห อากยาม อางยาน ปาย เหมา, แตห โอว ปึอน ดี กาลาง ดี เฆ ดูอี อีซาเรลัะ ตึอน? เฆ แฮะ ต็อห ดี โอว, ‘แกวะ แตห อึณ หณาบ แคะ ปี จัร ฆูณ แม เย โบง.’”

10 ฆึก อัน วี ต็อห ดี อัน, “แม วี กาลาง ดี เฆ ต็อห, ‘ฆูณ โอว แฮะ แตห ฆาน เบ จัน กาเซา. เบ วี หมาณ, แตห อัน อึณจึร. โอว ยี ต็อห ดี เบ, อึณ ปี กานู แวด โอว ซี ตาง หลึอม ณอย ฆูณ โอว. 11 ฆูณ โอว แฮะ จัร กาเซา เบ. โอว ดี วี จัร เบ แตห อึณ กาเซา หลึอม ตี. ฆูณ โอว แฮะ ตา อึณเพียะ, ซีเบรียะ เบ. โอว ยี ดี วี ตา มา แมงเงา, แตห เฆ ดอก เบ เซ เบ ฮี กราน.’”

12 แฮะ ฮอต, บอ ปึอน โอย ซีแง, อาเยโรวโบว บอ เฆ ดูอี อีซาเรลัะ ตึอน บอ วี ตัห โดง กอย คูนดีคัม อาเรโบม ตึอน, โดบ แคะ ปี จัร อัน. 13 คูนดีคัม บอ กาลาง โฆรห กาเซา ดี เฆ, แวน อากยาม อางยาน ปี กาลาง ดูอี กัด เฆ ตึอน. 14 อัน วี โดบ อากยาม อางยาน ปี กาลาง ดูอี หนึม เฆ ตึอน. อัน ต็อห, “ฆูณ โอว แฮะ แตห อึณ หณาบ กาเซา ดี เบ. โอว ยี วี แตห อึณ หณาบ หลึอม ตี. ฆูณ โอว ตา อึณเพียะ ซีเบรียะ เบ, โอว ยี ดี วี ตา มา แมงเงา แตห เฆ ดอก เบ เซ เบ ฮี กราน.”

15 คูนดีคัม ตู โทม โฆรห ดา ตาง เฆ ตึอน. โคว, เฌาพรา ดี แตห อึณ แบน ปี ดึอม กาลาง อัน ดี อาฮียา อี กอย มืง ซีโลว, แตห อัน วี กาลาง ดี อาเยโรวโบว อี มูห ฆอน อาเนบัด.

16 ดูอี อีซาเรลัะ เฆ ตึอน เฆ บอ นับ, คูนดีคัม ตู โทม ตู โดบ โฆรห เ. เฆ วี กาลาง ดี คูนดีคัม ต็อห, “เย นี, เย ตู บาะ ดี อาดาวีด. เย ตู มูห ครึร ฆอน อาเยเซ. อึย เบ ดูอี อีซาเรลัะ, ฮาว เอ, วี เวณ โดง กอย ทึบ บีก เอ. อึย เบ ดูอี อาดาวีด, แตห เบ ยอด ลึมลา อาโมยว เบ.” เฆ แฮะ ฮอต ต็อห ปาย ตี เฆ ดูอี อีซาเรลัะ บอ เวณ โดง กอย ทึบ บีก เฆ. 17 อึณ ยี มูห ดูอี อีซาเรลัะ อี กอย แคง มืง ยูดา ตึอน, อาเรโบม ซี อึบ เฆ.

18 วาย ตี คูนดีคัม อาเรโบม บอ จัร อาตอรัม อี มูห ดา ตาง แฆบ รึอน จึง แตห อัน ฮาว โดง กอย เฆ ดูอี อีซาเรลัะ. เฆ ยี กาโพรม ดี ดึห มาว วึณ, แตห อัน กอ ยัม. คูนดีคัม อาเรโบม บอ ปีครัน ดี ป็อะ ลักเลา อัน, วี เตา เวณ แคง มืง เยรูซาแลม. 19 ปาย ตี ดูอี อีซาเรลัะ ตู กาล็อะ ดี อาโมยว อาดาวีด กอ ฌัม อาตึร นี.

20 เฆ ดูอี อีซาเรลัะ บอ ยึร อาเยโรวโบว แฮะ วี ตัห, เฆ บอ กาโพรม ดี ฮาว บาง อัน, แตห อัน ตัห โดง กอย ดูอี กืน เฆ ตึอน. เฆ บอ แตห อัน แบน คูนดีคัม อี อึบ ดูอี อีซาเรลัะ. อึณ ยี มึห มี ดูอี อายูดา อี โดบ อาดาวีด.

21 อาเรโบม ตึอน แฮะ ฮอต วี ตัห ฌัม แคง มืง เยรูซาแลม, เฆ วี ร็อห อี ดี แบน ดา ซึก แคง ครึร ยูดา ฆาย ครึร อาเบนยาม อาดา อู แซณ ดี ดา หมึณ วี, แตห เฆ ฮาว กาโฆห ดี ดูอี อีซาเรลัะ, แตห เฆ วี ปึอน วีว มาน มืง, แตห อาเรโบม อี มูห ฆอน อาซาโลวโมว ตึอน, วี ปึอน ดี อึบ.

22 เฌาพรา วี กาลาง โฆรห ดี ดูอี ปี ตึย อัน อี จืร อาเซมายา. อัน ต็อห, 23 “แตห แม กาลาง ดี อาเรโบม อี มูห ฆอน อาซาโลวโมว, อี มูห คูนดีคัม ดูอี อายูดา ฆาย ดูอี อาเบนยาม อี ซี ฆีด ตึอน. 24 แตห แม ต็อห, ‘เฌาพรา แฮะ ต็อห, อาว โลว ฮาว กาโฆห ดี ดูอี อีซาเรลัะ อี มูห บีนอง เบ ตี. แตห เบ วี เวณ ดี กาง เบ ดอน อี. อึณ มูห โอว อี แฮะ โบง ปาย ตี.’” เฌาพรา แฮะ ฮอต กาลาง โฆรห ตี, เฆ บอ โทม, อาว ฮู แบน ฮาว กาโฆห. เฆ บอ วี เวณ ดี กาง เฆ.

25 วาย อัน ตี อาเยโรวโบว บอ โบง แตห มืง เซเคม อี กอย กาแต นอน อาเอพารีม มึห แรง. อัน บอ ฮาว กอย ดี ตี. วาย อัน ตี อัน บอ วี ฮาว ซัม แบน โมยว แบน โมยว แคง มืง เปนูเอน.

26 อัน บอ กาพา แคง น็อห อัน ต็อห, “โอว โยว, ดูอี แคง มาน มืง โอว นี, เฆ ซี วี ฮาว บลาก อาดาวีด. 27 เซ ดูอี แคง เรา แคง มืง โอว นี วี ฮาว หลู ปี หลู เฆ ดี โฮว เฌาพรา แคง มืง เยรูซาแลม, โยว เฆ ดี วี กาปลูะ น็อห วี ฮาว โดบ ดา กาณา เฆ อี จืร อาเรโบม อี มูห คูนดีคัม ดูอี อายูดา ตึอน. เฆ ดี บอ ง็อห ยัม โอว, วี ฮาว กอย โดบ อาเรโบม ตี.”

28 ปัน ตี คูนดีคัม บอ ซังคยาง ดี อี. แฮะ ฮอต, อัน บอ โบง ราง มามัก ครีว อา โดว. อัน บอ กาลาง ดี ดูอี ต็อห, “อึย เบ ดูอี อีซาเรลัะ, เซ เบ โลว ฮาว แคง มืง เยรูซาแลม, อึณ แบน หณาบ ดี เบ. แตห เบ ยอด อารึบ ราง นี. อึณ มูห เฌาพรา อี แฮะ แยต เลห เบ แคง มืง แอฆึบ ตึอน.” 29 อัน บอ ดึห ราง มามัก อาดา อู โดว ฮาว อูน ดี มืง เบดาเอน. ปอ อู โดว อัน ฮาว อูน ดี มืง ดาน. 30 ปี โบง อัน ตี, อึณ ยี แบน หมาบ. อัน แตห ดูอี ดอน เรา ดอน มืง ฮาว กรึบ อารึบ มามัก ตี, แตห เฆ ฮาว กอ ฌัม บอ มืง ดาน.

31 อัน บอ โบง โฮว ดี โดง จา, แตห อี ปึอน ดี กรึบ เฌาพรา. อัน บอ แดะ ดูอี เฮา อี ตู มูห ดูอี ครึร อาเลวี, แตห เฆ แบน ดูอี หลู ดี เฌาพรา. 32 อัน บอ โบง บลอย ดอ มูห มาเฆียน อึณดา, ซีแง ฆึร ดี อึณพัน. อึณ ปี บลอย ปี ดึอม โบง เฆ แคง มืง ยูดา ตึอน. อัน บอ หลู โดว ซัดดาวา แดง กาโช็ง หลู, แตห อึณ แบน ปี หลู ดี อารึบ มามัก ปี อูน อัน แคง มืง เบดาเอน ตึอน. บอ แคง มืง เบดาเอน ตึอน บอ ดี โดง จา แบน โปละ แบน โปละ อัน เบลห อูน ดูอี หลู ดี เฌาพรา. 33 อัน โบง ดี หลู ดี กาโช็ง ปี โบง อัน แคง มืง เบดาเอน ดอ มูห มาเฆียน อึณดา, ซีแง ฆึร ดี อึณพัน ตึอน. อัน โดบ น็อห โดว บรีม อัน, จัร เฆ ดูอี อีซาเรลัะ หลู ดี กาโช็ง หลู ตี, แตห เฆ โดะ บอ ซีนัม อูห หงูน ดี ตี.