1 คูนดีคัม อาซาโลวโมว ตึอน วี ร็อก อีบึณ กืน อี มูห ดูอี อาโมยว เฮา. แดง ฆอน คูนดีคัม พาโรว ตึอน, อัน ปี วี ดึห ดูอี โมวอาบ, ดูอี อัมโมน, ดูอี เอโดม, ดูอี ซีโดน บอ ดูอี เฮทีด. เฆ กืน แฮะ แบน อีบึณ อัน. 2 ลอง ดูอี อาโมยว เฮา, เฌาพรา แฮะ ดึอม ดัม อูน ดี เฆ ดูอี อีซาเรลัะ ต็อห, “แกวะ ลาย คัด ลาย ดึห, โยว เฆ ดี แตห น็อห เบ บยอง, วี กรึบ เฌา ปี กรึบ เฆ.” อาซาโลวโมว ยี ร็อก อีบึณ อาโมยว เฮา ตึอน, ตู โทม โฆรห เฌาพรา. 3 อัน มึห อีบึณ อี มูห ฆอน คูนดีคัม บู มาย็อห วี, ปี วี มึห ปอ โอย มาย็อห วี, อี กอย รึม โดบ ฌืง นาง อัน. อึณ บอ มูห อีบึณ อัน เฆ ตี, อี แตห น็อห อัน บลืง. 4 อัน บอ แกร ดี กัด, อีบึณ อัน เฆ ตึอน เฆ บอ แตห น็อห อัน บลืง, วี กรึบ เฌา แบน กาดัง แบน กาดัง. น็อห อัน อาว ฮู วี โดบ เฌาพรา ปี อาดาวีด อี มูห ฆูณ อัน แฮะ ดึอม โดบ. 5 อัน บอ วี โดบ นาง เอซาทารีด อี มูห นาง กานัม ปี กรึบ เฆ ดี มืง ซีโดน. อัน กรึบ บอ เฌา มูล็อก อี หมึอม โยว หมึอม กาอีห กาเซา, อี มูห เฌา กานัม ปี กรึบ เฆ ดูอี อัมโมน ตึอน. 6 ปี โบง อัน ตี แฮะ แบน หมาบ ปี ตู อึง เฌาพรา. อัน อาว ฮู โดบ มี เฌาพรา อู กาดัง ปี อาดาวีด อี มูห ฆูณ อัน.

7 อัน บอ โบง กาโช็ง แดง นอน อี กอย โคบ มืง เยรูซาแลม นา เลห ซีแง, แตห อัน กรึบ เฌา เคมูซา อี มูห เฌา กานัม ปี กรึบ ดูอี โมวอาบ, อี หมึอม กาอีห กาเซา. อัน โบง ปอ อู กาโช็ง อาดา เฌา มูล็อก อี มูห เฌา กานัม ปี กรึบ ดูอี อัมโมน, อี หมึอม กาอีห กาเซา. 8 บอ อีบึณ อัน เฆ อี มูห ดูอี อาโมยว เฮา ตึอน, อัน โบง แตห เฆ หลู ซีนัม อูห หงูน อี โดะ ดี เงา, แตห เฆ หลู บอ โดว ซัดดาวา แบน โมยว แบน โมยว ดี เฌา กานัม เฆ ตึอน.

9-10 เฌาพรา อี แฮะ กาปลูห ดี อาซาโลวโมว อาดา อา เฌณ, อัน บอ รู ดี อาซาโลวโมว โกบ แฮะ บลืง น็อห อัน, อาว ฮู โดบ เฌาพรา อี มูห เฌาพรา ปี กรึบ ดูอี อีซาเรลัะ. เฌาพรา แฮะ ฮอต กาลาง ดี อัน, แกวะ กรึบ เฌา กานัม ปี กรึบ ดูอี เฮา. อัน ยี ตู โทม โฆรห เฌาพรา ตี. 11 โคว, เฌาพรา วี ต็อห ดี อัน, “โกบ แฮะ โบง แม ปาย ตี, โกบ อาว ฮู โดบ แม ปี กาแซณ อาย, โกบ ตู โดบ แม ดารา ปี ดัม อูน โอว ดี แม, โอว ดี ดึห มาน มืง แม นี, วี ดัว ดี แดเจณ แม อู วี. โอว ดี โบง ปาย ตี อาคัร หมาน, แตห อี เฮา อึบ มืง ตี. 12 มาแล, โกบ โหลห โอว ฆูณ แม อี มูห อาดาวีด, โจว แม นี โอว ตู โบง. โจว ฆอน แม, โอว ดี โบง ปี ต็อห โอว นี. 13 โอว ยี ตู ดึห โตต มาน มืง แม ตี. โกบ กาเว โอว อาดาวีด อี มูห แดเจณ โอว, โกบ กาเว โอว บอ มืง เยรูซาแลม อี มูห มืง แปะ แฮะ ร็อห โอว, โอว ดี แตห ฆอน แม อึบ อู ครึร.” แคะ ตี ปี กาลาง เฌาพรา ดี อาซาโลวโมว.

14 วาย อัน ตี เฌาพรา แตห อึณ มึห รันซู อาซาโลวโมว. อึณ มูห อาฮาดาด อี มูห ครึร เฆ คูนดีคัม อี อึบ มืง เอโดม ตึอน. อัน บอ ตัห กาโฆห ดี อาซาโลวโมว. 15 อาต นี อาดาวีด แฮะ ดึอม กาโฆห ดี ดูอี เอโดม ตี. ดอ อัน ตี อึณ มูห อายอพัะ อี อึบ ดา ซึก อาดาวีด. อัน แฮะ ต็อห ดี ฮาว ดีบ ดูอี ยัม. อัน ยี วี ฮาว ง็อห เฆ อีมาย อาโมยว เอโดม, แตห เฆ บอกาเฆลียด ยัม. 16 อายอพัะ บอ ดูอี อีซาเรลัะ เฆ กอย ดี มืง เอโดม อาดา เดา มาเฆียน, แตห เฆ ปึอน ดี ง็อห ยัม โตต อีมาย อี กอย แคง มืง เอโดม ตึอน. 17 ดอ อัน ตี อาฮาดาด ตึอน ยี ซี มูห ฆอน ดีรอย. อัน แฮะ เตา ฮาว โดบ เฆ แดเจณ ฆูณ อัน มัง อี, แตห เฆ ฌัม มืง แอฆึบ. 18 เฆ แฮะ เลห ดี มืง มีดีอาน, ฮาว ฌัม ดี มืง พาราน. บอ ดูอี มืง พาราน ตี, เฆ บอ วี แดะ มัง อี โดบ เฆ. แฮะ ฮอต, เฆ บอ ฮาว ฌัม ดี มืง แอฆึบ อี มูห โดง กอย คูนดีคัม พาโรว. คูนดีคัม ตึอน บอ ยอด กาง, ดัว ดี เฆ. อัน บอ ดัว ปี ดี โฮม ปี ดี ตา, บอ กาดาย โดง ดี รัณ.

19 คูนดีคัม พาโรว ตึอน บอ อึง อาฮาดาด. โคว, อัน บอ ดึห วา อีบึณ อัน, วี ดัว ดี อาฮาดาด, แตห ฆาย คัด, ลาย ดึห. อัน มูห วา นาง ฮอคัม อี จืร เทบานีด. 20 วาย อัน ตี อาฮาดาด ฆาย นาง เทบานีด บอ มึห ฆอน อีมาย อู วี อี จืร อาเกนูปาด. นาง เทบานีด บอ แตห อัน กอย แคง โฮว คูนดีคัม พาโรว. อาเกนูปาด บอ กอย แคง โฮว คูนดีคัม พาโรว, แบน ฆึก ฆอน คูนดีคัม เฆ ตึอน.

21 วาย อัน ตี ดอ กอย อาฮาดาด แคง มืง แอฆึบ, อัน บอ ยึร ลอง อาดาวีด บอ ลอง ดา โบว อายอพัะ, ฆาย แฮะ ฮอต ยัม. อัน บอ วี หมาณ ดี คูนดีคัม พาโรว ต็อห, “โอว หมาณ, แตห แม ควาง โอว เวณ แคง มืง โดง กอย บรีม โอว.”

22 คูนดีคัม พาโรว วี ต็อห ดี อัน, “ดอ กอย แม โดบ โอว ดี นี, มาเซ ปี ซี โลว แม? เหมา อึณ ปาย ปี วี ซี เวณ แม โดง กอย มืง บรีม แม?” อัน วี ต็อห, “อาว ฮู โลว มาเซ. โอว ยี หมาณ, แตห แม ควาง แตห โอว เวณ, แคะ ตี.”

23 ปัน ตี เฌาพรา ปี วี แดะ ปอ อู วี, แตห อัน แบน รันซู อาซาโลวโมว. อัน วี แดะ อี จืร อาเรโฌน, อี มูห ฆอน อาเลดัะ. อัน แฮะ ดึอม เตา ดา กาณา อัน อี มูห คูนดีคัม อาฮาเดจา อี อึบ มืง จอพัะ. 24 อาเรโฌน ตี อัน ดึอม แดะ กาฌูะ ดูอี แตห เฆ โดบ อัน. อัน แบน ดา อี อึบ พึง เฆ ดา โฌน ตี. ดอ กาโฆห อาดาวีด ดี ดูอี จอพัะ ตึอน บอ อัน บอ อี โดบ อัน, เฆ ฮาว ดี มืง ดามาคู บอ กอย ดี ตี, แบน ดา ตาง อึบ มืง ดามาคู ตี. 25 ดอ กอย อาซาโลวโมว อาเรโฌน ตี แฮะ แบน รันซู ดูอี อีซาเรลัะ, แตห บอ อัน บอ อาฮาดาด ดัว ดูก ดี อาซาโลวโมว ดอ มูห โจว อัน. อาเรโฌน ยี อึบ มืง ตาง อี มูห มืง อาราม.

26 อึณ มูห อาเยโรวโบว อี มูห ฆอน อาเนบัด อี มูห ดูอี อาโมยว อาเอพารีม อี กอย ดี มืง เจรัะตัะ. อัน มูห แดเจณ อาซาโลวโมว. มา อัน มูห ยา ซีปรัห อี จืร นาง เฌเรดา. บอ อัน วี รู ดี คูนดีคัม.

27 ลอง รู อัน ดี คูนดีคัม อึณ ปาย นี. ดอ โบง อาซาโลวโมว ดี โคบ โดง กอย อัน ตึอน, อัน บอ อึณปราย โดง แฮะ หลูห ดี แรง มืง อาดาวีด, อี มูห ฆูณ อัน. 28 อาเยโรวโบว แบน ดา ซึก อี มึห โปลม ตาง. อัน ยี ซี หนึม. อาซาโลวโมว บอ ยอด ฆาน ปี โบง อัน, อัน บอ วี แตห อัน แบน ดา อี อึบ เฆ ดูอี อี โบง ฆาน อัน, อี มูห อาโมยว อาโยว.

29 ดอ อัน ตี อู เฌณ อาเยโรวโบว ตึอน บอ เลห แคง มืง เยรูซาแลม. ดอ ฮาว อัน โดบ อึณเตณ, อัน กาตูณ อาฮียา, อี มูห ดูอี บยาน โฆรห เฌาพรา, อี กอย ดี มืง ซีโลว. อาฮียา แฮะ ชึบ ซีโตว กามาย. ดอ ลาย กาตูณ ฆาย ตี, อาว มึห อี เฮา ยึร. 30 อาฮียา บอ วี ดึห ซีโตว ปี ตา อัน ตึอน, วี กายาต, แตห อึณ แบน ฆึร ดี อา ปอด. 31 แฮะ ฮอต, อัน วี ต็อห ดี อาเยโรวโบว, “ดึห ฆึร ปอด นี. เฌาพรา อี มูห เฌาพรา ปี กรึบ เฆ ดูอี อีซาเรลัะ, อัน แฮะ ต็อห, ‘โอว ดี กาย็อห ดูอี ปี อึบ อาซาโลวโมว, แตห แม วี อึบ อาดา ฆึร ครึร. 32 มาแล, โกบ โหลห โอว อาดาวีด บอ มืง เยรูซาแลม แปะ แฮะ ร็อห โอว แคง ดูอี อีซาเรลัะ บอกาเฆลียด, อาซาโลวโมว ดี ปึอน ดี อึบ อู ครึร. 33 โอว ดี ดึห เลห ครึร ฆึร โมยว ตี. โคว, เฆ แฮะ แวน โอว, วี บึง นาง กานัม เอซาทารีด ดี มืง ซีโดน, บอ เฌา เคมูก ปี กรึบ เฆ ดูอี โมวอาบ, บอ เฌา มูล็อก ปี กรึบ เฆ ดูอี อัมโมน. เฆ อาว ฮู วี โดบ โอว, อาว ฮู โบง นา บอด นา หมึอม, อาว ฮู โดบ ดารา โอว ปี ดึอม โดบ อาดาวีด อี มูห ฆูณ อาซาโลวโมว.

34 มาแล, โอว ตู ดึห เลห ดูอี บอกาเฆลียด ดี อาซาโลวโมว. โอว ดี แตห อัน แบน คูนดีคัม บอ โจว อัน. โอว โบง ปาย ตี โกบ อาดาวีด อี ปี ร็อห โอว, อี มูห แดเจณ โอว, อี โดบ ซีคยา ดารา โอว. 35 ปัน ดี มูห โจว ฆอน อัน, โอว ดี ดึห มาน มืง, วี ดัว ดูอี ฆึร ครึร ดี แม. 36 โอว ดี แตห อาซาโลวโมว อึบ อู ครึร ตี, แตห หลูกหลาน อาดาวีด อึบ มืง เยรูซาแลม เซเซ. อึณ มูห มืง แปะ แฮะ ร็อห โอว, โดง ดี กอย โอว. ปาย ตี โอว ดี วี โหลห อาดาวีด เซเซ, แตห อึณ ปี บลาง เงา ราง ปี ดี ปึอน ยึร โอว เซเซ. 37 โอว ยี แฮะ ร็อห แม, แตห แม แบน อี อึบ ดูอี อีซาเรลัะ, แตห แม โบง แคะ ล็อะ น็อห แม, แตห แม แบน คูนดีคัม เฆ. 38 เซ แม โทม โฆรห ปี กาลาง โอว ดี แม, โบง โดบ ปี ต็อห โอว ดี แม ดอน โมยว, เซ แม บอ โบง นา บอด นา หมึอม ปี อึง โอว บอ โดบ ดารา โอว ปี อาดาวีด ตึอน แฮะ โดบ โอว, โอว ดี กอย รึม โดบ แม. โอว ดี บอ แตห หลูกหลาน แม อึบ มืง ตี เซเซ, แตห อึณ ปี แปะ แฮะ โบง โอว ดี อาดาวีด ตึอน. โอว ดี อาบ โตต มืง ดูอี อีซาเรลัะ ดี แม. 39 โอว ดี โบง, แตห ดูอี อาดาวีด แบน น็อห ลึร. โอว ยี ตู แตห อึณ แบน เซเซ.’” แคะ ตี เฌาพรา แฮะ จัร อาฮียา กาลาง ดี อาเยโรวโบว ตึอน.

40 โกบ ปาย ตี อาซาโลวโมว วี ซี ง็อห อาเยโรวโบว. อาเยโรวโบว บอ เตา ฮาว มืง แอฆึบ, โดง กอย คูนดีคัม อาซีซัก. อัน บอ กอย แคง มืง แอฆึบ ตี, แตห อาซาโลวโมว กอ ยัม.

41 ลอง ปี ปาย ดอ มูห โจว อาซาโลวโมว, อี หณัม ดึอม กาลาง ดอน โมยว, แคะ ปี โบง อัน, บอ ลอง อางยาน อัน, แฮะ แดม อูน โตต แคง บับ อาซาโลวโมว ตึอน. 42 อาซาโลวโมว กอย แคง มืง เยรูซาแลม, อึบ บึง มืง ดูอี อีซาเรลัะ, อึณ กอ โนะ พวน ฆึร ซีนัม. 43 อัน บอ ยัม โดบ ดา ดา อัน เฆ ตึอน. เฆ บอ อูน อัน แคง บาเรว. เฆ บอ ดีบ อัน แคง มืง อี มูห มืง ฆูณ อัน อาดาวีด. ฆอน อัน อี จืร อาเรโบม บอ วี ปลูะ อัน.