1 วาย ตี อึณ มึห นาง ฮอคัม อี อึบ มืง เซบา, อัน บอ ยึร ลอง อาซาโลวโมว แฮะ มึห ซาเร บอ ปวน ปี ดัว เฌาพรา ดี อัน. อัน บอ ตัห โดง กอย อาซาโลวโมว บอ ดีหมอด ลอง อี หณาบ อี คึกคัม, แตห อัน เทว อางยาน อาซาโลวโมว. 2 อัน บอ ดึห ดูอี กืน โดบ อัน. บอ อึณปร็อง กาฮาต อี ดาง อึณกรึห อูห หงูน บอ ครีว บอ แซณ อี ง็อห ตาง กาเซา เฆ ดึห ตัห ฌัม มืง เยรูซาแลม โดง กอย อาซาโลวโมว ตึอน. นาง ตึอน บอ กาลาง ดี อาซาโลวโมว ลอง ปี กาพา อัน แบน โมยว แบน โมยว. 3 อาซาโลวโมว บอ นับ ดี กาลาง ลอง ปี ดีหมอด อัน ตี ดอน โมยว. อาว มึห คอ อู โมยว ปี ตู นับ อาซาโลวโมว ดี กาลาง. 4 นาง ฮอคัม อี ตัห มืง เซบา ตึอน อัน บอ ยึร ปี ปาย อางยาน อาซาโลวโมว บอ ยึร บอ โฮว แปะ แฮะ โบง อัน ตึอน, 5 อัน บอ ยึร ปี ดี โฮม ปี เบลห เฆ แคง โฮว อัน, บอ ปี ปาย อามู อามาด อัน ดี ตูต ดี กอย. อัน บอ ยึร แดเจณ อัน อี ชึบ ครึง ชีด, อี ลึมลา เฆ ดูอี โฮม รึม บอ เฆ อี ดัว ปี ดี เดียง ดี อัน. อัน บอ ยึร บอ อึณแตง อี โฮะ ดี โฮว เฌาพรา ตึอน. อึณ แตห อัน อาม กาเซา.

6 อัน วี ต็อห ดี คูนดีคัม, “ดอ กอย โอว มืง โอว, โฆรห แปะ แฮะ ยึร โอว ลอง แปะ แฮะ โบง แม บอ ลอง อางยาน แม ดอน โมยว, อึณ แฮะ มูห แฮะ หมาน. 7 มาแล, เซ โอว ตู ตัห ฌัม แตห โอว ยึร ดี งาย โอว, โอว ตู หณึม โฆรห ตี. ปี แค อี ดี โอว อาว มูห คอ อู กาแต. อางยาน แม บอ โกรวกราม แม ดอน โมยว แฮะ หลึอม แปะ แฮะ ยึร โอว ลอง อัน ตี. 8 เฆ ดูอี อี โดบ แม บอ เฆ อามู อามาด แม อี กอย รึม โดบ แม, อี แฮะ ปึอน ดี โทม อางยาน แม, เฆ ดอน อี แฮะ ดาคึย อาคัร หมาน. 9 โอว อืบ เฌาพรา อี มูห เฌาพรา ปี กรึบ แม, อี แฮะ อึง แม, แฮะ แตห แม อึบ ดูอี อีซาเรลัะ. โกบ ร็อก เฌาพรา ดูอี อีซาเรลัะ เซเซ, อัน แฮะ แตห แม แบน คูนดีคัม, แตห แม ซูงพยาด อามู เฆ, แตห อึณ มูห, แตห อึณ หมาน ดอน โมยว.”

10 แฮะ ฮอต กาลาง โฆรห ตี, นาง ฮอคัม ตึอน บอ ดึห ครีว อู มาย็อห ดี อา ฆึร ทาเลน^a บอ อึณกรึห อูห หงูน กืน, บอ แซณ อี ง็อห ตาง ตึอน, อาบ ดัว ดี คูนดีคัม. วาย ตี, อาเซ บอ ดึห ดัว อึณกรึห อูห หงูน แบน โมยว แบน โมยว, อึณ ตู ดาน ปี ดึห นาง ฮอคัม อี อึบ มืง เซบา, ดัว ดี อาซาโลวโมว ตึอน.

11 อึณ บอ มึห รึร ซังโพว อาฮีรัม อี ฮาว ดี มืง โอวพี ตึอน, ดึห ตัห ครีว บอ เฮ นัมซา เฆ แซณ อี บอด กาเซา. 12 คูนดีคัม บอ ดึห เฮ นัมซา ตี, โบง แบน ร็อง แคง โฮว เฌาพรา บอ แคง โฮว อัน. อัน โบง บอ ดีง แบน โมยว แบน โมยว, ดัว ดี เฆ อี ต็อห โหมว. วาย ตี กอ ฌัม อาตึร นี, อาว ฮู มึห เฮ นัมซา อี กืน แคะ ตี.

13 คูนดีคัม อาซาโลวโมว บอ แตห นาง ฮอคัม หมาณ แคะ ซี หมาณ อัน, วี ดัว โตต ดี อัน. แฮะ ฮอต, นาง ฮอคัม เฆ อี โดบ อัน, เฆ บอ วี วีว มืง โดง กอย เฆ.

14 อาดา อู ซีนัม คูนดีคัม อาซาโลวโมว บอ ปึอน ครีว อาดา เดา มาย็อห ดี เดา ฆึร ดี เดา ทาเลน.^b 15 แดง ตี, ปี วี มึห ครีว จึง ปี โลว ดัว เฆ ดูอี อี กาจึห กาย็อง บอ เฆ คูนดีคัม อาโมยว อาราบ บอ เฆ ดา ตาง อี อึบ มืง เฮา.

16 คูนดีคัม อาซาโลวโมว บอ ดึห ครีว ตี, โบง มัง ฆ็อง อา มาย็อห โบ็ง อาดา ดา ซึก อัน. อู โบ็ง, อัน ตา ครีว เดา มาย็อห เบคา.^c 17 บอ มัง ฆ็อง อี ดีแตด อัน วี โบง โอย มาย็อห โบ็ง. อู โบ็ง, อัน ตา ครีว โอย มีนา.^d คูนดีคัม อูน โกรว ตี แคง โฮว อัน อี จืร แปร เลบานูน ตึอน.

18 คูนดีคัม วี โบง บอ มาลาง. อัน ดึห แปละ มาซาง, ฮับ แตห อึณ ชีด. อัน ดึห ครีว หลึบ นา เรต. 19 มาลาง อัน ตี, อึณ มึห อึณแตง เดา บล็อะ. ดี ฆีณ อัน นา ปัน, อึณ กาลัง. ดี อา บลาก โดง ดี ตูต ตึอน, อึณ วี มึห โดง เบลห แด อัน. อึณ บอ มึห ราง มาครังซี อา โดว อี จ็อง นา โคบ อัน. 20 อึณ วี มึห ราง มาครังซี ฆึร ดี อา โดว อี จ็อง ดี อึณแตง ดอน บล็อะ บอ อา บลาก. แคง มืง ดอน มืง, อึณ ตู ดึอม มึห อี ปี มาลาง ตี. 21 ซีลัยะ ปี เดียง คูนดีคัม อาซาโลวโมว บอ ซีลัยะ ปี เบลห อูน อัน แคง โฮว อัน, อี จืร แปร เลบานูน ตึอน, อึณ มูห โตต ครีว. อาว มึห อี มูห รึอน. โคว, ดอ มูห โจว อาซาโลวโมว, รึอน ตู ง็อห ตาง. 22 อาซาโลวโมว บอ มึห รึร ซังโพว อี กอย ดี บาง อึม นัมมูกซารา. บอ รึร ซังโพว อาฮีรัม ตึอน กอย ดี ตี. โอย ซีนัม อู เฌณ, เฆ ดึห ตัห ครีว เฆ รึอน, บอ แปละ มาซาง บอ มาฟา บอ มาปรัะ.

23 คูนดีคัม อาซาโลวโมว มึห กืน โกรวกราม เฆ อางยาน หลึอม คูนดีคัม ดอน กาดัง แดง กาดาย นี. 24 ดูอี บอ กาดาย บอ ตัห โดง กอย อาซาโลวโมว, ซี โทม อางยาน ปี ดัว เฌาพรา ดี อัน. 25 ดอน ซีนัม เฆ ดูอี อี ตัห ตึอน บอ ดึห ตัห คอซอง อี มูห ซีลัยะ ครีว, ซีลัยะ รึอน, ครึง ตา, ครึง กาโฆห ดา ซึก, อึณกรึห อูห หงูน บอ อึณปร็อง เฆ มาโลว. เฆ ดึห ตัห อาบ โกรว ตี ดี คูนดีคัม อาซาโลวโมว.

26 อัน บอ กาฌูะ อูน ลักเลา บอ ดา ซึก อี ป็อะ อึณปร็อง เฆ ตึอน. ลักเลา อัน ตึอน มึห อู แหรณ ดี พวน มาย็อห หลาง. ดา ซึก อัน กอย อู หมึณ ดี อา แหรณ วี. อัน แฮะ อูน เฆ ตี แคง มืง อี โลว ยอด ลึมลา เฆ ลักเลา อัน บอ แคง มืง เยรูซาแลม. 27 คูนดีคัม เบลห อูน กืน รึอน แคง มืง เยรูซาแลม, แตห อึณ กอ ปี มาว. บอ เฮ อารีด อึณ กืน กาเซา แตห อึณ กอ ปี เฮ เบล ดีปู อี ลัต แคง ฆลัง. 28 อึณปร็อง อี มูห โกรว อาซาโลวโมว ตึอน, อัน ดึห ตัห แคง มืง แอฆึบ บอ มืง กูย. เฆ อี จึห อี ย็อง โกรว คูนดีคัม, เฆ ดึห ตัห โดว เฆ ตี แบน พึง แบน พึง. 29 เฆ ดึห ลักเลา แคง มืง แอฆึบ, อู หลาง อาดา รึอน แฌต เดา มาย็อห โบ็ง. บอ อึณปร็อง อู โดว เฆ ดัว รึอน แฌต อู มาย็อห ดี พัน ฆึร โบ็ง. เฆ บอ ดึห โกรว ตี, วี ย็อง ดี คูนดีคัม ดอน กาดัง อี อึบ ดูอี เฮทีด บอ เฆ ดูอี อาราม.