1 อาซาโลวโมว แฮะ ฮอต โบง โฮว เฌาพรา บอ โฮว อัน, แฮะ ฮอต โตต ดอน โมยว แคะ ปี ซี โบง อัน. 2 วาย อัน ตี เฌาพรา ปี วี ตัห กาปลูห ดี อาซาโลวโมว ปอ อู เฌณ. อึณ ปี ดอ กาปลูห อัน ดี มืง ฆีปอง ตึอน.

3 เฌาพรา วี ต็อห ดี อัน, “โอว แฮะ ยึร โฆรห ซาคึร แปะ แฮะ หมาณ แม ดี โอว. โอว ดี แตห โฮว ปี ซัม แม ตี แบน โฮว บอด. โอว ดี กอย ดี ตี เซเซ. อาเซ บอ ตัห ดี ตี, โอว ดี บอ ยอด อัน, ร็อก กาเว อัน เซเซ.

4 อึณ ยี มูห แม, เซ น็อห แม บอ ซืร, เซ โอว บอ ยึร ปี โบง แม แฮะ บอด ปี ปี โบง อาดาวีด อี มูห ฆูณ แม, เซ แม บอ โทม แปะ แฮะ กาลาง อูน โอว ดี แม บอ โดบ ดารา อากยาม อางยาน โอว, 5 โอว ดี แตห เฆ หลูกหลาน แม อึบ มืง อีซาเรลัะ เซเซ. โอว แฮะ ดึอม ต็อห ดี ฆูณ แม, ‘หลูกหลาน แม ดี ปึอน ดี อึบ มืง อีซาเรลัะ เซเซ.’

6 เซ แม บอ หลูกหลาน แม ตู วี โดบ โอว, วี วัห อึณเตณ โอว, อาว ฮู โดบ ดารา เฆ อากยาม อางยาน โอว, เซ เฆ วี แวน โอว, วี โดบ เฌา ปอ กาดัง บอ กรึบ เฆ, เซ เฆ โบง ปาย ตี, 7 โอว ดี บอ แวน เฆ ดูอี อีซาเรลัะ, ตู แตห เฆ กอย แคง มืง ปี ดัว โอว ดี เฆ. บอ โฮว ตี แปะ แฮะ แตห โอว แบน โฮว บอด, โอว ดี แวน. อี มูห ดูอี อีซาเรลัะ, เฆ ดี แบน ปี แนนัะ ปี กาณัห เฆ ดูอี เฮา. 8 โฮว อี ตาง อี ชีด กาเซา ดอ ตี นี มืร, อึณ ดี ลึร โตต. อี เฮา อี กาโลห โดบ อึณเตณ นี, เฆ ดี อาม บอ แนนัะ ต็อห, ‘โกบ มาเซ เฌาพรา แฮะ โบง แตห อึณ ชึม ปาย นี แคง มืง นี, บอ แคง โฮว อัน นี?’

9 อี เฮา ปี ดี วี ต็อห, ‘เฌาพรา แฮะ ดัม หมาบ ดี เฆ. โกบ แฮะ แวน เฆ เฌาพรา อี มูห เฌาพรา อี ดึห เลห ดา ดา เฆ แคง มืง แอฆึบ ตึอน. เฆ แฮะ วี บึง กรึบ เฌา ปอ อู กาดัง.’” แคะ ตี, เฌาพรา กาลาง ดี อาซาโลวโมว.

10 วาย อัน ตี อึณ บอ โนะ อา ฆึร ซีนัม, อาซาโลวโมว แฮะ ซัม โฮว อา กาตูะ. อึณ มูห โฮว เฌาพรา อู กาตูะ บอ โฮว โดง กอย อัน อู กาตูะ. 11 อาฮีรัม อี มูห คูนดีคัม แคง มืง ทูโรว ตึอน, อัน มืร แฮะ ดัว เฮ อารีด บอ เฮ อึณเก บอ ครีว แคะ ปี โลว อัน. โคว อัน ตี, อาซาโลวโมว บอ ดึห มืง อา ฆึร มืง อี กอย แคง กาดาย มืง ฆาลีเล, ดัว ดี คูนดีคัม อาฮีรัม ตึอน. 12 อาฮีรัม บอ เลห ดี มืง ทูโรว ตัห ยอด มืง ปี ดัว อาซาโลวโมว ดี อัน ตึอน, อาว ล็อะ น็อห อัน.

13 อัน วี ต็อห, “อึย แม วา, มืง ปี ดัว แม ดี โอว, โยว อึณ มูห มืง ปาย เหมา?” มืง เฆ ตี, อัน วี แตห เฆ จืร กาดาย กาบูลัะ. กอ ฌัม อาตึร นี, เฆ ต็อห ปาย ตี.

14 อาฮีรัม ตึอน บอ ดัว ครีว ดี อาซาโลวโมว อู มาย็อห ดี อา ฆึร ทาเลน.^a

15 ดอ ซัม อาซาโลวโมว โฮว เฌาพรา บอ โฮว อัน บอ ดี โคบ โดง กอย อัน, อัน บอ แฆบ ดูอี, แตห เฆ โบง ฆาน อัน. เฆ ดูอี ปี แฆบ อัน, เฆ บอ โลว โบง แรง มืง เยรูซาแลม. บอ มืง ฮาจอ, มืง มีกีตอ บอ มืง เกจา เฆ โลว ซัม. 16 อี มูห มืง เกจา ตี, คูนดีคัม พาโรว อี อึบ มืง แอฆึบ, อัน แฮะ ดึอม กาโฆห บอ โดะ แวน มืง ตี. อัน บอ ง็อห ดูอี กานัณ อี กอย แคง มืง ตี, วี ดึห มืง ตี, วี อาบ แตห อึณ แบน ลักซอง ดัว ดี ฆอน อีบึณ อัน อี มูห อีบึณ อาซาโลวโมว ตึอน. 17 โกบ อึณ ปาย ตี อาซาโลวโมว ปึอน ดี แด มืง เกจา. บอ มืง เบดโฮวรูน อี กอย นา เตต, 18 บอ มืง บาลาด, มืง ทามา อี กอย แคง แปร กาฮ็อห อี มูห กาดาย ปี อึบ อาซาโลวโมว, 19 บอ มืง โดง อูน อาซาโลวโมว โกรวกราม อัน, มืง โดง กอย เฆ อี ยอด ลึมลา ลักเลา เฆ อึณปร็อง อัน บอ ดอน โมยว แปะ แฮะ ซัม อาซาโลวโมว แคง มืง เยรูซาแลม บอ ปี โบง อัน แดง นอน เลบานูน บอ แคง มืง อัน ดอน โปละ, เฆ ดูอี ปี แฆบ อัน ตึอน, เฆ โลว โบง โตต ดอน โมยว.

20 แคะ กอย เฆ ดูอี อาโมยว เฮา อี ตู มูห ดูอี อีซาเรลัะ อาซาโลวโมว วี แตห เฆ แบน หมาย อัน, กอ ฌัม อาตึร นี. อึณ มูห ดูอี อาโมวรีด, ดูอี เฮทีด, ดูอี เพเรซีด, เฆ ดูอี ฮีวีด บอ ดูอี เยบูซีด. 21 อึณ มูห เฆ หลูกหลาน ดูอี อี ซี ฆีด แคง มืง ตี ปี ตู ปึอน ดี ง็อห ดูอี อีซาเรลัะ ดอ มึอน, เฆ บอกาเฆลียด วี แบน หมาย อาซาโลวโมว. 22 อี มูห ดูอี อีซาเรลัะ อาซาโลวโมว ตู แตห เฆ แบน หมาย อี เฮา. อัน แตห เฆ แบน ดา ซึก, แตห เฆ แบน แดเจณ อัน, แบน อามู อามาด อัน อี อึบ ดา ซึก อัน อี อึบ พึง เฆ อี ป็อะ ลักเลา อัน บอ อี ป็อะ อึณปร็อง อัน. 23 อี มูห อามู อามาด อี ตาง อี อึบ ฆาน ปี โลว โบง ดอน โมยว เฆ กอย พัน มาย็อห ดี พัน ฆึร วี.

24 อี มูห ฆอน อีบึณ คูนดีคัม พาโรว ตึอน, อัน บอ เลห แคง มืง อาดาวีด, วี ฮาว กอย แคง โฮว ปี โบง อาซาโลวโมว ดัว ดี อัน. โฮว นาง ตี อาซาโลวโมว บอ โบง โคบ โฮว อัน.

25 อู ซีนัม โอย เฌณ, อาซาโลวโมว แรน ปี ดี หลู อัน อี โดะ ดี เงา, บอ ปี หลู อี กอย กาฌูะ โฮม รึม. อัน หลู ฌึร ตี แดง กาโช็ง หลู ปี โบง อัน ตึอน. อัน บอ ดึห ซีนัม อูห หงูน, โดะ แดง กาโช็ง อัน, แตห อึณ ล็อะ น็อห เฌาพรา. ปาย ตี อัน ปึอน ดี โบง โตต ดอน โมยว ปี กาอาบ โบง แคง โฮว เฌาพรา.

26 อาซาโลวโมว บอ โบง รึร ซังโพว ดี มืง เอจาโยนกาบา อี กอย กาตัด มืง เอลาด ดี โคบ ดีโหนง เรณ แคง กาดาย มืง เอโดม ตึอน.

27 คูนดีคัม อาฮีรัม ตึอน บอ จัร ดูอี อัน อี นับ ดี ป็อะ รึร, อี นับ ปี ปาย อึม ตาง, แตห เฆ ป็อะ รึร ซังโพว โดบ ดูอี อาซาโลวโมว เฆ ตึอน.

28 เฆ บอ ฮาว ดี มืง โอวพี, เฆ บอ ดึห ตัห ครีว พวน มาย็อห ดี อา ฆึร ทาเลน, ตัห อาบ ดี อาซาโลวโมว.^b