1 ปัน ตี อาซาโลวโมว บอ แดะ แคะ กอย ดา ตาง เฆ ดูอี อีซาเรลัะ อี มูห ดา ตาง อึบ ครึร เฆ. อัน แดะ บอ ฆีณ อึณโฮม เฆ. อัน จัร เฆ ตัห โดง กอย อัน แคง มืง เยรูซาแลม, แตห เฆ ดึห ตัห ฌีดืก เฌาพรา อี กอย แคง มืง อาดาวีด, อี มูห โดง จืร ฌีโอน ตึอน. 2 เฆ ดูอี อีซาเรลัะ บอกาเฆลียด บอ ตัห กาฌูะ โดง กอย คูนดีคัม อาซาโลวโมว. ดอ อัน ตี อึณ มูห อาคราว โบง เฆ บลอย, ดอ มูห มาเฆียน อึณบู, อี จืร มาเฆียน เอซานีม.

3 เฆ บอกาเฆลียด บอ ตัห. เฆ อี มูห ดูอี หลู ดี เฌาพรา บอ โจะ ฌีดืก เฌาพรา. 4 เฆ บอ ดึห ฌีดืก เฌาพรา บอ ทึบ บีก บอด บอ โกรวกราม อี บอด อี กอย แคง ทึบ บีก ตี. อึณ มูห เฆ ดา อี หลู ดี เฌาพรา บอ ดูอี อาโมยว อาเลวี อี โจะ ตัห โกรว ตี ดอน โมยว. 5 คูนดีคัม อาซาโลวโมว บอ เฆ ดูอี อีซาเรลัะ อี ตัห กาฌูะ โดง กอย อัน ตึอน, เฆ บอกาเฆลียด ตัห กอย นา อาต ฌีดืก เฌาพรา ตึอน. เฆ บอ หลู มาบู เฆ มามัก กืน กาเซา, กอ ฮู นับ ดี ตีห.

6 ดา อี หลู ดี เฌาพรา, เฆ บอ ดึห ฌีดืก ตี, ฮาว อูน แคง โฮง อี กอย นา แคง โฮว เฌาพรา อี มูห โดง บอด หลึอม โตต. เฆ เบลห อูน ฌีดืก ตี, แตห อัน กอย ครึม เพียง อารึบ อามู อามาด เฌาพรา อี จืร เครูบ ตึอน. 7 อารึบ เครูบ อา กาดัง ตี, ฆาย บลัห เพียง ฆาย นา แดง ฌีดืก ตึอน, แตห อึณ ซีบลึก โตต ฌีดืก บอ มัง ฆอด อัน. 8 เฆ บอ ดืด เลห มัง ฆอด อัน อี แจก. เซ อี กอย นา อาต โดง บอด หลึอม โตต นา แคง โฮว, แฮะ ปึอน ยึร. เซ อี ยี กอย นา แคง แวง นา เรต โฮว, อาว ลึห. อึณ ยี กอย ปาย ตี กอ ฌัม อาตึร นี.

9 นา แคง ฌีดืก ตี อึณ มึห มี มาว อา ดีพลัะ ปี ดึอม ฮับ อูน อาโมวแซ ดอ กอย อัน แดง นอน โฮวเรบ ตึอน.^a ดอ อัน ตี เฌาพรา แฮะ ดัว กาดีก ซัดฌา ดี ดูอี อีซาเรลัะ วาย เลห เฆ แคง มืง แอฆึบ ตึอน. แดง ตี เฆ ตู อูน มาเซ แคง ฌีดืก ตี.

10 ปัน ตี ดูอี อี หลู ดี เฌาพรา บอ เลห ดี โฮว เฌาพรา, อึณ วี มึห อึณอูะ อี ตัห แตห กอ โนะ แคง โฮว ตึอน. 11 เฆ ดูอี หลู ดี เฌาพรา ตู ปึอน โบง ปี โลว โบง เฆ โกบ อึณอูะ ตึอน. อึณ มูห อาพูง ดังโคว เฌาพรา อี แฮะ โนะ แคง โฮว เฌาพรา ตี.

12 อาซาโลวโมว บอ ต็อห, “เฌาพรา แฮะ ต็อห, อัน ดี กอย แคง อึณอูะ เฮต. 13 ดอ ตี นี, โอว แฮะ โบง อาคัร หมาน โฮว ดี แม เฌาพรา. อึณ แฮะ ตาง, แฮะ ชีด, แตห แม ปึอน ดี กอย เซเซ.”

14 ปัน ตี คูนดีคัม บอ วี มางัห ยอด เฆ ดูอี กืน อี มูห ดูอี อีซาเรลัะ, อี แฮะ จ็อง โคบ อัน. อัน บอ ม็องการา แตห ดี เฆ. แฮะ ฮอต, อัน บอ ซาคึร.

15 อัน ต็อห, “โอว อืบ แม เฌาพรา, อี มูห เฌาพรา ปี กรึบ ดูอี อีซาเรลัะ. แม แฮะ แตห อึณ ฮอต โตต ดอน โมยว แปะ แฮะ ดัว แม กาดีก ซัดฌา ดี อาดาวีด อี มูห ฆูณ โอว. แม แฮะ ดึอม ต็อห, 16 ‘ซีณ ดอ ดึห เลห โอว ดูอี อีซาเรลัะ แคง มืง แอฆึบ ตึอน, โอว ตู ดึอม ร็อห มืง, ตู ดึอม ร็อห ครึร, แตห เฆ โบง โฮว ดี โอว, แตห โอว ปึอน ดี กอย. โอว ยี แฮะ ร็อห อาดาวีด, แตห อัน อึบ ดูอี อีซาเรลัะ อี มูห อาโมยว ดูอี ปี อึบ โอว.’

17 ปัน ตี ฆูณ โอว แฮะ คราม ดี ซัม โฮว แม เฌาพรา อี มูห เฌาพรา ปี กรึบ ดูอี อีซาเรลัะ. 18 แม เฌา ยี วี ต็อห ดี ฆูณ โอว, ‘แม แฮะ คราม ดี ซัม โฮว แตห โอว ปึอน ดี กอย นา แคง. ปี คราม แม ตี แฮะ มูห, แฮะ หมึอม. 19 แม ยี ตู ปึอน ซัม โฮว ตี. ฆอน อีมาย แม อี ดี ซัม โฮว, แตห โอว กอย นา แคง.’

20 แม เฌาพรา แฮะ ฮอต โบง แคะ ปี ต็อห แม ตี. โอว แฮะ ปลูะ อาดาวีด อี มูห ฆูณ โอว, วี อึบ มืง อีซาเรลัะ, แตห อึณ โดบ แคะ ปี ต็อห แม เฌาพรา. โอว มืร แฮะ ซัม โฮว, แตห แม เฌาพรา กอย นา แคง. แม มูห เฌาพรา ปี กรึบ ดูอี อีซาเรลัะ. 21 แคง โฮว แม ตี, โอว แฮะ โบง บอ โดง ดี อูน ฌีดืก อี มูห ฌีดืก ปี อูน เย กาดีก ซัดฌา ปี ดัว แม เฌา ดี ดา ดา เย ดอ เลห เฆ แคง มืง แอฆึบ ตึอน.”

22 อาซาโลวโมว แฮะ ฮอต กาลาง โฆรห ตี, อัน บอ ตัห จ็อง โคบ กาโช็ง หลู ดี เฌาพรา, แตห เฆ ดูอี กืน บอ ยึร. อัน บอ โซ็ง แด อัน โฮะ นา แดง บอ ซาคึร.

23 อัน ต็อห, “อึย แม เฌาพรา, แม มูห เฌาพรา อี อึบ ดูอี อีซาเรลัะ. บอ แคง ฆางหราว บอ แดง กาดาย อาว มึห เฌาพรา ปอ อู กาดัง อี คัม กาดีก ซัดฌา ปี ดัว อัน, อี มึห น็อห ร็อก กาเว ดูอี อี โดบ ซีคยา อัน. 24 อี มูห ฆูณ โอว อี จืร อาดาวีด, แม เฌาพรา แฮะ กาแซณ ดี อัน, แฮะ วี โบง แตห อึณ เฌะฌูง โตต ปี อาตึร นี.

25 อึย แม เฌาพรา อี มูห เฌาพรา ปี กรึบ ดูอี อีซาเรลัะ, ดอ ตี นี โอว หมาณ, แตห อึณ บอ แบน ปี ดึอม กาลาง แม ดี ฆูณ โอว. แม แฮะ ต็อห, ‘เซ หลูกหลาน แม บอ โบง นา บอด นา หมึอม ดี โอว, แตห อึณ ปี แม แฮะ โบง นา บอด นา หมึอม ดี โอว, โอว ดี แตห เฆ อึบ มืง อีซาเรลัะ เซเซ, อาว กาดัด ดอ เหมา.’ โอว หมาณ, แตห แม บอ โบง โดบ โฆรห แม ตี. 26 แม เฌาพรา อี มูห เฌาพรา อี อึบ ดูอี อีซาเรลัะ, โอว วี หมาณ ปอ อู โมยว. แม แฮะ ดึอม ต็อห ดี ฆูณ โอว,

27 ‘แม ทาง, โอว ดี กอย แดง กาดาย นี?’ โอว ยี นับ, ฆางหราว อี จา กาเซา, อึณ ตู ฆลึม แตห อึณ แบน โดง กอย แม เฌา. โฮว แปะ แฮะ ซัม โอว, อึณ แว ตู ฆลึม, แตห แม ปึอน ดี กอย. 28 แม เฌาพรา อี มูห เฌาพรา ปี กรึบ โอว, โอว ยี หมาณ แตห แม โทม โฆรห ปี ซาคึร, ปี หมาณ โอว ดี แม อาตึร นี. 29 โอว หมาณ แม เฌา, แตห แม ยอด โฮว แม นี ดอง วัน ดอง คืน เซเซ. อึณ มูห โดง ตี, แปะ แฮะ ต็อห แม เฌา, ‘โอว ดี กอย ดี ตี เซเซ.’ โคว, โอว หมาณ, แตห แม โทม โฆรห ปี ซาคึร โอว นี. 30 แม เฌา ปี บอ กอย แคง ฆางหราว, หมาณ, แตห แม ยึร โฆรห โอว อี มูห แดเจณ แม, แตห แม ยึร บอ โฆรห เฆ ดูอี อีซาเรลัะ อี มูห ดูอี อาโมยว แม. เซ เฆ บอ ซาคึร, แตห แม เฌา โทม โฆรห เฆ, แตห แม บอ ฆ็อห แวน บอ หมาบ เฆ.

31 เซ อึณ บอ มึห ดูอี อี แฮะ กาลูต ดี ฆึก อัน อี กอย กาตัด อัน, เซ อัน ดี กาดูห ดี คัม โฆรห ซัมดืง, เซ อัน บอ โลว ตัห ดืง ดี อาต กาโช็ง หลู แคง โฮว แม เฌา นี, 32 แตห แม เฌา อี กอย ฆางหราว บอ ยึร โฆรห ตี, แตห แม ซูงพยาด อามู เย บอกาเฆลียด. เฆ อี มึห หมาบ, แตห เฆ คัม หมาบ เฆ. เฆ อี ตู มึห หมาบ, แตห แม แตห ดอน อี นับ ลอง ตู มึห เฆ หมาบ.

33 เฆ ดูอี อีซาเรลัะ อี มูห ดูอี ปี อึบ แม, เซ เฆ ดี ชึม ดี รันซู เฆ โกบ แฮะ โบง เฆ ปี ตู อึง แม, เซ เฆ บอ วี ตัห แคง โฮว นี, ซาคึร หมาณ ดี แม เฌา, 34 แตห โฆรห เฆ วี ลึห ดี แม แคง ฆางหราว, แตห แม วี ฆ็อห แวน หมาบ เฆ. แตห แม วี แยต เฆ, แตห เฆ วี ฌัม แคง มืง แปะ แฮะ อาบ แม เฌา ดี ดา ดา เฆ ตึอน.

35 เซ ฆลาย ตู โจห โกบ แฮะ โบง เฆ หมาบ, เซ เฆ บอ วี มางัห, ยอด บลาก กอย โฮว นี, เซ เฆ วี โหลห ลอง โลว คัม เฆ ดูก โกบ หมาบ เฆ, เซ เฆ บอ แวน หมาบ เฆ, วี ซาคึร ดี แม, 36 แตห แม เฌา บอ โทม โฆรห ปี ซาคึร เฆ แคง ฆางหราว, แตห แม ฆ็อห แวน หมาบ เฆ อี มูห ดูอี อีซาเรลัะ ดูอี ปี อึบ แม เฌา. แตห แม เฌา วี มาโนว อึณเตณ บอด อึณเตณ หมึอม, แตห เฆ วี โดบ. บอ ฆลาย, แตห อึณ วี โจห แดง กาดาย แปะ แฮะ อาบ แม เฌา ดี เฆ.

37 แคง มืง เย ตี, เซ อึณ บอ มึห แลง โจห, แตห ดูอี บอ เอต ปี ดี โฮม, เซ บอ มึห คูน เฆียด ตัห บูด, แตห เฮ เฆ เบล กอ ยัม, เซ บอ มึห มาวัะ เฆ มาอาโฌ็ง โฮม ปี ซัม เฆ, เซ บอ มึห รันซู อี แป มาน มืง เฆ ตี, เซ บอ มึห เซา โมยว เหมา อาว ต็อห, 38 เซ ดูอี อู วี แคง ดูอี อีซาเรลัะ บอ ซาคึร ดี แม เฌา โกบ แฮะ กาดูห อัน ดี คัม ดูก ฌึร ตี, เซ อัน บอ วี มางัห นา กอย โฮว นี, วี ซาคึร หมาณ โมยว เหมา ดี แม เฌา, 39 แตห โฆรห เฆ ลึห ดี แม เฌา แคง ฆางหราว, แตห แม โทม. แม เฌา นับ โตต ปี ปาย น็อห พึอม เย. หมาณ แม เฌา, แตห แม โบง ดี เย ดอน อี แคะ ปี ปาย แคง น็อห เย. โคว, อึณ มึห มี แม เฌา อี นับ โตต ปี ปาย น็อห พึอม ดูอี ดอน โมยว. 40 แตห แม โบง ปาย ตี. แตห เฆ โรวเซ แม เฌา ดอ ซี กอย เฆ แคง มืง ปี อาบ แม ดี ดา ดา เย ตี.

41-42 แดง นี, อึณ ดี บอ มึห ดูอี อาโมยว เฮา อี ตู มูห ดูอี อีซาเรลัะ, เฆ อี ตัห โต็ง, เฆ ดี ยึร ลอง ปี ปาย อาพูง ดังโคว แม เฌา, อึณ ตาง กาเซา, เฆ ดี บอ ยึร ปี โบง แม เฌา แฮะ กยัะ กาเซา. เซ เฆ ดูอี ตี บอ ตัห มืง โต็ง, วี มางัห บลาก กอย โฮว นี, ซาคึร ดี แม เฌา, 43 แตห แม เฌา โทม โฆรห เฆ แคง ฆางหราว, อี มูห โดง กอย แม. แตห แม โบง โดบ แคะ ปี ซาคึร หมาณ เฆ ดูอี อาโมยว เฮา ตี, แตห ดูอี บอ กาดาย นี กอ นับ ลอง แม เฌา, แตห เฆ บอ โรวเซ แม, แตห อึณ ปี เฆ ดูอี อีซาเรลัะ แฮะ โรวเซ แม เฌา, แตห เฆ บอ นับ โฮว แปะ แฮะ ซัม โอว ตี, อึณ มูห โฮว แม เฌา.

44 เซ แม เฌา จัร ดูอี แม ฮาว กาโฆห ดี รันซู เฆ, แม บอ จัร เฆ ฮาว นา เหมา, เซ เฆ บอ มางัห ยอด มืง แปะ แฮะ ร็อห แม, เซ เฆ บอ วี มางัห ยอด บอ โฮว นี แปะ แฮะ ซัม โอว อาดา แม เฌา, เซ เฆ บอ ซาคึร ดี แม เฌา, 45 แตห แม เฌา อี กอย ฆางหราว วี ยึร โฆรห ปี ซาคึร เฆ ตี.

46 โคว, อึณ มืร ตู มึห ดูอี คอ อู วี, อี ตู นับ ดี โบง หมาบ. เซ เฆ บอ โบง นา ตู หมึอม ดี แม เฌา, เซ แม เฌา บอ รู ดี เฆ บอ แตห รันซู เฆ แป เฆ, เซ รันซู เฆ ปี บอ ดึห ฮาว เฆ มืง โต็ง, มืง กาตัด, 47 ดอ กอย เฆ แคง มืง อี เฮา, เซ เฆ บอ วี กาพา โหลห ลอง แปะ แฮะ โบง ลูต เฆ, บอ วี กาลาง หมาบ เฆ ต็อห, ‘เย แฮะ ฮอต โบง มืก, แฮะ โบง อี ตู บอด ตู หมึอม, แฮะ โบง นา จีจีว.’ 48 เซ เฆ บอ บยอง อาคัร หมาน น็อห เฆ, วี หมาณ ดี แม เฌา, วี มางัห ยอด มืง แปะ แฮะ อาบ แม เฌา ดี ดา ดา เฆ ตึอน, มางัห ยอด บอ โฮว ปี ซัม โอว อาดา แม นี, 49 แม เฌา อี กอย ฆางหราว, หมาณ, แตห แม โทม โฆรห ปี ซาคึร ปี หมาณ เฆ ตี, แตห แม จอย เฆ. 50 โอว บอ หมาณ, แตห แม เฌา ฆ็อห แวน หมาบ แปะ แฮะ โบง กาลึบ เฆ ดี แม เฌา ตี. หมาณ, แตห แม เฌา บอ แตห รันซู อี ดึห ฮาว เฆ ตึอน, วี กาเว เฆ. 51 โคว, เฆ มูห ดูอี ปี อึบ แม เฌา. เฆ แฮะ ปี คาฆูน แม, แปะ แฮะ ดึห เลห แม เฌา แคง มืง แอฆึบ. อึณ บอ ปี แม เฌา แฮะ คัม ดี ดึห เลห เฆ แคง อึณกึร เงา โดง จึม เฆ ดี ฮีน.

52 หมาณ, แตห แม เฌา ยอด ยึร ปี ซาคึร หมาณ โอว บอ ปี ซาคึร เฆ ดูอี อีซาเรลัะ อี มูห ดูอี ปี อึบ แม เฌา, แตห แม โทม โฆรห ปี ซาคึร เย นี ดอน เฌณ. 53 โคว, แม เฌา แฮะ กาย็อห เฆ ดี ดูอี แดง กาดาย นี ดอน ครึร, แตห เฆ ปี คาฆูน แม เฌา, แตห อึณ ปี ปี กาลาง แม ดี อาโมวแซ ดอ ดึห เลห แม ดา ดา เย แคง มืง แอฆึบ ตึอน.” แคะ ตี อาซาโลวโมว ซาคึร.

54 อาซาโลวโมว แฮะ ฮอต ซาคึร ดี เฌาพรา ปาย ตี อัน วี ยีต โดง แฮะ ครึบเครา อัน โคบ กาโช็ง หลู ดี เฌาพรา, โดง แปะ แฮะ โจะ โซ็ง อัน แด อัน ตึอน. 55 อัน วี ยีต จ็อง ดัด ตาง, ม็องการา แตห ดี เฆ ดูอี อีซาเรลัะ.

56 อัน ต็อห, “โอว อืบ แม เฌาพรา. อึณ มูห ดูอี อีซาเรลัะ อี มูห ดูอี ปี อึบ แม. แม แฮะ แตห เฆ กอย ดาคึย ฆัด เฆียด. แม แฮะ โบง แคะ ปี ดัว แม กาดีก ซัดฌา ตึอน. โฆรห ปี กาลาง อูน แม เฌา ดี อาโมวแซ อี มูห แดเจณ แม, อึณ ตู ลึร คอ อู แด. 57 แม เฌาพรา อี มูห เฌาพรา ปี กรึบ เย, แตห แม กอย รึม โดบ เย, แตห อึณ ปี แม เฌา แฮะ กอย รึม โดบ ดา ดา เย ดอ มึอน. แม เฌา, แกวะ เบลห แวน เย ดอ เหมา. 58 หมาณ แม เฌา อึณปราย น็อห เย, แตห เย โหลห แม เฌา, แตห เย โดบ อึณเตณ แม เฌา, บอ โดบ ซีคยา ดารา แม เฌา, บอ โดบ อากยาม อางยาน ปี ดัว แม ดี ดา ดา เย ตึอน. 59 โฆรห ปี ซาคึร โอว นี แตห แม เฌา อี มูห เฌาพรา ปี กรึบ โอว โหลห ดอน หมึร ดอน หณา, แตห แม เฌา โทม บอ ลอง แดเจณ แม บอ ลอง เฆ ดูอี แม อี มูห ดูอี อีซาเรลัะ, แตห แม จอย บอ ดัว แคะ ปี โลว เย ดอน ซีแง. 60 แตห เฆ ดูอี แดง กาดาย กอ นับ ลอง แม เฌาพรา, แม มูห เฌาพรา อาคาคัร. อาว มึห เฌาพรา ปอ อู กาดัง. 61 บอ เบ ดูอี อีซาเรลัะ, แตห น็อห เบ โดบ มี เฌาพรา. แตห เบ ปึอน ดี โดบ อากยาม อางยาน อัน เฌา บอ โดบ ซีคยา ดารา อัน เฌา เซเซ, แตห อึณ ปี ซีแง อาตึร นี.”

62 วาย อัน ตี คูนดีคัม บอ เฆ ดูอี อีซาเรลัะ, เฆ บอ หลู ปี หลู เฆ ดี เฌาพรา.

63 อาซาโลวโมว บอ ดึห มัก อา หมึณ ดี อา แหรณ โดว บอ มาบู อู แซน ดี อา หมึณ โดว, แตห อึณ แบน ปี หลู อี กอย กาฌูะ โฮม รึม. ปัน ตี คูนดีคัม บอ ดูอี อีซาเรลัะ บอ กาโพรม ดี อืบ เฌาพรา แคง โฮว ตึอน.

64 ซีแง ตี อู เฌณ คูนดีคัม บอ โบง แตห แวง อี กอย นา อาต โฮว เฌาพรา แบน โดง บอด. อัน บอ หลู ปี หลู อัน ดอน โมยว. โคว, กาโช็ง บ็อง อี กอย นา อาต โฮว เฌาพรา ตึอน, อึณ ดีแตด, อาว ปึอน เบลห โกรว ปี หลู อัน อี โดะ ดี เงา, บอ โหงว ดีฆาว, บอ เบรียง อี เลห ดี ปี ดี หลู อี กอย กาฌูะ โฮม รึม ตึอน. 65 ปาย ตี บอ อาซาโลวโมว บอ เฆ ดูอี อีซาเรลัะ, เฆ บอกาเฆลียด, จูห ดี อึณเตณ อี ฮาว มืง เลโบวฮามาด กอ ฌัม โคบ แบลง แอฆึบ ตึอน, เฆ อี มูห พึง ดูอี กืน, เฆ กาโพรม ดี ตัห โตต ลึบ บลอย เฌาพรา อี มูห เฌาพรา ปี กรึบ เฆ ตี. เฆ แฮะ ฮอต โบง บลอย อาดา บู ซีแง, เฆ ปี วี โบง ปอ บู ซีแง, แตห อึณ กอ โนะ ฆึร ดี พวน ซีแง. 66 เฆ แฮะ ฮอต โบง บลอย ตี, ปา แคหณา อัน บอ แตห ดูอี วีว. เฆ มืร ม็องการา ดัว ดี คูนดีคัม. แฮะ ฮอต, เฆ บอ วีว ดี กาง เฆ. น็อห เฆ มืร แฮะ ดาคึย โกบ นา หมึอม แปะ แฮะ โบง เฌาพรา ดี อาดาวีด อี มูห แดเจณ อัน บอ ดี เฆ ดูอี อาโมยว อีซาเรลัะ.