1 อึณ ยี มูห โฮว โดง กอย อาซาโลวโมว ตึอน อึณ กอ โนะ ฆึร ดี โอย ซีนัม, อัน แฮะ โบง แตห อึณ กอ ฮอต โตต. 2 อัน โบง โฮว อัน, ดึห เฮ แคง แปร เลบานูน ตึอน. นา โต็ง โฮว อัน ตี อู มาย็อห กานีห. นา กาว็อห อัน พัน ฆึร กานีห. นา จา อัน โอย ฆึร กานีห. ร็อง โฮว อัน บอ ดึห เฮ อารีด, ซัม พวน อึณแปรง. อัน บอ ดึห เฮ อารีด โบง มานัก, เบลห แดง ร็อง ตึอน. 3 อัน ดึห แบน เฮ อารีด, ตับ นา แดง ร็อง เฆ ตึอน อี มูห พวน ฆึร ดี พัน ณ็อง. ร็อง อู อึณแปรง ปี วี มึห ฆึร ดี พัน ณ็อง. 4 อัน บอ โบง กาเดา ปาแตง โอย อึณแปรง, แตห เฆ ลาย กาซืร, แตห อึณ แบน คร็อง แบน คร็อง. 5 บอ มา มาโลห มึห พวน กาโตะ. นา อาต โฮว ตึอน, อึณ บอ มึห มาโลห โอย ทาบ อี ลาย กาซืร ดี กาเดา ปาแตง ตึอน.

6 นา อาต โฮว อัน วี ซัม ร็อง, แตห อึณ แบน ฆรัห. นา โต็ง อัน พัน ฆึร กานีห. นา เตียม อัน โอย ฆึร กานีห. นา อาต โฮว ตึอน, อึณ ปี วี มึห ฆรัห แคง, อี มึห บอ ร็อง บอ อี ตับ อัน.

7 อัน วี โบง โฮง โดง กอย มาลาง อัน. อึณ มูห บอ โดง ซูงพยาด อัน ดารา. อัน ดึห แบน เฮ อารีด, วี ดัะ ดี บืน อัน, จูห นา นี กอ ฌัม นา ดอย. 8 อี มูห โฮว โดง กอย อัน, บอ ฆรัห อัน บอ กาตูะ ตึอน, อัน โบง แตห เฆ ลาย ปี. อัน วี โบง โฮว ปอ อู กาตูะ อาดา ฆอน อีบึณ คูนดีคัม พาโรว ปี ดึห อาซาโลวโมว แบน อีบึณ อัน. บอ โฮว ตี อัน โบง แตห อึณ ปี กาตูะ เฮา.

9 อัน โบง ฮอต โตต ดอน กาตูะ, ตา มาว อี ง็อห กาเซา. จูห ดี บืน อัน, กอ ฌัม มานัก อัน, เฆ ตา มาว แปะ แฮะ ซัวะ เฆ ตา เลกลึร, แตห อึณ ตาง แคะ ปี โลว เฆ. เฆ บอ ด็อห ดอน บลาก, บอ นา เรต, นา แคง. เฆ บอ ตา มาว ตี ดอน โปละ, กอ ฌัม แรง แวง. 10 อี มูห ดัง อัน, เฆ ดึห โตต มาว อี ง็อห กาเซา, อี มูห มาว ตาง อี โต็ง ดา กานีห บอ ฆึร กานีห. 11 นา แดง เฆ บอ ตา มาว อี ง็อห ตาง แปะ แฮะ ด็อห เฆ. แฮะ ฮอต, เฆ บอ ตา เฮ อารีด. 12 แวง ตาง ตึอน, อัน บอ มึห แรง ปี โบง เฆ ตา โตต มาว แปะ แฮะ ด็อห เฆ ตึอน. แรง ตี มึห โอย อึณแปรง. อู อึณแปรง มูห เฮ อารีด. เฆ โบง แวง ตี, แตห อึณ ปี แวง เรต ฆาย แวง แคง อี มึห ดี โฮว เฌาพรา.

13 คูนดีคัม อาซาโลวโมว บอ จัร เฆ ฮาว มืง ทูโรว, วี แดะ อาฮูรัม ตัห. 14 อาฮูรัม ตึอน อัน มูห ฆอน ยา ซีปรัห, ดูอี แคง ครึร อานาบทาลี. ฆูณ อัน มูห ดูอี อาโมยว ทูโรว อี นับ ดี ฌึม บ็อง เดณ. อาฮูรัม ตี มูห ดูอี อี แหลว ดี โบง แบน โมยว แบน โมยว. อัน บอ ตัห โดง กอย คูนดีคัม อาซาโลวโมว ตึอน. เฆ มืร แตห อัน โบง, แตห อึณ กอ ฮอต โตต.

15 อัน บอ โหลว ร็อง บ็อง อา ณ็อง. นา จา อัน ฆึร ดี ดา กานีห. ร็อง แลบ อัน ฆึร ดี อา กานีห. 16 อัน วี โหลว ฆีณ ร็อง อา โบ็ง, เบลห แดง ร็อง ฆาย ตึอน. ฆีณ ร็อง ตี อึณ จา อู โบ็ง พัน กานีห.

17 อัน บอ ดึห บ็อง, โบง กาแบห อี กอย ดี ฆีณ ร็อง. บอ วัน บ็อง อัน ฮอย ดี กาแบห ตึอน, แตห อึณ แบน บู ณ็อง อาดา ร็อง อู ณ็อง บอ บู ณ็อง อาดา ร็อง ปอ อู ณ็อง. 18 แฮะ ฮอต, อัน วี โบง ราง เบล มาจัก, วี ฮอย ดี กาแบห ตึอน, แตห อึณ กอย อา อึณแปรง. ร็อง บอ อา ณ็อง อัน โบง แตห อึณ มูห อู โมยว. 19 ดี ฆีณ ร็อง อี กอย แดง ฆรัห ตึอน, อัน โบง ฆีณ แตห อึณ ปี ราง โบห คัมซอน อี โต็ง พวน กานีห. 20 เบล มาจัก แปะ แฮะ ฮอย อัน ดี กาแบห แฮะ วี กอย โรบ ฆีณ ร็อง แบน อึณแปรง แบน อึณแปรง. แฮะ มึห อาดา อา มาย็อห โบ็ง. เฆ บอ กอย กาซืร โดง มึห ราง โบห. 21 อัน ดึห ร็อง ฆาย ตึอน, ซัม อูน ดี โฮว อี กอย ดี อาต มาโลห โฮว เฌาพรา. ร็อง บลาก อาอัห, อัน แตห จืร ยาคีน. ร็อง บลาก อาฆัะ, อัน แตห จืร โบวอาบ. 22 ฆีณ ร็อง ฆาย ตี ปี ราง โบห คัมซอน. ปาย ตี ปี โบง อัน ดี ร็อง ฆาย ตี, แฮะ ฮอต โตต ดอน โมยว.

23 อัน วี ตา บ็อง, วี โบง บอ อึณปาน ตาง อี กาลัง, แตห อึณ ปี อึม ดึง. กาว็อห อัน ฆึร กานีห. นา ลึก อัน พัน กานีห. เซ เฆา โรบ อัน, อึณ โลว วัน อี โต็ง โอย ฆึร กานีห. 24 ดี บาง อัน, อึณ มึห อารึบ เบล กาเปา อี กอย โรบ อัน. อู กานีห เฆ เบลห ราง เบล กาเปา ฆึร โบ็ง, แตห อึณ กอ โรบ อึณปาน ตึอน. ดอ โหลว เฆ อึณปาน ตี, เฆ บอ โหลว บอ อารึบ เบล กาเปา ตี อู ซีะ, แตห เฆ แบน อา อึณแปรง.

25 อึณปาน ตึอน เฆ ปี วี เบลห แดง ราง มามัก ฆึร ดี อา โดว. มามัก ตึอน โอย โดว มางัห นา เลห ซีแง, โอย โดว มางัห นา เฆต ซีแง, โอย โดว มางัห นา เตต ปอ โอย โดว มางัห นา กัว. เฆ วี เบลห อึณปาน ตึอน แดง มามัก เฆ ตี. ซีโป็ง มามัก เฆ ตี เฆ แตห อึณ ลึบ โตต นา แคง. 26 ดี บาง อึณปาน อึม ตี อัน เฮต อู กาบา แด. อึณโฆง ปี โบห คัมซอน. อึณ บอ ปี บาง ซีลัยะ. อึณ ปึอน ฮับ อึม อา แหรณ ปาะ.^a

27 แฮะ ฮอต อัน ปี วี โบง กาโช็ง ปี เบลห อึณปาน อึม. อัน ตา บ็อง, โบง กาโช็ง ฆึร โบ็ง. นา ตาง อัน บอ นา กาว็อห พวน กานีห. จา อัน โอย กานีห. 28 ปี ปาย อารึบ กาโช็ง ตี, อึณ มึห บลัะ ดี เบรต อัน บอ บาง อัน, แตห อึณ มึห โปลม. 29 ดี กาแต บลัะ ตึอน, อึณ ปี วี มึห ราง มาครังซี, ราง มามัก บอ ราง อามู อามาด เฌาพรา อี จืร เครูบ. บอ นา แดง บาง ตึอน, อึณ ปี วี มึห อารึบ ฌึร ตี. บอ นา แดง บอ นา ครึม มาครังซี เฆ มามัก, อึณ ปี วี มึห บอ วัน ราง โบห ฮอย โลง. 30 ดี กาโช็ง ดอน โบ็ง, ปี วี มึห กาเลณ บ็อง พวน โบ็ง บอ นอน อัน อา ณ็อง. นา แดง กาโช็ง ตี, อึณ มึห อึณปาน อึม. อึณ ปี วี มึห อี บึม อัน ดี กาโตะ พวน โปละ. นา เรต อี บึม อัน ตี, อึณ ปี วี มึห วัน โบห, ฮอย ดอน บลาก. 31 แคง อี บึม อัน ตึอน ปี วี มึห กาเดา กาลัง. ลาย กายาน อัน อู กานีห. บอ ตาง อัน อู กานีห ดี อู กาซาน. โคบ บาง อัน, อึณ วี มึห บอ ราง โบห. เบรต อัน ยี ตู กาลัง. อึณ กอย พวน กาโตะ. 32 กาเลณ พวน โบ็ง วี กอย ครึม กาโช็ง, แตห นอน อัน วี ดึก ดี กาโช็ง. กาเลณ ตี แฮะ จา อู กานีห ดี อู กาซาน. 33 ปี ปาย อารึบ อัน, อึณ ปี กาเลณ ลักเลา. โดง กาบัด นอน อัน บอ บล็อะ อัน บอ โคบ อัน. อึณ มูห โตต ปี โหลว ดีโลย. 34 ดี กาโช็ง ตี ดอน โบ็ง, อึณ ปี วี มึห มัง ปา อัน พวน โบ็ง. เฆ แฮะ โหลว อู ซีะ, แตห อึณ กาดึก ดี กาโช็ง. 35 อี บึม อี กอย แดง กาโช็ง ตึอน, อัน กูก ยีต อู กาซาน, แฮะ ดึก ดี กาโช็ง. บอ เบรต อัน, เฆ แฮะ โหลว กาดึก, แฮะ มูห อู โมยว. 36 เฆ วี โบง ราง อามู อามาด เฌาพรา อี จืร เครูบ บอ ราง มาครังซี บอ ราง เฮ จึก, วี เบลห ดี เบรต อัน. บอ ราง วัน โบห เฆ วี ดึก ดอน โปละ โดง ซี มึห. 37 ปาย ตี อาฮูรัม แฮะ โหลว โบง กาโช็ง ฆึร โบ็ง, แตห อารึบ เฆ มูห อู โมยว.

38 อัน โบง บอ อึณปาน บ็อง ตาง ฆึร โบ็ง อี ปึอน เบลห แดง กาโช็ง ฆึร โบ็ง ตึอน. อึณปาน ดอน โบ็ง อึณ กาว็อห พวน กานีห. ปึอน ฮับ อึม พวน ฆึร ปาะ.^b 39 อัน ดึห กาโช็ง เฆ ตึอน, อูน แคง โฮว เฌาพรา, นา กัว พัน โบ็ง, นา เตต พัน โบ็ง. อี มูห อึณปาน ตาง ตึอน, อัน เบลห อูน แคง โฮว นา เตต, ดี กาโตะ อี กอย นา เลห ซีแง. 40 อาฮูรัม บอ โบง กาโละ, มัง โซก บอ ซีลัยะ. ปาย ตี อัน โบง ฮอต โตต อี กอย แคง โฮว เฌาพรา ปี จัร อาซาโลวโมว อัน โบง.

อึณ มึห บอ ฆีณ ร็อง อี ปี โบห คัมซอน,

41 บอ ร็อง อา ณ็อง, บอ กาแบห อี ซีบลึก ฆีณ ร็อง ตึอน.

42 อัน โบง บอ เบล มาจัก พวน มาย็อห โบ็ง อาดา กาแบห อา โบ็ง ตึอน. อึณ มูห มาจัก อา อึณแปรง อาดา กาแบห อี ซีบลึก ฆีณ ร็อง ตึอน.

43 อัน โบง บอ กาโช็ง ฆึร โบ็ง บอ อึณปาน ปี เบลห อัน แดง กาโช็ง ตึอน 44 บอ อึณปาน ตาง อี ปี อึม ดึง อู โบ็ง. อัน บอ โบง บอ ราง มามัก ฆึร ดี อา โดว, อี บึม อึณปาน ตาง ตึอน บอ กาโละ เฆ มัง โซก บอ ซีลัยะ เฆ ตึอน.

45 อึณกรึห ปี ดี ตา อี กอย แคง โฮว เฌาพรา ปี โบง อาฮูรัม อาดา คูนดีคัม อาซาโลวโมว ตึอน แฮะ มูห โตต บ็อง เดณ อี กาลัะ มาบรีว. 46 คูนดีคัม แตห เฆ โหลว โบง โกรว ตี, ดึห กาดาย กาปีด, โบง ราง อัน, วี โหลว บ็อง นา แคง. เฆ โบง ฆาน ตี โดง กอย ดี กาแต มืง ซูโคด ฆาย มืง จาตานัะ, อี กอย ดี โคบ แบลง ยอดาน. 47 อาซาโลวโมว อาว ซัะ โกรว ตี. โคว, แฮะ กืน กาเซา. อัน บอ โหลว โบง ปาย ตี. อาว มึห อาเซ อี นับ ดี ซัะ บ็อง ตึอน.

48 อาซาโลวโมว บอ โบง ครึง ตา อี กอย แคง โฮว เฌาพรา ตึอน.

อึณ มูห กาโช็ง หลู ปี โบง เฆ ตา ครีว บอ กาโช็ง โดง ดาง เฆ คามูน ดี อาต เฌาพรา, อี ปีด เฆ ครีว.

49 อึณ มูห บอ เงา ราง ครีว ปี เบลห เฆ นา อาต โดง บอด หลึอม โตต. เฆ เบลห นา อัห พัน โบ็ง, นา ฆัะ พัน โบ็ง. อึณ มูห บอ โบห ครีว, เงา ออม ครีว, อึณ เกียบ ครีว

50 บอ ซีลัยะ, อึณเกียบ, อึณปาน บอ อาโฌว เฆ พาน, อี มูห โตต ครีว แฌด. อึณ มูห บอ โดง ฮ็อะ มาโลห อี กอย ดี โฮว ซีงา บอด หลึอม โตต บอ โดง ฮ็อะ มาโลห อี กอย ดี โฮว เฌาพรา ตึอน, อัน แฮะ โบง โตต, ตา ครีว.

51 อาซาโลวโมว บอ โบง ดอน โมยว ฌึร ตี แคง โฮว เฌาพรา ตึอน. แฮะ ฮอต โตต ดอน โมยว, อัน บอ ดึห ครึง ครีว, ครึง รึอน แปะ แฮะ หลู อาดาวีด ตึอน. แฮะ ฮอต, อัน บอ ดึห ฮับ โตต แคง โฮง อูน เฆ คาฆูน แคง โฮว เฌาพรา ตึอน.