1 อาซาโลวโมว แฮะ แบน คูนดีคัม อาดา พวน ซีนัม, อึณ บอ ฌัม มาเฆียน ฌีพัะ อี มูห มาเฆียน ฮาอา. ดอ อัน ตี อาซาโลวโมว จูห ดี ซัม โฮว เฌาพรา. ซีนัม อัน ตี แฮะ ปึอน พวน มาย็อห ดี ดา ฆึร ซีนัม วาย เลห เฆ ดูอี อีซาเรลัะ แคง มืง แอฆึบ ตึอน.

2 โฮว เฌาพรา ปี ต็อห อาซาโลวโมว ดี ซัม, อึณ ตาง แคะ นี. นา โต็ง อัน เดา ฆึร กานีห. นา เตียม อัน อา ฆึร กานีห. นา จา อัน โอย ฆึร กานีห. 3 โฮง อี กอย บาง มาโลห โฮว อัน ตึอน นา เตียม อัน, อึณ การัม นา เตียม โฮว เฌาพรา, แฮะ แบน อา ฆึร กานีห. นา โต็ง อัน ยี มูห ฆึร กานีห. 4 ดี แรง โฮว ตึอน, อัน โบง กาเดา ปาแตง กาเคียะ อี มึห ราง โบห นา แคง. 5 นา เรต แรง อัน โบง โฮง แบน โฮง แบน โฮง, แตห อึณ กอ โรบ โฮว โอย บลาก, วี แบน โอย คร็อง. 6 คร็อง ครึม แฮะ ว็อห พัน กานีห. คร็อง ดี กาแต แฮะ ว็อห เดา กานีห. คร็อง แดง แฮะ ว็อห บู กานีห. บลาก นา เรต อัน แตห แรง โฮง ชูชึง, แกวะ แตห นอน โฮง ลึบ แคง แรง โฮว เฌาพรา.

7 ซีณ อาต ดึห ตัห เฆ มาว แปะ แฮะ ด็อห เฆ ตึอน, เฆ แฮะ เฆา แคะ ซีคยา อัน. โคว, ตู ยึร ฆรัณ ปัวะ, ฆรัณ มึย เฆ. บอ ฆรัณ ครึง ฮีน อี ซีนัน อาว ฮู มึห ดอ ซัม เฆ โฮว ตึอน.

8 มาโลห อี ลึบ แคง โฮง ครึม ตึอน, อัน กอย บลาก อาอัห โฮว เฌาพรา ตึอน. อึณ บอ มึห อึณแตง อี โฮะ ดี คร็อง กาแต บอ วี โฮะ ดี โฮง คร็อง แดง. 9 อาซาโลวโมว โบง โฮว เฌาพรา ตี, แตห อึณ กอ ฮอต โตต. อัน บอ ดึห มานัก เฆ แบน, ตา เฮ อารีด, วี ตับ โฮว เฌาพรา ตึอน. 10 โฮง เฆ ตึอน อัน โบง แตห เฆ กอย โรบ โฮว เฌาพรา. นา จา อัน อู คร็อง พัน กานีห. ดอน โฮง แฮะ การัม มูห อู โมยว. อัน ตา บอ เฮ อารีด อี แบน นอน โฮง. เฆ ฆาย อูน นอน ตี ดี แรง โฮว เฌาพรา.

11 อู ซีแง เฌาพรา วี กาลาง โฆรห ดี อาซาโลวโมว. 12 อัน ต็อห, “แม ซัม โฮว โอว ดอ ตี นี. เซ แม บอ โดบ แคะ ปี กาลาง โอว, แม บอ โบง ปี จัร โอว แม โบง, แม บอ โดบ ดารา โอว ดอน ณ็อง, เซ แม บอ โบง ปาย ตี บอ โอว ดี โบง โตต ปี ดัว โอว กาดีก ซัดฌา ดี ฆูณ แม อาดาวีด. 13 โอว มืร ดี กอย รึม โดบ ดูอี อีซาเรลัะ เซเซ. โอว มืร ตู เบลห แวน เฆ ดอ เหมา. เฆ มูห ดูอี ปี ร็อก โอว.”

14 ปาย ตี อาซาโลวโมว โบง โฮว เฌาพรา, แตห อึณ กอ ฮอต โตต. 15 อัน โบง แรง อี กอย นา แคง, ตา เฮ อารีด. จูห ดี บืน อัน กอ ฌัม มานัก อัน, อัน ตา โตต แบน. แบน ดัะ อัน วี มูห โตต เฮ อึณเก.

16 แคง โฮว ตึอน, อัน ฆ็อง นา ปัน, แตห โต็ง อัน ฆาย เตียม อัน อา ฆึร กานีห อู โมยว. จูห ดี บืน, กอ ฌัม กาบึย อัน, อัน ตา โตต แบน เฮ อารีด. อัน แตห โดง ตี วี แบน โดง บอด หลึอม โตต. 17 โฮว อี กอย นา อาต โฮง ตึอน, แฮะ โต็ง พวน ฆึร กานีห. 18 นา แคง โฮว ตึอน มูห โตต เฮ อารีด. เฆ บอ ดอก, แตห อึณ มึห ราง กาเปา บอ ราง โบห บรัห. อัน โบง ดอน โมยว, มูห โตต เฮ อารีด, แกวะ แตห อึณ ซี ลึห มาว. 19 อัน โบง โฮง อี กอย นา แคง โฮว ตึอน, แตห อัน ปึอน ดี เบลห ฌีดืก อี มึห ดี อูน โฆรห ปี กาแซณ เฌาพรา. 20 โฮง ตี นา โต็ง อัน อา ฆึร กานีห, นา เตียม อัน อา ฆึร กานีห บอ นา จา อัน อา ฆึร กานีห. นา แคง โฮง ตี, อัน บอ ปีด โตต ครีว แฌด. บอ ดี กาโช็ง หลู ปี โบง เฆ ตา เฮ อารีด ตึอน, อัน บอ ปีด โตต ครีว. 21 อาซาโลวโมว บอ ดึห ครีว แฌด, ปีด โตต แคง โฮว ตี. อัน บอ ดึห วัน ครีว ซีณ นา อาต โฮง บอด อี แฮะ ฮอต ปีด ครีว. 22 ปาย ตี อัน แฮะ ปีด โตต ครีว แฌด. บอ นา แคง โฮว บอ กาโช็ง หลู อี กอย แคง โฮง บอด ตึอน, อัน แฮะ ปีด โตต ตา ครีว แฌด.

23 นา แดง โฮง บอด ตึอน อัน ดึห เฮ นามัน, โบง อารึบ อามู อามาด เฌาพรา อี จืร เครูบ. อัน โบง อารึบ ฌึร ตี อาดา อา กาดัง อี จา ฆึร กานีห. 24 เพียง อารึบ ตี อู บลาก, อึณ โต็ง พัน กานีห, แตห บอ อา บลาก กาว็อห ฆึร กานีห. 25 อารึบ ปอ อู กาดัง ตึอน แฮะ กาว็อห ฆึร กานีห. โคว, อารึบ อา กาดัง ตี บอ ตาง อัน บอ ปี ปาย อัน แฮะ มูห อู โมยว. 26 บอ อา กาดัง แฮะ จา ฆึร กานีห. 27 อัน ดึห อารึบ ฆาย ตึอน, เบลห อูน แคง โฮง บอด อี กอย แคง โฮว เฌาพรา. เพียง ฆาย ตึอน แฮะ อึณบลัห บอ อา กาดัง. กาแดะ เพียง อู กาดัง ฌัม แรง อู บลาก. กาแดะ เพียง ปอ อู กาดัง ปี วี ฌัม แรง ปอ อู บลาก. เพียง ฆาย อู กาดัง อู บลาก ตัห ลาย ฌัม ดี กาแต โฮว ตึอน. 28 อารึบ อามู อามาด เฌาพรา อา กาดัง ตี, อัน บอ ดึห ครีว แฌด ปีด โตต.

29 ดี แรง โฮว ตึอน บอ นา เรต บอ นา แคง กอ โรบ อัน โบง ราง อามู อามาด เฌาพรา อี จืร เครูบ. บอ ราง เฮ จึก บอ ราง โบห บรัห อัน โบง. 30 ปี ดัะ อัน ดี บืน แคง โฮว ตึอน บอ โฮง นา เรต บอ โฮง นา แคง, อัน ปีด โตต ครีว แฌด.

31 โดง ดี ลึบ โฮง บอด หลึอม โตต, อัน ดึห เฮ นามัน อา บลัะ โบง มาโลห อัน. อี มูห มา มาโลห, ตาง อัน แฮะ ลึบ แคง แรง พัน บูน อู บูน. 32 อัน โบง มาโลห ตี, ตา เฮ นามัน อา บลัะ ตึอน. อัน บอ โบลห โบง ราง เครูบ, ราง เฮ จึก บอ ราง โบห บรัห. แฮะ ฮอต, อัน วี ดึห ครีว แฌด ปีด ดี ราง ตึอน ดอน โมยว. 33 โดง ดี ลึบ โฮว เฌาพรา มืร, อัน ดึห เฮ นามัน โบง มาโลห. ตาง อัน แฮะ ลึบ แคง แรง พวน บูน อู บูน. 34 อี มูห บลัะ มาโลห, อัน ดึห แบน เฮ อึณเก แตห อึณ มึห อา บลาก. อู บลาก วี มึห แบน อา บลัะ, แตห อึณ ปึอน กาบัก, ปึอน ดีฆับ. ปอ บลาก มืร มึห แบน อา บลัะ, แตห อึณ ปึอน กาบัก, ปึอน ดีฆับ. 35 ดี มาโลห เฆ ตี, อัน โบลห โบง ราง อามู อามาด เฌาพรา อี จืร เครูบ, บอ ราง เฮ จึก บอ ราง โบห บรัห. อัน บอ ปีด ครีว แฌด, บอ ดอก โดบ ปี ปาย อารึบ อัน.

36 อัน บอ โบง แวง แคง, อี กอย โคบ โฮว เฌาพรา, ดึห มาว แปะ แฮะ ด็อห เฆ, โบง แตห อึณ แบน แรง โอย อึณแปรง. แฮะ ฮอต, อัน บอ ดึห เฮ อารีด โบง ปอ อู อึณแปรง. 37 ดอ ซีนัม อึณ พวน แฮะ ฌัม มาเฆียน ฌีพัะ, เฆ จูห ดี ซัม เจณ ร็อง. 38 บอ ฌัม ซีนัม ฆึร ดี เหลห, มาเฆียน อึณดา, อี จืร มาเฆียน บูลัะ, โฮว เฌาพรา ตึอน บอ ฮอต โตต ดอน โมยว. เฆ แฮะ โบง โดบ โตต แคะ ปี จัร อาซาโลวโมว ตึอน. อาดา บู ซีนัม เฆ แฮะ โบง ฆาน, แตห โฮว เฌาพรา กอ ฮอต โตต.