1 อาฮีรัม อี มูห คูนดีคัม อี อึบ มืง ทูโรว อัน บอ ยึร ลอง เฆ แฮะ พ็อห นามัน ดี ฆีณ อาซาโลวโมว, แตห อัน แบน คูนดีคัม อี ปลูะ อาดาวีด. ดอ อัน ตี อัน บอ จัร แดเจณ อัน ฮาว โดง กอย อาซาโลวโมว ตึอน โกบ แฮะ ดึอม แบน อาฮีรัม ฆาย อาดาวีด อู ฆึก. 2 ปัน ตี อาซาโลวโมว วี จัร เฆ ฮาว กาลาง ดี คูนดีคัม อาฮีรัม ต็อห,

3 “แม คูนดีคัม แฮะ นับ ลอง ฆูณ โอว อาดาวีด. อัน แฮะ กาโฆห กืน ดี รันซู อัน ดอน โปละ. โคว, อาต ฌัม อาคราว ดอ แตห เฌาพรา อัน ออง รันซู อัน, อัน ตู ปึอน ซัม โฮว เฌาพรา อี มูห เฌาพรา ปี กรึบ อัน. 4 ดอ ตี นี, เฌาพรา อี บอ มูห เฌาพรา ปี กรึบ โอว, อัน แฮะ แตห มาน มืง โอว ดาคึย ดอน โปละ. อาว มึห อี ดี แบน รันซู ดี โอว. บอ อี ตู มูห, อี ตู หมึอม อาว มึห มาเซ ปี ดี กาตูณ โอว. 5 โคว, โอว แฮะ ต็อห ดี ซัม โฮว เฌาพรา อี มูห เฌาพรา ปี กรึบ โอว. เฌาพรา แฮะ กาลาง ดี ฆูณ โอว อี มูห อาดาวีด ต็อห, ‘ฆอน อีมาย แม, วี ปี ดี แตห โอว อัน อึบ มืง, แตห อัน ปลูะ แม, อัน ดี ซัม โฮว ดี โอว.’

6 โคว อึณ ปาย ตี โอว หมาณ, แตห แม จัร ดูอี แม, ฮาว ฆัร เฮ อารีด อี กอย ดี นอน เลบานูน, แตห ดี โอว. บอ ดูอี โอว ดี ฮาว จอย ดูอี แม. โอว ดี ดัว ง็อห อัน, รูห อัน, แคะ หมาณ แม คูนดีคัม. แม คูนดีคัม บอ นับ, แคง ดูอี โอว เฆ นี, อาว มึห อี นับ ดี ฆัร ดี แดบ เฮ, อี ปี ดูอี มืง ซีโดน อี นับ ซีคยา ดี ฆัร ดี แดบ เฮ.”

7 คูนดีคัม อาฮีรัม บอ ยึร โฆรห อาซาโลวโมว ตี, อึณ บอ ล็อะ กาเซา น็อห อัน. อัน ต็อห, “โอว อืบ เฌาพรา อี แฮะ ดัว ฆอน อี มึห อางยาน ตี ดี อาดาวีด, แตห อัน อึบ ดูอี อาโมยว ตาง เฆ ตี.” 8 แฮะ ฮอต, อาฮีรัม วี จัร ดูอี อัน ฮาว โดง กอย อาซาโลวโมว วี ต็อห, “โอว แฮะ นับ ลอง ปี กาลาง ตัห แม คูนดีคัม ดี โอว. โอว ดี โบง แคะ ปี โลว แม. โอว ดี ดัว เฮ อารีด บอ เฮ อึณเก แคะ ปี โลว แม. 9 ดูอี โอว ดี โฮะ ดึห แดง นอน เลบานูน, โลง ฌัม ดี อึม นัมมูกซารา. แฮะ ฮอต, เฆ ดี โบง แตห อึณ แบน แป, แตห อึณ แหล โลง โดบ อึม, แตห กอ ฌัม โดง ปี กาลาง อูน แม. ฮี ฌัม โดง ตี, เฆ ดี วี ฆ็อห เฮ ตี, แตห แม บอ ปึอน ดี ดึห. แม ยี โลว ดัว ปี ดี โฮม แคะ ปี โลว โอว อาดา ดูอี โอว อี กอย แคง โฮว โอว.” 10 ปัน ตี อาฮีรัม บอ ดัว เฮ อารีด ฆาย เฮ อึณเก ตึอน ดี คูนดีคัม อาซาโลวโมว แคะ ปี ซี ปึอน อัน. 11 อาซาโลวโมว บอ ดัว กาแปะ เคาคยูง อา หมึณ กอรัะ.^a บอ นามัน ปี แฮะ ฮอต กรีด, แฮะ ฮอต ทารอง อา ฆึร กอรัะ.^b ดอน ซีนัม อาซาโลวโมว ดัว ดี อาฮีรัม ปาย ตี. 12 เฌาพรา มืร ดัว อางยาน ดี อาซาโลวโมว, แตห อึณ ปี แปะ แฮะ ดัว อัน กาดีก ซัดฌา. อาฮีรัม บอ อาซาโลวโมว ฆาย อา วี ตี อาว ฮู ลาย กาโฆห. ฆาย ลาย แบน อู ฆึก.

13 คูนดีคัม อาซาโลวโมว บอ จัร แคะ กอย ดูอี อีซาเรลัะ ดอน โปละ, แตห เฆ โบง ฆาน อัน. เฆ บอกาเฆลียด กอย โอย หมึณ วี. 14 อัน บอ จัร เฆ โฮะ ดี นอน เลบานูน ตึอน, อู มาเฆียน อู หมึณ วี. เฆ ฮี กอย ดี นอน เลบานูน อู มาเฆียน, เฆ ปี วี ตัห กอย ดี กาง เฆ อา มาเฆียน. อาโตวนีรัม ยี แบน ดา อี อึบ เฆ ดูอี อี โบง ฆาน ตี. 15 อาซาโลวโมว ตึอน มึห หมาย บู หมึณ วี อี โลว ปัห โกรว แบน โมยว แบน โมยว. อัน มึห ปอ ดา หมึณ วี อี ลึร มาว. 16 แดง ตี อึณ วี มึห โอย แหรณ ดี โอย มาย็อห วี อี แยต เฆ อี โบง ฆาน, แตห เฆ โบง ซีคยา. 17 คูนดีคัม บอ จัร เฆ, แตห เฆ ดึห มาว ตาง อี หมึอม, อี ตู ดัห. เฆ บอ ดึห เลห กืน มาว อี ง็อห กาเซา ดี นอน ดาอาง. เฆ วี ด็อห มาว ตี, แตห อึณ แบน เจณ ร็อง แคง โฮว เฌาพรา. 18 ปัน ตี เฆ อี มูห ดาลาก อาซาโลวโมว บอ เฆ อี มูห ดาลาก อาฮีรัม บอ เฆ ดูอี กอย มืง เกปาลา เฆ บอ กาโพรม ดี แรน ดี โบง เฮ เฆ มาว แตห อึณ ปึอน ดี ซัม โฮว เฌาพรา ตึอน.