1 เฆ ดูอี เรา ดูอี กาง บอ วี กาโพรม ดี ดึห ฆอน อีมาย อาโยวซียา อี จืร อาโยวคัด วี พ็อห นามัน ดี ฆีณ อัน, แตห อัน วี แบน คูนดีคัม ปลูะ ฆูณ อัน. อัน วี กอย แคง มืง เยรูซาแลม.

2 อาโยวคัด ตี ดอ แบน อัน คูนดีคัม, อาซาก อัน แฮะ โนะ อา ฆึร ดี โอย ซีนัม. อัน บอ อึบ มืง บอ กอย แคง มืง เยรูซาแลม อาดา โอย มาเฆียน. 3 คูนดีคัม อี อึบ มืง แอฆึบ บอ บลัวะ โจห อัน, ตู แตห อัน ปึอน ดี แบน คูนดีคัม แคง มืง เยรูซาแลม. อัน บอ เบลห อามีง แตห เฆ ดูอี แคง มืง ตี ฮับ จึง ดี อัน. เฆ โลว ฮับ รึอน อู มาย็อห ทาเลน บอ ครีว อู ทาเลน. 4 คูนดีคัม มืง แอฆึบ บอ วี ดาง อาเอลาคีม อี มูห อีกัด อาโยวคัด ตึอน, แตห อัน วี แบน คูนดีคัม อี อึบ กาดาย มืง ยูดา บอ มืง เยรูซาแลม. อัน วี ดัว จืร กามาย ดี อาเอลาคีม, วี ต็อห อายอยาคีม. แฮะ ฮอต, คูนดีคัม อาเนคอ อี อึบ มืง แอฆึบ บอ ดึห อาโยวคัด อี มูห วา อายอยาคีม, ตึย ฮาว อัน ดี มืง แอฆึบ.

5 อายอยาคีม แฮะ แบน คูนดีคัม ดอ อาซาก อัน แฮะ ปึอน อา ฆึร ดี พัน ซีนัม. อัน บอ อึบ มืง บอ กอย แคง มืง เยรูซาแลม อาดา ฆึร ดี อู ซีนัม. อัน ยี โบง อี ตู หมึอม ปี ตู อึง เฌาพรา. 6 คูนดีคัม อาเนบูคัดเนจา อี อึบ มืง บาแบ บอ แยต ดา ซึก อัน ตัห กาโฆห ดี อายอยาคีม. เฆ บอ ดึห วัน บ็อง เดณ ปัก ฮาว อายอยาคีม ดี มืง บาแบ. 7 อาเนบูคัดเนจา แฮะ ดึห ครึง ตา อี กอย แคง โฮว เฌาพรา, วี ฮาว อูน แคง โฮว เฌา ปี กรึบ อัน.

8 ลอง แปะ แฮะ โบง อายอยาคีม อี หณัม ดึอม กาลาง, บอ มูห ลอง อี หมึอม กาอีห, ลอง อี ตู หมึอม ปี พยาก อี เฮา ดี อัน ดอน โมยว, อึณ แฮะ แดม อูน แคง บับ คูนดีคัม อีซาเรลัะ บอ แคง บับ คูนดีคัม ยูดา. ฆอน อีมาย อัน อี จืร อาเยคอนี บอ วี ปลูะ อัน วี อึบ กาดาย มืง ยูดา.

9 อาเยคอนี แฮะ แบน คูนดีคัม ดอ อาซาก อัน แฮะ ปึอน ฆึร ดี ดา ซีนัม. อัน บอ อึบ แคง มืง เยรูซาแลม อาดา โอย มาเฆียน ดี ฆึร ซีแง. อัน ยี โบง อี ตู หมึอม ปี ตู อึง เฌาพรา. 10 ดอ วี ฌัม อาคราว ดียาง, คูนดีคัม อาเนบูคัดเนจา บอ จัร อี ตัห แดะ อาเยคอนี, ดึห ฮาว บอ โกรวกราม บอ ครึง ตา อี มึห ดีง็อห ดีคัน อี กอย แคง โฮว เฌาพรา, วี ฮาว อูน แคง มืง บาแบ. อัน บอ วี ดาง ฆูณ แตะ อาเยคอนี อี จืร อาเฌเดกี, แตห อัน วี แบน คูนดีคัม วี อึบ กาดาย มืง ยูดา บอ มืง เยรูซาแลม.

11 อาเฌเดกี แฮะ แบน คูนดีคัม ดอ อาซาก อัน แฮะ โนะ อา ฆึร ดี อู ซีนัม. อัน บอ อึบ มืง บอ กอย แคง มืง เยรูซาแลม อาดา ฆึร ดี อู ซีนัม. 12 อัน ยี โบง มืก, โบง ปี ตู อึง เฌาพรา อี มูห เฌาพรา ปี กรึบ อัน. อัน มืร ตู คัม ดี โฆม ดี โยม ดี ดูอี อี บยาน โฆรห เฌาพรา อี จืร อาเยเรมี อี แฮะ กาลาง แคะ ปี จัร เฌาพรา อัน กาลาง.

13 วาย อัน ตี อาเฌเดกี บอ วี กาบัห ดี คูนดีคัม อาเนบูคัดเนจา อี แฮะ แตห อัน กาแซณ ดืง ดี เฌาพรา อี มูห เฌาพรา ปี กรึบ อัน ต็อห, อัน ดี โบง นา มูห นา หมาน. อัน วี ปีดืร น็อห อัน, ตู วี โดบ เฌาพรา อี มูห เฌาพรา ปี กรึบ ดูอี อีซาเรลัะ. 14 แดง ตี บอ ดา ตาง อี แยต เฆ ดูอี อี หลู ดี เฌาพรา บอ เฆ ดูอี บอ เรา บอ มืง มืร อาว ฮู มึห น็อห ซืร น็อห หมาน ดี เฌาพรา. เฆ วี โบง อี หมึอม กาอีห ปี ดูอี อาโมยว เฮา. เฆ มืร วี โบง แตห โฮว เฌาพรา กาดาต. เฌาพรา ยี แฮะ โบง แตห โฮว อี กอย แคง มืง เยรูซาแลม ซีงา บอด.

15 เฌาพรา อี มูห เฌาพรา ปี กรึบ ฆูณ ดัง เฆ ดูอี อีซาเรลัะ, โกบ ร็อก กาเว อัน เฌา ดี เฆ ดูอี ปี อึบ อัน บอ ร็อก โดง ซีงา บอด อี มูห โดง กอย อัน, อัน วี ตึย อามู อามาด อัน ฮาว โดง กอย เฆ แบน เฌณ แบน เฌณ. 16 มาแล, เฆ ยี วี ปี วาณาก บอ กาณัห อามู อามาด เฌาพรา เฆ ตี. เฆ วี แนนัะ โฆรห เฌาพรา บอ เอห เฆ ดา อี บยาน โฆรห เฌาพรา. ปาย ตี เฌาพรา กอ รู กาเซา ดี เฆ ดูอี ปี อึบ อัน, อาว มึห ปี ดี ปาย แตห อึณ เยน.

17 โคว อัน ตี เฌาพรา วี แตห คูนดีคัม มืง บาแบ แยต ดา ซึก อัน ตัห โดง กอย เฆ. เฆ บอ ตา มาปัวะ ลาง เฆ, ง็อห แวน เฆ อีมาย อี ซี หนึม แคง โดง ซีงา บอด. เฆ มืร ตู กาเว อาเซ, บอ มูห กาโณม ดีบยา, บอ มูห ดูอี กัด, อาซาก อี แฮะ กืน กาเซา, เฌาพรา อาบ โตต เฆ บอกาเฆลียด ดี คูนดีคัม อาเนบูคัดเนจา. 18 อัน ดึห ฮาว บอ ครึง ตา อี กอย แคง โฮว เฌาพรา บอ อี เตียะ อี ตาง. อัน ดึห บอ โกรวกราม อี มึห ดีง็อห ดีคัน แปะ แฮะ แฆบ กาฌูะ อูน เฆ แคง โฮว เฌาพรา บอ อี กอย แคง โฮว คูนดีคัม บอ แคง กาง เฆ อามู อามาด อัน, อัน ดึห ฮาว โตต ดี มืง บาแบ. 19 เฆ มืร โดะ กาซึม โฮว เฌาพรา บอ ปยาต แวน แรง มืง เยรูซาแลม. แคะ กอย โฮว คูนดีคัม ดอน กาตูะ เฆ มืร แฮะ ฮอต โดะ กาซึม โตต. เฆ ปยาต แวน บอ โกรว อี บอด อี หมึอม ดอน โมยว.

20 อัน วี เหมต ดูอี อี แฮะ ลอด ยัม ดี มาปัวะ ลาง, วี ตึย ฮาว เฆ แคง มืง บาแบ. ดูอี เฆ ตี บอ กาดูห ดี แบน หมาย อัน บอ หมาย ฆอน อัน. เฆ บอ กอย โดง ตี, แตห อึณ กอ วี ฌัม ดอ วี อึบ ดูอี มืง บีราซี ดี มืง บาแบ. 21 โฆรห เฌาพรา ปี กาลาง ดา อี บยาน โฆรห เฌาพรา อี จืร อาเยเรมี แฮะ ฮอต เฌะฌูง โตต. อัน แฮะ ต็อห, มาน มืง ดูอี อีซาเรลัะ ดี กาปยาต ลึร อาดา บู ฆึร ซีนัม. อาคราว ดอ อัน ตี กาดาย แคง มืง ตี อาว มึห อี รัณ มาเซ. อึณ แตห กาดาย ปึอน ดี ดีเหลา ปี ดูอี ดีเหลา ซีแง ดีเหลา.

22 คูนดีคัม อาซายรัด มูห คูนดีคัม อี อึบ มืง บีราซี. ซีนัม ดอ โฆว ดอ วี อึบ อัน มืง บาแบ โฆรห เฌาพรา ปี กาลาง ดา อี บยาน โฆรห เฌาพรา อี จืร อาเยเรมี แฮะ ฮอต เฌะฌูง โตต. เฌาพรา วี กาซูห น็อห คูนดีคัม อาซายรัด มึห น็อห ซี จอย ดูอี อีซาเรลัะ. อัน วี แดม แปะ, แตห เฆ แดะ กาลาง แคง มาน มืง ปี อึบ อัน ดอน นา ดอน โปละ.

23 อัน ต็อห, “อาซายรัด อี มูห คูนดีคัม อี อึบ มืง บีราซี แฮะ เบลห อามีง ต็อห, เฌาพรา อี มูห เฌาพรา อี อึบ ฆางหราว, อัน แฮะ ดึห มาน มืง อี กอย แดง กาดาย นี บอกาเฆลียด, อาบ ดัว ดี โอว. อัน เฌา มืร แฮะ กาลาง อูน ลอง โลว โอว ซัม โฮว อาดา อัน เฌา แคง มืง เยรูซาแลม อี กอย แคง กาดาย มืง ยูดา. อาเซ มูห ดูอี ปี อึบ อัน เฌา อี กอย กาแต เบ, แตห เฆ วี เวณ แคง มืง เยรูซาแลม, แตห เฌาพรา ปี กรึบ เฆ มืร กอย รึม โดบ เฆ.”