1 อาโยวซียา วี โบง บลอย แคง มืง เยรูซาแลม. อึณ มูห บลอย โหลห เฆ เฌาพรา ดอ กาโลห อัน กาง เฆ แคง มืง แอฆึบ ตึอน. ดอ มูห มาเฆียน ดอ โฆว, ซีแง ฆึร ดี อึณพวน, เฆ บอ ง็อห ฆอน มาบู อาดา บลอย ตี. 2 อัน มืร ดาง เฆ ดา อี หลู ดี เฌาพรา บอ กาซูห น็อห เฆ, แตห เฆ โบง ซีคยา ฆาน เฆ แคง โฮว เฌาพรา. 3 อัน มืร กาลาง ดี เฆ ดูอี ครึร อาเลวี อี มาโนว เฆ ดูอี อีซาเรลัะ บอกาเฆลียด อี แฮะ ซีงา. อัน ต็อห, “แตห เบ ดึห ฌีดืก เฌาพรา อี ซีงา บอด, วี อูน แคง โฮว เฌาพรา แปะ แฮะ ซัม อูน อาซาโลวโมว อี มูห ฆอน อาดาวีด อี มูห คูนดีคัม อี อึบ มืง อีซาเรลัะ. วาย อัน ตี เบ มืร อาว ฮู โลว กาฆอด แดง ยัะ เบ. ดอ ตี นี, แตห เบ โบง ฆาน เฌาพรา อี มูห เฌาพรา ปี กรึบ เบ บอ จอย เฆ ดูอี ปี อึบ อัน เฌา อี มูห ดูอี อีซาเรลัะ. 4 แตห เบ แรน โดว เบ โดบ อึณโฮม เบ พึง เหมา พึง อัน. แตห อึณ บอ โดบ ปี แดม อูน อาดาวีด อี มูห คูนดีคัม ดูอี อีซาเรลัะ บอ ปี แดม ฆอน อัน อี จืร อาซาโลวโมว ตึอน.

5 แตห เบ จ็อง โดง ซีงา บอด แคง พึง เบ โดบ แปะ แฮะ กาย็อห เฆ อาโมยว เฆ ฆูณ ดัง เบ ครึร เหมา ครึร อัน. แตห เฆ ดูอี ครึร อาเลวี กอย โดบ ดูอี เรา ดูอี กาง พึง เหมา พึง อัน. 6 แฮะ ฮอต, แตห เบ บอ ง็อห หลู ฆอน มาบู อาดา บลอย โหลห เบ เฌาพรา ตี. แตห โดว เบ ซีงา บอ แรน โดว ปี ดี หลู อาดา บีนอง เบ อี มูห ดูอี เรา ดูอี กาง, อี กอย โดบ พึง เฆ, อึณกรึห เหมา อึณกรึห อัน. แตห อึณ บอ โดบ แปะ แฮะ กาลาง อูน เฌาพรา ดี อาโมวแซ ตึอน.”

7 อาโยวซียา มืร ดึห มาบู เฆ มาแป อาดา โอย หมึณ โดว บอ มัก โอย แหรณ โดว อี มูห โกรว อาราง อัน. อัน วี อาบ ดัว ดี เฆ ดูอี เรา ดูอี กาง อี ตัห กาฌูะ, แตห อึณ บอ แบน ปี ดี หลู อาดา บลอย โหลห เฆ เฌาพรา ดอ กาโลห อัน กาง เฆ.

8 เฆ อามู อามาด อัน มืร วี มึห น็อห ซี หลู โดบ. เฆ มืร วี อาบ ดัว ดี เฆ ดูอี เรา ดูอี กาง, อาบ ดัว บอ ดี เฆ ดา อี หลู ดี เฌาพรา บอ ดี เฆ ดูอี ครึร อาเลวี อี มูห อาฮีลาคี, อาซาคารา บอ อาเยฮีลา อี มูห ดา ตาง อี อึบ แคง โฮว เฌาพรา. เฆ มืร วี ดึห มาบู บอ มาแป อา แหรณ ดี เดา มาย็อห โดว. เฆ ดึห บอ มัก อาโล็ง โอย มาย็อห โดว, วี อาบ ดัว ดี เฆ ดา อี หลู ดี เฌาพรา, แตห อึณ แบน ปี ดี หลู อาดา บลอย โหลห เฆ เฌาพรา ดอ กาโลห อัน กาง เฆ. 9 อากอนานี, อาเซมายา บอ อาเนทาเนลา อี มูห วา อากอนานี บอ อาฮาซาบี, อาเยยีลา, อายอจาบาด อี มูห ดา อี อึบ อี แยต ดูอี อาเลวี, เฆ มืร ดึห มาบู บอ มาแป เฆ พัน แหรณ โดว, มัก อาโล็ง พัน มาย็อห โดว, อาบ ดัว ดี เฆ ดูอี ครึร อาเลวี, แตห อึณ แบน ปี ดี หลู อาดา บลอย โหลห เฆ เฌาพรา ดอ กาโลห อัน กาง เฆ.

10 เฆ แฮะ ฮอต แรน บลอย บอ ต็อห ดี กรึบ เฌาพรา. แคะ กอย เฆ ดา อี หลู ดี เฌาพรา มืร จ็อง โดง กอย เฆ. เฆ ดูอี อาโมยว อาเลวี มืร กอย แบน พึง แบน พึง โดบ โฆรห ปี กาลาง อูน คูนดีคัม. 11 เฆ มืร ง็อห ฆอน มาบู อาดา บลอย โหลห เฆ เฌาพรา ตี. เฆ ดา อี หลู ดี เฌาพรา วี ดึห หนาม มาบู ดี แด เฆ ดูอี อาเลวี, วี คร็อห. ดอ อัน ตี เฆ ดูอี ครึร อาเลวี, เฆ มืร เลียะ เลห ฮูน โดว ปี ดี หลู ตี. 12 เฆ มืร กาย็อห เลห โดว อาดา ปี ดี หลู อี โดะ ดี เงา, กาซาง ดัว ดี เฆ ดูอี เรา ดูอี กาง โดบ อึณโฮม เหมา อึณโฮม อัน. อึณ แตห เฆ วี ปึอน ดี หลู ดี เฌาพรา โดบ ดารา ปี แดม อูน อาโมวแซ ตึอน. มัก อาโล็ง เฆ ตึอน มืร เฆ บอ กาซาง ปาย ตี. 13 เฆ มืร ดึห มาบู ปี ดี หลู เฆ อาดา บลอย ตี, วี ตาะ ดี เงา, แตห อึณ โดบ ดารา เฆ. เฆ มืร ดึห ปี ดี หลู อี ซีงา บอด, วี ก็อง แคง กาโละ, กาโละ ฮีน บอ แคง มาคาง. เฆ มืร กาซาง ดี ดูอี บอกาเฆลียด แฮ แฮ ครัน ครัน. 14 วาย ตี, เฆ บอ วี แรน อาดา โดว บรีม เฆ บอ อาดา เฆ ดา อี หลู ดี เฌาพรา. เฆ ดา อี หลู ดี เฌาพรา อี มูห หลูกหลาน อาโรน ตึอน เฆ โลว หลู ปี ดี หลู อี โดะ ดี เงา บอ ดีกลวน เบรียง กอ ฌัม บา ดี อับ.

15 เฆ ดูอี อี ต็อห โหมว อี มูห หลูกหลาน อาซาบ ตึอน, เฆ มืร กอย โดง กอย เฆ โดบ ปี กาลาง อูน อาดาวีด. บอ อาซาบ, อาเฮมาน บอ อาเยดูทูน อี มูห ดูอี อี นับ ดี ยึร, เฆ แฮะ โบง ปาย ตี โดบ ปี จัร อาดาวีด. เฆ ดูอี อี บัร ดี มาโลห มืร, เฆ กอย ดี มาโลห ปี โลว บัร เฆ ราง อาเซ ราง อัน. เฆ มืร ตู โลว เบลห แวน ฆาน เฆ. บีนอง เฆ อี มูห ดูอี ครึร อาเลวี, เฆ แฮะ ฮอต แรน อูน อาดา เฆ.

16 ซีแง ตี เฆ มืร แรน โตต ดอน โมยว ดอ ลึบ เฆ บลอย อี โหลห เฌาพรา ดอ กาโลห อัน กาง เฆ. เฆ มืร หลู ดี เฌาพรา ปี ดี หลู อี โดะ ดี เงา แดง กาโช็ง หลู, แตห อึณ บอ โดบ ปี จัร คูนดีคัม อาโยวซียา ตึอน. 17 เฆ ดูอี อีซาเรลัะ อี ตัห กอย กาฌูะ โดง ตึอน, เฆ มืร ลึบ บลอย โหลห เฆ เฌาพรา ดอ กาโลห อัน กาง เฆ บอ บลอย โฮม คามูน ตู ฮับ ซีนัม บรัห อาดา บู ซีแง. 18 จูห ซีณ โจว บาน ดา อี บยาน โฆรห เฌาพรา อี จืร อาซามูเอน, อาว ฮู มึห อี โบง บลอย ปาย ตี กาแต เฆ ดูอี อีซาเรลัะ. คูนดีคัม อีซาเรลัะ มืร, อาว มึห คอ อู กาดัง อี โบง บลอย ตี, แตห อึณ ปี ปี โบง อาโยวซียา บอ เฆ ดา อี หลู ดี เฌาพรา, ดูอี อาโมยว อาเลวี, ดูอี อายูดา เฆ ดูอี อีซาเรลัะ บอ ดูอี แคง มืง เยรูซาแลม บอกาเฆลียด อี แฮะ กอย รึม โบง บลอย ตี. 19 ซีนัม โบง เฆ บลอย ตี, คูนดีคัม อาโยวซียา แฮะ อึบ มืง อาดา ฆึร ดี ดา ซีนัม.

20 วาย อัน ตี อาโยวซียา แฮะ ฮอต โบง, แฮะ ฮอต อึณปราย โตต โฮว เฌาพรา, อาเนคอ อี มูห คูนดีคัม อี อึบ มืง แอฆึบ, อัน บอ แยต ดา ซึก อัน ตัห ดี มืง คาเซมีด อี กอย โคบ แบลง อึม อูพาราด. คูนดีคัม อาโยวซียา บอ ดา ซึก อัน เลห ฮาว บัร ดี แร อึณเตณ อัน. 21 คูนดีคัม อาเนคอ วี จัร ดาลาม อัน ฮาว กาลาง ดี อาโยวซียา ต็อห, “อึย แม คูนดีคัม อี อึบ กาดาย มืง ยูดา, มาเซ ปี ลูต โอว ดี แม? คา นี อาว มูห โอว แยต ดา ซึก โอว ตัห กาโฆห ดี แม. โอว แยต ดา ซึก โอว ตัห กาโฆห ดี รันซู โอว. เฌาพรา แฮะ กาลาง แตห โอว โบง แฮ แฮ ครัน ครัน. แกวะ แตห แม โบง กาบัห ดี เฌาพรา อี แฮะ กอย บลาก โอว ตี. เซ อาว ปาย ตี เฌาพรา ดี บอ ปยาต แวน แม.”

22 ปี บอ ปาย เหมา มืร, อาโยวซียา ยี ตู จู. อัน บอ กาปลูะ ครึง ปี ตา อัน, ฮาว กาโฆห ดี อาเนคอ. อัน มืร ตู โทม โฆรห เฌาพรา ปี กาลาง อาเนคอ ดี อัน. เฆ บอ ลาย กาโฆห ดี โคบ มืง มีกีตอ.

23 เฆ ดา ซึก มืง แอฆึบ บอ บัณ อัะ บอ ล็อะ คูนดีคัม อาโยวซียา. คูนดีคัม อาโยวซียา บอ วี กาลาง ดี เฆ แดเจณ อัน ต็อห, “แตห เบ ดึห ฮาว โอว. โอว แฮะ กาดูห เซา, แฮะ เซา กาเซา.” 24 เฆ แดเจณ อัน บอ ดึห เลห อัน แดง ลักเลา อึณปร็อง ปี ป็อะ อัน, วี ดาง อัน แดง ลักเลา ปอ อู หลาง. เฆ วี ดึห เวณ อัน ดี มืง เยรูซาแลม. อัน บอ ยัม ดี ตี. แฮะ ฮอต, เฆ บอ ดีบ โดว อัน แคง บาเรว ดา ดา อัน. เฆ ดูอี แคง มืง ยูดา บอ ดูอี แคง มืง เยรูซาแลม เฆ บอ กาโพรม ดี ยาม โกบ แฮะ ยัม อาโยวซียา.

25 อาเยเรมี มืร แดม โหมว โฆรห กาโบย ลอง กลึร เหงา อาดา อาโยวซียา ตี. เฆ อี นับ ดี ต็อห โหมว, บอ อีบึณ อีมาย, เฆ มืร กาลาง ลอง อาโยวซียา แคง กาซัม โหมว เฆ ตี, แตห อึณ แบน ทูงฆยาม ดี เฆ ดูอี อีซาเรลัะ กอ ฌัม อาตึร นี. ลอง อัน ตี, อึณ แฮะ แดม อูน แคง บับ กลึร เหงา.

26 ลอง ปี โบง อาโยวซียา อี หณัม ดึอม กาลาง บอ ลอง แปะ แฮะ โบง อัน นา ซืร นา หมาน, แฮะ แดม อูน แคง บับ ดารา เฌาพรา.

27 บอ ลอง ซีณ กาจูห อัน ดี อึบ มาน มืง กอ ฌัม กาแดะ, อึณ แฮะ แดม อูน แคง บับ คูนดีคัม มืง อีซาเรลัะ บอ แคง บับ คูนดีคัม มืง ยูดา.