1 อาโยวซียา แฮะ แบน คูนดีคัม ดอ แฮะ โนะ อาซาก อัน ดา ซีนัม. อัน บอ อึบ มาน มืง, กอย แคง มืง เยรูซาแลม อาดา โอย ฆึร ดี อู ซีนัม. 2 อัน บอ โบง นา บอด นา หมึอม ปี อึง เฌาพรา. อัน โบง โดบ ปี ดา ดา อัน อี จืร อาดาวีด. อัน มืร โดบ ซีคยา, ตู วัห ตู บลืง มาเซ.

3 อาโยวซียา แฮะ แบน คูนดีคัม อาดา ดา ซีนัม, ดอ ซี หนึม อัน, อัน จูห ดี เหรต ดี บึง ซีคยา เฌาพรา อี มูห เฌาพรา ปี กรึบ ดา ดา อัน อี จืร อาดาวีด. ดอ แบน อัน คูนดีคัม อาดา ฆึร ดี อา ซีนัม, อัน วี จูห ดี ปยาต แวน โดง จา อี กอย แคง กาดาย มืง ยูดา บอ แคง มืง เยรูซาแลม ดอน โปละ. อัน ปยาต แวน บอ ร็อง นาง กานัม เอซูรา, บอ อารึบ ราง ปี โบลห ปี โหลว เฆ. 4 อัน จัร เฆ ปยาต แวน บอ กาโช็ง หลู ดี เฌา บาลัะ. อัน มืร แยต เฆ ปยาต แวน บอ อารึบ ราง อี กอย โดง จา. เฆ มัห กาลาต กามูน โตต บอ ร็อง อารึบ ปี กรึบ เฆ บอ อารึบ ราง ปี โบลห ปี โหลว เฆ. เฆ วี บรัด วี ฌ็อห แดง อวน เฆ ดูอี อี แฮะ กรึบ, แฮะ หลู ดี อารึบ ราง เฆ ตี. 5 อัน วี ดึห กาอาง เฆ ดา อี หลู ดี เฌา ปี กรึบ ดูอี อาโมยว เฮา ตึอน, วี โดะ แคง เงา แดง กาโช็ง หลู. อัน โบง แตห มืง ยูดา บอ มืง เยรูซาแลม วี ซีงา. 6 อัน โบง ปาย ตี แคง มืง ดอน มืง, บอ มูห แคง กาดาย มืง อามานาเซ, อาเอพารีม, อาซีเมโอน กอ วี ฌัม แคง กาดาย อานาบทาลี. อัน โบง ปาย ตี บอ โดง แฮะ ราม อี กอย นา เรต มืง เฆ ตี. 7 เฆ กาบัก แวน บอ กาโช็ง หลู, ดึห แวน บอ ร็อง นาง กานัม เอซูรา, บอ อารึบ ราง ปี โบลห ปี โบง เฆ. อัน แตห เฆ วี ดอย วี มัห แตห อึณ กามอต โตต. เฆ ฆัร แวน บอ กาโช็ง หลู ซีนัม อูห หงูน ดอน โปละ อี กอย แคง มืง อีซาเรลัะ. แฮะ ฮอต, อัน มืร วี เวณ ดี มืง เยรูซาแลม.

8 อาโยวซียา แฮะ แบน คูนดีคัม อาดา ฆึร ดี ดา ซีนัม. ดอ อัน ตี อัน วี โบง แตห มาน มืง อัน บอ โฮว เฌาพรา วี ซีงา บอด. อัน วี จัร อาซาพาน อี มูห ฆอน อาจาจี บอ อามาอาเซยา อี มูห ดา กาณา อึบ มืง, บอ ดา จาเร อี จืร อาโยวอา อี มูห ฆอน อาโยวอาฮาด, แตห เฆ วี อึณปราย โฮว เฌาพรา อี มูห เฌาพรา ปี กรึบ อัน.

9 ดูอี เฆ ตี มืร ฮาว โดง กอย ดา ตาง อี หลู ดี เฌาพรา อี จืร อาฮีลาคี. เฆ มืร ดึห รึอน แปะ แฮะ หลู เฆ ดูอี กืน แคง โฮว เฌาพรา, วี ดัว ดี อัน. ดา อี บัร มาโลห อี มูห ดูอี อาโมยว อาเลวี แฮะ แฆบ อูน รึอน ตี. เฆ แฮะ แฆบ รึอน ตี ดี ดูอี ครึร อามานาเซ, ดูอี ครึร อาเอพารีม, ดูอี อาโมยว อีซาเรลัะ อี ซี ฆีด ซี กอย บอ เฆ ดูอี ครึร อายูดา, ครึร อาเบนยาม บอ เฆ ดูอี อี กอย แคง มืง เยรูซาแลม บอกาเฆลียด. 10 เฆ มืร อาบ ดัว ดี เฆ อี อึบ อี ยอด แมน โฮว เฌาพรา. ดูอี เฆ ตี ปี วี กาซาง ดัว ดี เฆ อี โบง ฆาน อี อึณปราย โฮว เฌาพรา. 11 เฆ อี อึบ แคง โฮว เฌาพรา มืร อาบ ดัว ดี ดาลาก อี นับ ดี ลึร เฮ, ดัว บอ ดี เฆ อี นับ ดี โฆว มาว, แตห เฆ จึห มาว แปะ แฮะ ฮอต ด็อห อี, จึห บอ มานัก บอ บราง บอ นอน บอ ดีโอว, แตห เฆ วี อึณปราย โฮว เฌาพรา แปะ แฮะ เบลห แวน เฆ คูนดีคัม ยูดา, แตห อึณ ลึร ราม.

12 เฆ ดูอี อี อึณปราย ตี, เฆ มืร มึห น็อห ซืร น็อห หมาน ดี โบง. เฆ อี อึบ อี ยอด แมน ฆาน ปี โบง เฆ ตี, บอ มูห ดูอี อาโมยว อาเลวี อี จืร อายาฮาด บอ อาออบาดี อี มูห หลูกหลาน อาเมนรารี. อึณ บอ มึห บอ อาซาคารา บอ อาเมซูลัม อี มูห หลูกหลาน อาโควฮาด. ดูอี เฆ ตี เฆ บอ แบน ดูอี อี อึบ อี แยต เฆ อี โบง ฆาน. เฆ ดูอี อาโมยว อาเลวี ตี เฆ มูห ดูอี อี กยัะ อี แหลว ดี บูด ดี บัห โมยว อี ฮัม ดาคึย. 13 เฆ ดูอี อาโมยว อาเลวี ตี เฆ บอ แบน ดา อี อึบ ดูอี อี โลว ฆอด โลว ปัห บอ แยต เฆ โบง แบน โมยว แบน โมยว. ดูอี อาเลวี มัง อี บอ แบน ดา จาเร บอ ดา อี จอย ดา จาเร บอ ดา ตาง อี บัร มาโลห.

14 ดอ ดึห เลห เฆ รึอน แคง โฮว เฌาพรา ตึอน, ดา ตาง อี หลู ดี เฌาพรา อี จืร อาฮีลาคี, อัน วี กาดูห บอ บับ ดารา เฌาพรา แปะ แฮะ ดึอม ดัว อาโมวแซ ดี เฆ ดูอี อีซาเรลัะ. 15 อาฮีลาคี ตึอน บอ วี กาลาง ลอง แฮะ กาดูห อัน บับ ดารา ตี ดี อาซาพาน อี มูห ดา จาเร คูนดีคัม. อัน ต็อห, “โอว แฮะ กาดูห บับ ดารา เฌาพรา แคง โฮว เฌาพรา นี.” อัน แฮะ ฮอต ต็อห ปาย ตี อัน วี ดึห บับ ตี, วี อาบ ดัว ดี อาซาพาน.

16 อาซาพาน มืร วี ดึห บับ ตี, วี ฮาว โดง กอย คูนดีคัม บอ ต็อห, “แคะ ปี จัร แม คูนดีคัม ดี เฆ แดเจณ แม ตึอน, เฆ มืร แฮะ โบง ดอ ตี นี. 17 เฆ แฮะ ดึห เลห รึอน แคะ มึห แคง โฮว เฌาพรา, วี อาบ ดัว ดี เฆ อี แยต ดูอี อี รัณ ฆาน.” 18 ดา จาเร อาซาพาน แฮะ ฮอต กาลาง ปาย ตี อัน ปี วี ต็อห ดี คูนดีคัม, “ดา อี หลู ดี เฌาพรา อี จืร อาฮีลาคี, อัน วี ดัว บอ บับ นี ดี โอว.” อัน มืร ตีห แตห คูนดีคัม โทม.

19 คูนดีคัม บอ ยึร โฆรห ดารา เฌาพรา ตี, อัน บอ กายาต ครึง ตา อัน โกบ แฮะ กลึร อัน. 20 อัน วี ดัว อามีง ดี เฆ ดา อี หลู ดี เฌาพรา อี มูห อาฮีลาคี, อาฮีกัม อี มูห ฆอน อาซาพาน, อาบาโตน อี มูห ฆอน อามีคา, อาซาพาน อี มูห ดา จาเร อัน ตึอน บอ อาซายา อี มูห แดเจณ คูนดีคัม. 21 อัน ต็อห ดี เฆ, “แตห เบ ฮาว ดีหมอด เฌาพรา ลอง โฆรห แคง บับ ปี กาดูห เบ ดอ ตี นี, แตห บอ โอว บอ เฆ อี กอย แคง มืง อีซาเรลัะ บอ เฆ ดูอี อี กอย แคง มืง ยูดา บอกาเฆลียด กอ นับ ลอง อัน ตี. เฆ ฆูณ ดัง เอ ตู โทม โฆรห ปี กาลาง เฌาพรา. เฆ มืร ตู โบง โดบ ปี แดม อูน แคง บับ ตี. โคว, เฌาพรา วี แตห เอ คัม กาเซา ปี รู อัน ดี เอ.”

22 ปัน ตี อาฮีลาคี บอ ดูอี ปี จัร คูนดีคัม ฮาว, เฆ วี ฮาว กาลาง ลอง อัน ตี บอ ดี ดูอี อี บยาน โฆรห เฌาพรา อี มูห อีบึณ อี จืร นาง โฮวลาตา. อัน บอ มูห อีบึณ อาซาโลม อี มูห ฆอน อาโตวคาด บอ หลาน อาฮาราด. อาซาโลม บอ มูห ดูอี อี บัร อี ยอด ลึมลา ครึง ตา คูนดีคัม. นาง ตี กอย แคง มืง เยรูซาแลม ทาบ เรต.

23 อีบึณ ตี มืร วี ต็อห ดี อัน, “เฌาพรา อี มูห เฌาพรา ปี กรึบ ดูอี อีซาเรลัะ แฮะ กาลาง, แตห แม วี เวณ โดง กอย ดูอี อี แฮะ จัร แม ตัห โดง กอย โอว, แตห แม กาลาง ดี อัน ปาย นี. 24 เฌาพรา แฮะ ต็อห, ‘บัร เบ ยอด, โอว ดี แตห อึณ มึห ดูก ตาง กาซืร นี บอ ดี เฆ ดูอี อี กอย แคง มืง นี. แตห อึณ บอ โดบ โฆรห ดืง แปะ แฮะ แดม อูน แคง บับ ดารา แปะ แฮะ ฮอต ตีห เบ, แตห คูนดีคัม ยูดา โทม. 25 โคว, เฆ แฮะ วัห แฮะ แวน โอว, แฮะ วี โดะ หลู ซีนัม อูห หงูน ดี เฌา ปี กรึบ อี เฮา. อารึบ ราง ปี โบง เฆ ตา แด เฆ มืร, อึณ แตห โอว รู ดี เฆ. เฆ อี กอย โดง ตี บอ โลว คัม น็อห รู โอว อี ปี เงา อี ตู ปึอน บยัด ดอ เหมา.’ 26 มาแล, เบ โลว วี กาลาง ดี คูนดีคัม ยูดา อี แฮะ จัร เบ ตัห ดีหมอด โอว. แตห เบ กาลาง ดี อัน ต็อห, ‘เฌาพรา อี มูห เฌาพรา ปี กรึบ ดูอี อีซาเรลัะ อี แฮะ กาลาง ลอง โฆรห ปี แดม แคง บับ ดารา แปะ แฮะ ฮอต โทม แม ตึอน. 27 อัน ต็อห, แม แฮะ วี มึห น็อห โฆม น็อห เตียม ดี อาต โอว ดอ แฮะ โทม แม โฆรห โอว อี ตู หมึอม ลอง กาซืร นี บอ เฆ ดูอี อี กอย ดี นี, แม มืร แฮะ วี กายาต ครึง ตา แม โกบ กลึร แม บอ ยาม นา อาต โอว. โคว, โอว แฮะ วี โทม โฆรห แม. 28 มาแล, โอว ยี ดี ตึย แตห แม ฮาว โดง กอย เฆ ฆูณ ดัง แม. แม ดี ปึอน ดี ยัม ดาคึย ดาคึย. แม มืร ตู กาดูห ดี ยึร ดูก ตาง ปี ดี โบง โอว กาซืร นี บอ ดี เฆ ดูอี อี กอย ดี นี.’” ดูอี เฆ ตึอน มืร ดึห โฆรห เฌาพรา ตี, วี เวณ กาลาง ดี คูนดีคัม.

29 ดอ อัน ตี คูนดีคัม วี จัร เฆ แดะ ดา ตาง แคง กาดาย มืง ยูดา บอ แคง มืง เยรูซาแลม, แตห เฆ บอกาเฆลียด ตัห กาฌูะ. 30 อัน บอ โฮะ แคง โฮว เฌาพรา, แดะ บอ เฆ ดูอี อายูดา บอกาเฆลียด บอ ดูอี แคง มืง เยรูซาแลม บอกาเฆลียด บอ เฆ ดา อี หลู ดี เฌาพรา บอ เฆ ดูอี ครึร อาเลวี บอ ดูอี อี เตียะ อี ตาง, แตห เฆ บอกาเฆลียด โดบ อัน. อัน บอ ดึห บอ บับ ปี กาดูห เฆ แคง โฮว เฌาพรา ตึอน, ตีห แตห เฆ ดอน อี ปึอน ดี โทม. 31 คูนดีคัม มืร ยีต จ็อง โคบ ร็อง อัน บอ กาแซณ แตห เฌาพรา โทม ลอง ดี คัม ดี โบง โดบ อัน ปี ต็อห เฌาพรา. อัน คัม กาดีก ซัดฌา ลอง ดี โบง โดบ อัน ดารา อัน เฌา บอ โทม ปี จัร เฌาพรา อี โบง. อัน ดี แตห บอ น็อห บอ พึอม อัน คัม ดี โดบ โตต แคะ ปี แดม อูน แคง บับ แปะ ตี.

32 อัน วี จัร บอ เฆ ดูอี อี กอย แคง มืง เยรูซาแลม, บอ เฆ อี กอย แคง กาดาย มืง อาเบนยาม, แตห บอ เฆ คัม ปาย ตี ปี อัน. แฮะ ฮอต, เฆ ดูอี อี กอย แคง มืง เยรูซาแลม มืร โพรม ดี โบง โดบ ปี กาแซณ เฌาพรา อี มูห เฌาพรา ปี กรึบ ดา ดา เฆ.

33 อาโยวซียา มืร ดึห แวน อารึบ ราง บอ ดอน โมยว อี หมึอม กาอีห อี กอย โดง กอย ดูอี อีซาเรลัะ ดอน โปละ. อัน มืร ซูงพยาด, แตห เฆ ดูอี อี กอย แคง มืง อีซาเรลัะ บอกาเฆลียด กรึบ มี เฌาพรา อี มูห เฌาพรา ปี กรึบ เฆ. ดอ มูห โจว อัน ตี, เฆ มืร โดบ ซีคยา บอ ตู วัห เฌาพรา อี มูห เฌาพรา ปี กรึบ ดา ดา เฆ.