1 อามานาเซ แฮะ แบน คูนดีคัม ดอ อาซาก อัน แฮะ โนะ ฆึร ดี อา ซีนัม. อัน บอ อึบ มืง บอ กอย แคง มืง เยรูซาแลม อาดา พัน ฆึร ดี พัน ซีนัม. 2 อัน โบง มืก, โบง อี หมึอม กาอีห ปี ตู อึง เฌาพรา. อัน โบง ปี เฆ ดูอี อาโมยว เฮา อี มูห ดูอี ปี โฮว เลห เฌาพรา อาต ตัห ลึบ ดูอี อีซาเรลัะ แคง มืง เฆ. 3 อัน วี อึณปราย โดง จา แปะ แฮะ ปยาต แวน ฆูณ อัน อี มูห อาเฮจัะกี ตึอน. อัน บอ โบง กาโช็ง หลู ดี เฌา บาลัะ, โบง บอ กันทอน ดี กรึบ นาง กานัม เอซูรา. อัน บอ กรึบ บึง ซีมัณ ดอน โมยว อี กอย แคง เบลณ. 4 เฌาพรา แฮะ ดึอม ต็อห ลอง โฮว เฌาพรา, “โอว ดี กอย แคง มืง เยรูซาแลม เซเซ.” คูนดีคัม อามานาเซ ยี วี โบง กาโช็ง แบน โมยว แบน โมยว เบลห แคง โฮว เฌาพรา ตี. 5 อัน บอ โบง กาโช็ง ดี กรึบ ซีมัณ ดอน โมยว แคง เบลณ, เบลห แคง แวง โฮว เฌาพรา บอ อา โปละ. 6 อัน บอ คัม ดี หลู ฆอน อัน แคง เงา ดี ดีลัยะ เบนฮีนูม. อัน บอ แมน เบดาง บอ ฆาว ปวน กานัม, โบง มยัะหลัยะ, บอ บึง ดา บู มืง บอ ดีหมอด ยา กานัม. อัน บอ โบง กืน กาเซา อี ตู บอด อี ตู หมึอม ปี ตู อึง เฌาพรา, แตห เฌาพรา วี รู ดี อัน.

7 อัน วี ดึห อารึบ ราง ปี โบง อัน, วี เบลห แคง โฮว เฌาพรา. มาแล, เฌาพรา แฮะ ดึอม กาลาง ดี อาดาวีด ฆาย อาซาโลวโมว ต็อห, “โอว ดี กอย แคง โฮว เฌาพรา นี บอ แคง มืง เยรูซาแลม เซเซ. อึณ มูห โดง แปะ แฮะ ร็อห โอว แคง มาน มืง เฆ ดูอี อีซาเรลัะ ดอน ครึร, แตห อึณ แบน โดง ดี กอย โอว เซเซ.” 8 อัน เฌา มืร แฮะ ต็อห, “เซ เฆ ดูอี อีซาเรลัะ บอ โบง โดบ ดารา ปี กาลาง โอว ดี แดเจณ โอว อี จืร อาโมวแซ ตึอน, โอว มืร ตู แตห เฆ ดูอี อีซาเรลัะ วี เลห ฮาว ตัะ มืง แปะ แฮะ อาบ ดัว โอว ดี ฆูณ ดัง เฆ ตึอน.” 9 อามานาเซ ยี แยต เฆ ดูอี อายูดา บอ ดูอี แคง มืง เยรูซาแลม โบง กาลึบ, โบง อี ฮาย อี มืก หลึอม เฆ ดูอี อาโมยว เฮา, อี มูห ดูอี ปี โฮว แวน เฌาพรา อาต ตัห ลึบ เฆ ดูอี อีซาเรลัะ แคง มืง ตี.

10 เฌาพรา แฮะ กาลาง ดี อามานาเซ บอ ดี เฆ ดูอี ปี อึบ อัน. มาแล, เฆ ยี ตู โทม. 11 ปาย ตี เฌาพรา มืร แตห ดา ซึก คูนดีคัม อาซูรา ตัห กาโฆห ดี เฆ บอ แป เฆ. เฆ บอ เหมต อามานาเซ, วี บลูห ฆูงมูห อัน ฮับ ควัง ฮีน. เฆ ดึห วัน บ็อง เดณ, ปัก เปลา เฆ แด อัน. แฮะ ฮอต, เฆ วี ดึห ฮาว อัน ดี มืง บาแบ. 12 ดอ แฮะ ฌัม อามานาเซ ดูก ตาง ปาย ตี อัน บอ วี ซาคึร หมาณ, แตห เฌาพรา อี มูห เฌาพรา ปี กรึบ อัน เฆฌู อัน. อัน บอ วี ปีเตียม กาเซา โดว อัน ดี อาต เฌาพรา อี มูห เฌาพรา ปี กรึบ บอ ฆูณ ดัง อัน. 13 ดอ ซาคึร หมาณ อัน ดี เฌาพรา ปาย ตี เฌาพรา มืร โทม โฆรห ปี ซาคึร ปี หมาณ อัน, บอ วี กาเว อัน. เฌาพรา ปี วี ตึย ตัห อัน แคง มืง เยรูซาแลม อี มูห มาน มืง ปี ดึอม อึบ อัน, โดง กอย บรีม อัน. ปัน อัน ตี อามานาเซ กอ นับ ลอง เฌาพรา ตี แฮะ มูห เฌาพรา อาคัร หมาน.

14 วาย อัน ตี อัน บอ วี โบง แรง มืง ปอ อู ทาบ นา เรต แรง บรีม อี กอย ดี มืง อาดาวีด โดบ ดีลัยะ ฆีโฮน บลาก นา เฆต ซีแง, กอ วี ฮาว ฌัม ดี บาง มาโลห มืง อี จืร มาโลห มาฆา. อัน มืร โบง แตห อึณ กอ โรบ โดง จืร ออแพลัะ. แรง ตี อัน โบง แตห อึณ กอ จา กาเซา. อัน มืร แตห เฆ ดา ตาง อี อึบ ดา ซึก กอย แคง มืง ดอน มืง อี มึห แรง อี กอย แคง กาดาย มืง ยูดา.

15 อัน มืร ปยาต แวน เฌา ปี กรึบ เฆ ดูอี อาโมยว เฮา. อารึบ ราง ปี โบง เบลห อัน แคง โฮว เฌาพรา บอ กาโช็ง หลู ปี อูน อัน แดง นอน โดง กอย โฮว เฌาพรา บอ อี กอย แคง มืง เยรูซาแลม, อัน วี ดึห ฮาว แวน โตต นา เรต มืง. 16 อัน วี อึณปราย กาโช็ง หลู ดี เฌาพรา, วี หลู ปี ดี หลู อี กอย กาฌูะ โฮม รึม บอ ปี ดี หลู อี ดาง ฆูง เฆฌู ดี เฌาพรา. อัน วี กาลาง ดี เฆ ดูอี อีซาเรลัะ, แตห เฆ กรึบ มี เฌาพรา อี มูห เฌาพรา ปี กรึบ เฆ. 17 เฆ ดูอี แคง เรา แคง กาง, เฆ ปี บอ ซี หลู ปี ดี หลู แดง นอน จา มืร, เฆ ยี หลู มี ดี เฌาพรา.

18 ลอง ปี โบง อามานาเซ อี หณัม ดึอม กาลาง บอ ลอง แฮะ ซาคึร หมาณ อัน ดี เฌาพรา, บอ ลอง โฆรห ปี กาลาง เฆ ดูอี อี นับ อี ยึร อี มูห โฆรห แปะ แฮะ กาลาง เฌาพรา ดี เฆ อี มูห เฌาพรา ปี กรึบ ดูอี อีซาเรลัะ. อึณ แฮะ แดม อูน แคง บับ คูนดีคัม มืง อีซาเรลัะ. 19 ลอง ปี ซาคึร อัน, ลอง แฮะ โทม เฌาพรา โฆรห ปี ซาคึร อัน, ลอง แปะ แฮะ กาลึบ อัน ดี โบง หมาบ บอ แวน เฌาพรา, ลอง โดง จา แปะ แฮะ โบง อัน บอ ลอง แฮะ ซัม อัน ร็อง นาง กานัม เอซูรา บอ ลอง อารึบ ราง ปี โบง อัน ดอน โมยว อาต โฆม อัน ดี เฌาพรา, อึณ แฮะ แดม อูน แคง บับ ดูอี อี นับ ดี ยึร ตึอน. 20 อามานาเซ บอ ยัม ฮาว โดบ ดา ดา อัน. เฆ บอ ดีบ โดว ยัม อัน แคง กาง อัน. ฆอน อีมาย อัน อี จืร อาโมน บอ วี แบน คูนดีคัม ปลูะ อัน.

21 อาโมน แฮะ แบน คูนดีคัม ดอ อาซาก อัน แฮะ โนะ อา ฆึร ดี อา ซีนัม. อัน บอ อึบ กอย แคง มืง เยรูซาแลม อาดา อา ซีนัม. 22 อัน มืร โบง ปี ตู อึง เฌาพรา ปี ปี โบง ฆูณ อัน อี จืร อามานาเซ ตึอน. อัน วี กรึบ วี หลู ปี ดี หลู ดี อารึบ ราง ดอน โมยว แปะ แฮะ โบง อูน ฆูณ อัน. 23 อัน ยี ตู ปีเตียม น็อห อัน ดี อาต เฌาพรา ปี ปี โบง ฆูณ อัน อี จืร อามานาเซ แฮะ วี ปีเตียม น็อห อัน. อาโมน บอ โบง กาลึบ, แตห หมาบ แว กืน กาเซา.

24 เฆ อามู อามาด อัน บอ ดูอี ปี อึบ อัน, เฆ บอ วี คราม ดี บลัวะ แวน อัน. เฆ บอ วี ง็อห ยัม อัน แคง โฮว โดง กอย อัน. 25 มาแล, เฆ ดูอี แคง กาดาย มืง ตึอน บอ วี ง็อห แวน เฆ ดูอี อี แฮะ คราม ดี บลัวะ แวน คูนดีคัม อาโมน ตี. แฮะ ฮอต, เฆ บอ วี ดึห ฆอน อีมาย อัน อี จืร อาโยวซียา, วี แตห อัน แบน คูนดีคัม วี ปลูะ ฆูณ อัน.