1 คูนดีคัม อาเฮจัะกี แฮะ ฮอต โบง ฌึร ตึอน ดอน โมยว. วาย อัน ตี คูนดีคัม อาซาคารีบ อี อึบ มืง อาซูรา, อัน บอ แยต ดา ซึก อัน ตัห กาโฆห ดี มืง อี มึห แรง ดอน มืง อี กอย แคง กาดาย มืง ยูดา. อัน บอ จัร เฆ ดา ซึก อัน, แตห เฆ ปยาต แรง มืง เฆ ตี, แตห เฆ ปึอน ดี ลึบ. 2 คูนดีคัม อาเฮจัะกี บอ ยึร ลอง คูนดีคัม อาซาคารีบ แฮะ ตัห, แฮะ คราม ดี กาโฆห ดี มืง เยรูซาแลม. 3 อัน บอ วี กามวน ซังคยาง ดี เฆ อามู อามาด อัน บอ เฆ ดา ตาง อี อึบ ดา ซึก, แตห เฆ ฮาว ปูน ฮาว กาบีด โตห อึม อี กอย นา เรต มืง. เฆ มืร กาโพรม ดี จอย อัน. 4 ปาย ตี บอ มึห ดูอี กืน กาเซา ฮาว ปูน, ฮาว กาบีด แคะ กอย โตห อึม บอ อึม อี แหล ฮาว กาแต กาดาย มืง. โคว, เฆ ตู แตห เฆ ดูอี อาซูรา ยึร อึม กืน ดอ ตัห ฌัม กาตัด เฆ มืง เยรูซาแลม. 5 อาเฮจัะกี วี โบง บอ อี ฆ็อง อี แร มืง, แตห อึณ แว โปลม. อัน มืร วี อึณปราย แรง มืง โดง แฮะ เกห แฮะ ดีฆล็อห, อัน บอ ซัม โฮว จา โดง ดี บัร ดา ซึก แดง แรง มืง. อัน ปี วี โบง แตห อึณ มึห แรง ปอ อู ทาบ นา เรต แรง บรีม. แดง ตี อัน วี อึณปราย อึณโฆว ดี แรง มืง โดง แฮะ อึณปูน กาดาย อี กอย ดี มืง อาดาวีด. อัน วี โบง บอ ครึง กาโฆห บอ มัง ฆ็อง อี กืน กาเซา.

6 อัน วี คาน เบลห ดา ตาง อี อึบ ดา ซึก, แตห เฆ แยต ดูอี กืน. อัน วี จัร แตห เฆ ตัห กอย กาฌูะ แคง ฆลัง ดี บาง มาโลห มืง. อัน บอ กาลาง โฆรห อี ดี แตห โปลม แตห แฮณ ดี น็อห เฆ. 7 อัน ต็อห, “แตห เบ ปียัะ ปีกยัะ เบ, แกวะ แตห เบ โยว คูนดีคัม อี อึบ มืง อาซูรา บอ เฆ ดา ซึก ปี แยต ตัห อัน. อี กอย บลาก เอ แฮะ มึห โปลม เฆ แฮณ หลึอม อี กอย บลาก อัน. 8 บลาก อัน มึห มี โปลม แฮณ ดูอี. อี มูห เอ, เฌาพรา อี มูห เฌาพรา ปี กรึบ เอ ยี กอย รึม โดบ เอ. อัน ดี จอย เย บอ กาโฆห ดาง เย.” ดูอี กืน เฆ ตี บอ มึห โปลม มึห แฮณ โกบ โฆรห ปี กาลาง คูนดีคัม ตี.

9 วาย อัน ตี อาว บอ เหลณ, อาซาคารีบ เฆ ดา ซึก อัน บอ แวง โรบ มืง ลาคีด. ดอ อัน ตี อัน วี ตึย อามู อามาด อัน ฮาว โดง กอย อาเฮจัะกี แคง มืง เยรูซาแลม. เฆ บอ กาลาง โฆรห แตห อาเฮจัะกี บอ เฆ ดูอี อายูดา บอกาเฆลียด โทม.

10 เฆ ต็อห, “อาซาคารีบ อี มูห คูนดีคัม ตาง อี อึบ มืง อาซูรา แฮะ กาลาง ปาย นี. มาเซ ปี ดี บึง เบ, เซ อี เฮา ตัห แวง โรบ เบ แคง มืง เยรูซาแลม ตี? 11 อาเฮจัะกี นับ ดี ต็อห, แตห เบ บึง เฌาพรา อี มูห เฌาพรา ปี กรึบ เบ, แตห อัน คยอด เบ, แตห เบ ลอด ดี คูนดีคัม อี อึบ มืง อาซูรา. มาแล, อัน ยี ดี เบลห แวน เบ, แตห เบ ยัม ดี เอต อึม เฆ โบม. 12 อาเฮจัะกี ยี แฮะ ปยาต แวน โดง จา โดง ดี กรึบ เฌาพรา บอ กาโช็ง หลู ดี เฌาพรา. อัน แฮะ แยต ดูอี แคง กาดาย มืง ยูดา บอ แคง มืง เยรูซาแลม, แตห เฆ กรึบ เฌาพรา บอ แตห เฆ โดะ ซีนัม อูห หงูน มี แดง กาโช็ง หลู อู โบ็ง.

13 เบ ตู นับ ลอง แปะ แฮะ ดึอม โบง โอว บอ เฆ ฆูณ ดัง โอว ดี เฆ ดูอี มืง เตต มืง ตัะ. เฌา แบน โมยว แบน โมยว ปี กรึบ เฆ ดูอี แคง มืง ตี ตู ปึอน คยอด แตห เฆ ลอด ดี คูนดีคัม อาซูรียา. 14 แคง มืง ดอน มืง แปะ แฮะ ปยาต แวน เฆ ฆูณ ดัง โอว, อาว ดึอม มึห เฌา กาดัง เหมา อี ปึอน คยอด แตห เฆ ลอด ดี โอว. เหมา อึณ ปาย ปี ทาง เบ เฌาพรา ปี กรึบ เบ ดี บอ ปึอน คยอด แตห เบ ลอด ดี โอว? 15 โคว อัน ตี, แกวะ แตห อาเฮจัะกี กาโลว เบ บอ แยต เบ ฌัม ดูก. แกวะ แตห เบ หณึม โฆรห อัน. โคว, กาแต เฌา ปี กรึบ ดูอี อาโมยว เฮา บอ เฆ ดูอี มืง เฮา, อาว ดึอม มึห คอ อู กาดัง อี ปึอน คยอด ดูอี เฆ, แตห เฆ ลอด ดี โอว บอ ดี เฆ ฆูณ ดัง โอว. เฌาพรา เบ ตี แฮะ แว ตู ปึอน คยอด แตห เบ ลอด ตัะ โอว.”

16 อามู อามาด คูนดีคัม มืง อาซูรียา เฆ บอ แว กาลาง โฆรห ตู หมึอม ลอง เฌาพรา บอ ลอง อาเฮจัะกี อี มูห แดเจณ เฌาพรา. 17 แดง ตี, อาซาคารีบ วี แดม บอ แปะ อี แนนัะ อี พยาก เฌาพรา อี มูห เฌาพรา ปี กรึบ ดูอี อีซาเรลัะ. อัน ต็อห, “กาแต เฌา ปี กรึบ ดูอี ดอน โมยว ดอน มาน ดอน มืง, ดอน นา ดอน โปละ อาว มึห อี ปึอน คยอด ดูอี อี กรึบ เฆ, แตห เฆ ลอด ตัะ โอว. ปาย ตี บอ เฌาพรา ปี กรึบ อาเฮจัะกี มืร, อาว ปึอน คยอด แตห ดูอี ปี อึบ อัน ลอด ตัะ โอว.” 18 อามู อามาด คูนดีคัม อาซูรียา มืร กาลาง โฆรห แฮแบร บอ ดัด แดะ โฆรห ตาง, แตห อึณ กาโบยว ดูอี แคง มืง เยรูซาแลม อี กอย แดง แรง มืง. อึณ แตห น็อห เฆ ลึร, แตห ดูอี อาซูรียา ปึอน ดี ลึบ ตึก มืง ตี หงึย หงึย. 19 เฆ บอ กาลาง ลอง เฌาพรา อี อึบ มืง เยรูซาแลม, แตห อึณ ปี ปี กาลาง เฆ ลอง เฌา ปี กรึบ ดูอี แบน โมยว แบน โมยว แดง กาดาย นี, อี มูห เฌา อารึบ ราง ปี โบง เฆ ดูอี.

20 ดอ อัน ตี คูนดีคัม อาเฮจัะกี บอ ดา อี บยาน โฆรห เฌาพรา อี จืร อาอีซายัะ อี มูห ฆอน อาโมด, ฆาย วี ซาคึร ดี เฌาพรา บอ ดัด แดะ หมาณ, แตห อัน เฌา จอย. 21 เฌาพรา มืร จัร อามู อามาด อัน อู กาดัง, แตห อัน ฮาว ง็อห ยัม ดา ซึก บอกาเฆลียด บอ เฆ ดา ตาง อี อึบ ดา ซึก อาซูรา. ปาย ตี คูนดีคัม เฆ แฮะ ชึม ซาเร บอ วี เวณ แคง มืง อาซูรียา. อาดา อู ซีแง ดอ กอย อัน แคง โฮว เฌา ปี กรึบ อัน, ฆอน อีมาย อัน มัง อี บอ วี ง็อห ยัม อัน ตา มาปัวะ ลาง.

22 ปาย ตี เฌาพรา แฮะ คยอด คูนดีคัม อาเฮจัะกี บอ เฆ ดูอี แคง มืง เยรูซาแลม, แตห เฆ ลอด ดี อาซาคารีบ อี มูห คูนดีคัม อี อึบ มืง อาซูรา. อัน แตห เฆ ลอด บอ ดี รันซู อี กอย ดอน นา ดอน โปละ. อัน เฌา มืร ยอด แมน เฆ, แตห เฆ กอย ดาคึย, กอย ฆยามซา ดอน นา ดอน โปละ. 23 เฆ ดูอี กืน บอ ดึห ตัห ปี ดี หลู เฆ, หลู ดี เฌาพรา แคง มืง เยรูซาแลม ตึอน. เฆ มืร ดึห คอซอง อี มึห ดีง็อห ดีคัน, ดัว ดี คูนดีคัม อาเฮจัะกี. จูห ซีณ ดอ อัน ตี คูนดีคัม อาเฮจัะกี มืร มึห ปวน มึห อาพูง ดังโคว, แตห ดูอี เฮา ดอน ฌึร ดอน โมยว โรวเซ อัน.

24 วาย อัน ตี อาเฮจัะกี แฮะ มึห เซา กอ รีน ดี ยัม. อัน บอ วี ซาคึร หมาณ ดี เฌาพรา. เฌาพรา มืร บยัะ อี หมึอม อาม กาเซา ดี อัน. 25 มาแล, อาเฮจัะกี วี มึห น็อห ปีคึก, อาว ฮู วี โหลห แปะ แฮะ เฆฌู เฌาพรา ดี อัน. โคว, เฌาพรา วี รู ดี อัน บอ ดี เฆ ดูอี อายูดา บอ ดูอี มืง เยรูซาแลม บอกาเฆลียด. 26 มาแล, อาเฮจัะกี ยี วี โหลห ลอง แฮะ ปีคึก อัน น็อห อัน ตี. ปาย ตี บอ อัน บอ เฆ ดูอี แคง มืง เยรูซาแลม บอกาเฆลียด, เฆ บอ วี ปีเตียม น็อห เฆ. เฌาพรา มืร อาว ฮู วี ดัม หมาบ ดี เฆ ดอ ซี กอย อาเฮจัะกี.

27 คูนดีคัม อาเฮจัะกี บอ มึห โกรวกราม บอ อาพูง ซาเร กืน กาเซา. อัน วี จูห ดี โบง โฮง โดง ดี แฆบ อูน รึอน ครีว, แซณ บอด, ซีนัม อูห หงูน, มัง ฆ็อง บอ ครึง ตา อาโมยว เฮา อี บอด อี หมึอม. 28 แดง ตี, อัน วี โบง บอ ฆรัว, โดง ดี แฆบ อูน โหงว, อึม มางูน, นามัน บอ โฮง โดง ดี คร็อง อูน มามัก แบน โมยว แบน โมยว บอ กาปึม มาบู. 29 อัน วี แด เรา แบน โปละ แบน โปละ, บอ ปึอน พึง มาบู มาแป กืน กาเซา. โคว, เฌาพรา แฮะ แตห อัน มึห โกรวกราม กืน กาเซา.

30 อาเฮจัะกี แฮะ ดึอม กาบีด โตห อึม อี กอย นา กัว โตห อึม ฆีโฮน. อัน วี ฆึห โรง, แตห อึม วี แหล ฮาว บลาก นา เฆต ซีแง มืง อาดาวีด. ปาย ตี แคะ ปี คราม อาเฮจัะกี ดี โบง มืร, อึณ ออง. 31 คูนดีคัม มืง บาแบ แฮะ จัร ดาลาม อัน, แตห เฆ ตัห ดีหมอด อาเฮจัะกี ลอง อี หมึอม อาม อี แฮะ โบว แบน แคง มืง อัน. ดอ อัน ตี เฌาพรา เบลห อาเฮจัะกี, แตห อัน โบง โดบ ปี อึง อัน. ปาย ตี อัน เฌา แฮะ เทว น็อห อัน, แตห อัน นับ โตต ดอน โมยว อี กอย แคง น็อห อาเฮจัะกี.

32 ลอง แปะ แฮะ โบง อาเฮจัะกี ดอ แฮะ อึบ อัน มาน มืง บอ ลอง แคะ ปี บึง อัน เฌาพรา, อึณ บอ แฮะ แดม อูน แคง บับ ปี แดม ดา อี บยาน โฆรห เฌาพรา อี จืร อาอีซายัะ อี มูห ฆอน อาโมด. อึณ แฮะ แดม อูน บอ แคง บับ บืน คูนดีคัม มืง ยูดา บอ คูนดีคัม มืง อีซาเรลัะ. 33 อาเฮจัะกี บอ ยัม ฮาว โดบ ดา ดา อัน. เฆ บอ ดีบ โดว โบ็ง อัน แดง บึบ อี มูห บาเรว หลาน อาดาวีด. ดอ ยัม อัน, เฆ ดูอี แคง กาดาย มืง ยูดา บอ เฆ ดูอี แคง มืง เยรูซาแลม, เฆ บอกาเฆลียด กาโพรม ดี อืบ มยูก อาเฮจัะกี, แตห อึณ โดบ ซาเร บอ อาพูง ดังโคว อัน. ฆอน อีมาย อัน อี จืร อามานาเซ บอ วี แบน คูนดีคัม ปลูะ อัน.