1 วาย แฮะ ฮอต โบง เฆ บลอย ตี, เฆ ดูอี อีซาเรลัะ อี แฮะ ตัห ลึบ บลอย ตี, เฆ วี ฮาว แคง กาดาย มืง ยูดา, วี กาบัก แวน ร็อง ปี กรึบ เฆ, ฆัร เกห ร็อง อารึบ นาง กานัม อี จืร เอซูรา. เฆ ปยาต แวน กาโช็ง หลู บอ โดง ดี กรึบ เฆ เฌา ปี กรึบ อี เฮา. เฆ โบง ปาย ตี แคง กาดาย มืง ยูดา ดอน นา ดอน โปละ บอ แคง กาดาย มืง อาเบนยาม, อาเอพารีม บอ อามานาเซ. เฆ ดูอี อีซาเรลัะ แฮะ ฮอต ปยาต แวน โตต ดอน นา ดอน โปละ, เฆ บอ วี ตัห มืง โดง กอย เฆ ราง อาเซ ราง อัน.

2 คูนดีคัม อาเฮจัะกี บอ วี ดาง แตห อึณ มึห พึง เฆ ดา อี หลู ดี เฌาพรา บอ พึง เฆ ดูอี อาโมยว อาเลวี, แตห เฆ วี นับ ฆาน ปี โลว โบง เฆ ราง อาเซ ราง อัน. ฆาน ปี โลว โบง เฆ ตี บอ มูห ลอง โลว หลู ปี ดี หลู อี โดะ ดี เงา, หลู อี กอย กาฌูะ โฮม รึม บอ ต็อห โหมว อี อืบ มยูก เฌาพรา ดี มาโลห โดง กอย เฌาพรา. 3 คูนดีคัม อาเฮจัะกี บอ หลู พึง มาบู เฆ พึง มามัก อี มูห โกรว อัน, แตห อึณ แบน ปี ดี หลู อี โดะ ดี เงา ซีณวัห บอ บา ดี อับ บอ ดอ มูห ซีแง ดีเหลา บอ ซีแง ลืนโมน. อัน บอ หลู ปี ดี หลู บอ ซีแง โบง บลอย, แตห อึณ บอ โดบ ดารา แคะ ปี แดม อูน แคง บับ เฌาพรา. 4 แดง ตี คูนดีคัม วี จัร เฆ ดูอี อี กอย แคง มืง เยรูซาแลม, แตห เฆ ดัว แคะ ปี โลว เฆ ดัว ดี ดา อี หลู ดี เฌาพรา บอ เฆ ดูอี อาโมยว อาเลวี, แตห เฆ บอ ปึอน ดี โดบ โบง ซีคยา ดารา เฌาพรา. 5 ดอ แฮะ ฮอต กาลัต ปี จัร คูนดีคัม ตี, เฆ ดูอี อีซาเรลัะ มืร กาโพรม ดี ดึห ตัห โกรว ปี ดี หลู เฆ อี มูห เบล ดัง ดอน โมยว. อึณ บอ มึห บอ โหงว, อึม มางูน, นามัน, งาม มาเพียน บอ เบล ปี ปีด ปี ซัม เฆ อี เลห แคง มาน เฆ. บอ โกรวกราม อาโมยว เฮา อี กืน กาเซา, เฆ วี ดึห ฆึร บูน อู บูน, วี ดัว ดี เฆ ดา อี หลู ดี เฌาพรา บอ เฆ ดูอี ครึร อาเลวี. 6 ปาย ตี เฆ ดูอี อีซาเรลัะ บอ เฆ ดูอี อายูดา อี กอย แคง กาดาย มืง ยูดา, เฆ มืร ดึห ฆึร บูน อู บูน แคง พึง มามัก, พึง มาบู มาแป เฆ บอ โกรวกราม เฆ แบน โมยว แบน โมยว อี กืน กาเซา, หลู ดี เฌาพรา. โกรว ปี หลู เฆ ตี, เฆ มืร แฆบ กาฌูะ อูน แบน อึณปึม อึณปึม. 7 เฆ จูห ดี แฆบ อูน โกรว ตี ซีณ มาเฆียน ฮาโอย, บอ วี ฮอต มาเฆียน อึณบู. 8 คูนดีคัม อาเฮจัะกี บอ เฆ อามู อามาด อัน, ดอ วี ตัห ยึร เฆ โกรว ปี หลู เฆ ตี, เฆ วี อืบ มยูก เฌาพรา บอ ม็องการา ดัว ดี เฆ ดูอี อีซาเรลัะ.

9 คูนดีคัม บอ ดีหมอด เฆ ดา อี หลู ดี เฌาพรา บอ เฆ ดูอี อาเลวี ลอง โกรว หลู ตี. 10 ดา ตาง อี หลู ดี เฌาพรา อี จืร อาฌารียา, อี มูห อาโมยว อาฌาโดก บอ วี ต็อห, “ซีณ ดอ กาจูห เฆ ดูอี กืน ดี ตัห หลู แคง โฮว เฌาพรา นี, อาว ฮู วัน ดี ฆลึม โฮม ฆลึม ตา เย. อึณ กอ แฮะ วี กาโลย กืน กาเซา. เฌาพรา แฮะ ม็องการา ดัว ดี เฆ ดูอี ปี อึบ อัน. โคว, เย แฮะ ปึอน กืน ปาย ตี.”

11 แฮะ ฮอต, คูนดีคัม อาเฮจัะกี วี กาลาง ดี เฆ, แตห เฆ วี โบง, วี อึณปราย โฮง โดง ดี แฆบ อูน โกรวกราม แคง โฮว เฌาพรา ตึอน. เฆ มืร โบง โดบ อู เฌณ. 12 ปาย ตี เฆ ดูอี อายูดา บอ เฆ ดูอี อีซาเรลัะ มืร โบง โดบ น็อห ซืร น็อห หมาน เฆ. เฆ วี ดึห โกรว หลู เฆ ตึอน ฆึร บูน อู บูน, วี แฆบ อูน แคง โฮง ตี. ดา ตาง อี อึบ อี ยอด แมน โกรว หลู เฆ ตี บอ มูห อากอนานี อี มูห ดูอี ครึร อาเลวี. บอ วา อัน อี จืร อาซีมี แบน อี ดาม อัน. 13 เฆ ดูอี อาโมยว อาเลวี อี จอย อี ดาม ฆาย ตี บอ มูห อาเยฮีลา, อาฌาฌียา, อานาฮัด, อาซาเฮลัะ, อาเยรีมูด, อายอจาบาด, อาเอลีเอน, อาอีซามาคียา, อามาฮาด บอ อาบีนายา. ดูอี เฆ ตี คูนดีคัม อาเฮจัะกี บอ อาฌารียา อี มูห ดา ตาง อี อึบ โตต แคง โฮว เฌาพรา, ฆาย แฮะ ดาง แตห เฆ โบง ฆาน ตี.

14 อาโควเร อี มูห ฆอน อาอีมานาฮา บอ ดูอี ครึร อาเลวี, อี บัร มาโลห บลาก นา เลห ซีแง, อัน บอ แบน ดา อี อึบ อี ยอด แมน โกรว แปะ แฮะ หลู อี ดี เฌาพรา, แบน บอ ดา อี กาย็อห กาซาง โกรว ตี. 15 แคง มาน มืง โดง กอย เฆ ดา อี หลู ดี เฌาพรา อึณ บอ มึห อาเอเดน, อามีนียามีน, อายอซู, อาเซมายา, อามารียา บอ อาเซคานี. ดูอี เฆ ตี เฆ บอ มึห น็อห ซืร น็อห หมาน ดี โบง ฆาน แบน อี ดาม อาโควเร. เฆ บอ กาซาง ปี ดี โฮม ดี บีนอง เฆ อี มูห ดูอี ครึร อาเลวี, แตห อึณ บอ การัม ดอน อี โดบ ฆาน ปี โบง เฆ วี เหมา วี อัน.

16 แดง ตี เฆ มืร กาซาง ดัว ดี อีมาย อาซาก อี แฮะ ปึอน โอย ซีนัม โฮะ นา แดง. ดูอี เฆ ตี แฮะ ฮอต มึห จืร เฆ แคง ฌาราง ดูอี อี ดี ปึอน ลึบ แคง โฮว เฌาพรา บอ โบง ฆาน เฌาพรา ดอน ซีแง ดอน ซีแง โดบ พึง เฆ ราง อาเซ ราง อัน. 17 เฆ วี กาซาง ดัว บอ ดา อี หลู ดี เฌาพรา อี แฮะ มึห จืร แคง ฌาราง อึณโฮม เฆ ดอน อึณโฮม. เฆ กาซาง บอ ดี เฆ ดูอี ครึร อาเลวี อาซาก อี แฮะ ปึอน อา ฆึร ซีนัม, บอ อา ฆึร โฮะ นา แดง, อี โลว โบง ฆาน โดบ พึง เฆ ราง อาเซ ราง อัน. 18 เฆ บอ กาซาง ดัว ดี ดอน อี บอ ดี อีบึณ เฆ บอ ดี ฆอน ดีแตด, บอ มูห ฆอน อีบึณ ฆอน อีมาย บอ ดอน อี อี แฮะ มึห จืร แคง ฌาราง. โคว, เฆ บอกาเฆลียด แฮะ มึห น็อห ซืร น็อห หมาน ดี แตห โดว เฆ ซีงา บอด. 19 อาดา เฆ หลูกหลาน ครึร อาโรน อี มูห ดา อี หลู ดี เฌาพรา อี กอย แคง มืง เฆ, บอ แคง มาน มืง อี กอย โรบ มืง ตี บอ ดอน มืง, เฆ ร็อห อีมาย มัง อี, แตห เฆ กาซาง ดัว ปี ดี โฮม ดี เฆ อีมาย บอ ดอน อี อี มึห จืร แคง ฌาราง เฆ ดูอี อาโมยว อาเลวี.

20 คูนดีคัม อาเฮจัะกี โบง ปาย ตี แตห อึณ กอ กาลัต แคง กาดาย มืง ยูดา. อัน มืร โบง นา ซืร นา หมาน, แตห อึณ โดบ ปี อึง เฌาพรา อี มูห เฌาพรา ปี กรึบ อัน. 21 แคะ ปี โบง อัน มืร แฮะ ออง. โคว, บอ มูห ลอง ปี โบง อัน แคง โฮว เฌาพรา, บอ มูห ลอง โบง โดบ อัน ดารา เฌาพรา, อัน แตห บอ น็อห บอ พึอม อัน โฆยวฆยา ดี โบง ปี อึง เฌาพรา อี มูห เฌาพรา ปี กรึบ อัน.