1 คูนดีคัม อาเฮจัะกี จัร ดาลาม อัน ฮาว แดะ ดูอี อีซาเรลัะ บอ ดูอี อายูดา, แตห เฆ ตัห ดี โฮว เฌาพรา อี กอย แคง มืง เยรูซาแลม, แตห เฆ โบง บลอย โหลห เฆ เฌาพรา ดอ กาโลห อัน กาง เฆ ดอ กอย เฆ แคง มืง แอฆึบ ตึอน. อัน บอ ตึย แปะ บาง บอ ครึร อาเอพารีม บอ ครึร อามานาเซ. 2 โคว อัน ตี, คูนดีคัม บอ วี ลาย ซังคยาง ดี เฆ อามู อามาด อัน บอ เฆ ดูอี แคง มืง เยรูซาแลม, แตห เฆ วี โบง บลอย ตี ดอ มูห มาเฆียน ฮาอา. 3 เฆ ดูอี กืน ตู ดัน โบง บลอย ตี โดบ อาคราว อัน ดอ มูห มาเฆียน ดอ โฆว. โคว, เฆ ดา อี หลู ดี เฌาพรา อี แฮะ ฮอต โบง แตห โดว โบ็ง เฆ ซีงา บอด, เฆ ตู ฆลึม. บอ เฆ ดูอี บอกาเฆลียด หณัม ตัห กาฌูะ แคง มืง เยรูซาแลม. 4 ลอง อัน ตี, แฮะ ล็อะ น็อห คูนดีคัม บอ เฆ ดูอี กืน. 5 เฆ มืร แดม แปะ, บาง แคะ กอย ดูอี อีซาเรลัะ บอกาเฆลียด, จูห ดี มืง บีราเซบา กอ วี ฌัม แคง กาดาย มืง ดาน, แตห เฆ ตัห กาฌูะ แคง มืง เยรูซาแลม, โบง บลอย โหลห เฆ เฌาพรา ดอ กาโลห อัน กาง เฆ. แฮะ เหลณ กาเซา เฆ ดูอี กืน ตู โบง บลอย ตี, แตห อึณ โดบ ปี ดัม อูน ดารา.

6 ปาย ตี เฆ ดาลาม บอ ดึห แปะ ตี, ฮาว แคง กาดาย มืง ยูดา บอ แคง กาดาย มืง อีซาเรลัะ ดอน โปละ, แตห อึณ โดบ แคะ ปี กาลาง คูนดีคัม บอ เฆ อามู อามาด อัน. โฆรห ปี แดม แคง แปะ ตี แฮะ ต็อห, “อึย เบ ดูอี อีซาเรลัะ, แตห เบ วี ตัห กรึบ เฌาพรา อี มูห เฌาพรา ปี กรึบ อาบราฮัม บอ อาแซก บอ อาโกบ. ปาย ตี อัน เฌา มืร ดี วี ตัห โดง กอย เบ อี ซี ฆีด ซี กอย, อี แฮะ ลอด ดี คูนดีคัม อาซูรา. 7 แกวะ แตห เบ โบง ปี ปี โบง ฆูณ เบ บอ อีกัด วา เบ อี มูห ดูอี อีซาเรลัะ, อี ตู มึห น็อห ซืร น็อห หมาน ดี เฌาพรา อี มูห เฌาพรา ปี กรึบ เฆ. เบ มืร แฮะ ฮอต ยึร ลอง เฌาพรา แฮะ แตห อาแบรด อี หมึอม โยว กาเซา ดี เฆ. 8 แกวะ แตห เบ ดืร ปี ฆูณ ดัง เบ. แตห เบ โฆม ดี อาต เฌาพรา. แตห เบ ตัห ลึบ แคง โฮว เฌาพรา อี แฮะ แบน โดง ซีงา บอด เซเซ. แตห เบ โบง ปี อึง เฌาพรา, แกวะ แตห อัน เฌา ซี รู ดี เบ. 9 เซ เบ วี ตัห โดบ เฌาพรา, เฆ รันซู เบ อี แฮะ เหมต ฮาว บีนอง เบ บอ ฆอน เบ ดี วี กาเว เฆ, วี เบลห เฆ, แตห เฆ วี ตัห แคง มืง นี. โคว, เฌาพรา อี มูห เฌาพรา ปี กรึบ เบ, อัน บอ มึห น็อห ร็อก บอ น็อห ซี เฆฌู อี. เซ เฆ วี โดบ อัน, อัน เฌา มืร ตู เบลห แวน เฆ.” แคะ ตี แปะ ปี แดม คูนดีคัม เฆ อามู อามาด อัน.

10 ดาลาม อี ตึย แปะ เฆ ตึอน มืร ฮาว ดอน มืง อี กอย แคง กาดาย ดูอี อาเอพารีม บอ ดูอี อามานาเซ, กอ วี ฌัม บอ แคง กาดาย มืง ดูอี อาเฌบูโลน. มาแล, ดูอี เฆ ตี บอ วี แนนัะ ดาลาม เฆ ตี, บอ วี ปี วาณาก กาณัห เฆ. 11 ปี บอ แฮะ ปาย ตี มืร, ยี มึห เฆ ดูอี มัง อี อี มูห ดูอี ครึร อาเซน, ดูอี ครึร อามานาเซ บอ ครึร อาเฌบูโลน, เฆ มึห น็อห โฆม, น็อห เตียม บอ ฮาว ดี มืง เยรูซาแลม. 12 เฌาพรา มืร จอย เฆ ดูอี อายูดา, แตห เฆ แบน อู น็อห อู พึอม, แตห เฆ ลาย โพรม ดี โบง อี ล็อะ น็อห อัน เฌา โดบ ปี กาลาง ปี คราม คูนดีคัม บอ เฆ อามู อามาด อัน. 13 อึณ บอ มึห ดูอี กืน กาเซา ตัห กาฌูะ แคง มืง เยรูซาแลม, แตห เฆ โบง บลอย โฮม คามูน ตู ฮับ ซีนัม บรัห ดอ มูห มาเฆียน ฮาอา. 14 ดูอี เฆ ตี มืร ดึห กาโช็ง หลู โดง โดะ เฆ ปี ดี หลู บอ โดง โดะ เฆ ซีนัม อูห หงูน ดี อารึบ ราง อี กอย แคง มืง เยรูซาแลม. เฆ วี ปยาต, วี ฮาว แวน แคง ดีลัยะ แบลง คีดาโรน.

15 บอ ฌัม มาเฆียน ฮาอา, ซีแง ฆึร ดี อึณพวน, เฆ บอ ง็อห ฆอน มาบู อี แตห เฆ โหลห ดอ กาโลห เฌาพรา กาง เฆ. เฆ ดา อี หลู ดี เฌาพรา บอ เฆ ดูอี อาโมยว อาเลวี, เฆ อี ตู ซีงา, เฆ บอ ซาย อี. เฆ บอ วี โบง แตห เฆ ซีงา บอด. แฮะ ฮอต, เฆ บอ วี ปึอน ดี หลู ปี ดี หลู อี โดะ ดี เงา แคง โฮว เฌาพรา. 16 เฆ วี ปึอน ดี โบง ฆาน เฆ ราง อาเซ ราง อัน โดบ ปี กาลาง อูน อาโมวแซ อี มูห แดเจณ เฌาพรา. เฆ ดา อี หลู ดี เฌาพรา เฆ วี ดึห หนาม ดี เฆ ดูอี อาเลวี, วี คร็อห แดง กาโช็ง หลู. 17 โกบ หณัม ซีงา เฆ ดูอี กืน, เฆ ตู ปึอน หลู ฆอน มาบู อาดา บลอย ตี. เฆ ดูอี อาโมยว อาเลวี บอ กาดูห ดี ง็อห ฆอน มาบู อาดา เฆ อี ตู ซีงา บอด, อี ตู ปึอน หลู ดี เฌาพรา. 18 อึณ ยี ซี มึห ดูอี กืน อี หณัม แตห โดว โบ็ง เฆ ซีงา บอด. ดูอี เฆ ตี บอ มูห ครึร อาเอพารีม, ครึร อามานาเซ, ครึร อาอีซาคา บอ ครึร อาเฌบูโลน. เฆ ยี โฮม บลอย ตี, แกวะ แตห อึณ โดบ ปี ดัม อูน ดารา. มาแล, คูนดีคัม อาเฮจัะกี บอ วี ซาคึร ดาง เฆ. 19 อัน ต็อห, “อึย แม เฌาพรา อี มูห เฌาพรา ปี กรึบ เฆ ฆูณ ดัง ดูอี เฆ ตี. เฆ ตู ซีงา อี โดบ ปี ดัม อูน ดารา. แม ยี มูห เฌาพรา อี มึห น็อห หมึอม. โอว หมาณ, แตห แม เฌา ฆ็อห แวน หมาบ เฆ ดูอี อี แฮะ ดึห บอ น็อห บอ พึอม เฆ, ตัห กรึบ แม เฌาพรา.” 20 เฌาพรา มืร โทม โฆรห ปี ซาคึร อาเฮจัะกี บอ วี แตห เฆ คัะ ฆยามซา.

21 แคะ กอย ดูอี อีซาเรลัะ อี แฮะ ตัห กาฌูะ แคง มืง เยรูซาแลม ตึอน, เฆ มืร โบยว ดาคึย กาเซา บอ โบง บลอย โฮม คามูน อี ตู ฮับ ซีนัม บรัห อาดา บู ซีแง. เฆ ดา อี หลู ดี เฌาพรา บอ เฆ ดูอี ครึร อาเลวี, เฆ มืร ต็อห โหมว, อืบ เฌาพรา บอ บูด บอ บัห โมยว อี ฮัม ดาคึย แบน ซีแง แบน ซีแง.

22 อาเฮจัะกี มืร กาลาง โฆรห อี ดี แตห โปลม แตห แฮณ ดี น็อห เฆ ดูอี ครึร อาเลวี, เฆ อี นับ ดี แยต อี เฮา กรึบ เฌาพรา. เฆ แฮะ โบง บลอย ตี อาดา บู ซีแง. ดอ อัน ตี เฆ มืร โฮม ปี ดัว เฌาพรา เฆ โฮม. เฆ มืร หลู ปี ดี หลู อี กอย กาฌูะ โฮม รึม บอ อืบ มยูก เฌาพรา อี มูห เฌาพรา ปี กรึบ ฆูณ ดัง เฆ.

23 เฆ บอกาเฆลียด วี ลาย โพรม ดี โบง ฮาว บลอย ตี ปอ บู ซีแง. เฆ มืร โบง แตห อึณ กอ โบยว โบยว เกยา เกยา อาดา ปอ บู ซีแง ตี. 24 คูนดีคัม อาเฮจัะกี อี อึบ มืง ยูดา มืร หลู มัก อาโล็ง อู แหรณ โดว บอ มาบู มาแป บู แหรณ โดว. อัน หลู แตห อึณ แบน อาดา ปี ดี โฮม เฆ ดูอี กืน. เฆ อามู อามาด อัน ปี วี หลู มัก อาโล็ง อู แหรณ โดว บอ มาบู มาแป อู หมึณ โดว อาดา ดูอี กืน เฆ ตี. อึณ บอ มึห เฆ ดา อี หลู ดี เฌาพรา กืน กาเซา อี โบง แตห โดว โบ็ง เฆ ซีงา บอด. 25 แคะ กอย เฆ ดูอี กืน บอ มูห ดูอี อายูดา, บอ มูห ดา อี หลู ดี เฌาพรา บอ ดูอี ครึร อาเลวี, บอ มูห ดูอี อี ตัห มืง อีซาเรลัะ บอ เฆ ดูอี อาโมยว เฮา อี ตัห กอย แคง มืง อีซาเรลัะ บอ แคง มืง ยูดา, เฆ บอกาเฆลียด บอ กาโพรม ดี โคย ดาคึย กาเซา. 26 แคง มืง เยรูซาแลม ตี, เฆ มืร แฮะ โบยว แฮะ เกยา ดาคึย กาเซา. โคว, ซีณ ดอ มูห โจว บาน คูนดีคัม อาซาโลวโมว อี มูห ฆอน อาดาวีด บอ อึบ มืง อีซาเรลัะ, ตู ดึอม มึห ดอ โบยว ดอ เกยา แคะ ตี. 27 ปาย ตี เฆ ดา อี หลู ดี เฌาพรา บอ เฆ ดูอี ครึร อาเลวี, เฆ มืร ซาคึร หมาณ, แตห เฌาพรา ม็องการา ดัว ดี เฆ ดูอี กืน. โฆรห ปี ซาคึร เฆ ตี, เฌาพรา มืร แฮะ โทม. โคว, อึณ แฮะ ลึห ฌัม แคง ฆางหราว อี มูห โดง ซีงา บอด, โดง กอย อัน เฌา.