1 อาเฮจัะกี วี แบน คูนดีคัม อี อึบ มืง ยูดา ดอ โนะ อาซาก อัน อา ฆึร ดี พัน ซีนัม. อัน บอ อึบ กอย แคง มืง เยรูซาแลม อาดา อา ฆึร ดี ดีม ซีนัม. มา อัน จืร นาง เอพียัะ อี มูห ฆอน อาซาคารา. 2 อัน บอ โบง นา บอด นา หมึอม ปี อึง เฌาพรา. อัน โดบ ปี ปาย ดา ดา อัน อี มูห คูนดีคัม อาดาวีด ตึอน.

3 ดอ มูห ซีนัม ดอ โฆว, มาเฆียน ดอ โฆว ดอ แบน อาเฮจัะกี คูนดีคัม ตี อัน วี วึห มาโลห โฮว เฌาพรา อู เฌณ บอ วี โบง วี อึณปราย ดอน โปละ. 4 อัน วี กาลาง ดี เฆ ดา อี หลู ดี เฌาพรา บอ ดี เฆ ดูอี ครึร อาเลวี, แตห เฆ ตัห กาฌูะ แคง แวง โฮว เฌาพรา บลาก นา เลห ซีแง. 5 อัน วี ต็อห ดี เฆ, “อึย เบ ดูอี อาโมยว อาเลวี, แตห เบ โทม, แตห เบ โบง แตห โดว โบ็ง เบ ซีงา บอด. แฮะ ฮอต, วี โบง แตห บอ โฮว เฌาพรา ซีงา บอด. อึณ มูห เฌาพรา ปี กรึบ ฆูณ ดัง เบ แตห เบ ดึห แวน โตต อี หมึอม กาอีห, อี กอย แคง โดง ซีงา บอด. 6 เฆ ฆูณ เอ ตู มึห น็อห ซืร น็อห หมาน ดี เฌาพรา อี มูห เฌาพรา ปี กรึบ เอ. เฆ แฮะ โบง อี ตู ล็อะ น็อห อัน เฌา. เฆ แฮะ วัห อัน เฌา, อาว ฮู ยอด โดง กอย อัน เฌา. 7 เฆ แฮะ กาบีด มาโลห โฮว เฌาพรา, แฮะ บยัด แวน บอ เงา ออม บอกาเฆลียด. เฆ มืร อาว ฮู โดะ ซีนัม อูห หงูน, อาว ฮู หลู ปี ดี หลู อี โดะ ดี เงา แคง โฮว เฌาพรา อี มูห เฌาพรา ปี กรึบ ดูอี อีซาเรลัะ. 8 โกบ โบง เฆ ปาย ตี เฌาพรา มืร รู กาเซา ดี เฆ ดูอี อายูดา บอ ดี เฆ ดูอี แคง มืง เยรูซาแลม. เบ มืร แฮะ ฮอต นับ ซีคยา แคะ แปะ แฮะ โบง อัน เฌา ดี เฆ แฮะ หมึอม โยว หมึอม กาฮีว ดี ดูอี ดอน อี. 9 ดา เอ บอ ฆูณ เอ แฮะ กาดูห ดี ยัม โดง กาโฆห เฆ. ฆอน เอ เฆ อีบึณ เอ แฮะ วี กาดูห ดี คัม อี เฮา เหมต ฮาว เฆ. 10 ดอ ตี นี โอว แฮะ คัด น็อห, ต็อห ดี ดัว กาดีก ซัดฌา ดี เฌาพรา อี มูห เฌาพรา ปี กรึบ ดูอี อีซาเรลัะ, แตห น็อห รู อัน หราย. 11 อึย เบ ฆอน โอว, เบ แกวะ แกร แกวะ ทืง ดี โบง. โคว, เฌาพรา แฮะ ร็อห เบ, แตห เบ แบน อี โบง ฆาน อัน, อี กอย ดี อาต อัน เฌา บอ โดะ ซีนัม อูห หงูน บอ แยต เฆ ดูอี กืน กรึบ อัน.”

12 ปาย ตี เฆ ดูอี ครึร อาเลวี มืร ตัห อู เฌณ. ดูอี เฆ ตี บอ มูห อามาฮาด อี มูห ฆอน อามาเซ บอ อาโยวเอลัะ อี มูห ฆอน อาฌารียา. ฆาย บอ มูห ดูอี อาโมยว อาโควฮาด. อึณ บอ มูห อากีซา อี มูห ฆอน อาพาดี บอ อาฌารียา อี มูห ฆอน อาเยฮาลาเลน. ฆาย มูห ดูอี อาโมยว อาเมนรารี. อึณ มูห บอ อาโยวอา อี มูห ฆอน อาฌีมา บอ อาเอเดน อี มูห ฆอน อาโยวอา. ฆาย บอ มูห ดูอี อาโมยว อาเฆนราโซน. 13 อึณ บอ มูห อาซีมารี บอ อาเยยีลา อี มูห ดูอี อาโมยว อาเอลีฌาพาน, อาซาคารา บอ อามาทานี อี มูห ดูอี อาโมยว อาซาบ, 14 อาเยฮีลา บอ อาซีมี อี มูห ดูอี อาโมยว อาเฮมาน, อาเซมายา บอ อาอูซีเอน อี มูห ดูอี อาโมยว อาเยดูทูน.

15 เฆ มืร แดะ ตัห กาฌูะ โตต แคะ กอย ดูอี ครึร อาเลวี บอ โบง แตห โดว เฆ ซีงา. แฮะ ฮอต, เฆ มืร โบง โดบ ปี จัร คูนดีคัม เฆ โบง. เฆ วี โบง แตห บอ โฮว เฌาพรา ซีงา, แตห อึณ บอ โดบ ปี กาลาง อูน เฌาพรา. 16 เฆ ดา อี หลู ดี เฌาพรา มืร ตัห ลึบ แคง โฮว เฌาพรา บอ โบง แตห โฮว เฌาพรา ซีงา บอด. เฆ บอ โตว เลห กาอัห อี ตู ซีงา บอด ดอน โมยว อี กอย แคง โฮว เฌาพรา ตึอน, วี ฮาว ฮูห ดี ดีฆลัะ แวง โฮว เฌาพรา. เฆ ดูอี ครึร อาเลวี ปี วี ดึห ดี ตี, วี ฮาว ฮูห นา เรต มืง แคง ดีลัยะ แบลง คีดาโรน. 17 ดอ ฌัม มาเฆียน ดอ โฆว, ซีแง ดอ โฆว, เฆ มืร กาจูห ดี โบง. กอ ฌัม ซีแง อึณดา เฆ แฮะ ฮอต โบง แตห อึณ ซีคยา โตต ดอน โปละ, กอ ฌัม บอ แคง โฮว ตาง อี กอย ดี อาต มาโลห โฮว เฌาพรา. ดอ วี ฌัม มาเฆียน ดอ โฆว, ซีแง ฆึร ดี อึณเดา, เฆ มืร แฮะ ฮอต ฮอต โตต.

18 เฆ ดูอี ครึร อาเลวี บอ วี ตัห ฌัม โดง กอย คูนดีคัม อาเฮจัะกี บอ ต็อห ดี อัน, “เย แฮะ ฮอต โบง แตห โฮว เฌาพรา ซีงา บอด โตต ดอน โปละ. เย แฮะ โบง แตห อึณ เฌะฌูง โตต ดอน โมยว. บอ มูห กาโช็ง โดง หลู ปี หลู อี โดะ ดี เงา, กาโช็ง โดง เบลห คามูน อี ซีงา บอด บอ โกรว ปี โลว จัร โลว ตา ดอน โมยว มืร, แฮะ ฮอต ซีงา บอด โตต ดอน โมยว. 19 ครึง ตา แปะ แฮะ ดึห เลห คูนดีคัม อาคาด ดอ แฮะ โบง กาบัห อัน ดี เฌาพรา มืร, เย แฮะ ฮอต วี โบง วี อึณปราย, แตห อึณ ซีงา บอด โตต ดอน โมยว. โกรว เฆ ตี แฮะ กอย โตต ดี อาต กาโช็ง หลู ดี เฌาพรา.”

20 ปา แคหณา อาเฮจัะกี มืร ยีต ซีณ ซีณวัห เจว, แดะ ตัห กาฌูะ แคะ กอย เฆ อามู อามาด อัน, แตห เฆ วี โฮะ ลึบ แคง โฮว เฌาพรา. 21 อัน มืร ดึห มัก อาโล็ง บู โดว, มาบู อาโล็ง บู โดว, ฆอน มาบู อาโล็ง บู โดว บอ มาแป อาโล็ง บู โดว, แตห อึณ แบน ปี ดี หลู อี ฆ็อห แวน หมาบ เฆ ดูอี อี กอย แคง โฮว อัน บอ เฆ ดูอี บอ เรา บอ กาง แคง กาดาย มืง ยูดา บอกาเฆลียด, แตห บอ โฮว เฌาพรา ซีงา บอด. อัน มืร จัร เฆ ดา อี หลู ดี เฌาพรา อี มูห หลูกหลาน อาโรน, แตห เฆ ดึห โดว ซัดดาวา เฆ ตี, หลู แดง กาโช็ง หลู. 22 เฆ ดา อี หลู ดี เฌาพรา มืร ง็อห มัก อาโล็ง, วี ดึห หนาม โดว เฆ ตี, คร็อห ดี กาโช็ง หลู. แฮะ ฮอต, เฆ วี ง็อห มาบู อาโล็ง, วี ดึห หนาม โดว เฆ ตี, คร็อห ดี กาโช็ง หลู. ปี วี ง็อห บอ ฆอน มาบู อาโล็ง, ปี วี ดึห หนาม โดว เฆ ตี, วี คร็อห ดี กาโช็ง หลู. 23 เฆ วี ดึห มาแป อาโล็ง อาดา ปี ดี หลู ดี ฆ็อห แวน หมาบ, วี ฮาว เบลห ดี อาต คูนดีคัม บอ ดี อาต เฆ ดูอี กืน, แตห เฆ ดอน อี ดาง แด เฆ แดง ฆีณ มาแป เฆ ตี. 24 วาย อัน ตี, เฆ ดา อี หลู ดี เฌาพรา บอ ง็อห มาแป อาโล็ง ตี, วี ดึห หนาม วี โหลว แดง กาโช็ง หลู, แตห อึณ แบน ปี ดี หลู อี ฆ็อห แวน หมาบ ดูอี บอกาเฆลียด. โคว, คูนดีคัม แฮะ จัร เฆ หลู ปี ดี หลู อี โดะ ดี เงา บอ ปี ดี หลู อี ฆ็อห แวน หมาบ เฆ ดูอี อีซาเรลัะ บอกาเฆลียด.

25 คูนดีคัม อาเฮจัะกี มืร โบง โดบ โฆรห เฌาพรา แปะ แฮะ กาลาง อัน เฌา ดี ดา อี บยาน โฆรห เฌาพรา อี จืร อาฆัด ฆาย อานาทาน, แตห ฆาย วี กาลาง ดี คูนดีคัม อาดาวีด. อัน มืร จัร เฆ ดูอี อาเลวี โฆ็ง แชณ, ดีง บอ ดีง ดีเรา, กอย แคง โฮว เฌาพรา. 26 โกรว ปี ดอย ปี บัห เฆ ตี, อึณ บอ มูห โกรว ปี ดึอม ดัว คูนดีคัม อาดาวีด, แตห เฆ ดูอี อาเลวี จัร. ปาย ตี เฆ ดูอี อาเลวี มืร จ็อง โฆ็ง โมยว ปี ดอย ปี บัห ตี. เฆ ดา อี หลู ดี เฌาพรา บอ บัร ดี บูด เวา.

27 อาเฮจัะกี มืร กาลาง แตห เฆ หลู ปี ดี หลู อี โดะ ดี เงา. ดอ กาจูห เฆ ดี หลู ตี, เฆ มืร ต็อห โหมว อี อืบ มยูก เฌาพรา. เฆ บอ บูด เวา บอ ดอย บอ บัห แบน โมยว แบน โมยว อี ฮัม ดาคึย. 28 แคะ กอย ดูอี กืน, เฆ มืร มูด ฆึบ กรึบ เฌาพรา. เฆ อี โลว ต็อห โหมว, เฆ มืร ต็อห โหมว. เฆ อี โลว บูด เวา มืร บูด เวา. เฆ โบง ปาย ตี แตห กอ ฌัม ปัน ดี ฮอต เฆ หลู ปี ดี หลู อี โดะ ดี เงา.

29 ดอ แฮะ ฮอต เฆ หลู ตี, คูนดีคัม อาเฮจัะกี บอ เฆ ดูอี กืน บอกาเฆลียด วี กาโพรม ดี ครึบเครา กรึบ. 30 คูนดีคัม เฆ อามู อามาด อัน มืร จัร เฆ ดูอี ครึร อาเลวี, แตห เฆ ต็อห โหมว อี อืบ เฌาพรา อี มูห โหมว ปี แดม อาดาวีด บอ อาซาบ อี มูห ดูอี อี นับ ดี ยึร. ปาย ตี เฆ มืร โคย ดาคึย บอ มูด กรึบ.

31 วาย อัน ตี อาเฮจัะกี ปี วี กาลาง ดี เฆ ดูอี กืน ต็อห, “ดอ ตี นี เบ แฮะ ฮอต แตห โดว โบ็ง เบ ซีงา. โคว, แตห เบ ดึห โดว ซัด ปี ซี หลู เบ บอ ปี ดี หลู อี ดาง ฆูง เฆฌู ดี เฌาพรา, แตห เบ หลู ดอ ตี นี.” เฆ มืร โทม โฆรห คูนดีคัม ตี. เฆ อี มึห น็อห ฌอนโฌม ซี หลู, เฆ มืร ดึห ตัห โดว ซัดดาวา, แตห อึณ แบน ปี ดี หลู อี โดะ ดี เงา บอ ปี ดี หลู อี ดาง ฆูง เฆฌู ดี เฌาพรา.

32 ปี ดี หลู เฆ บอ ดอน โมยว บอ มูห มัก อาโล็ง บู ฆึร โดว, มาบู อาโล็ง อู มาย็อห โดว, ฆอน มาบู อาโล็ง อา มาย็อห โดว. บอกาเฆลียด เฆ แตห อึณ แบน ปี ดี หลู ดี เฌาพรา อี โดะ ดี เงา. 33 แดง ตี เฆ ปี วี หลู บอ มัก อาโล็ง ปอ เดา มาย็อห โดว บอ มาบู อาโล็ง โอย แหรณ โดว. 34 เฆ ดา อี หลู ดี เฌาพรา แฮะ เปรต กาเซา. โคว, เฆ อาว ฮู นับ ดี เลียะ เลห ฮูน โดว ซัด เฆ ตี. เฆ ดูอี ครึร อาเลวี บอ กาดูห ดี จอย เฆ, แตห อึณ กอ ฌัม ปัน ดี ฮอต เฆ ดา อี หลู ดี เฌาพรา ปอ อึณปัว โบง แตห โดว โบ็ง เฆ ซีงา บอด. เฆ ดูอี ครึร อาเลวี เฆ แฮะ ซาดีก กาเซา, โบง แตห โดว โบ็ง เฆ ซีงา บอด หลึอม เฆ ดา อี หลู ดี เฌาพรา. 35 โดว ปี หลู อี โดะ ดี เงา บอ เบรียง อี เลห ดี ปี ดี หลู อี กอย กาฌูะ โฮม รึม, บอ ปี ดี เดียง อี โดบ ปี ดี หลู อี โดะ แคง เงา, อึณ แฮะ กืน กาเซา. ปาย ตี เฆ วี จูห ดี กรึบ เฌาพรา บอ หลู ปี ดี หลู แคง โฮว เฌาพรา ตึอน.

36 คูนดีคัม อาเฮจัะกี บอ เฆ ดูอี กืน, เฆ มืร โคย ดาคึย กาเซา โกบ แฮะ จอย เฌาพรา, แตห ฆาน ปี โลว โบง เฆ เจว ฮอต, แตห เฆ ปึอน ดี หลู ครัน ครัน.