1 ดอ แฮะ โนะ อาซาก อาคาด อา ฆึร ซีนัม อัน แฮะ แบน คูนดีคัม. อัน บอ กอย อึบ แคง มืง เยรูซาแลม อาดา ฆึร ดี เดา ซีนัม. อัน ยี ตู โบง นา บอด นา หมึอม ปี ปี โบง ดา ดา อัน อี มูห อาดาวีด ตึอน. อัน วี โบง ปี ตู อึง เฌาพรา. 2 อัน วี โบง ปี ปี โบง เฆ คูนดีคัม อีซาเรลัะ. อัน บอ โหลว อารึบ เฌา บาลัะ แบน กาดัง แบน กาดัง, แตห อัน กรึบ. 3 อัน วี โดะ หลู ซีนัม อูห หงูน แคง ดีลัยะ เบนฮีนูม. อัน บอ หลู ฆอน อัน มัง อี ดี เฌา อารึบ, แตห อึณ แบน ปี ดี หลู อี โดะ ดี เงา. อัน โบง โดบ ทูงฆยาม อี หมึอม กาอีห ปี แปะ แฮะ โบง เฆ ดูอี แปะ แฮะ ดึอม ณอน แวน เฌาพรา อาต ลึบ เฆ ดูอี อีซาเรลัะ แคง มืง ตี. 4 อัน บอ หลู ปี หลู อี โดะ ดี เงา บอ ปี หลู อี อูห หงูน ดี โดง จา ดอน โปละ, บอ แดง นอน ดอน นอน บอ ดี ดัง เฮ ตาง ดอน กาดัง.

5 โกบ โบง คูนดีคัม อาคาด อี ตู หมึอม ตี, เฌาพรา อี มูห เฌาพรา ปี กรึบ อัน บอ แตห อัน ชึม ดี คูนดีคัม มืง อาราม. เฆ บอ กาโฆห แป คูนดีคัม อาคาด บอ เหมต ดูอี อายูดา กืน กาเซา, วี ตึย เวณ เฆ แคง มืง ดามาคู. ดอ อัน ตี มืร เฌาพรา แฮะ โบง แตห อาคาด ชึม ดี คูนดีคัม อีซาเรลัะ อี จืร อาเบคา อี มูห ฆอน อาเรมาลี. อัน บอ ง็อห ยัม ดา ซึก ดูอี อายูดา กืน กาเซา. 6 อู ซีแง อัน บอ ปึอน ดี ง็อห ยัม ดา ซึก ดูอี อายูดา อาดา อู แซน ดี อา หมึณ วี. โคว, เฌาพรา อี มูห เฌาพรา ปี กรึบ ฆูณ ดัง เฆ, อัน แฮะ โบง แตห อึณ แบน ปาย ตี ดี เฆ โกบ แฮะ แวน เฆ ดี อัน เฌา. 7 ดา ซึก ดูอี อาโมยว อาเอพารีม อู วี อี จืร อาฌีคารี, อัน บอ ง็อห ยัม อามาเซยา อี มูห ฆอน คูนดีคัม อาคาด บอ อาฌารีกัม อี มูห ดา ตาง อี อึบ แคง โฮว คูนดีคัม. อัน บอ ง็อห ยัม บอ อาเอนคานา อี มูห ดา กาณา อี ดาม คูนดีคัม. 8 เฆ ดูอี อายูดา ปี บอ แฮะ มูห อู บีนอง อู ครึร ดี ดูอี อีซาเรลัะ มืร, เฆ ดูอี อีซาเรลัะ ยี วี เหมต บอ ฆอน อีบึณ บอ ฆอน อีมาย เฆ อาดา อา แซน วี, วี ตึย เวณ เฆ ดี มืง ซามารี. เฆ ดึห ฮาว บอ โกรวกราม เฆ กืน กาเซา.

9 ดอ อัน ตี อึณ วี มึห ดูอี อี บยาน โฆรห เฌาพรา อี จืร อาโอวดี. อัน กอย แคง มืง ซามารี บอ วี ฮาว บัร ดี รวห อึณเตณ เฆ ดา ซึก ดูอี อีซาเรลัะ. เฆ แฮะ รีน ดี ตัห ลึบ แคง มืง, อัน วี กาลาง ดี เฆ ต็อห, “เฌาพรา อี มูห เฌาพรา ปี กรึบ เบ, อัน แฮะ รู ดี เฆ ดูอี อายูดา, แฮะ แตห เบ กาโฆห แป เฆ. มาแล, อัน เฌา แฮะ วี ยึร บอ ปี ปาย ดอซัะ เบ ดี แฮณ บอ ลอง แฮะ ง็อห ยัม กืน กาเซา เบ ดี เฆ. 10 ดอ ตี นี, เบ วี คราม ดี ดึห บอ อีบึณ อีมาย อี กอย แคง มืง เยรูซาแลม บอ แคง มืง ยูดา, แตห เฆ แบน หมาย เบ. เบ ยี แฮะ ฮอต ลูต เฌาพรา, แฮะ ฮอต มึห หมาบ. 11 แตห เบ โทม โฆรห โอว. ดูอี ปี เหมต ตัห เบ เฆ ตี, เฆ มูห บีนอง วอแว เบ. แตห เบ วี เบลห เวณ เฆ, โยว เฌาพรา รู ดี เบ, ดี บอ ดัม หมาบ ดี เบ.”

12 อึณ มึห ดา ตาง มัง อี เฆ อี อึบ แคง กาดาย มืง อาเอพารีม. เฆ จืร อาฌารียา อี มูห ฆอน อาเยโฮวนัน, อาเบเรก อี มูห ฆอน อาเมซีลามูด, อาเฮจัะกี อี มูห ฆอน อาซาโลม บอ อามาซา อี มูห ฆอน อาฮาตาลี มืร แคร ปี โบง เฆ ดา ซึก อี แฮะ วี ตัห เฆ ตี. 13 เฆ มืร กาลาง ดี ดา ซึก เฆ ตี ต็อห, “แกวะ แตห ดูอี ปี เหมต ตัห เบ ตัห ลึบ แคง มืง. เอ แฮะ ฮอต ลูต เฌาพรา, แฮะ ฮอต มึห หมาบ. เฌาพรา แฮะ ฮอต รู กาเซา ดี เอ. แกวะ โบง แตห หมาบ เอ แว กืน กาปัว. แกวะ แตห เอ แว โลว คัม ปอ อึณปัว.”

14 ปาย ตี ดา ซึก เฆ ตึอน บอ วี ดึห ดูอี ปี เหมต ตัห เฆ บอ โกรวกราม แปะ แฮะ พาด ตัห เฆ, วี เบลห อูน ดูอี เฆ ตี บอ โกรวกราม เฆ, แตห บอ ดูอี กืน บอ ดา กาณา อี อึบ มืง ยึร. 15 เฆ มืร อาบ ดัว ดี เฆ ดา กาณา พวน วี ตึอน, แตห เฆ ดึห ครึง ตา แปะ แฮะ พาด ตัห เฆ, วี กาซาง ดัว ดี เฆ ดูอี ปี เหมต ตัห เฆ. เฆ ดา ตาง พวน วี, เฆ มืร ดึห ครึง ตา บอ มูห ซีโตว บอ แคลบ, วี ดัว ดี เฆ อี ตู มึห, แตห เฆ ชึบ. เฆ มืร ดึห บอ ปี ดี โฮม เฮียง เฆ, ดึห บอ นามัน พ็อห ดี ดีม เฆ. ดูอี อี ตู จาว ฮาว, เฆ บอ แตห เฆ ป็อะ มาลา. เฆ วี ตึย ดูอี เฆ ตี บอกาเฆลียด, แตห เฆ วี เวณ แคง มืง เยรีโคว อี กอย แคง กาดาย มืง ยูดา. อึณ มูห มืง อี มึห เฮ จึก. แฮะ ฮอต, เฆ ดูอี อีซาเรลัะ มืร วี เวณ ดี มืง ซามารี.

16 ดอ อัน ตี คูนดีคัม อาคาด วี จัร ดาลาม อัน ฮาว โดง กอย คูนดีคัม อี อึบ มืง อาซูรา, แดะ แตห อัน ตัห จอย อัน. 17 โคว, เฆ ดูอี มืง เอโดม แฮะ วี ตัห ตึก ดูอี อายูดา ปอ อู เฌณ. เฆ มืร แฮะ เหมต ฮาว บอ เฆ ดูอี อายูดา มัง อี. 18 ดอ กาโฆห เฆ ตี, เฆ ดูอี พีลีที แฮะ วี ตัห ลึบ แคง มืง มัง มืง อี กอย เครียะ ดี ดัง นอน นา เลห ซีแง บอ บลาก นา เตต กาดาย มืง ยูดา ตึอน. เฆ มืร แฮะ ปึอน มืง เบดเซเมด, มืง อาจาลูน, มืง เกตารูด บอ มืง เซคอ, มืง ทีมานา บอ มืง ฆีมาซอ บอ เรา อี กอย โรบ มืง เฆ ตี. แฮะ ฮอต, เฆ มืร คยัะ กอย แคง มืง เฆ ตี. 19 โคว, เฌาพรา มืร แตห มืง ยูดา โจห เตียม กาเซา โกบ คูนดีคัม อาคาด. อัน มืร แฮะ กาซูห ดูอี อายูดา โบง อี ฮาย กาเซา. อัน มืร แฮะ ลูต กาเซา เฌาพรา. 20 อาตีกาลาดบีเลซา อี มูห คูนดีคัม อี อึบ มืง อาซูรา, ปี บอ แฮะ ตัห โดง กอย คูนดีคัม อาคาด มืร, วี ดัว ดูก ดี อัน บอ ตู จอย มาเซ. 21 ปาย ตี คูนดีคัม อาคาด มืร แฮะ ดึห ครีว อี กอย แคง โฮว เฌาพรา บอ อี กอย แคง โฮว คูนดีคัม บอ แคง กาง เฆ อามู อามาด อัน, วี ดัว ดี คูนดีคัม อาซูรา. อึณ ยี ตู จอย มาเซ ดี อัน.

22 ดอ ดูก ตาง แฮะ แว กาเซา ดี คูนดีคัม อาคาด ตี, อัน มืร วี แว โบง ลูต เฌาพรา หลึอม อาต นี. 23 อัน วี หลู ปี ดี หลู ดี เฌา ปี กรึบ เฆ ดูอี แคง มืง ดามาคู อี แฮะ โบง แตห อัน ลึร ชึม ตึอน. อัน มืร ต็อห, “เฌา แบน กาดัง แบน กาดัง ปี กรึบ เฆ ดูอี มืง ดามาคู นี แฮะ จอย คูนดีคัม เฆ. ปาย ตี โอว มืร โบง ดี หลู ดี เฌา เฆ ตี, โยว เฆ ซอ จอย บอ โอว.” มาแล, เฌา เฆ ตี, ยี วี โบง แตห อัน ลึร ชึม กืน กาเซา, แตห บอ ดูอี แคง มาน มืง ปี อึบ อัน ลึร ชึม.

24 คูนดีคัม อาคาด ปี วี ดึห กาฌูะ บอ โกรวกราม ปี จัร ปี ตา เฆ อี กอย แคง โฮว เฌาพรา, วี ดึห เลห โตต. อัน วี กาแดบ แบน ปอด แบน ปอด. อัน วี กาบีด มาโลห โฮว เฌาพรา, วี โบง กาโช็ง หลู ดี กาโตะ มืง เยรูซาแลม ดอน กาโตะ. 25 อัน โบง กาโช็ง หลู เฆ โดง จา แคง มืง ดอน มืง อี กอย แคง กาดาย มืง ยูดา, แตห เฆ ปึอน ดี โดะ หลู ซีนัม อูห หงูน ดี เฌา ปี กรึบ ดูอี อาโมยว เฮา. ปาย ตี อัน โบง แตห เฌาพรา ปี กรึบ ฆูณ ดัง อัน แว รู กาเซา ดี อัน.

26 ลอง ปี โบง คูนดีคัม อาคาด บอ ดอน โมยว จูห ซีณ ดอ โฆว กอ ฌัม กาแดะ แฮะ แดม อูน แคง บับ บืน คูนดีคัม ยูดา บอ บืน คูนดีคัม มืง อีซาเรลัะ. 27 คูนดีคัม อาคาด ตี อัน บอ ยัม ฮาว โดบ ดา ดา อัน. เฆ บอ ดีบ โดว โบ็ง อัน แคง มืง อาดาวีด, ยี ตู มูห แคง บาเรว เฆ คูนดีคัม. ฆอน อีมาย อัน อี จืร อาเฮจัะกี บอ วี ปลูะ อัน.