1 อาเนฮามี อี มูห ฆอน อาฮาคี แฮะ แค ปาย นี.

ดอ มูห มาเฆียน คีซาลู ดอ แฮะ อึบ คูนดีคัม อาตาเจรีด มืง บีราซี อาดา อา ฆึร ซีนัม, โอว แฮะ กอย แคง โฮว คูนดีคัม แคง มืง ซูซาน. 2 ดอ อัน ตี อึณ มึห วา โอว อู วี อี จืร อาฮานานี. บอ อัน บอ อี เฮา มัง อี แฮะ ตัห แคง กาดาย มืง ยูดา, วี ตัห ฌัม โดง กอย โอว. โอว บอ ดีหมอด เฆ ลอง มืง เยรูซาแลม บอ ลอง เฆ บีนอง อี มูห ดูอี อายูดา อี แฮะ เลห แคง มืง บาแบ, วี ตัห ฌัม โดง กอย บรีม เฆ.

3 เฆ บอ ต็อห, “เฆ ดูอี อี แฮะ วี ตัห ฌัม มืง บรีม เฆ แฮะ กาดูห ดี คัม ดูก ตาง กาเซา โกบ แฮะ แนนัะ ดูอี เฮา ดี เฆ. แรง มืง เยรูซาแลม มืร แฮะ ฮอต เกห ลึร, กาปยาต โตต. มาโลห มืง มืร, เงา แฮะ ฮอต กาซึม, ยี หณัม ปึอน ดี วี อึณปราย.”

4 โอว บอ ยึร โฆรห เฆ ตี, โอว บอ ตูต ยาม อู เฌณ. โอว มืร ยาม หงูน, ตู โฮม มาเซ แบน ซีแง แบน ซีแง. โอว บอ วี ซาคึร ดี เฌาพรา ต็อห,

5 “อึย แม เฌาพรา อี อึบ ฆางหราว, แม เฌา บอ มูห เฌาพรา อี บอด มยาด กาเซา. อึณ แฮะ กาอาบ โรวเซ แม เฌา. แม เฌา มืร โบง โดบ กาดีก ซัดฌา แปะ แฮะ ดัว แม ดี เฆ อี ร็อก แม. แม บอ มึห น็อห กาเว เฆ อี โดบ ดารา แม เฌา. 6 อึย แม เฌาพรา, โอว หมาณ แตห แม เฌา ยอด ยึร โอว, แตห แม บอ โทม โฆรห ปี หมาณ โอว. โอว แฮะ ซาคึร ดี แม เฌา ดอง คืน ดอง วัน ดาง ดูอี อีซาเรลัะ อี มูห แดเจณ แม เฌา. เย ดูอี อีซาเรลัะ, บอ โอว บอ ฆูณ ดัง โอว, เย แฮะ ฮอต โบง ลูต แม เฌา. 7 แปะ แฮะ โบง ลูต เย ดี แม เฌาพรา แฮะ ฮาย กาเซา. เย มืร ตู โดบ ดารา ปี ดัว อูน แม เฌา ดี เย. เย มืร ตู โดบ ปี ดัม อูน แม เฌา แบน โมยว แบน โมยว ดี อาโมวแซ ตึอน อี มูห แดเจณ แม เฌา.

8 ดอ ตี นี โอว หมาณ, แตห แม เฌา วี โหลห โฆรห กาดีก ซัดฌา ปี กาลาง แม ดี อาโมวแซ ตึอน. แม เฌา แฮะ ต็อห, ‘เซ เบ ฮี หลึร ฮี บลืง ดารา โอว, โอว ดี แตห เบ กาย็อห กาเรห ฮาว กอย กาแต ดูอี อาโมยว เฮา. 9 มาแล, เซ เบ กอ วี ตัห กรึบ โอว, วี โบง โดบ ดารา โอว, เบ ปี บอ แฮะ กาย็อห กาเรห ฮาว กอ ฌัม โดง ซืด กาดาย มืร, โอว ปี ดี วี ดึห ตัห เบ, แตห เบ ฌัม ดี โดง แปะ แฮะ ร็อห อูน โอว, แตห อึณ แบน โดง กอย โอว.’

10 อึย แม เฌาพรา, ดูอี เฆ นี, เฆ บอ มูห แดเจณ แม เฌา บอ มูห ดูอี ปี อึบ แม เฌา. แม เฌา แฮะ ตา อาพูง ดังโคว แม บอ ปวน ตาง แม, แฮะ ทูด เลห เฆ ดี รันซู เฆ. 11 ดอ ตี นี โอว หมาณ, แตห แม เฌา โทม โฆรห ปี ซาคึร โอว, โทม บอ โฆรห ปี ซาคึร เฆ อี โรวเซ แม เฌา เซเซ. เย บอ มูห ดูอี อี แฮะ ดาคึย ดี โบง ปี อึง แม เฌา. อาตึร นี เย หมาณ, แตห แม ม็องการา ดัว นา หมึอม ดี เย, แตห คูนดีคัม มึห น็อห กาเว เย บอ มึห น็อห ซี เฆฌู เย.”

ดอ ซาคึร โอว ปาย ตี โอว มูห ดูอี อี โลว ฆาบ ซีลัยะ อึม มางูน ดี คูนดีคัม ตี.