1 ดอ แฮะ อึบ คูนดีคัม อาตาเจรีด มาน มืง อัน อาดา อา ฆึร ซีนัม ดอ มูห มาเฆียน นีซัน, โอว แฮะ ดึห ซีลัยะ อึม มางูน, อาบ ดัว ดี คูนดีคัม. อาต อัน ตี, คูนดีคัม มืร ตู ดึอม ยึร โอว แฮะ กลึร แฮะ เหงา คอ อู เฌณ. 2 โคว, คูนดีคัม วี ดีหมอด โอว ต็อห, “นา แม ปี ซอ โหมง โกบ มาเซ? แม ยี ตู เซา. แหนน แฮะ มึห อี ดูก อี หณาบ ดี น็อห แม.”

3 โอว บอ วี กาปึณ กาเซา, บอ วี กาลาง ดี คูนดีคัม ต็อห, “แตห แม คูนดีคัม กอย เซเซ. เซ โอว ฮู กลึร ฮู เหงา, เหมา โอว ดี ปาย ดี กอย? มืง บรีม เย แปะ แฮะ ดีบ เย ดี ฆูณ ดัง เย, อึณ แฮะ ลึร, แฮะ ฮอต ราม. มาโลห มืง มืร, เงา แฮะ ฮอต กาซึม โตต.”

4 คูนดีคัม มืร วี ดีหมอด ต็อห, “มาเซ ปี ซี หมาณ แม?” โอว มืร วี ซาคึร ดี เฌาพรา อี อึบ ฆางหราว.

5 โอว บอ วี กาลาง ดี คูนดีคัม ต็อห, “เซ อึณ บอ มูห ปี อึง แม คูนดีคัม, แตห แม เฆฌู โอว. โอว หมาณ, แตห แม ควาง โอว เวณ ดี กาดาย มืง ยูดา อี มูห โดง กอย บาเรว ฆูณ ดัง เย, แตห เย วี ปึอน ดี วี โฆว วี อึณปราย มืง ตี.”

6 ดอ อัน ตี นาง ฮอคัม ยี กอย รึม โดบ คูนดีคัม. คูนดีคัม มืร ต็อห ดี โอว, “เซ แม ฮาว, อึณ ดี เหลณ แคะ เหมา? ปัน เหมา แม ดี วี ตัห?” คูนดีคัม แฮะ มึห น็อห ซี ตึย โอว ฮาว. โคว, โอว บอ กาลาง แคะ เหมา อึณ ดี เหลณ.

7 โอว ปี วี หมาณ ดี คูนดีคัม ต็อห, “เซ แม คูนดีคัม กอ อึง, โอว หมาณ แตห แม ดัว แปะ อามีง ดี โอว. เฆ ดา กาณา อี อึบ มืง อี กอย บลาก นา เฆต ซีแง อึม แบลง อูพาราด, แกวะ แตห เฆ ปึอน ดี แคร โอว. แตห เฆ จอย โอว, แตห โอว ฮาว ฌัม ซีคยา ดี กาดาย มืง ยูดา. 8 แตห แม กาเว โอว, วี ดัว แปะ ปอ อู พืน อาดา อาซาบ ตึอน อี มูห ดา กาณา อี อึบ เฮ เฆ แปร แม ตึอน, แตห อัน ดัว เฮ ดี โอว, แตห โอว ปึอน ดี โบง มานัก อี กอย ดี มาโลห โฮว ตาง อี กอย โคบ โฮว เฌาพรา. แตห อัน ดัว เฮ บอ อาดา แรง มืง บอ อาดา กาง อี มูห โดง ดี กอย โอว.” ปาย ตี คูนดีคัม มืร ดัว ดอน โมยว แคะ ปี หมาณ โอว. โคว, เฌาพรา แฮะ เฆฌู โอว. 9 คูนดีคัม มืร จัร ดา ซึก อี อึบ แบน พึง แบน พึง บอ ดา ซึก อี อึบ มังปร็อง, แตห เฆ ฮาว โดบ โอว. โอว มืร ฮาว ฌัม นา เฆต ซีแง อึม แบลง อูพาราด. โอว มืร ดึห แปะ อามีง คูนดีคัม ตาง ตึอน แหน ดี เฆ ดา กาณา อี อึบ มืง.

10 มาแล, อาซันบาลาด อี ตัห แคง มืง เบดโฮวโรน บอ อาตอพียา อี มูห ดา ตาง เฆ ดูอี อัมโมน, ฆาย บอ ยึร ลอง แฮะ มึห ดูอี อู วี อี ดี ตัห จอย ดูอี อีซาเรลัะ, ฆาย ตู อึง, อาว ล็อะ น็อห ฆาย.

11 โอว แฮะ ฮอต ตัห ฌัม แคง มืง เยรูซาแลม บอ กอย ปึอน โอย ซีแง, 12 โอว มืร หณัม กาลาง ดี อาเซ ลอง เฌาพรา แฮะ กาซูห น็อห โอว, แตห โอว วี โบง วี อึณปราย มืง เยรูซาแลม. โอว มืร แดะ เฆ อี ตัห โดบ โอว มัง อี, แตห เฆ ยีต กาแต ซึอม, แตห เฆ ฮาว โดบ โอว. อึณ ยี ตู มึห โดว ซัดดาวา อี โดบ โอว. อึณ มึห มี อึณปร็อง ปี ป็อะ โอว.

13 อึณ ยี ซี มูห แคง หมึร ดอ เลห ฮาว โอว นา เรต มืง. โอว ฮาว โดบ อึณเตณ อี เลห ดี มาโลห โดบ ดีลัยะ บอ ฮาว ดี อึม คึม อี จืร อึม คึม มากราย, บอ วี ฮาว ฌัม ดี มาโลห อี จืร มาโลห เอียง มัก. ดอ ฮาว เย ตี, โอว ซาคีะ ดี ยอด แรง มืง อี แฮะ เกห แฮะ ลึร บอ มาโลห มืง อี แฮะ กาซึม ดี เงา. 14 แฮะ ฮอต ปาย ตี โอว บอ วี กาโลห ฮาว ฌัม ดี มาโลห อี จืร มาโลห อึม โตห บอ ดี อึม ดึง คูนดีคัม. โดง ตี อาว ฮู มึห อึณเตณ อี ดี ปึอน ฮาว อึณปร็อง. 15 โคว, โอว บอ วี โลง, วี ฮาว โคบ ดีลัยะ อึม, วี ฮาว โดบ แรง มืง. แฮะ ฮอต, โอว บอ วี กาบัด เวณ, วี โดบ อึณเตณ โดง ตัห โอว ตึอน. โอว บอ วี ลึบ แคง มืง, ลึบ ดี มาโลห อี กอย โดบ ดีลัยะ ตึอน. 16 เฆ ดา กาณา อึบ มืง, อาว มึห อาเซ อี นับ ลอง ฮาว โอว นา เหมา บอ ฮาว โบง มาเซ. โอว มืร หณัม กาลาง ลอง อัน ตี ดี เฆ บีนอง อี มูห ดูอี อาโมยว อายูดา บอ ดี เฆ ดา อี หลู ดี เฌาพรา, ดี เฆ ดา ตาง อี อึบ อี แยต เฆ, ดี เฆ อามู อามาด คูนดีคัม บอ ดี เฆ อี ดี บัด โบง ฆาน ดี ตี. อาว มึห อาเซ อี แฮะ นับ ลอง ปี คราม โอว ดี โบง.

17 วาย อัน ตี โอว วี ต็อห ดี เฆ, “เบ ยึร, แฮะ ดูก กาเซา ดี เอ โกบ แฮะ ราม แฮะ ลึร มืง เยรูซาแลม บอ มาโลห มืง, เงา แฮะ ฮอต กาซึม. ตัห, แตห เอ วี แด วี อึณปราย มืง เยรูซาแลม, แกวะ แตห เอ โลว ซาย อี เฮา.” 18 โอว ปี วี กาลาง แหน ดี เฆ บอ ลอง เฌาพรา อี แฮะ เฆฌู โอว, แฮะ จอย โอว. โอว บอ กาลาง บอ ลอง คูนดีคัม ตาง อี แฮะ ดัว อามีง ดี โอว ตึอน. เฆ มืร วี ต็อห, “อึร, แตห เอ กาโพรม ดี วี โฆว วี อึณปราย มืง.” แฮะ ฮอต, เฆ บอ วี กาจูห ดี โบง ฆาน อี แฮะ บอด แฮะ หมึอม ตี.

19 อึณ ยี มูห อาซันบาลาด อี ตัห แคง มืง เบดโฮวโรน บอ อาตอพียา อี มูห ดูอี อาโมยว อัมโมน บอ อาเฆซีม อี มูห ดูอี อาโมยว อาราบ. เฆ บอ นับ บอ ยึร ลอง อัน ตี, เฆ บอ พยาก บอ กาณัห แนนัะ เย ต็อห, “มาเซ อึณ มูห ปี ดี โบง เบ? อึณ ปี เบ คราม ดี วี กาแคณ ดี คูนดีคัม”

20 โอว ยี วี ต็อห ดี เฆ, “เฌาพรา อี อึบ ฆางหราว, อัน แฮะ ควาง แตห โอว โบง. อัน ดี บอ โบง แตห อึณ กอ ฮอต. ปาย ตี เย อี มูห แดเจณ อัน เฌา ตี, เย ดี วี จูห ดี วี อึณปราย มืง ตี. อี มูห เบ, เบ ยี ตู ปึอน ตัห หมาณ มาเซ, โกบ ตู มึห เบ ปวน มาเซ. เบ มืร ตู มึห ปี ดี นัมโหลห มาเซ แคง มืง นี.”