1 ดอ มูด ฆึบ อาเอซารา ดี อาต โฮว เฌาพรา บอ ยาม บอ ซาคึร กาลาง หมาบ เฆ ตึอน, อึณ บอ มึห พึง เฆ ดูอี อีซาเรลัะ, เฆ กืน บอ ตัห กาฌูะ กอย โรบ อัน. อึณ มูห บอ อีบึณ บอ อีมาย บอ ฆอน, เฆ มืร ยาม ตาง โกบ แฮะ ซ็อง ตืก บอ ดี น็อห เฆ. 2 ดอ อัน ตี อาเซคานี อี มูห ฆอน อาเยฮีลา อี มูห หลูกหลาน อาเอลัม, อัน บอ กาลาง ดี อาเอซารา ต็อห, “เอ นี, เอ แฮะ ลูต เฌาพรา ปี กรึบ เอ โกบ แฮะ คัด ดึห เอ อีบึณ อี มูห ดูอี อาโมยว เฮา. ปี บอ แฮะ ปาย ตี มืร, ดูอี อีซาเรลัะ ยี ซี มึห ปี หน็อะ อึณด็อะ. 3 ดอ ตี นี, แตห เอ ลาย กาแซณ ดี เฌาพรา ลอง ดี แวน เอ อีบึณ เอ เฆ ฆอน เอ บอกาเฆลียด, แตห อึณ วี โดบ อากยาม อางยาน แม อี มูห ดา กาณา เอ บอ อากยาม อางยาน เฆ อี โยว อี โรวเซ ดารา เฌาพรา, แตห อึณ วี โดบ ดารา. 4 อึณ ยี มูห แม อี โลว โบง. เย ดี กอย บลาก แม, แตห แม มึห น็อห ยัะ, แตห แม โบง.”

5 ปาย ตี อาเอซารา บอ จัร เฆ ดา ตาง อี หลู ดี เฌาพรา บอ เฆ ดูอี ครึร อาเลวี บอ เฆ ดูอี อีซาเรลัะ บอกาเฆลียด, แตห เฆ ดืง, แตห เฆ คัม กาดีก ซัดฌา ดี โดบ อากยาม อางยาน ปี กาลาง อาเซคานี ตึอน. เฆ มืร ดืง คัม อู เฌณ. 6 ปัน ตี อาเอซารา บอ วี ยีต โดง กอย อัน ดี อาต โฮว เฌาพรา ตึอน, วี ฮาว ลึบ แคง โดง อีด อาเยโฮวนัน อี มูห ฆอน อาเอลาเซบ. โกบ หมาบ แปะ แฮะ โบง เฆ ดูอี อี แฮะ วี ตัห ฌัม แคง มืง เฆ, อัน บอ กลึร บอ เหงา ดอ กอย อัน ดี ตี. อัน มืร ตู โฮม ตู เดียง มาเซ.

7 เฆ บอ กาลาง แตห ดอน อี อี กอย แคง มืง ยูดา บอ แคง มืง เยรูซาแลม บอ ปึอน ดี โทม, แตห เฆ นับ, แตห เฆ ดูอี อี แฮะ วี ตัห ฌัม แคง มืง เฆ, วี ตัห กาฌูะ โตต ดี มืง เยรูซาแลม. 8 เซ อึณ บอ มึห อี ลูด อี ตู ตัห กานัร โอย ซีแง, เซ อัน ตู โดบ ปี ซูงพยาด เฆ ดา ตาง บอ เฆ ดา กาณา อี อึบ มืง, อึณ โลว ดึห โตต แคะ กอย โกรวกราม อัน, แวน บอ อัน, แกวะ ฮู แตห อัน กอย แคง พึง เฆ ดูอี อีซาเรลัะ.

9 วาย โอย ซีแง ตี, ดูอี อี กอย แคง มืง ยูดา บอ แคง มืง อาเบนยาม, เฆ บอกาเฆลียด แฮะ ตัห กาฌูะ ดี มืง เยรูซาแลม. ดอ มูห มาเฆียน อึณดีม, ซีแง อา ฆึร, เฆ ตัห กาฌูะ ดี ฆลัง อี กอย ดี อาต โฮว เฌาพรา. ดูอี ดอน อี บอ โยว กาเซา โกบ ฌึร ตี แฮะ มึห ดี ลอง ดี ดาง. ฆลาย มืร แฮะ โจห แฮณ กาเซา, ตู แตห เฆ กอย ดาคึย. 10 ดา อี หลู ดี เฌาพรา อี จืร อาเอซารา บอ ยีต กาลาง ดี เฆ ต็อห, “เบ นี เบ แฮะ ฮอต ลูต. เบ แฮะ ดึห อีบึณ อี มูห ดูอี อาโมยว เฮา, แตห หมาบ เอ ดูอี อีซาเรลัะ แว กืน. 11 ปาย ตี แตห เบ วี ซาคึร ดี เฌาพรา อี มูห เฌาพรา ปี กรึบ ฆูณ ดัง เบ, แตห เบ วี กาลาง หมาบ เบ, แตห เบ วี โบง โดบ ปี อึง อัน เฌา. แตห เบ ลาย กาย็อห ดี ดูอี อี กอย แคง มืง นี, แวน บอ อีบึณ เบ อี มูห ดูอี อาโมยว เฮา ตี.”

12 แคะ กอย ดูอี เฆ ตึอน, เฆ บอกาเฆลียด บอ วี กาโพรม ดี กาลาง แตห อึณ มูห อู โมยว. เฆ ต็อห, “อึร, โฆรห แม แฮะ มูห แฮะ หมาน. เย โลว โบง แคะ ปี ต็อห แม ตี.” 13 มาแล, พึง เอ แฮะ แบน ดูอี กืน กาเซา. ฆลาย มืร แฮะ โจห ตาง กาเซา. เย อาว ฮู คัม ดี จ็อง แคง ฆลางแฆลณ นี. เย มืร แฮะ กืน อี แฮะ โบง ลูต ลอง อัน ตี. เย มืร ตู ปึอน โบง แตห อึณ ฮอต อู ซีแง อา ซีแง. หมาบ เย แฮะ กืน ลอง ดาง อัน ตี. 14 หมาณ, แตห เฆ ดา กาณา อี อึบ เอ โบง อามู ตี ดาง เอ แคง มืง เอ. เซ อึณ มึห ดูอี อี แฮะ ดึห อีบึณ อาโมยว เฮา, แตห เฆ ดา ตาง อี อึบ มืง บอ เฆ ดา ตาง อี ซูงพยาด ดารา วี แดะ ดูอี ฌึร ตี, ซูงพยาด อามู เฆ แบน วี แบน วี, แตห น็อห รู เฌาพรา บอ แกร ดี โยม, แตห อาเร อัน ตี กอ ฮอต, แตห อึณ กอ วี เยน ดอน โมยว.” 15 เฆ ดอน อี แฮะ โพรม ลอง อัน ตี. อึณ มึห มี อาโยวนาทาน อี มูห ฆอน อาซาเฮลัะ บอ อายัะฮาจี อี มูห ฆอน อาตีกาวา บอ อาเมซูลัม บอ อาซาปาเซ อี มูห ดูอี ครึร อาเลวี, เฆ แฮะ คัด แคณ ลอง อัน ตี.

16 แคะ กอย เฆ ดูอี อี แฮะ วี ตัห ฌัม แคง มืง เฆ, เฆ บอ โทม ลอง อัน ตี. ดา อี หลู ดี เฌาพรา อาเอซารา บอ ร็อห เฆ อี มูห ฆีณ อึณโฮม อาดา อึณกรึห อึณกราต อู โมยว อู วี. อัน บอ แดม อูน จืร เฆ. ดอ แฮะ ฌัม มาเฆียน ฆึร, ซีแง ฮาเหลห เฆ แฮะ จูห ดี ซูงพยาด อามู เฆ ตี. 17 เฆ ดี บอ ซูงพยาด แตห อึณ กอ ฮอต อามู เฆ ดูอี อี ดึห อีบึณ อาโมยว เฮา. ดอ ฌัม มาเฆียน ดอ โฆว, ซีแง ดอ โฆว, เฆ แฮะ โบง แตห อึณ ฮอต โตต ดอน โมยว.

18 อึณ มึห หลูกหลาน เฆ ดา อี หลู ดี เฌาพรา, เฆ อี ดึห อีบึณ ดูอี อาโมยว เฮา. ฌาราง เฆ ดูอี เฆ ตี, อึณ ปาย นี.

แคง หลูกหลาน อายอซู บอ หลูกหลาน วา อัน อี มูห ฆอน อายอฌาดัก, อึณ บอ มูห อามาอาเซยา, อาเอลีเอฌา, อายารีบ บอ อาเกตาลี.

19 เฆ มืร แฮะ คัม กาดีก ซัดฌา ดี แวน อีบึณ เฆ. เฆ บอ ดึห มาบู อาโล็ง, วี หลู แตห อึณ แบน ปี ดี หลู อี ฆ็อห แวน หมาบ เฆ.

20 แคง หลูกหลาน อาอีเมรา อึณ บอ มูห อาฮานานี บอ อาเฌบาดี.

21 แคง หลูกหลาน อาฮารีม อึณ บอ มูห อามาอาเซยา, อาเอลียา, อาเซมายา, อาเยฮีลา บอ อาอูฌียา.

22 แคง หลูกหลาน อาบาซูรา อึณ บอ มูห อาเอลีออเน, อามาอาซายา, อาซามาน, อาเนทาเนลา, อายอจาบาด บอ อาเอลาซา.

23 แคง ครึร อาเลวี อึณ บอ มูห อายอจาบาด, อาซีมี บอ อาเมลายา อี บอ จืร อาเฆลีตา, อาเบซาฮี, อายูดา บอ อาเอลีเอฌา.

24 แคง เฆ ดูอี อี นับ ดี ต็อห โหมว, อึณ บอ มูห อาเอลาเซบ.

แคง พึง อี บัร มาโลห โฮว เฌาพรา อึณ บอ มูห อาซาโลม, อาเดลีม บอ อาอูรี.

25 ฌาราง เฆ ดูอี อีซาเรลัะ วี เฮา, อึณ ปาย นี.

แคง หลูกหลาน อาบาโรด, อึณ บอ มูห อารามี, อาเยจีมา, อามาลาคียา, อามียามีน, อาเลอาซา, อามาลาคียา บอ อาบีนายา.

26 แคง หลูกหลาน อาเอลัม, อึณ บอ มูห อามาทานี, อาซาคารา, อาเยฮีลา, อาพาดี, อาเยเรโมด บอ อาเอลียา.

27 แคง หลูกหลาน อาจาตูะ, อึณ บอ มูห อาเอลีออเน, อาเอลาเซบ, อามาทานี, อาเยเรโมด, อาฌาบาด บอ อาจีจา.

28 แคง หลูกหลาน อาเบเบ, อึณ บอ มูห อาเยโฮวนัน, อาฮานานียา, อาจาเบ บอ อาทาเล.

29 แคง หลูกหลาน อาบานี, อึณ บอ มูห อาเมซูลีอัม, อามาลูก, อาตายา, อายาโซบ, อาซาลา บอ อาเยเรโมด.

30 แคง หลูกหลาน อาบาฮาดโมวอาบ, อึณ บอ มูห อาอาดนา, อาเคลายา, อาบีนายา, อามาอาเซยา, อามาทานี, อาเบฌาเลน, อาบีนูอี บอ อามานาเซ.

31 แคง หลูกหลาน อาฮารีม อึณ บอ มูห อาเอลีเอฌา, อาอีซายัะ, อามาลาคียา, อาเซมารี, อาซีเมโอน, 32 อาเบนยาม, อามาลูก บอ อาเซมารี.

33 แคง หลูกหลาน อาฮาโซม อึณ บอ มูห อามาตาเน, อามาตัะทา, อาฌาบาด, อาเอลีเพเลด, อาเยราเม, อามานาเซ บอ อาซีมี.

34 แคง หลูกหลาน อาบานี อึณ บอ มูห อามาเดอา, อามารัม, อาอูเอน,

35 อาบีนายา, อาเบดียา, อาเคลูฮี,

36 อาฮีวา, อาเมเรมูด, อาเอลาเซบ,

37 อามาทานี, อามาตาเน บอ อายาซอ.

38 แคง หลูกหลาน อาบีนูอี อึณ บอ มูห อาซีมี,

39 อาเซลามี, อานาทาน, อาตายา,

40 อามาคานา, อาจาบาด, อาเซซารา,

41 อาจาเรน, อาเซลามี, อาเซมารี,

42 อาซาโลม, อามารียา บอ อาโยว.

43 แคง หลูกหลาน อาเนปอ อึณ บอ มึห อาเยยีลา, อามาดีซี, อาฌาบาด, อาเจบีนา, อายาดายา, อาโยวเอลัะ บอ อาบีนายา.

44 ดูอี เฆ ตี บอกาเฆลียด, เฆ แฮะ ดึห โตต อีบึณ อี มูห ดูอี อาโมยว เฮา. เฆ บอ แวน อีบึณ เฆ ตี. มัง อี มืร แฮะ มึห ฆอน ดี รึม โดบ อีบึณ เฆ ตี. บอ ฆอน เฆ ตี โลว ฮาว โดบ มา เฆ.