1 วาย แฮะ ฮอต โบง โตต ดอน โมยว ลอง ฌึร ตี, เฆ ดา ตาง อี อึบ อี แยต เฆ ดูอี อีซาเรลัะ, เฆ บอ วี ตัห โดง กอย โอว บอ กาลาง ต็อห, “แคะ กอย เฆ ดูอี อีซาเรลัะ, เฆ ดา อี หลู ดี เฌาพรา บอ ดูอี ครึร อาเลวี, เฆ ตู กาฆ็อห ดี เฆ ดูอี อาโมยว เฮา อี กอย รึม โดบ เอ แคง มืง นี. เฆ วี โบง อี หมึอม กาอีห อี ปี ปี โบง เฆ ดูอี อาโมยว กานัณ บอ เฆ ดูอี เฮทีด, เฆ ดูอี เพเรซีด, เฆ ดูอี เยบูซีด, เฆ ดูอี อัมโมน, เฆ ดูอี โมวอาบ, เฆ ดูอี แอฆึบ บอ เฆ ดูอี อาโมวรีด. เฆ ดูอี อีซาเรลัะ วี โบง ณึง เฆ ตี. 2 เฆ อีมาย แฮะ วี คัด ดึห ฆอน อีบึณ ดูอี เฆ ตี, แตห เฆ แบน อีบึณ เฆ บอ อีบึณ ฆอน เฆ. เอ มูห ดูอี อี ซีงา บอด ปี อึบ เฌาพรา. เฆ ยี แฮะ โบง แตห ดูอี อาโมยว เอ วี กาซู กาวัร ดี อี เฮา. เฆ ดา ตาง อี อึบ อี แยต เฆ บอ เฆ ดา กาณา อี อึบ มืง, เฆ แฮะ แว โบง อี ตู หมึอม หลึอม อี เฮา.”

3 ดอ ยึร โอว โฆรห ตี, โอว บอ กายาต ครึง โอว, รึต บอ ฮึก ฆีณ โอว บอ ดีโมห ดี กูงกาบ โอว, บอ แบน เหงา, แบน กาพา ฆว็อง ดี โอว. 4 โอว บอ รึร ปาย ตี แตห อึณ กอ ฌัม อาคราว ดี วี โลว หลู ปี ดี หลู บา ดี อับ. เฆ ดูอี อี โยว อี โรวเซ โฆรห เฌาพรา อี มูห เฌาพรา ปี กรึบ ดูอี อีซาเรลัะ, เฆ บอ ตัห โดง กอย โอว โกบ หมาบ แปะ แฮะ ลูต เฆ ดูอี อี แฮะ วี ตัห ฌัม แคง มืง บรีม เฆ. 5 อึณ บอ ฌัม อาคราว ดี โลว หลู ปี ดี หลู บา ดี อับ ตึอน, โอว บอ วี ยีต โดง แฮะ เหงา แฮะ กลึร โอว ตึอน. โอว ยี ซี ตา ครึง กาปยาต โอว ตึอน. โอว บอ วี ครึบเครา, โจะ แด โอว, ซาคึร ดี เฌาพรา ปี กรึบ โอว. 6 โอว บอ วี ซาคึร ต็อห, “อึย แม เฌาพรา, โอว แฮะ ซาย กาเซา. โอว อาว ยัะ ซากึห ยอด แม เฌา. โคว, อี ตู หมึอม แปะ แฮะ โบง เย แฮะ ตาง แฮะ แบร. อึณ ปี อึม แฮะ อึณปูน ฆีณ เย. หมาบ แปะ แฮะ โบง เย, อึณ ปี อึณ แฮะ ดูห ฆางหราว. 7 อู ซีณ ดอ มูห โจว ดา ดา เย กอ วี ฌัม อาตึร นี, เย แฮะ กาลึบ แฮะ กาลูต กืน กาเซา. โกบ หมาบ แปะ แฮะ โบง เย ตี, แคะ กอย เย บอกาเฆลียด, บอ คูนดีคัม บอ ดา อี หลู ดี เฌาพรา, เย บอ โลว วี คัม ปี อึบ คูนดีคัม อี อึบ มืง เฮา. เย บอ กาดูห ดี ยัม ดี บลา ปัวะ เฆ บลา เลียห, บอ กาดูห อี โฌน อี คาหนาบ เย, แตห เย แบน หมาย อี เฮา. เย บอ ชึม ซาเร ปี ปี ปาย เย ดอ ตี นี.

8 ดอ ตี นี อาดา อู กาจัน, เฌาพรา ปี กรึบ เย แฮะ วี เฆฌู เย, วี กาเว เย. อัน แฮะ วี แตห เย มัง อี มึห ดี ฆืด, วี ลอด แบน หมาย อี เฮา. อัน แฮะ วี แตห เย ปึอน ดี กอย ซีคยา, กอย ทังฮาง แคง มืง อัน เฌา อี แฮะ ซีงา บอด นี. ปาย ตี อัน แฮะ แตห น็อห เย วี ดาคึย. 9 เย ปี บอ แฮะ กาดูห ดี แบน หมาย อี เฮา มืร, อัน เฌา ยี ตู เบลห แวน เย ดอ แฮะ แบน เย หมาย อี เฮา ตี. อัน เฌา แฮะ แตห เย วี แบน อี ล็อะ น็อห คูนดีคัม อี อึบ มืง บีราซี. อึณ แฮะ วี แตห เย มึห โปลม มึห แฮณ, แตห เย ปึอน บอ ดี วี ซัม โฮว เฌาพรา บอ แรง มืง อี แฮะ ลึร แฮะ กาปยาต. อึณ แฮะ แตห เย ปึอน ดี วี กอย ซีคยา แคง มืง เยรูซาแลม บอ แคง มืง ยูดา.

10 อึย แม เฌาพรา, ดอ ตี นี เย อาว ฮู นับ ปี ดี ปาย ดี ซาคึร. แม มูห เฌาพรา ปี กรึบ เย. เย ยี แฮะ ฮอต แวน ดารา แม เฌาพรา. 11 แม เฌาพรา แฮะ แตห เฆ ดา อี บยาน โฆรห เฌาพรา กาลาง ดารา แม ดี เย. เฆ มืร แฮะ กาลาง ลอง มืง ปี ฮาว กอย เย ตี, อึณ มูห มืง อี หมึอม กาอีห หมึอม กาดาต. โคว, เฆ ดูอี อี กอย บรีม แคง มืง ตี, เฆ โบง มี อี หมึอม กาอีห. อึณ ปี อี หมึอม กาอีห แฮะ โนะ แคง มืง บอ มืง, อึณ บอ จูห อู บลาก กอ วี ฌัม ปอ บลาก. 12 โคว, เฆ ดา อี บยาน โฆรห เฌาพรา แฮะ กาลาง ดี เย ต็อห, ‘แกวะ แตห ฆอน อีบึณ เบ คัด ดึห ฆอน อีมาย เฆ ดูอี แคง มืง ตี. บอ แกวะ แตห ฆอน อีมาย เบ คัด ดึห ฆอน อีบึณ เฆ. แกวะ ลาย กาแซณ ดี แบน ฆึก เฆ ดอ เหมา. เซ เบ โบง ปาย ตี อึณ ดี แตห เบ วี มึห โปลม มึห แฮณ, แตห เบ ปึอน ดี โฮม อี บอด อี หมึอม แคง มืง ตี. กาดาย มืง ตี มืร, อึณ ดี แบน คาฆูน หลูกหลาน เบ เซเซ.’

13 แม เฌาพรา ปี กรึบ เย, แม ปี บอ แฮะ ดัม หมาบ ดี เย มืร, อึณ ยี เปรต หลึอม หมาบ ปี กาอาบ เย คัม. เย แฮะ โบง อี ตู หมึอม อี ฮาย อี มืก กาเซา. แม เฌา ยี ตู ปยาต แวน โตต เย. แม แฮะ แตห อึณ ซี ฆืด พึง ดีแตด อี มูห อาโมยว เย. 14 ปาย ตี อาว กาอาบ เย แวน ดารา แม เฌาพรา. อาว กาอาบ เย วี คัด ดึห ดูอี อี โบง หมึอม กาอีห หมึอม ฌ็อง ตี. โกบ แฮะ โบง เย ปาย ตี แฮะ หมาน, เซ แม เฌา รู กาเซา ดี เย บอ โบง แตห เย ลึร ชึม โตต, แกวะ แตห เย ซี ฆืด คอ อู วี. 15 อึย แม เฌาพรา อี มูห เฌาพรา ปี กรึบ ดูอี อีซาเรลัะ, แม มึห น็อห ซืร น็อห หมาน. เย ยี มูห ดูอี อี ซี ฆืด ซี กอย. เย แฮะ โบง หมาบ. โคว, เย อาว ฮู กาอาบ ตัห กอย ดี อาต แม เฌา โกบ หมาบ แปะ แฮะ โบง เย. ปี บอ แฮะ ปาย ตี มืร, เย ยี แฮะ วี ตัห กอย ดี อาต แม เฌาพรา.”