1 ดอ มูห โจว บาน คูนดีคัม ตาง อาตาเจรีด อึณ มึห ดูอี กืน อี แฮะ เลห แคง มืง บาแบ, วี เวณ แคง มืง อีซาเรลัะ โดบ โอว. เฆ ฆีณ อึณโฮม บอ เฆ ดูอี อี ฮับ จืร เฆ แคง ฌาราง, อึณ ปาย นี.

2 ดูอี เฆ ตี บอ มูห อาเฆโซม. อัน มูห หลูกหลาน อาพีเนฮาด. อาดาเนลัะ มูห หลูกหลาน อาอีทามา. อาฮาดูด อี มูห หลูกหลาน อาดาวีด.

3 อาดาวีด มูห ดูอี อึณกรึห อาเซคานี. อาซาคารา อี มูห หลูกหลาน อาบารูด. เฆ ดูอี อี แฮะ ฮับ จืร เฆ แคง ฌาราง โดบ อัน ตี, เฆ อีมาย กอย อู มาย็อห ดี พัน ฆึร วี.

4 อึณ มูห บอ อาเอลีออน อี มูห ฆอน อาเจราฮี บอ หลูกหลาน อาบาฮาดโมวอาบ. อึณ มึห บอ อีมาย อา มาย็อห วี อี โดบ อัน.

5 อึณ มูห บอ อาเซคานี อี มูห ฆอน อายาฮาเฌลา บอ หลูกหลาน อาจาตูะ. อึณ มึห อีมาย โอย มาย็อห วี อี โดบ อัน.

6 อึณ มูห บอ อาเอเบด อี มูห ฆอน อาโยวนาทาน บอ หลูกหลาน อาตีน. อึณ มึห อีมาย พัน ฆึร วี อี โดบ อัน.

7 อึณ มูห บอ อาเยซายา อี มูห ฆอน อาเอทาลี บอ หลูกหลาน อาเอลัม. อึณ มึห อีมาย บู ฆึร วี อี โดบ อัน.

8 อึณ มูห บอ อาเฌพาดียา อี มูห ฆอน อามีคีลา บอ หลูกหลาน อาเฌบาดี. อึณ มึห อีมาย ดา ฆึร วี อี โดบ อัน.

9 อึณ มูห บอ อาออบาดี อี มูห ฆอน อาเยฮีลา บอ หลูกหลาน อายอพัะ. อึณ มึห อีมาย อา มาย็อห ดี ฆึร ดี ดา วี อี โดบ อัน.

10 อึณ มูห บอ อาเซลอมีด อี มูห ฆอน อายอซีพี บอ หลูกหลาน อาบานี. อึณ มึห อีมาย อู มาย็อห ดี เดา ฆึร วี อี โดบ อัน.

11 อึณ มูห บอ อาซาคารา อี มูห ฆอน อาเบเบ บอ หลูกหลาน อาเบเบ. อึณ มึห อีมาย อา ฆึร ดี ดา วี อี โดบ อัน.

12 อึณ มูห บอ อายอนีบ อี มูห ฆอน อาฮากาดาน บอ หลูกหลาน อาจากาด. อึณ มึห อีมาย อู มาย็อห ดี ฆึร วี อี โดบ อัน.

13 เฆ หลูกหลาน อาตอนีกัม อี ตัห ดี ปัน ซืด, เฆ บอ มูห อาเอลีเพเลด, อาเยอูลา บอ อาเซมายา. อึณ มึห อีมาย เดา ฆึร วี อี โดบ เฆ.

14 เฆ หลูกหลาน อาบีฆาวี บอ มูห อาอูเซ ฆาย อาฌากูรา. อึณ มึห อีมาย บู ฆึร วี อี โดบ ฆาย. เฆ ดูอี ตี บอกาเฆลียด แฮะ ฮาว โดบ โอว.

15 โอว แฮะ แตห ดูอี เฆ ตี ตัห กอย กาฌูะ โคบ แบลง อึม อี แหล ฮาว ดี มืง อาฮาวา. เย มืร แฮะ คยัะ กอย ดี ตี อาดา โอย ซีแง. โอว บอ วี ซาคีะ ดี ยอด เฆ ดูอี กืน บอ เฆ ดา อี หลู ดี เฌาพรา. โอว บอ วี นับ, อาว มึห ดูอี อาโมยว อาเลวี คอ อู วี. 16 โอว บอ วี แดะ เฆ อี มูห ดา ตาง อี จืร อาเอลีเอฌา, อาเรลัะ, อาเซมายา, อาเอนนาทาน, อายารีบ, อาเอนนาทาน ปอ อู วี, อานาทาน, อาซาคารา บอ อาเมซูลัม. โอว บอ แดะ บอ อายารีบ ฆาย อาเอนนาทาน อี มึห อางยาน. 17 โอว บอ วี จัร เฆ ฮาว โดง กอย อาอีตอ อี มูห ดา ตาง อี อึบ เฆ ดูอี แคง มืง กาซีพี, แตห เฆ ฮาว กาลาง ดี อัน บอ ดี เฆ บีนอง อัน อี แฮะ ดึอม โบง ฆาน แคง โฮว เฌาพรา. โอว แฮะ จัร เฆ กาลาง ดี อัน, หมาณ แตห อัน ตึย ดูอี อี ดี โบง ฆาน แคง โฮว เฌาพรา, แตห เฆ ฮาว โดบ เย. 18 เฌาพรา แฮะ เฆฌู เย, แตห เฆ ตึย ตัห อาเซรัะพี อี มูห ดูอี อี นับ ดี โบง แบน โมยว แบน โมยว. อัน บอ มูห ดูอี อีซาเรลัะ อี มูห ครึร อาเลวี บอ หลูกหลาน อามาลี. บอ อัน บอ เฆ บีนอง อัน บอกาเฆลียด, เฆ กอย ฆึร ดี ดา วี. 19 เฆ บอ ตึย ตัห บอ อาฮาซาบี ฆาย อาเยซายา อี มูห หลูกหลาน อาเฆรารี. บอ ฆาย บอ บีนอง วอแว บอ ฆอน ฆาย, เฆ อีมาย กอย อา ฆึร วี. 20 แดง ตี, เฆ บอ ตึย ตัห บอ เฆ อี มูห แดเจณ อี โบง ฆาน แคง โฮว เฌาพรา. คูนดีคัม อาดาวีด บอ เฆ อามู อามาด อัน, เฆ แฮะ ดึอม ดาง แดเจณ เฆ ตี, แตห เฆ จอย ดูอี อาเลวี ตึอน. ฌาราง เฆ ตี บอกาเฆลียด, เฆ อีมาย กอย อา มาย็อห ดี อา ฆึร วี. เฆ ดอน อี แฮะ ฮับ จืร เฆ แคง ฌาราง ตี.

21 ดอ อัน ตี ดอ กอย เย โคบ แบลง อาฮาวา ตึอน, โอว วี กาลาง ดี เฆ, แตห เย บอกาเฆลียด ยืน ปี ดี โฮม. แตห เย มึห น็อห โฆม, น็อห เตียม ดี อาต เฌาพรา, แตห เย ปึอน ดี ซาคึร หมาณ, แตห เฌาพรา แยต อึณเตณ เย, แตห อัน เฌา ฆ็อง แร บอ ฆอน เย บอ โกรวกราม เย บอกาเฆลียด. 22 โอว แฮะ ซาย ดี หมาณ ดี คูนดีคัม, แตห อัน ดัว ดา ซึก อี ป็อะ อึณปร็อง, แตห เฆ แยต อึณเตณ เย, แตห เฆ จอย เย แบน อี แร อี ฆ็อง รันซู ดี เย. โคว, โอว แฮะ ดึอม กาลาง ดี คูนดีคัม ต็อห, “เฌาพรา ปี กรึบ เย, อัน ดี เฆฌู วี อี หณึม บึง อัน. วี อี แวน อัน เฌา, อัน เฌา ยี ตู อึง. อัน ดี ดัม หมาบ ดี ดูอี วี ตี.” 23 โกบ อึณ ปาย ตี เย บอ ยืน ปี ดี โฮม บอ ซาคึร หมาณ ลอง อัน ตี ดี เฌาพรา ปี กรึบ เย. อัน เฌา มืร โทม ปี ซาคึร เย.

24 กาแต เฆ อี มูห ดา อี หลู ดี เฌาพรา, โอว วี ร็อห เฆ ฆึร ดี อา วี. อึณ บอ มูห อาเซรัะพี บอ อาฮาซาบี บอ เฆ อี มูห ดา อี หลู ดี เฌาพรา ปอ ฆึร วี อี มูห บีนอง วอแว อาเซรัะพี ฆาย อาฮาซาบี. 25 โอว มืร ซัะ รึอน เฆ ครีว บอ ครึง ตา อี มูห ปี หลู คูนดีคัม เฆ ดา กาณา อี อึบ มืง. อึณ บอ มูห บอ ปี หลู เฆ อามู อามาด คูนดีคัม บอ ปี หลู เฆ ดูอี อีซาเรลัะ อี แฮะ กอย ดี ตี. โอว แฮะ ฮอต ซัะ โตต ดอน โมยว, โอว บอ วี อาบ ดี เฆ, แตห เฆ ปึอน ดี จัร แคง โฮว เฌาพรา. 26 โกรว แปะ แฮะ อาบ โอว ดี เฆ ตี, อึณ บอ มูห รึอน เดา มาย็อห ดี พัน ฆึร ทาเลน.^a บอ ครึง รึอน อาดา อู มาย็อห ทาเลน.^b ครีว อู มาย็อห ทาเลน. 27 บอ ก็อก ครีว อา ฆึร โบ็ง. ง็อห อัน อึณ ปี ครีว อู แหรณ แตง. บอ ก็อก บ็อง เดณ แฌด อา โบ็ง อี แฮะ ง็อห การัม ครีว. 28 โอว วี ต็อห ดี เฆ, “เบ แฮะ แบน ดูอี อี ซีงา บอด ดี อาต เฌาพรา. โกรวกราม รึอน ครีว เฆ นี มืร, แฮะ แบน ปี ดี หลู อี ซีงา บอด. เฆ อี มึห น็อห ซี หลู ตึอน มืร เฆ แฮะ หลู ดี อัน เฌา อี มูห เฌาพรา ปี กรึบ ฆูณ ดัง เอ. 29 แตห เบ บัร ซีคยา โกรว เฆ ตี, แตห อึณ กอ ฌัม แคง มืง เยรูซาแลม. เซ ฮี ฌัม ดี ตี, แตห เบ วี ซัะ ดี อาต เฆ ดา ตาง อี หลู ดี เฌาพรา บอ เฆ ดูอี อาโมยว อาเลวี บอ เฆ ดา ตาง อี มูห ฆีณ อึณโฮม เฆ ดูอี อีซาเรลัะ. แฮะ ฮอต, แตห เบ วี อูน โกรว ตี แคง โฮง อี กอย ดี โฮว เฌาพรา.” 30 วาย อัน ตี เฆ ดา อี หลู ดี เฌาพรา บอ เฆ ดูอี อาโมยว อาเลวี บอ ดึห โกรวกราม เฆ รึอน ครีว แปะ แฮะ ซัะ โอว ตี, แตห เฆ วี ดึห ฮาว โดง กอย โฮว เฌาพรา ดี มืง เยรูซาแลม ตึอน.

31 ดอ ฌัม มาเฆียน ดอ โฆว, ซีแง ฆึร ดี ฮาอา, เย บอ เลห ดี อึม แบลง อาฮาวา, วี ฮาว ดี มืง เยรูซาแลม. เฌาพรา มืร บอ กอย รึม โดบ เย บอ บัร ดี ฆ็อง ดี แร เย, แตห เย ลอด ดี รันซู เย บอ ดี เฆ อี บัร ดี โฌน เย โดบ อึณเตณ ตี. 32 ดอ แฮะ ฮอต ตัห ฌัม เย แคง มืง เยรูซาแลม, เย บอ ดีเหลา อาดา โอย ซีแง. 33 อึณ บอ วี ฌัม ซีแง อึณพวน, เย บอ ฮาว ดี โฮว เฌาพรา บอ ซัะ ดัว รึอน เฆ ครีว บอ โกรว เฆ ตึอน, วี อาบ ดัว ดี ดา อี หลู ดี เฌาพรา อี จืร อาเมเรมูด อี มูห ฆอน อาอูรียา บอ ดี อาเลอาซา อี มูห ฆอน อาพีเนฮาด, ดี เฆ ดูอี ครึร อาเลวี อา วี อี จืร อายอจาบาด อี มูห ฆอน อายอซู บอ ดี อานอตี อี มูห ฆอน อาบีนูอี. ดูอี เฆ ตี, เฆ แฮะ กอย รึม โดบ อาเมรามูด ตึอน. 34 เย บอ ดึห โกรว เฆ ตี บอ ซัะ ดี ยอด, บอ ตีห วี ยอด ดอน โมยว, อึณ แฮะ โดบ ฌาราง อัน บอกาเฆลียด. เฆ บอ แดม อูน, แตห อึณ ฮอต โตต ซีแง ตี.

35 วาย อัน ตี แคะ กอย เฆ ดูอี แปะ แฮะ เหมต ฮาว อี เฮา, เฆ อี แฮะ วี ตัห ตึอน, เฆ บอกาเฆลียด บอ วี หลู ดี เฌาพรา ปี กรึบ เฆ ดูอี อีซาเรลัะ. เฆ บอ หลู อี โดะ ดี เงา อาดา เฆ ดูอี อีซาเรลัะ บอกาเฆลียด. อึณ บอ มูห มัก อาโล็ง ฆึร ดี อา โดว, มาบู อาโล็ง ดีม ฆึร ดี เดา โดว, บอ ฆอน มาบู บู ฆึร ดี บู โดว. อาดา ปี ดี หลู อี ดี แตห อึณ ฆ็อห แวน หมาบ, เฆ บอ ดึห มาแป อาโล็ง ฆึร ดี อา โดว. ปี หลู เฆ ฌึร ตี ดอน โมยว, อึณ บอ มูห ปี ดี หลู ดี เฌาพรา อี โดะ ดี เงา. 36 เฆ มืร ดึห บอ แปะ อามีง แปะ แฮะ ตึย ตัห คูนดีคัม ดี เฆ, วี อาบ ดัว ดี เฆ ดา กาณา อี อึบ มืง, บอ ดี เฆ ดา ตาง อี กอย บลาก นา เฆต ซีแง อึม แบลง อูพาราด. ดูอี เฆ ตี มืร, วี จอย เฆ ดูอี อีซาเรลัะ, จอย บอ แตห โฮว เฌาพรา เจว ฮอต.