1 วาย อัน ตี ดอ แฮะ อึบ คูนดีคัม อาตาเจรีด ดี มืง บีราซี, อึณ บอ มึห ดา อี หลู ดี เฌาพรา อู วี, อัน จืร อาฌารียา. ฆูณ ดัง อัน บอ มูห ดา อี หลู ดี เฌาพรา อี จืร อาโรน ตึอน. อาเอซารา บอ มูห ฆอน อาเซรายา. อาเซรายา บอ มูห ฆอน อาฌารียา. อาฌารียา บอ มูห ฆอน อาฮีลาคี. 2 อาฮีลาคี บอ มูห ฆอน อาซาโลม. อาซาโลม บอ มูห ฆอน อาฌาโดก. 3 อาฌาโดก บอ มูห ฆอน อาฮีโตบ. อาฮีโตบ บอ มูห ฆอน อามารียา. อามารียา บอ มูห ฆอน อาฌารียา ปอ อู วี. อาฌารียา ตี บอ มูห ฆอน อามารายูด. 4 อามารายูด บอ มูห ฆอน อาเจราฮี. อาเจราฮี บอ มูห ฆอน อาออจี. อาออจี บอ มูห ฆอน อาบูกี. 5 อาบูกี บอ มูห ฆอน อาพีซู. อาพีซู บอ มูห ฆอน อาพีเนฮาด, อาพีเนฮาด บอ มูห ฆอน อาเลอาซา. อาเลอาซา บอ มูห ฆอน ดา ตาง อี หลู ดี เฌาพรา อี จืร อาโรน. 6 อาเอซารา ตี แฮะ เลห แคง มืง บาแบ, ตัห ฌัม มืง เยรูซาแลม. อัน บอ มูห ดา ซารา อี นับ ซีคยา ดารา ปี ดัม อูน เฌาพรา ดี เฆ ดูอี อีซาเรลัะ. อึณ มูห ดารา ปี แดม อูน อาโมวแซ ตึอน. เฌาพรา ปี กรึบ อาเอซารา มืร กอย รึม โดบ อัน เซเซ. โคว, แคะ ปี หมาณ อัน ดี คูนดีคัม, คูนดีคัม แฮะ ดัว โตต ดอน โมยว. 7 ดอ แฮะ อึบ คูนดีคัม อาตาเจรีด มาน มืง อัน อาดา บู ซีนัม, อึณ บอ มึห เฆ ดูอี อีซาเรลัะ อู พึง อี มูห ดา อี หลู ดี เฌาพรา บอ ดูอี อาโมยว อาเลวี, เฆ อี นับ ดี ต็อห โหมว, เฆ ดูอี อี บัร มาโลห ดี โฮว เฌาพรา บอ เฆ อี โบง ฆาน แคง โฮว เฌาพรา, เฆ บอกาเฆลียด แฮะ โดบ อาเอซารา เลห แคง มืง บาแบ, วี ฮาว ดี มืง เยรูซาแลม.

8 ดอ เลห เฆ แคง มืง บาแบ ตึอน, อึณ มูห มาเฆียน ดอ โฆว, ซีแง ดอ โฆว. 9 เฆ บอ วี ตัห ฌัม ดี มืง เยรูซาแลม ดอ ฌัม มาเฆียน อึณพัน, ซีแง เหลห. เฌาพรา แฮะ จอย เฆ. โคว, เฆ แฮะ ฌัม ซีคยา. 10 อาเอซารา ตี บอ มูห ดูอี อี แฮะ ออน ดี เฮน, แตห อัน นับ ซีคยา ดารา เฌาพรา บอ แตห อัน วี ปึอน ดี โดบ. อัน บอ ออน ดี ดึห ดารา ตี บอ ปี ดัม อูน เฌาพรา แบน โมยว แบน โมยว, วี มาโนว เฆ ดูอี อีซาเรลัะ.

11 ดอ เลห อาเอซารา แคง มืง บาแบ ตึอน, คูนดีคัม อาตาเจรีด แฮะ ดัว แปะ ดี อาเอซารา อี มูห ดา อี หลู ดี เฌาพรา อี นับ ซีคยา บอ ดารา เฌาพรา บอ ปี ดัม อูน เฌาพรา ดี เฆ ดูอี อีซาเรลัะ แบน โมยว แบน โมยว.

12 แปะ แฮะ แดม คูนดีคัม ตี, อึณ แฮะ วี ทูด เลห ปาย นี. อึณ ต็อห, “โอว อี มูห คูนดีคัม ตาง อาตาเจรีด, โอว มึห แปะ นี, ดัว ดี แม อี มูห ดา อี หลู ดี เฌาพรา. แม บอ มูห ดา ซารา อี มาโนว ดารา เฌาพรา อี มูห เฌาพรา อี อึบ ฆางหราว. แตห แม ฆัด เยน ฆยามซา.

13 โอว แฮะ ดัว อามีง ปาย นี. เฆ ดูอี อีซาเรลัะ บอกาเฆลียด บอ เฆ ดา อี หลู ดี เฌาพรา บอ เฆ ดูอี อาโมยว อาเลวี อี กอย แคง มาน มืง ปี อึบ โอว นี, เซ เฆ กอ มึห น็อห ซี เวณ กอย แคง มืง เยรูซาแลม, แตห เฆ เวณ โดบ แม. 14 บอ โอว บอ เฆ บู วี อี ดัว อากยาม อางยาน ดี โอว, เย แฮะ ควาง แตห แม เวณ, แตห แม วี ยอด บอ เฆ ดูอี แคง มืง ยูดา บอ เฆ ดูอี แคง มืง เยรูซาแลม, โยว เฆ แฮะ โดบ ตู โดบ ดารา เฌาพรา อี มูห ดารา แปะ แฮะ อาบ อัน เฌา ดี แม. 15 แดง ตี, แม โลว ดึห ฮาว บอ โกรว อี มูห ครึง รึอน เฆ ครีว แปะ แฮะ หลู โอว บอ เฆ อี ดัว อากยาม อางยาน ดี โอว. เย แฮะ มึห น็อห ซี หลู ดี เฌาพรา ปี กรึบ เบ ดูอี อีซาเรลัะ, อี มึห โฮว อัน แคง มืง เยรูซาแลม ตี. 16 บอ โกรว บอ รึอน เฆ ครีว แปะ แฮะ ปึอน แม แคง มืง บาแบ อี มูห แปะ แฮะ หลู เฆ ดูอี อีซาเรลัะ บอ แปะ แฮะ หลู เฆ ดา อี หลู ดี เฌาพรา, แม โลว ดึห ฮาว โตต. เฆ ดูอี ฌึร ตี, เฆ มืร แฮะ มึห น็อห ซี หลู ซี ดาน. แตห แม วี ดึห ฮาว โตต ดอน โมยว, วี หลู ดี โฮว เฌาพรา อี กอย แคง มืง เยรูซาแลม ตี. 17 แตห แม ดึห รึอน ตี, จึห มัก อาโล็ง, มาบู อาโล็ง, บอ ฆอน มาบู, บอ โหงว เฆ ดีฆาว, บอ อึม มางูน, แตห แม วี หลู ฌึร ตี แดง กาโช็ง หลู อี กอย แคง โฮว เฌาพรา แคง มืง เยรูซาแลม ตี. เฌาพรา ตี มูห เฌาพรา ปี กรึบ แม.

18 บอ แม บอ เฆ บีนอง อี มูห ดูอี อาโมยว แม, แตห เบ ยอด รึอน อี ซี ฆีด. อึณ หมึอม จัร ปาย เหมา, แตห เบ จัร ปาย ตี, แตห อึณ โดบ ปี อึง เฌาพรา อี มูห เฌาพรา ปี กรึบ เบ. 19 โกรว แปะ แฮะ อาบ เย ดี แม อาดา ปี ดี กรึบ เฌาพรา แคง โฮว เฌาพรา ตี มืร, แตห แม วี ดึห วี อาบ ดัว ดี เฌาพรา อี อึบ มืง เยรูซาแลม. 20 เซ อึณ บอ ซี มึห ปี ดี โลว แม แคง โฮว เฌาพรา เบ, แม แฮะ ปึอน ดึห รึอน แคง ฌีดืก คูนดีคัม.

21 โอว คูนดีคัม อาตาเจรีด โอว วี ดัว อามีง บอ ดี ดา กาณา อี บัร โกรวกราม โอว ดอน โปละ อี กอย บลาก นา เฆต ซีแง แบลง อึม อูพาราด. เซ อึณ บอ มูห อาเอซารา อี มูห ดา อี หลู ดี เฌาพรา, อี มูห บอ ดา ซารา อี นับ ซีคยา แปะ ดารา เฌาพรา อี อึบ ฆางหราว, เซ อัน บอ โลว บอ หมาณ โมยว เหมา, แตห เบ ดัว แคะ ปี หมาณ อัน ตี. 22 เบ แฮะ ปึอน ดัว, แตห อึณ กอ โนะ รึอน อู มาย็อห ทาเลน.^a ดีฆาว อู มาย็อห กอรัะ,^b อึม มางูน อู มาย็อห ปาะ^c. นามัน อู มาย็อห ปาะ, บอ ซัยะ แคะ ปี โลว อัน. แคะ ตี เบ ปึอน ดัว. 23 แคะ ปี ดัม อูน เฌาพรา อี อึบ ฆางหราว ลอง โฮว เฌาพรา ตี, แตห เบ โฆยวฆยา ดี โบง, แตห อึณ กอ กางยา, แตห อึณ กอ โดบ โตต ดอน โมยว, แกวะ แตห อัน เฌา มึห ดี รู ดี โอว บอ โจว โอว บอ โจว ฆอน เฆ หลูกหลาน โอว. 24 เบ ดา กาณา อี บัร โกรวกราม โอว, โอว วี กาลาง ดี เบ ปอ อึณ ปัว, แตห แม นับ. อาว ปึอน แฆบ คอน เฆ จึง คอ อู โมยว ดี ดา อี หลู ดี เฌาพรา บอ ดี ดูอี อาโมยว อาเลวี, ดี เฆ อี นับ ดี ต็อห โหมว, ดี เฆ ดา อี บัร บาง มาโลห แคง โฮว เฌาพรา บอ ดี เฆ อี โบง ฆาน โมยว เฮา แคง โฮว เฌาพรา ตี.

25 แม อาเอซารา มืร, แม โลว ดึห อางยาน ปี ดัว เฌาพรา ดี แม, วี ร็อห วี ดาง คูน เรา บอ เฆ ดา ตาง อี ซูงพยาด ดารา. แตห เฆ ซูงพยาด ซืร ซืร หมาน หมาน อาเร เฆ ดูอี อี กอย บลาก นา เฆต ซีแง อึม แบลง อูพาราด ตี. แตห เฆ อึบ เฆ อี โดบ ดารา เฌาพรา บอกาเฆลียด. แตห อึณ บอ มูห ดูอี อี แฮะ นับ ดารา เฌาพรา ปี กรึบ เบ ตี, แตห เบ บอ วี มาโนว เฆ ดูอี อี ตู นับ. 26 เซ อึณ บอ มึห ดูอี อี แทณ อี หลึร ดารา เฌาพรา บอ อามีง ปี ดัว โอว คูนดีคัม นี, ดูอี วี ตี โลว คัม หมาบ อัน อาคาคัร. อัน โลว ยัม. เซ อาว มูห ปาย ตี, เบ โลว โฮว เลห อัน นา เรต มืง. เซ อาว มูห ปาย ตี มืร, ดึห โตต แคะ กอย โกรวกราม อัน บอ เหมต คร็อง อัน แคง กาปึม.” แคะ ตี แปะ ปี แดม คูนดีคัม ดี อาเอซารา ตึอน.

27 วาย อัน ตี อาเอซารา วี ต็อห, “แตห เอ อืบ เฌาพรา ปี กรึบ ฆูณ ดัง เอ เฆ ตึอน. อัน เฌา แฮะ โบง แตห คูนดีคัม มึห น็อห ซี โบง โฮว เฌาพรา อี กอย ดี มืง เยรูซาแลม, แตห อึณ ชีด, แตห อึณ ซีคยา, แตห อึณ หมึอม โรวเซ. 28 ปี เฆฌู เฌาพรา ดี โอว, อึณ แฮะ หมึอม, แฮะ บอด กาเซา. บอ คูนดีคัม บอ เฆ อี ดัว อากยาม อางยาน ดี คูนดีคัม บอ เฆ อามู อามาด คูนดีคัม อี มึห ปวน, อัน เฌา แฮะ โบง แตห เฆ ดอน อี อึง ปี โบง โอว. เฌาพรา ปี กรึบ โอว, อัน แฮะ แตห โปลม แตห แฮณ ดี โอว, แตห โอว วี ปึอน ดี วี แดะ เฆ ดา ตาง อี อึบ อี แยต เฆ ดูอี อีซาเรลัะ, แตห เฆ วี ตัห โดบ โอว.”