1 ปาย ตี คูนดีคัม ตาง อาตารีด บอ วี จัร เฆ วี เหรต แปะ พืน ปี แดม อูน เฆ แคง มืง บาแบ ตึอน. 2 เฆ บอ วี ยึร บับ อู พืน แคง โดง อี จืร อักบาทา อี กอย แคง มืง เมดี. โฆรห ปี แดม แคง บับ ตี, อึณ ต็อห, “แตห อี โนว เซเซ.

3 คูนดีคัม ตาง อาซายรัด แฮะ อึบ มืง อาดา อู ซีนัม. ดอ อัน ตี อัน แฮะ ดัว อามีง ลอง โฮว เฌาพรา อี กอย แคง มืง เยรูซาแลม. อึณ ต็อห, แตห เฆ วี ซัม โฮว เฌาพรา, แตห เฆ ดูอี วี ปึอน ดี วี หลู โมยว ปี ดี โลว หลู เฆ บอ ปี ดี หลู อี โดะ ดี เงา. แตห เฆ วี ซัม เจณ ร็อง. แตห เฆ โบง นา จา โฮว เฌาพรา ตี เดา ฆึร กานีห, นา ตาง อัน เดา ฆึร กานีห. 4 แตห เบ ดึห มาว ตาง อาดา โอย ทาบ. แฮะ ฮอต, แตห เฆ โฆว อู ทาบ ตา เฮ. ง็อห จารีะ จาคัะ แตห เบ ดึห แคง ฌีดืก คูนดีคัม. 5 อึณ บอ มูห ครึง รึอน เฆ ครึง ครีว อี แฮะ ดึอม กอย แคง โฮว เฌาพรา ดี มืง เยรูซาแลม ตี แปะ แฮะ ดึห ฮาว คูนดีคัม อาเนบูคัดเนจา ดี มืง บาแบ, วี ตัห อูน แคง โฮว เฌา ปี กรึบ เฆ แคง มืง บาแบ. แตห เบ วี ดึห เวณ ครึง เฆ ตี, วี เบลห อูน แคง โฮว เฌาพรา แคง มืง เยรูซาแลม.”

6 โกบ อึณ ปาย ตี คูนดีคัม อาตารีด วี แดม แปะ ต็อห, “โอว ตึย แปะ อามีง ดี แม ดา กาณา อาตาตัะเน อี อึบ มืง บลาก นา เฆต ซีแง อึม แบลง อูพาราด, บอ ดี แม อาเซซาปอจาเน บอ ดี เบ อี โบง รึม ฆาน โดบ บาย. ลอง ดี วี ซัม โฮว เฌาพรา ตี, อึณ ตู มูห อาเร เบ. 7 อาว โลว ปยาต, อาว โลว แคร ฆาน เฆ ตี. แตห เฆ ดา กาณา อี อึบ ดูอี อายูดา บอ ดา ตาง เฆ ดูอี อายูดา วี แด วี ซัม โฮว เฌาพรา แดง โดง กอย บรีม อัน.

8 แดง ตี, โอว วี ดัว อามีง ดี เบ, แตห บอ เบ จอย เฆ โบง. เบ แฮะ แฆบ รึอน จึง เฆ คอน แคง มืง อี กอย บลาก นา เฆต ซีแง อึม แบลง อูพาราด ตี. เบ โลว ดึห แคง รึอน ตี, วี ดัว ดี เฆ ดูอี อี ซัม โฮว เฌาพรา ตี, แตห อึณ แบน จารีะ จาคัะ บอ รูห รัณ เฆ, แกวะ แตห ฆาน ตี ฆืด, แตห อึณ เจว ฮอต. 9 เซ เฆ บอ มึห ปี ดี โลว ครึง ตา ดอน โมยว, บอ มูห มัก อาโล็ง, มาบู อาโล็ง, บอ มูห ฆอน มาบู บอ ฆอน มัก อาดา ปี ดี โลว โดะ แคง เงา บอ หลู ดี เฌาพรา อี อึบ ฆางหราว, บอ มูห ดีฆาว, ซัยะ, อึม มางูน บอ นามัน, แตห เบ ดัว ดอน ซีแง แคะ ปี โลว เฆ ดา อี หลู ดี เฌาพรา อี กอย แคง มืง เยรูซาแลม ตี. แกวะ แตห เบ ลูด. 10 ปาย ตี เฆ ดูอี อี หลู ดี เฌาพรา, เฆ โลว หลู อี ล็อะ น็อห เฌาพรา อี อึบ ฆางหราว. เฆ บอ โลว ซาคึร หมาณ, แตห อัน เฌา ม็องการา ดัว นา บอด นา หมึอม บอ ดี โอว บอ ดี เฆ ฆอน โอว บอกาเฆลียด.

11 โอว ปี วี ดัว อามีง ปอ อู โมยว. เซ อึณ มึห ดูอี อี ตู โทม อามีง โอว นี, แตห เบ ดึห เลห มานัก กาง อัน, วี ซัม, แตห อึณ แบน โดง ดี ปัก ฮอย แมง อัน. กาง อัน มืร, แตห เบ ปยาต แวน โตต. 12 เซ อึณ มึห ดูอี อี กาบัห ดี อามีง โอว ตี, บอ มูห คูนดีคัม, บอ มูห ดูอี เฮา, เซ เฆ บอ คราม ดี โบง แตห โฮว เฌาพรา ตี ลึร, โอว หมาณ แตห เฌาพรา แวน ดูอี ฌึร ตี. เฌาพรา แฮะ ร็อห โดง ตี, แตห อึณ แบน โดง กอย อัน. โอว อี มูห คูนดีคัม อาตารีด, โอว แฮะ ดัว อามีง เฆ ตี, แตห เบ ออน ดี โบง โดบ ซีคยา.” แคะ ตี แปะ ปี แดม คูนดีคัม อาตารีด.

13 วาย อัน ตี ดา กาณา ตาง อี จืร อาตาตัะเน บอ อาเซซาปอจาเน บอ เฆ ดา ตาง อี โบง รึม ฆาน โดบ ฆาย, เฆ บอ ออน ดี โบง โดบ อามีง ปี ดัว คูนดีคัม ตาง เฆ ตี. 14 เฆ อี มูห ดา ตาง อี อึบ อี แยต เฆ ดูอี อายูดา มืร, เฆ โบง แตห โฮว เฌาพรา ตี กอ ฮอต. ดา อี บยาน โฆรห เฌาพรา อี จืร อาฮักกาย ฆาย อาซาคารา อี มูห ฆอน อาอีตอ, ฆาย บอ มาโนว เฆ ดูอี อีซาเรลัะ, แตห เฆ มึห โปลม มึห แฮณ. เฆ มืร โบง แตห อึณ กอ ฮอต, แตห อึณ บอ โดบ แคะ ปี กาลาง เฌาพรา ปี กรึบ ดูอี อีซาเรลัะ, แตห อึณ บอ โดบ แคะ ปี ดัม อูน คูนดีคัม ตาง อี จืร อาซายรัด บอ แคะ ปี ดัม อูน คูนดีคัม อาตารีด ฆาย คูนดีคัม อาดาเจรีด อี อึบ มืง บีราซี. 15 ดอ แฮะ อึบ คูนดีคัม อาตารีด มืง อัน อาดา เดา ซีนัม, ดอ ฌัม มาเฆียน อัดตา, ซีแง ฮาโอย, เฆ มืร แฮะ ฮอต โบง โฮว เฌาพรา ตี.

16 ปัน ตี แคะ กอย เฆ ดูอี อีซาเรลัะ บอ มูห ดา อี หลู ดี เฌาพรา, บอ มูห ดูอี แคง ครึร อาเลวี, เฆ ดูอี อี แฮะ วี ตัห ฌัม มืง เยรูซาแลม, เฆ บอ วี โบง บลอย หลู โฮว เฌาพรา ตี. เฆ มืร โคย กาเซา. 17 บลอย หลู เฆ ดี โฮว เฌาพรา ตี, เฆ บอ ดึห หลู มัก อาโล็ง อู มาย็อห โดว, มาบู อาโล็ง อา มาย็อห โดว, บอ ฆอน มาบู พวน มาย็อห โดว. เฆ บอ ดึห บอ มาแป ฆึร ดี อา โดว, แตห อึณ แบน ปี ดี หลู อี ฆ็อห แวน หมาบ เฆ ดูอี อีซาเรลัะ ฆึร ดี อา ครึร, เฆ หลู อู ครึร อู โดว. 18 เฆ บอ วี ดาง ดา อี หลู ดี เฌาพรา แตห ดอน อี กอย แคง พึง อัน. เฆ ดูอี แคง ครึร อาเลวี มืร บอ กอย ดอน อี แคง พึง อัน, แตห เฆ โบง ฆาน เฌาพรา แคง มืง เยรูซาแลม ตี, แตห อึณ บอ โดบ ปี แดม อูน อาโมวแซ แคง บับ เฌาพรา.

19 ดอ ฌัม มาเฆียน ดอ โฆว, ซีแง ฆึร ดี อึณพวน, เฆ ดูอี อี แฮะ วี ตัห แคง มืง เฆ, เฆ บอ โบง บลอย โหลห เฆ เฌาพรา ดอ กาโลห อัน กาง เฆ. 20 เฆ ดา อี หลู ดี เฌาพรา บอ ดูอี แคง ครึร อาเลวี, เฆ มืร โบง แตห เฆ ซีงา ดอน อี, แตห อึณ โดบ ปี ดัม ดารา. เฆ ดูอี แคง ครึร อาเลวี ตึอน, เฆ บอ ง็อห ฆอน มาบู อาดา เฆ ดูอี อี แฮะ วี ตัห ฌัม แคง มืง เฆ บอ อาดา เฆ ดา อี หลู ดี เฌาพรา บอ อาดา โดว บรีม เฆ. 21 แคะ กอย เฆ ดูอี อีซาเรลัะ อี แฮะ วี ตัห, บอ เฆ อี แฮะ แวน อี ตู หมึอม แปะ แฮะ โบง เฆ โดบ ดูอี อาโมยว เฮา อี กอย แคง มืง เฆ ตี, เฆ บอกาเฆลียด แฮะ วี ตัห กรึบ โตต เฌาพรา อี มูห เฌาพรา ปี กรึบ เฆ ดูอี อีซาเรลัะ. 22 เฆ มืร โบง บลอย โฮม คามูน อี ตู ฮับ ซีนัม บรัห อาดา บู ซีแง. เฆ มืร แฮะ โคย ดาคึย กาเซา. เฆ โคย ดาคึย โกบ แฮะ โบง เฌาพรา แตห คูนดีคัม ตาง อี อึบ มืง อาซูรา โพรม บลาก เฆ บอ จอย แตห เฆ ปึอน ดี ซัม ฮอต โฮว เฌาพรา อี มูห เฌาพรา ปี กรึบ เฆ ดูอี อีซาเรลัะ.