1 ดอ อัน ตี ดา อี บยาน โฆรห เฌาพรา อี จืร อาฮักกาย บอ ดา อี บยาน โฆรห เฌาพรา อี จืร อาซาคารา อี มูห ฆอน อาอีตอ ฆาย บอ ฆาว ปวน เฌาพรา ปี กรึบ เฆ ดูอี อีซาเรลัะ บอ กาลาง ดี เฆ ดูอี อายูดา อี กอย แคง มืง ยูดา บอ แคง มืง เยรูซาแลม บอกาเฆลียด.

2 ปัน ตี อาเฌรูบาเบน อี มูห ฆอน อาเซทีเอน บอ อายอซู อี มูห ฆอน อายอจาตาก, ฆาย บอ วี ยึร โฆรห ปี กาลาง ดา อี บยาน โฆรห เฌาพรา ฆาย ตี, ฆาย บอ วี กาจูห ดี โบง ฮาว โฮว เฌาพรา อี กอย แคง มืง เยรูซาแลม ตึอน. ดา อี บยาน โฆรห เฌาพรา อา วี ตี มืร จอย ฆาย.

3 ดอ อัน ตี อาตาตัะเน อี มูห ดา กาณา ตาง อี อึบ มืง บลาก นา เฆต ซีแง อึม แบลง อูพาราด บอ อาเซซาปอจาเน บอ เฆ อี โบง รึม ฆาน โดบ อัน, เฆ บอ ตัห ดี มืง เยรูซาแลม บอ ดีหมอด เฆ ดูอี อีซาเรลัะ ต็อห, “อาเซ แฮะ ดัว อามีง, แตห เบ วี ซัม โฮว เฌาพรา บอ แรง มืง นี?” 4 เฆ บอ ดีหมอด บอ ปี จืร เฆ อี ลาย โพรม ดี โบง โฮว เฌาพรา ตี. 5 มาแล, เฌาพรา ยี บัร ดี ยอด เฆ อี มูห ดา ตาง อี อึบ อี แยต เฆ ดูอี อีซาเรลัะ. ดา กาณา เฆ อี มึห ปวน, อี มูห ดูอี อาโมยว บีราซี, เฆ ยี ตู ปึอน แคร ฆาน เฆ ตี, แตห อึณ กอ ฆืด. เฆ โลว แดม แปะ ตึย ดี คูนดีคัม อาตารีด ดี อาต. แฮะ ฮอต, เฆ โลว หน็อะ แตห คูนดีคัม กอ วี แดม เวียะ แปะ ตี.

6 แปะ แปะ แฮะ แดม เฆ ตี, อึณ แฮะ วี ทูด เลห ปาย นี. อึณ ต็อห, “อาตาตัะเน อี มูห ดา กาณา ตาง อี อึบ บลาก นา เฆต ซีแง อึม แบลง อูพาราด บอ อาเซซาปอจาเน บอ เฆ อี โบง รึม ฆาน โดบ อัน, เฆ แฮะ แดม แปะ นี.”

7 เย มืร มึห แปะ ดาง ฌัม แม คูนดีคัม ตาง อาตารีด, แตห แม ฆัด เยน ฆยามซา. 8 แตห แม คูนดีคัม ตาง นับ บอ ลอง แฮะ ตัห ฌัม เย ดี มืง ยูดา. เย แฮะ ยึร โฮว เฌาพรา อี ตาง อี บอด กาเซา. เฆ แฮะ โฆว ตา มาว ตาง, แฮะ วี ดึห มานัก อัน, ฮับ แคง แรง มาว ปี โฆว เฆ ตี. แปะ แฮะ โบง เฆ ตี, แฮะ คึกคัม แฮะ ตาง บอ ครัน กาเซา.

9 เย มืร แฮะ วี ดีหมอด เฆ อี มูห ดา ตาง อี อึบ อี แยต เฆ, แตห เฆ วี กาลาง แหน ดี เย, อาเซ แฮะ ควาง แตห เฆ ซัม โฮว เฌาพรา โบง บอ แรง มืง ตี. 10 เย มืร แฮะ ดีหมอด บอ จืร เฆ อี มูห ดา ตาง อี อึบ อี แยต เฆ ตี, แตห เย ปึอน ดี ดึห จืร เฆ ตี, วี ดาง ดี แม คูนดีคัม.

11 เฆ มืร แฮะ วี กาลาง ดี เย. เฆ ต็อห, “เย มูห แดเจณ เฌาพรา อี อึบ ฆางหราว บอ กาดาย. เย แฮะ วี โฆว วี อึณปราย โฮว เฌาพรา แปะ แฮะ ซัม อูน คูนดีคัม ตาง อี อึบ มืง ดูอี อีซาเรลัะ อู ซีณ อาต นี. 12 มาแล, เฆ ฆูณ ดัง เย แฮะ โบง แตห เฌาพรา อี อึบ ฆางหราว ตี รู ดี เย. อัน เฌา แฮะ แตห คูนดีคัม อาเนบูคัดเนจา ตัห กาโฆห ดี เฆ. คูนดีคัม ตี, อัน บอ มูห ดูอี อาโมยว คาลาเด อี อึบ มืง บาแบ. อัน มืร แฮะ ปยาต แวน บอ โฮว เฌาพรา, เหมต ฮาว บอ ดูอี บอ มาน บอ มืง, แตห เฆ ฮาว คัม ดูก ตาง แคง มืง บาแบ ตึอน.

13 อึณ บอ วี ฌัม โจว บาน คูนดีคัม อาซายรัด. ดอ แฮะ อึบ อัน มืง อัน อาดา อู ซีนัม คูนดีคัม อาซายรัด ตี แฮะ วี ดัว อามีง แตห เย วี โฆว วี อึณปราย โฮว เฌาพรา นี. 14 อัน มืร แฮะ วี ดึห ครึง รึอน เฆ ครึง ครีว อี มูห โกรว อี แฮะ ดึอม กอย แคง โฮว เฌาพรา. ครึง ตี คูนดีคัม อาเนบูคัดเนจา แฮะ ดึห เลห แคง โฮว เฌาพรา อี กอย ดี มืง เยรูซาแลม นี, วี ฮาว อูน แคง โฮว เฌา ปี กรึบ เฆ อี กอย แคง มืง บาแบ. คูนดีคัม ตาง อาซายรัด ตึอน, อัน แฮะ วี ดึห โกรว เฆ ตี, วี อาบ ดัว ดี ดูอี อี จืร อาเซซาบาจา อี มูห ดา กาณา อี อึบ ดูอี อายูดา แปะ แฮะ ดาง คูนดีคัม อาซายรัด ตี. 15 คูนดีคัม ตี แฮะ วี ดัม ต็อห, ‘แตห แม ดึห โกรว เฆ นี, วี ฮาว อูน แคง โฮว เฌาพรา อี กอย แคง มืง เยรูซาแลม. แฮะ ฮอต, แตห เบ วี โฆว วี อึณปราย โฮว เฌาพรา โดง กอย บรีม อัน ตึอน.’ 16 ปาย ตี อาเซซาบาจา ตึอน มืร ตัห ซัม อูน เจณ ร็อง โฮว เฌาพรา ตี. เย บอ โบง ฮาว ฆาน ตี กอ ฌัม อาตึร นี. เย ยี หณัม ฮอต โบง.” เฆ ต็อห ปาย ตี.

17 ดอ ตี นี, เซ แม คูนดีคัม ตาง อึง, หมาณ แตห แม วี เหรต แปะ แปะ แฮะ แดม อูน แคง มืง บาแบ. แตห แม นับ ซีคยา โยว แฮะ หมาน อาว หมาน ปี ต็อห เฆ. โยว คูนดีคัม ตาง อาซายรัด แฮะ ดึอม ดัว อามีง, แตห เฆ วี ซัม วี อึณปราย โฮว เฌาพรา แคง มืง เยรูซาแลม นี. เซ ฮี ฮอต ปาย ตี แคะ ปี ซี โบง แม คูนดีคัม ตาง, แตห แม วี กาลาง ตัห ดี เย.