1 อึณ ยี มึห รันซู เฆ ดูอี ครึร อายูดา บอ เฆ ดูอี ครึร อาเบนยาม. ดอ วี ยึร เฆ ลอง ดูอี อี แฮะ วี ตัห แคง มืง บาแบ, เฆ แฮะ วี จูห ดี ซัม โฮว เฌาพรา, 2 เฆ มืร ตัห กาลาง ดี อาเฌรูบาเบน บอ ดี เฆ ดูอี อี มูห ฆีณ อึณโฮม เฆ ตึอน. เฆ ต็อห, “แตห บอ เย ปึอน ดี จอย โบง รึม โดบ เบ. เย มืร กรึบ เฌาพรา ปี กรึบ เบ ตี. เย มืร แฮะ ดึอม หลู ดี อัน เฌา ซีณ ดอ มูห โจว บาน คูนดีคัม ตาง อี จืร อาซาฮาโดน อี อึบ มืง อาซูรา อี แฮะ แยต ตัห เอ ดี นี.” เฆ แฮะ ฮอต ต็อห ปาย ตี 3 อาเฌรูบาเบน บอ อายอซู บอ เฆ อี ซี ฆีด ซี กอย, อี มูห ฆีณ อึณโฮม ดูอี อีซาเรลัะ, เฆ วี ต็อห, “เบ ตู ปึอน ลึบ โบง รึม โดบ เย โฮว เฌาพรา ตี. มี เย อี ดี โบง อาดา เฌาพรา ปี กรึบ เย ดูอี อีซาเรลัะ. คูนดีคัม ตาง อาซายรัด อี อึบ มืง บีราซี ตึอน, อัน มืร แฮะ ดัว อามีง ปาย ตี.” 4 ปาย ตี เฆ ดูอี อี กอย แคง เรา แคง มืง ตี, เฆ มืร โบง แตห ดูอี อาโมยว อายูดา กลึร บอ โยว, แกวะ แตห เฆ โบง ฮาว ฆาน เฆ ตี. 5 เฆ บอ ฌาง ดูอี อี นับ ดี ดัว อากยาม อางยาน, แตห เฆ แคร ปี คราม ดูอี อายูดา ดี โบง. เฆ โบง ปาย ตี ดอ มูห โจว บาน คูนดีคัม อาซายรัด บอ โจว, อึณ กอ วี ฌัม บอ โจว บาน คูนดีคัม อาตารีด วี อึบ มืง บีราซี ตึอน.

6 ดอ กาจูห คูนดีคัม อาเซฮารู ดี อึบ มืง บีราซี, เฆ อี มูห รันซู ดูอี อีซาเรลัะ, เฆ บอ แดม แปะ อี พยาก เฆ ดูอี อายูดา บอ เฆ ดูอี อี กอย แคง มืง เยรูซาแลม.

7 ดอ มูห โจว บาน คูนดีคัม ตาง อี จืร อาตาเจรีด อี อึบ มืง บีราซี ตึอน มืร, อาบีซาลัม บอ อามีซาเรดัด บอ อาตาบีลา บอ ฆึก อัน เฆ บอ แดม แปะ วี ตึย ฮาว ดี คูนดีคัม ตาง อี จืร อาตาเจรีด. เฆ แฮะ แดม โดว อารามี บอ โฆรห อารามี.

8 อี มูห ดา โบว ตาง อี จืร อาเรฮูม บอ ดา จาเร ตาง อี จืร อาซีมาเซ, ฆาย แฮะ แดม แปะ ลอง มืง เยรูซาแลม, วี ตึย ดี คูนดีคัม ตาง อี จืร อาตาเจรีด. ปี แดม เฆ อึณ ปาย นี.

9 เฆ อี แดม แปะ ตี, อึณ บอ มูห ดา โบว ตาง อาเรฮูม บอ ดา จาเร ตาง อี จืร อาซีมาเซ บอ ฆึก อัน เฆ, ดา ตาง อี ซูงพยาด ดารา บอ เฆ อามู อามาด อี อึบ ดูอี อี ตัห แคง มืง เบเรด, มืง บาแบ บอ เฆ ดูอี เอลาม อี กอย แคง มืง ซูซาน. 10 อึณ มูห บอ เฆ ดูอี อาโมยว เฮา แปะ แฮะ ตึย ดา กาณา ตาง อี จืร อาซานาบ, แตห เฆ ฮาว กอย แคง มืง ซามารี บอ แคง มืง อี กอย บลาก นา เฆต ซีแง อึม แบลง อูพาราด ดอน โปละ. เฆ บอกาเฆลียด แฮะ ลาย โพรม ดี แดม แปะ ตี.

11 แปะ พืน ปี แดม ตึย เฆ ดี คูนดีคัม ตาง อี จืร อาตาเจรีด ตึอน, เฆ แฮะ วี ทูด เลห. อึณ บอ ต็อห, “เย อี มูห ดูอี อี กอย แคง มืง บลาก นา เฆต ซีแง อึม แบลง อูพาราด, เย อี มูห แดเจณ แม คูนดีคัม ตาง, เย แฮะ แดม แปะ นี ดี แม คูนดีคัม ตาง อี จืร อาตาเจรีด.

12 เย ซี แตห แม คูนดีคัม ตาง นับ, เฆ ดูอี อายูดา อี แฮะ เลห แคง มืง แม คูนดีคัม วี ตัห กอย แคง มืง เยรูซาแลม เฆ แฮะ วี จูห ดี วี ซัม มืง อี ฮาย, อี มูห มืง อี ตู หมึอม, มืง อี นับ ดี กาบัห เซเซ. เฆ แฮะ วี กาจูห ดี โฆว แรง มืง, แฮะ วี อึณปราย ดัง อัน.

13 แม คูนดีคัม, เย ซี แตห แม นับ, เซ เฆ ฮี ฮอต วี โฆว วี อึณปราย มืง บอ แรง มืง ตี, เฆ มืร อาว ฮู ฮับ คอน อึณเตณ, คอน กาจึห กาย็อง บอ รึอน จึง. รึอน ปี ดี โลว ปึอน แม คูนดีคัม, อึณ ดี โยม โลง ดอน โมยว. 14 เย ยี มูห ดูอี ปี ยอด แมน แม คูนดีคัม. ปาย ตี เย มืร ตู ซี แตห อาพูง ดังโคว แม คูนดีคัม โยม โลง. โคว, เย วี ตึย แปะ นี, แตห แม นับ ลอง อัน ตี. 15 เซ แม วี เหรต ดี ยอด แคง แปะ ปี อูน คูนดีคัม กาดัง อาต, แม ดี บอ ยึร ปี แดม แคง แปะ ตี ซีณ อาต นี. มืง ตี, อึณ บอ มูห มืง อี ออน ดี กาบัห เซเซ. อึณ แฮะ ดึอม แบน ดูก ดี คูนดีคัม กาดัง อาต บอ ดี มาน มืง เฆ. ดูอี แคง มืง ตี, เฆ แฮะ วี กาแคณ ดี เฆ ดา กาณา อี อึบ เฆ ซีณ โจว ดอ มึอน. โกบ อึณ ปาย ตี มืง ตี อึณ กอ กาดูห ดี กาโฆห, กาดูห ดี ปยาต แวน. 16 เย กาลาง แตห แม คูนดีคัม ตาง นับ, เซ มืง ตี ฮี ฮอต วี อึณปราย กามาย, ฮี ฮอต วี โฆว บอ แรง มืง, แม คูนดีคัม ตาง มืร อาว ฮู มึห มืง ปี ดี แป แม ดี อึบ บลาก นา เฆต ซีแง อึม แบลง อูพาราด นี.”

17 ปัน ตี คูนดีคัม มืร วี แดม แปะ ตึย ฮาว ดี เฆ. อัน ต็อห, “โอว มืร มึห แปะ ตึย ดี แม ดา โบว ตาง อี จืร อาเรฮูม บอ ดา จาเร ตาง อี จืร อาซีมาเซ บอ ดี เฆ ฆึก แม บอ ดี เฆ อี เฮา อี กอย บลาก นา เฆต ซีแง อึม แบลง อูพาราด, แตห เบ ฆัด เยน ฆยามซา ดอน อี.

18 แปะ ปี แดม ตึย เบ ตึอน แฮะ ฮอต ตีห, แฮะ ฮอต บยาน ซีเพา อัน, แตห โอว นับ. 19 โอว แฮะ ฮอต จัร แตห เฆ ยอด ลอง มืง เยรูซาแลม ตี. แฮะ หมาน, แฮะ ฮอต นับ, อู ซีณ ดอ มึอน, เฆ ดูอี อี กอย แคง มืง เยรูซาแลม, เฆ ออน ดี กาแคณ ดี เฆ ดา กาณา อี อึบ เฆ. เฆ ออน ดี กาบัห เซเซ, บอ วี แตห อึณ ดูก ดี คูนดีคัม แคง มืง ตี. 20 อึณ แฮะ ดึอม มึห คูนดีคัม แบน กาดัง แบน กาดัง อี มึห ปวน ตาง อี กอย แคง มืง ตี. เฆ แฮะ ดึอม อึบ โตต มาน มืง อี กอย บลาก นา เฆต ซีแง อึม แบลง อูพาราด ตี บอกาเฆลียด. เฆ แฮะ ดึอม แฆบ รึอน จึง บอ คอน กาจึห กาย็อง บอ คอน อึณเตณ. 21 เซ อึณ ปาย ตี แตห เบ วี ดัว อามีง ดี ดูอี แคง มืง ตี, แกวะ แตห เฆ วี ซัม วี อึณปราย ฮาว มืง ตี ปอ อึณ ปัว, แตห อึณ กอ ฌัม ปัน ดี วี ดัว โอว อามีง อี ควาง เฆ โบง. 22 แตห เบ ซาดีก ดี โบง ซีคยา ปี จัร โอว ตี, แกวะ แตห อี ตู หมึอม ตี แกร ดี ตาง, แกวะ แตห อาฆยึร ดี มาน มืง เอ ลึร ชึม.”

23 วาย อัน ตี เฆ มืร ตีห แปะ ปี ตึย คูนดีคัม ตาง อาตาเจรีด. บอ ดา โบว ตาง อาเรฮูม, ดา จาเร ตาง อาซีมาเซ บอ เฆ ฆึก อัน, เฆ บอกาเฆลียด แฮะ โทม ลอง อัน ตี, เฆ มืร ยีต อู เฌณ, ปีครัน เฆ, แตห เฆ ปึอน ดี ฮาว แคร ดูอี อายูดา, แกวะ แตห เฆ ปึอน ดี วี อึณปราย วี แด ฮาว มืง ตี.

24 ปาย ตี โฮว เฌาพรา ตึอน มืร อาว ฮู ปึอน ดี ซัม. เฆ บอ โลว เบลห อูน ปาย ตี แตห อึณ กอ วี ฌัม โจว คูนดีคัม อาตารีด ดอ อึบ อัน มืง บีราซี อาดา อา ซีนัม.