1 วาย อัน ตี เฆ ดูอี อีซาเรลัะ มืร แฮะ กอย ซีคยา แคง มาน มืง เฆ ตี. อึณ บอ ฌัม มาเฆียน อึณบู, แคะ กอย เฆ บอกาเฆลียด เฆ แฮะ แบน อู น็อห อู พึอม บอ วี ตัห กาฌูะ ดี มืง เยรูซาแลม. 2 ดอ อัน ตี อายอซู อี มูห ฆอน อายอฌาดัก บอ เฆ อี มูห ดา อี หลู ดี เฌาพรา อี โบง รึม ฆาน โดบ อัน บอ อาเฌรูบาเบน อี มูห ฆอน อาเซทีเอน บอ เฆ บีนอง อัน บอ กาโพรม ดี โบง กาโช็ง หลู. อึณ มูห กาโช็ง หลู เฆ ดี เฌาพรา ปี กรึบ เฆ ดูอี อีซาเรลัะ. เฆ โบง กาโช็ง ตี, แตห เฆ ปึอน ดี หลู ปี ดี หลู อี โดะ ดี เงา แดง กาโช็ง ตี, แตห อึณ บอ โดบ แคะ ปี แดม อูน อาโมวแซ อี มูห ดูอี ปี อึบ เฌาพรา ตึอน. 3 เฆ ปี บอ โยว ดูอี เฮา อี กอย แคง มืง ตี ดอน นา ดอน โปละ มืร, เฆ ยี วี ซัม กาโช็ง หลู แดง โดง บรีม ตึอน. เฆ บอ ดึห ปี ดี หลู อี โดะ ดี เงา, วี หลู ดี เฌาพรา เซเซ ดอน หมึร ดอน หณา. 4 เฆ บอ โบง บลอย โลว กอย แคง ทึบ, แตห อึณ บอ โดบ แปะ แฮะ แดม อูน แคง บับ เฌาพรา. เฆ บอ โบง บลอย ตี บอ หลู ปี ดี โลว เฆ หลู ดอน ซีแง ดอน ซีแง. 5 วาย อัน ตี เฆ บอ วี หลู โดว ปี โลว หลู อี โดะ ดี เงา เซเซ. เฆ บอ หลู บอ ปี โลว หลู ดอ ฌัม ซีแง มาเฆียน กามาย. เฆ บอ โบง บอ บลอย ดอน โมยว ปี ดัม อูน เฌาพรา ดี เฆ. เฆ หลู บอ ปี ซี หลู ดูอี ราง อาเซ ราง อัน. เฆ บอ ดึห ตัห โตต ฌึร ตี, หลู ดี เฌาพรา. 6 เฆ ปี บอ หณัม ปึอน ดี ซัม เจณ ร็อง โฮว เฌาพรา มืร, เฆ ยี วี จูห ดี หลู ปี ดี หลู อี โดะ ดี เงา. ดอ ฌัม มาเฆียน อึณบู ซีแง เหลห, เฆ จูห ดี หลู ปาย ตี.

7 เฆ บอ ดึห รึอน, ดัว ดี เฆ ดูอี อี นับ ดี โฆว มาอูด บอ ดี เฆ อี มูห ลักซามา. เฆ ดึห บอ ปี ดี โฮม ปี ดี เดียง บอ นามัน, ดัว ดี เฆ ดูอี แคง มืง ซีโดน ฆาย มืง ทูโรว, แตห เฆ ดึห เฮ อารีด. เฆ บอ โลว โฮะ แดง นอน เลบานูน, วี ดึห โลง เฮ ตี, แตห อึณ แหล โดบ อึม นัมมูกซารา, วี ฌัม บาง อึม ดี มืง โยวพา. คูนดีคัม อาซายรัด อี อึบ มืง บีราซี ตึอน, อัน แฮะ ฮอต ควาง เฆ โบง ปาย ตี.

8 วาย แฮะ ฮอต ตัห ฌัม เฆ โดง กอย โฮว เฌาพรา อี กอย แคง มืง เยรูซาแลม ตึอน, อึณ บอ วี ฌัม ปัน นา ดี ตัห ดอ มูห มาเฆียน ฮาอา. ดอ อัน ตี อาเฌรูบาเบน อี มูห ฆอน อาเซทีเอน บอ อายอซู อี มูห ฆอน อายอฌาดัก บอ เฆ บีนอง อี มูห ดา อี หลู ดี เฌาพรา บอ เฆ ดูอี ครึร อาเลวี, เฆ ดูอี อี แฮะ เลห แคง มืง บาแบ, อี แฮะ วี ตัห ฌัม แคง มืง เยรูซาแลม ตึอน, เฆ บอกาเฆลียด จูห ดี วี ซัม โฮว เฌาพรา. เฆ บอ ดาง แตห ดูอี ครึร อาเลวี แบน ดูอี อี อึบ อี ยอด ฆาน ปี ดี ปาย ดี วี ซัม โฮว เฌาพรา ตี. ดอน อี อาซาก อี แฮะ โนะ อา ฆึร ซีนัม โฮะ นา แดง แฮะ แบน ดูอี อี แยต ฆาน ตี. 9 ดอ อัน ตี อายอซู เฆ ฆอน อีมาย อัน บอ เฆ บีนอง วอแว อัน บอ อากาตาเมลา บอ ฆอน อีมาย อัน, เฆ อี มูห หลูกหลาน อาโฮวตอวา บอ เฆ ฆอน อาเฮนาตัะ บอ ฆอน เฆ บอ บีนอง วอแว เฆ อี มูห ดูอี ครึร อาเลวี ตึอน, ดูอี เฆ ตี บอ แบน ดูอี อี อึบ อี ยอด เฆ ดูอี อี ซัม โฮว เฌาพรา ตึอน.

10 ดูอี อี โบง โฮว เฌาพรา เฆ ตี ดอ แฮะ ฮอต เฆ ซัม เจณ ร็อง, เฆ ดา อี หลู ดี เฌาพรา มืร ชึบ ครึง ปี ตา ดา อี หลู ดี เฌาพรา, เฆ โฆ็ง บอ เวา นึง แป. เฆ ดูอี แคง ครึร อาเลวี อี มูห หลูกหลาน อาซาบ, เฆ บอ โฆ็ง แชณ, จ็อง โดง โลว จ็อง เฆ ราง อาเซ ราง อัน. ปาย ตี เฆ กาโพรม ดี อืบ มยูก เฌาพรา, แตห อึณ ปี แปะ แฮะ ดัม อูน คูนดีคัม อาดาวีด อี มูห คูนดีคัม เฆ ดูอี อีซาเรลัะ.

11 เฆ มืร กาโพรม ดี อืบ เฌาพรา บอ ดาง ฆูง เฆฌู ดี เฌาพรา, ต็อห บอ อึณเจณ, ลาย เวียะ แบน เฌณ แบน เฌณ. เฆ บอ ต็อห, “เฌาพรา แฮะ บอด กาเซา. น็อห ร็อก กาเว อัน เฌา ดี ดูอี อีซาเรลัะ มืร, อึณ บอ กอย เซเซ.” ปาย ตี แคะ กอย ดูอี บอกาเฆลียด, เฆ บอ กาโพรม ดี อืบ เฌาพรา, ต็อห โหมว ตาง ตาง โกบ แฮะ ปึอน เฆ ดี ซัม เจณ ร็อง โฮว เฌาพรา ตี. 12 มาแล, อึณ มูห เฆ ดา อี หลู ดี เฌาพรา บอ เฆ ดูอี อาโมยว อาเลวี อี มูห ดูอี กัด ดูอี แฆ, เฆ อี มูห ดัง เรา อี แฮะ ดึอม ยึร ปี ปาย โฮว เฌาพรา อี แฮะ กอย อาต นี. ดอ เบลห โลง เฆ ดูอี อี ซัม โฮว เฌาพรา ดี เจณ ร็อง ตี, เฆ บอ ยาม ตาง ดี อาต ดูอี เฆ ตี. เฆ ดูอี กืน อี กอย ดี ตี ยี กาโพรม ดี โคย, ดัด ซีนัน ซีนืง. 13 อี เฮา กอ ฮู วี นับ ปี บอ มูห, โยว อึณ บอ มูห เฆ ดัด เรียง โกบ แฮะ โบยว ดาคึย เฆ, โยว อึณ บอ มูห เฆ ดัด เรียง โกบ ยาม ตาง เฆ. โฆรห ปี ดัด เรียง เฆ ตี, อึณ บอ ลึห ฮาว โต็ง กาเซา.