1 วาย ตี น็อห รู คูนดีคัม อาฮาเซรู แฮะ วี หราย. อัน บอ วี นัมโหลห นาง วาซาดี, วี โหลห ลอง แปะ แฮะ โบง แปะ แฮะ ซูงพยาด อัน. 2 เฆ แดเจณ อัน อี กอย รึม โดบ อัน เซเซ, เฆ วี ต็อห ดี อัน, “เย หมาณ, แตห แม ควาง เย เหรต ดีบยา ชีด คอ อู วี อาดา แม คูนดีคัม. 3 แตห แม กาลาง บอ ดี เฆ ดา ตาง อี กอย แคง มืง ปี อึบ แม ดอน โปละ, แตห เฆ ตึย แคะ กอย ดีบยา อี ชีด ดอน อี, แตห เฆ ตัห กาฌูะ โดง กอย เฆ ฌึง นาง ดี โฮว แม แคง มืง ซูซาน นี. แตห เฆ อาบ นาง ตี ดี อาเฮแก อี มูห ดูอี ซัห อี อึบ ฌึง นาง ตี. แตห เฆ พ็อห บอ ซีนัม แบน โมยว แบน โมยว, แตห เฆ ชีด. 4 แตห แม คูนดีคัม ร็อห วี เหมา อี แฮะ ล็อะ น็อห แม, แตห แม แตห อัน วี ปลูะ นาง ฮอคัม วาซาดี ตึอน.” โฆรห เฆ ตี บอ ล็อะ น็อห คูนดีคัม. อัน บอ โบง ปาย ตี อู เฌณ.

5 อึณ ยี มึห ดูอี อายูดา อู วี, อัน จืร อาโมวตาเก. อัน มูห ฆอน อายาอีรา. อายาอีรา วี มูห ฆอน อาซีมี. อาซีมี วี มูห ฆอน อากีซา อี มูห ดูอี ครึร อาเบนยาม. อาโมวตาเก ตี บอ กอย โดง กอย โฮว ปี เครียง ดา ซึก แคง มืง ซูซาน ตึอน. 6 อัน แฮะ ตัห แคง มืง เยรูซาแลม ดอ เหมต ฮาว เฆ พึง คูนดีคัม อาเยคอนี อี อึบ มืง ยูดา ตึอน. ดอ อัน ตี คูนดีคัม อาเนบูคัดเนจา อี อึบ มืง บาแบ แฮะ เหมต เฆ บอกาเฆลียด, ตึย ฮาว เฆ ฌัม แคง มืง ซูซาน ตี. 7 อาโมวตาเก ตี มึห หลาน อู วี อี มูห ฆอน ฆูณ แตะ อัน. อัน จืร นาง เอซาทา. แคง โฆรห แฮแบร อัน จืร นาง ฮักตาซัะ. นาง เอซาทา ตี แฮะ ชีด กาเซา. ดอ แฮะ ยัม ฆูณ มา อัน, อาโมวตาเก แฮะ วี ดึห ดี เฮียง อัน, แตห อัน ปี ฆอน อาราง อาโมวตาเก.

8 ดอ กาลาง เฆ โฆรห คูนดีคัม ตึอน แตห ดอน อี นับ, อึณ บอ มึห ดีบยา กืน ปี ตึย เฆ ดี โฮว คูนดีคัม แคง มืง ซูซาน. เฆ บอ ดึห ฮาว บอ นาง เอซาทา, แตห อัน ฌัม โดง กอย โฮว ตี. เฆ บอ อาบ ดัว นาง เอซาทา ดี ดา อี อึบ ฌึง นาง อี จืร อาเฮแก. 9 นาง เอซาทา ตึอน บอ ล็อะ น็อห อาเฮแก อู เฌณ. อาเฮแก บอ ดึห ซีนัม แบน โมยว แบน โมยว อี แตห นาง เอซาทา ชีด. อาเฮแก บอ ดัว ปี ดี ชึบ ปี ดี ตา แบน โมยว แบน โมยว ดี อัน. อัน บอ จัร ดีบยา ปอ บู วี อี กอย แคง โฮว, แตห เฆ แบน อี ลึมลา นาง เอซาทา, แตห เฆ จึอม ปี ดี โฮม อาดา อัน. อัน บอ แตห นาง เอซาทา กอย โดง หมึอม หลึอม อี เฮา แคง ฌึง นาง คูนดีคัม.

10 นาง เอซาทา ยี ตู กาลาง อี มูห บีนอง วอแว อัน. โคว, อาโมวตาเก แฮะ ดัม อูน อัน, อาว โลว กาลาง. 11 ดอน ซีแง อาโมวตาเก มืร ตัห นา เรต แวง ฌึง นาง ตึอน, คยอง ดี ยอด โยว นาง เอซาทา แฮะ ดาคึย อาว ดาคึย, โยว เฆ โบง มาเซ ดี อัน.

12 นาง เฆ ตี, อาต ปึอน เฆ ดี ฮาว โดง กอย คูนดีคัม, เฆ โลว ปีชีด โดว เฆ อาดา ฆึร ดี อา มาเฆียน. เฆ โลว พ็อห นามัน เดา มูรา อาดา เดา มาเฆียน. แฮะ ฮอต, เฆ โลว วี พ็อห นามัน อูห หงูน บอ ซีนัม แบน โมยว แบน โมยว อาดา เดา มาเฆียน. แฮะ ฮอต โนะ คราว ตี, เฆ อู วี อู วี ปึอน ฮาว โดง กอย คูนดีคัม. 13 ดอ ฮาว ลึบ นาง อู วี โดง กอย คูนดีคัม, อัน ปึอน โตต ดอน โมยว แคะ ปี ซี โลว อัน, แตห อัน ปึอน ดี ดึห เลห แคง ฌึง นาง, วี ฮาว ดี คูนดีคัม. 14 อี เหมา บอ ฮาว โดง กอย คูนดีคัม, อัน โลว ฮาว บา ดี อับ, วี ตัห ซีณวัห. อัน ยี ตู ปึอน วี เวณ แคง โดง กอย บรีม อัน. อัน โลว วี ฮาว กอย โดง กอย อีบึณ คูนดีคัม อี มูห อีบึณ เตียะ, แตห ดูอี ซัห อี จืร อาซากาจัะ วี อึบ อัน. เซ คูนดีคัม ดี อึง วี เหมา, อัน ดี วี แดะ วี ตี. เซ คูนดีคัม ยี ตู แดะ, อัน ตู ปึอน ฮาว.

15 อึณ ยี มูห นาง เอซาทา อี มูห ฆอน ดึห อาโมวตาเก, อี มูห ฆอน ฆูณ แตะ อาโมวตาเก อี จืร อาพีเฮลา. ดอ ฮาว อัน โดง กอย คูนดีคัม, อัน ตู หมาณ มาเซ แดง ปี กาลาง อาเฮแก อี มูห ดา อี อึบ เฆ ตึอน. นาง เอซาทา บอ ล็อะ น็อห ดอน อี อี ยึร อัน. 16 ดอ อึบ คูนดีคัม อาฮาเซรู มืง อัน อาดา บู ซีนัม, ดอ มูห มาเฆียน ฆึร อี จืร มาเฆียน เดเบด, เฆ ตึย นาง เอซาทา ฮาว โดง กอย คูนดีคัม.

17 คูนดีคัม บอ อึง นาง เอซาทา หลึอม เฆ อีบึณ อัน ดอน อี. อัน บอ ร็อก นาง เอซาทา หลึอม เฆ ดีบยา ดอน อี. โคว, อัน บอ ชึบ มังฆึม ดี ฆีณ นาง เอซาทา, แตห อัน แบน นาง ฮอคัม, วี ปลูะ นาง วาซาดี ตึอน.

18 อัน บอ วี โบง บลอย ตาง, แตห อึณ แบน บลอย นาง เอซาทา. อัน บอ แดะ ดา กาณา เฆ อามู อามาด อัน. อัน บอ แตห ดอน อี แคง มืง ดอน มืง ดีเหลา ซีแง ตี. อัน บอ กาซาง บอ คอซอง อี กาดาน ดี มูห อัน คูนดีคัม.

19 เฆ บอ วี แดะ กาฌูะ ฆอน ดีบยา ตึอน ปอ อู เฌณ. ดอ อัน ตี อาโมวตาเก บอ วี ตัห กอย บาง มาโลห โฮว คูนดีคัม. 20 นาง เอซาทา หณัม ดึอม แตห อาเซ นับ บีนอง วอแว อัน. โคว, อาโมวตาเก แฮะ ดึอม ดัม อูน อัน. อัน มืร โทม ซีคยา โฆรห อาโมวตาเก, แตห อึณ กอ ปี ดอ เฮียง อาโมวตาเก ดี อัน.

21 ดอ ซี ตูต อาโมวตาเก บาง มาโลห โฮว คูนดีคัม, อึณ บอ มึห ฆาย อา วี, ฆาย จืร อาบีกาซัน ฆาย อาเดรีด. ฆาย มูห ดูอี ซัห อี แฮะ แบน แดเจณ คูนดีคัม อี บัร มาโลห. ฆาย ตี บอ รู ดี คูนดีคัม อาฮาเซรู ตึอน, บอ คราม ดี ง็อห ยัม อัน.

22 อาโมวตาเก แฮะ นับ ลอง อัน ตี, อัน บอ วี กาลาง แตห บอ นาง เอซาทา นับ. นาง เอซาทา บอ วี แตห บอ คูนดีคัม นับ ลอง อัน ตี, แตห อัน บอ นับ, อึณ มูห อาโมวตาเก อี แฮะ กาลาง.

23 เฆ บอ ดีหมอด บอ แฌด แตห เฆ นับ ซีคยา ลอง อัน ตี. เฆ แฮะ ฮอต นับ, แฮะ หมาน อาคาคัร, เฆ บอ ปัก ฮอย แมง ฆาย ดี ร็อง แตห ฆาย ยัม. ลอง อัน ตี เฆ บอ แดม อูน แคง บับ ลอง บืน คูนดีคัม, แตห บอ คูนดีคัม ยึร.