1 โอว ดี ดัด ตาง, ซาคึร ดี เฌาพรา แตห อัน เฌา บอ โทม โฆรห ปี ซาคึร ปี หมาณ โอว.

2 ดอ ฌัม โอว ดูก ตาง, โอว แฮะ ซาคึร ดี เฌาพรา. โอว บอ กรึบ ซาคึร ดี อัน เฌา ดอง คืน, ตู แตห โอว นูน. โอว ยี ตู ยึร อาเซ อี เหลา น็อห โอว.

3 ดอ กาดัวะ กาพา โอว อัน เฌา, อึณ บอ แบน ดีอีห น็อห. ดอ เฌณฌา โอว แบน โมยว แบน โมยว น็อห โอว บอ ดีแตด.

4 อัน เฌา ตู แตห โอว ปึอน ดี อีด ดอง คืน. อึณ บอ ดูก หณาบ ดี น็อห โอว, อาว ฮู นับ ดี กาลาง.

5 โอว บอ เฌณฌา ซีแง อี แฮะ ปวน ตัห อาต นี, บอ ซีนัม อี แฮะ ปวน ตัห ซีณ ดอ มึอน.

6 โอว บอ โหลห โหมว ปี ดึอม ต็อห โอว แบน โมยว แบน โมยว ดอง คืน. แคง น็อห โอว, โอว วี กาพา วี ดีหมอด ต็อห,

7 “โยว มืร เฌาพรา ดี แวน กาดัด โอว? โยว อัน เฌา ปี ฮู เฆฌู โอว ดอ เหมา?

8 โยว มืร น็อห ร็อก เฌาพรา แฮะ ฮอต โตต? โฆรห ปี กาแซณ อัน เฌา, โยว อัน แฮะ แวน โตต?

9 โยว มืร เฌาพรา แฮะ ฮอต ปีว น็อห กาเว อัน ดี อี? โยว มืร น็อห ร็อก กาเว เฌาพรา แฮะ วี แบน น็อห รู น็อห จาว นี?”

10 ดอ อัน ตี โอว บอ วี ทาง, “เฌาพรา อี อึบ โตต ดอน โมยว, อัน อาว ฮู จอย เย ปี คา อาต. อาตี แตห น็อห โอว กลึร หลึอม ดูก โมยว เฮา.”

11 โอว ยี วี ต็อห, โอว ดี วี โหลห แปะ แฮะ โบง เฌาพรา. โอว ดี วี โหลห อี หมึอม อาม กาเซา ดอน โมยว แปะ แฮะ โบง อัน เฌา ดอ มึอน.

12 โอว ดี วี กาดัวะ กาพา แปะ แฮะ โบง เฌาพรา ดอน โมยว, น็อห โอว บอ วี เฌณฌา แปะ แฮะ โบง เฌาพรา ตี.

13 อึย แม เฌาพรา, ปี โบง แม เฌา ดอน โมยว, อึณ แฮะ มูห โตต อี ซีงา บอด. อาว ฮู มึห เฌาพรา ปอ อู กาดัง อี ซี ดี บอด หลึอม แม เฌาพรา นี.

14 แม เฌาพรา บอ นับ ดี โบง แบน โมยว แบน โมยว อี หมึอม อาม กาเซา. แม เฌา บอ แฮะ โบง บยัะ ปี ปาย ปวน แม, แตห เฆ ดูอี ยึร.

15 แม เฌา แฮะ ดึห ปวน แม คยอด ดูอี ปี อึบ แม เฌา, อี มูห หลูกหลาน ครึร อาโกบ ฆาย ครึร อาโยว ตึอน.

16 อึย แม เฌาพรา, บอ อึม นัมมูกซารา นับ ดี โยว แม เฌา. บอ กาดัม อึม อี กอย ลึก กาเซา นับ ดี รัร ดียูห ดีเยณ ดี โยว แม เฌา.

17 อึม อึณอูะ แฮะ โจห แบน ฆลาย. กานัม มืร บอ ฮัม ซีนัน ซีนืง แคง ฆางหราว, ปลัะ อึณเปลต เฆ เบล กาซัห บอ ตัห ดอน โปละ ดอน นา.

18 ฮัม เบล กาซัห แม เฌา บอ ตัห โดบ คูน ลาง. ปลัะ อึณเปลต บอ แตห อึณ บลาง แดง กาดาย นี. กาดาย บอ ดีเยณ บอ รัร ดอน โปละ.

19 แม เฌา บอ ฮาว แดง มา อึม อี แฮะ ซีลอย ซีลอย. แม เฌา บอ กาโลห อึม นัมมูกซารา โดง ลึก กาเซา. ยี ตู ปึอน ยึร ปัน เปลา แม เฌา.

20 แม เฌา แฮะ แยต ดูอี ปี อึบ แม ปี ดา อี เฮียง มาบู แยต มาบู อัน. แม เฌา บอ จัร อาโมวแซ ฆาย อาโรน ตึอน, แตห ฆาย แยต ดูอี ปี อึบ แม เฌา.