1 อึย แม เฌาพรา, โอว หมาณ, แตห โอว ลอด ดี เฆ รันซู โอว, แตห แม ฆ็อง แร โอว ดี เฆ อี ซี กาโฆห ดี โอว.

2 โอว หมาณ, แตห โอว ลอด ดี เฆ ดูอี ฮาย. แตห แม เฌา คยอด เลห โอว ดี เฆ อี ซี ง็อห โอว.

3 แตห แม ยอด, เฆ อี มึห โปลม ตาง, เฆ บอ บัร ดี ง็อห ยัม โอว. เฆ บอ กอย กาฌูะ, บัร ดี กาโฆห ดี โอว. อึย แม เฌาพรา, อาว มูห โกบ หมาบ แปะ แฮะ กาลึบ โอว.

4 โอว ตู มึห ดี ลูต เฆ มาเซ, เฆ ยี ต็อห ดี ตัห กาโฆห โดง กอย โอว. โอว หมาณ, แตห แม เฌา ตัห จอย โอว, แกวะ แตห แม ปีว โอว.

5 แม เฌาพรา, แม มูห เฌาพรา อี ตาง หลึอม โตต, แม เฌา บอ มูห เฌาพรา ปี กรึบ เย ดูอี อีซาเรลัะ. แตห แม เฌา ตัห ดัม หมาบ ดี ดูอี ดอน โมยว. อี มูห เฆ ดูอี มืก, แกวะ กาเว คอ อู วี.

6 เฆ วี ตัห ดอน บา ดี อับ. เฆ บอ กาอืน ฆรัณ หราง เฆ ปี มาโซว. เฆ บอ วีน ดี แล แลบ แคง มืง.

7 โมต เฆ บอ กาลาง อี ตู หมึอม ปี ซีนัม ป็อง ปราง. โฆรห เฆ บอ ปี อาตึม อี ซัด อี. เฆ บอ กาพา แคง น็อห เฆ ต็อห, “อาว มึห อาเซ อี โทม.”

8 มาแล, แม เฌาพรา บอ วี กาณัห เฆ. ตู มาด เฆ ดูอี อาโมยว เฮา ดอน ครึร.

9 แม เฌา บอ แตห โปลม แตห แฮณ ดี โอว. โอว บอ หน็อะ แม เฌา. แม บอ มูห อี แร โอว.

10 แม เฌาพรา อี มูห เฌาพรา ปี กรึบ โอว, แม เฌา บอ ร็อก กาเว โอว บอ แตห โอว ยึร ดอ ชึม รันซู โอว.

11 มาแล, แม เฌา แกวะ แตห เฆ ยัม, แตห เฆ ยี เตา ฮาว ดอน นา ดอน โปละ, แกวะ แตห เฆ ดูอี ปี อึบ โอว ปีว ลอง อัน ตี. แม มูห เฌาพรา อี แร อี ฆ็อง เย. อาพูง ดังโคว แม เฌา บอ นับ ดี โบง แตห เฆ เกห ชึม โตต ดอน นา ดอน โปละ.

12 โกบ โฆรห ดืง ปี ต็อห เฆ, แตห อึณ วี แบน ปาย ตี. โกบ ปีคึก เฆ น็อห เฆ บอ กาลาง โฆรห กาโลว, แตห เฆ วี ฌัม ดูก ตาง กาเซา.

13 แตห แม เฌาพรา เบลห น็อห รู แม ดี เฆ, แตห เฆ ชึม โตต บอกาเฆลียด, แกวะ แตห อึณ ซี มึห คอ อู วี. แตห เฆ ดูอี บอ กาดาย กอ นับ, แม เฌา มูห เฌาพรา อี อึบ ครึร อาโกบ.

14 เฆ วี ตัห ดอน บา ดี อับ, กาอืน ฆรัณ หราง เฆ ปี มาโซว. เฆ วีน ดีแล แลบ แคง มืง.

15 เฆ บอ โลว ฮาว วีว ฮาว เวณ ดอง คืน, เหรต ปี ดี โฮม เฆ. เซ เฆ ยี ตู แพ เฆ ดี บอ โปรห ตาง.

16 อึณ ยี มูห โอว, โอว ดี ต็อห โหมว อี อืบ อาพูง ดังโคว แม เฌา. ซีณวัห เจว, โอว ดี ต็อห โหมว ดาคึย อี อืบ แม เฌา อี ร็อก กาเว โอว. ดอ ฌัม โอว ดูก ตาง, แม แตห โอว กอย โดง กอย แม, แตห อึณ แบน โดง เครียง โอว.

17 แม เฌาพรา บอ มูห อี แตห โปลม เฆ แฮณ ดี โอว. แม เฌา บอ ร็อก กาเว โอว บอ แตห โอว เครียง โดง กอย แม เซเซ.