คาน 60
ปี ซาคึร ดูอี ดอ แฮะ ชึม เฆ ดี รันซู
อาดาวีด แฮะ แดม โหมว นี, แตห อึณ มาโนว ดูอี. อัน แดม โหมว นี ดอ กาโฆห เฆ ดี อาราม นาราฮัม บอ ดี อาราม โฌวบาด. ดอ อัน ตี อายอพัะ แฮะ วี ฮาว ปอ อู เฌณ, วี ง็อห ดูอี เอโดม อาดา อู หมึณ ดี อา แหรณ วี, ดอ กอย เฆ โดบ ดีลัยะ ซัยะ. แตห ดา อี แยต เฆ อี ต็อห โหมว นับ, โลว โดบ แมง อี จืร “โบห.”
1 อึย แม เฌาพรา, แม เฌา แฮะ เบลห แวน เย. แม เฌา แฮะ แตห เย ชึม. แม แฮะ รู ดี เย. เย วี หมาณ, แตห แม วี จอย เย.
2 แม เฌา แฮะ โบง แตห อึณ ปี มาอีม แฮะ เยณ กาเซา บอ กาดาย แฮะ ดัห มาตูห. โคว, โอว วี หมาณ, แตห โดง ดัห ตี วี กาฌูะ ปี บรีม. แกวะ ฮู แตห อัน ดีเยณ.
3 แม เฌา แฮะ โบง แตห อึณ หณาบ กาเซา ดี ดูอี อี กรึบ แม เฌา. แม บอ คาหนาบ เฆ, แตห อึณ ปี เฆ เดียง อึม มางูน อี แตห เฆ ยึต กาเซา กอ เกห.
4 อี มูห เฆ อี โรวเซ แม เฌา, แตห แม เฌา ดัว อาลาม ดี เฆ, แตห เฆ ปึอน ดี เตา ฮาว โดบ, แตห เฆ ลอด บลา อัะ ปี บัณ รันซู.
5 โอว หมาณ, แตห แม เฌา โทม โฆรห ปี ซาคึร เย, บอ วี แตห โปลม ดี เย. แตห แม คยอด เฆ ดูอี ปี ร็อก แม เฌา.
6 เฌาพรา บอ กอย โดง บอด, โดง กรึบ อี ดี อัน. อัน แฮะ ต็อห, “โอว ดี โบง บลอย กาโฆห ออง บอ กาซาง มืง เซเคม. โอว ดี เฆา ดี กาซาง ดีลัยะ อี จืร ซูโคด, ดัว ดี ดูอี อาโมยว โอว.
7 อืง ฆีเลอาด บอ มูห อืง โอว. อืง มานาเซ บอ มูห อืง โอว. อืง เอพารีม บอ ปี มาฆีณ ฮีน โอว. อืง ยูดา บอ ปี เลียห ปี โฆ็ง โอว.
8 อืง โมวอาบ บอ ปี อึณปาน อึม, โดง ดี ตา โอว. อืง เอโดม บอ แบน โดง บูต อูน โอว คูดีณ โอว. โอว ดี บอ ดัด ตาง โกบ แฮะ แป แฮะ ออง โอว รันซู แคง อืง พีลีที.” แคะ ตี เฌาพรา แฮะ กาลาง.
9 อึย แม เฌาพรา, อาเซ ดี แยต ฮาว โอว ฌัม แคง มืง อี มึห แรง ตาง? อาเซ ดี ฮาว รึม โดบ โอว, แตห กอ ฌัม อืง เอโดม?
10 อึณ มูห แม เฌาพรา, โอว โลว แม ฮาว รึม โดบ โอว. แม เฌา แยะ แฮะ แวน เย. แม เฌา อาว ฮู ฮาว โดบ ดา โบว ดา ซึก เย.
11 โอว หมาณ, แตห แม เฌา วี จอย, แตห เย แป รันซู เย. เซ อึณ มูห ปี จอย ดูอี, อัน ตู โคว มาเซ.
12 โคว, อึณ บอ มูห แม เฌาพรา อี โบง แตห เย แป รันซู เย, แตห เฆ ชึม โตต.