1 อึย เบ อี มูห ดา ตาง, เซ เบ กาลาง โฆรห, เบ ทาง แฮะ มูห แฮะ หมาน. เบ อาโมยว ดูอี, เซ เบ ลาย ซูงพยาด อามู เบ, เบ ทาง อึณ แฮะ การัม.

2 อาว มูห ปาย ตี. แคง น็อห เบ, เบ คราม ดี โบง อี ตู หมึอม. ปี โบง เบ, อึณ มูห มี อี มืก อี ฮาย แดง กาดาย นี.

3 เฆ ดูอี มืก, เฆ ดี กาลึบ บอ โจว เฆ. เฆ กาโลว บอ ตู โบง นา หมาน ซีณ ดอ ฆึอด เฆ.

4 เฆ บอ มึห โฆง อี ปี อาย มาฮัณ. เฆ ปี มาฮัณ เฆรา อี กาบีด โหยะ อัน,

5 แกวะ แตห อัน ปึอน ดี โทม ฮัม เวา ปี บูด ดูอี อี ดี อึบ อัน. ดูอี ตี ปี บอ บูด แคะ เหมา, ฮัณ ตู ยึร มาเซ, ตู แตห อี อึบ อัน.

6 อึย แม เฌาพรา, แตห แม เฌา กาบัก แวน หราง เฆ. แตห แม ดึห แวน ปวน เฆ, แตห อึณ ปี ดูอี อี ทอด เลห แปละ มาครังซี.

7 แตห เฆ หราย แหล ปี อึม. แตห แม เฌา กาบัก แวน บอ บลา อัะ ปี บัณ เฆ.

8 แตห เฆ หราย, ปี วัะ ณึก อี กาฮ็อห ดอ ซอดาด. แตห เฆ ปี ฆอน อี แฮะ ลึร แคง วัต มา อัน, อี ตู ดัน ยึร บลาง ซีแง.

9 แตห แม เฌา แวน เฆ อาต โหลห เฆ โดว เฆ. แตห อึณ ปี เดา มาอาต, อี เงียน อี กาฮ็อห, แปะ แฮะ รึต เลห โตต อี.

10 เฌาพรา ดี โบง เวียะ นา ตู หมึอม ดี เฆ. เฆ อี มึห น็อห ซืร ฮี ยึร ลอง อัน ตี, เฆ ดี บอ โคย กาเซา. อึณ ปี เฆ ดี บอ แณต ฮาว แดง หนาม เฆ อี ตู หมึอม ตี.

11 ปัน ตี เฆ อี เฮา ดี บอ ต็อห, “อึร, เฆ ดูอี อี มึห น็อห ซืร น็อห หมาน, เฆ ดี ยึร อาฆยึร อัน. อึณ แฮะ หมาน แฮะ มูห, เฌาพรา ดี ซูงพยาด หมาน ดารา ดี ดูอี แดง กาดาย นี.”