1 อึย แม เฌาพรา, โอว หมาณ, แตห แม เฌา โทม โฆรห ปี ซาคึร โอว. โอว หมาณ, แกวะ แตห แม เฌา แวน โฆรห โอว นี.

2-3 โอว หมาณ, แตห แม เฌา บอ โทม บอ เวียะ โฆรห โอว. เซ เฆ รันซู โอว กาโบยว โอว, อึณ แบน ดูก ดี น็อห โอว, แตห อึณ กาฮัวะ เซเซ. โคว, เฆ แฮะ รู กาเซา ดี โอว บอ พยาก โอว เซเซ.

4 น็อห โอว บอ โยว กาเซา กอ ดีเยณ. อึณ ปี น็อห ดูอี อี แฮะ รีน ดี ยัม แฮะ ตัห ปลึก โอว.

5 น็อห โยว บอ น็อห ดียูห ดีเยณ แฮะ ฮอต ปลึก โตต โอว. โอว มืร ตู แป ดี แร ดี ฆ็อง อี หมึอม โยว อี หมึอม กาฮีว ตี.

6 โอว บอ ต็อห, “อาลึร, เซ โอว นับ ดี มึห เพียง ปี มาโบลย, โอว ดี บอ บึณ ฮาว โดง เยน ดาคึย.

7 แตห โอว ปึอน ดี เตา ฮาว กอย แคง แปร กาฮ็อห, โดง โต็ง กาเซา.

8 แตห โอว ปึอน ดี เตา ครัน ครัน, แตห โอว ฌัม โดง ฆัด เฆียด, แตห อึณ ปี โอว แฮะ ปวน คูน ตาง เฆ ฆลาย ตาง.”

9 อึย แม เฌาพรา, โอว หมาณ, แตห แม เฌา ปยาต เฆ, แตห บอ โฆรห เฆ ลาย กาย็อห ลาย บลืง. โคว, โอว แฮะ ยึร ปี โบง เฆ แคง มืง. เฆ บอ ลาย กาพาะ ลาย กาลูต เซเซ.

10 ดอง คืน ดอง วัน เฆ บอ แลบ แรง มืง, คราม ดี โบง นา ตู หมึอม. บอ เฆ ดูอี แคง มืง โบง มี นา จีจีว นา ตู หมึอม.

11 เฆ ดูอี อี มืก อี ฮาย กาเซา, เฆ บอ กอย แคง มืง. บอ เฆ อี นับ ดี คาหนาบ อี เฮา บอ เฆ อี นับ ดี ปีหล็อก ดี อี, เฆ กอย แคง กาลัห.

12 อึณ ยี มูห โอว. เซ รันซู โอว แนนัะ โอว, โอว ดี บอ คัม ดี ยืน. เซ อี เฮา ดี บอ ฌ็อง โอว, โอว ดี บอ นับ ดี วัห เฆ.

13 มาแล, อึณ วี มูห แม อี มูห ฆึก โอว, อี ดึอม กาล็อะ ดี โอว, อี ลาย ดึอม ซีคยา ดี โอว, แม แฮะ วี โบง แตห น็อห โอว ลึร.

14 อาย แฮะ ดึอม ลาย กามวน, แฮะ ออน ดี ลาย ซังคยาง เซเซ. อาย แฮะ ดึอม กาโดบ ฮาว ดี โฮว เฌาพรา, แฮะ ฮาว รึม โดบ เฆ อี เฮา.

15 โอว หมาณ, แตห เฆ ยัม ปาย พลับ อู เฌณ, แตห เฆ โจห กาโละ งาราย บอ อีม. โคว, บอ แคง น็อห เฆ, บอ แคง กาง เฆ, เฆ บอ แตห อี ตู หมึอม กอย เซเซ.

16 อี มูห โอว, โอว ดี ซาคึร หมาณ แม เฌาพรา, แตห แม เฌา คยอด โอว.

17 บอ มูห บา ดี อับ, ซีณวัห, กาแต ซีแง, โอว ดี บอ กาลาง ดี เฌาพรา เซเซ ลอง อี ดูก ดี น็อห โอว. เฌาพรา ดี บอ ยึร ปี ซาคึร โอว ตี.

18 เฌาพรา ดี บอ คยอด โอว, แตห โอว ลอด ดี เฆ อี กาโฆห ดี โอว. เฆ อี กาบัห ดี โอว, เฆ แฮะ กืน กาเซา.

19 เฌาพรา อี กอย เซเซ อี อึบ โตต ดอน โมยว, อัน อี ดี โทม ปี ซาคึร โอว. อัน ดี วี แตห เฆ กาดูห ดูก. อึณ มูห เฆ อี ตู กาปลูะ น็อห บอ เฆ อี ตู โรวเซ เฌาพรา.

20 ดูอี อี แฮะ ดึอม แบน ฆึก โอว ตึอน, อัน แฮะ วี กาลูต ดี เฆ ฆึก อัน. อัน บอ ปยาต แวน กาดีก ซัดฌา ปี ดึอม คัม อัน.

21 โมต อัน แฮะ งาม. มาแล, น็อห อัน ยี โฆะ แหนน อึณวาต. โฆรห ปี ต็อห อัน บอ อึณจัม. มาแล, อึณ ปี มาปัวะ ลาง แฮะ ฮอต ทอด เลห, บัร ดี แดบ.

22 เบ ดูอี อี กาดูห ดูก, แตห เบ บึง เฌาพรา. อัน เฌา ดี บอ จอย เบ. เฆ อี มึห น็อห ซืร, เฌาพรา ตู แตห เฆ ชึม ดอ เหมา.

23 แม เฌาพรา, แม ยี แวน เฆ อี น็อห มืก, แตห เฆ ฌัม แคง กาเดา บาเรว, แตห เฆ ลึร ชึม โตต. เฆ อี ซี ง็อห อี เฮา บอ เฆ อี กาโลว เซเซ, อาซาก เฆ ตู ดัน กาแต, เฆ ดี บอ ชึม. อี มูห โอว, โอว ดี บึง แม เฌาพรา.