คาน 52
ลอง เฌาพรา ดัม หมาบ ดี ดูอี บอ กาเว เฆ
อาดาวีด แฮะ แดม โหมว นี ดอ ตัห ดูอี มืง เอโดม อี จืร อาโดวกัะ กาลาง ดี อาซอลู ต็อห, “อาดาวีด แฮะ ฮาว ฌัม โดง กอย อาฮีมาเลก”. โหมว นี โดบ แมง มาซาคี. แตห ดา อี แยต เฆ อี ต็อห โหมว ตีห.
1 อึย เบ อี มึห ปวน ตาง, เหมา อึณ ปาย ปี อืบ เบ นา ตู หมึอม ปี โบง เบ ดี ดูอี อี โดบ เฌาพรา. เบ บอ กาลาง อี ตู หมึอม ดอง วัน, ตู โรวเซ เฌาพรา.
2 เบ ดูอี อี ซีมา กาโลว, เบ นับ ดี กาลาง โฆรห อี ปี อาตึม ฆาะ ฆีณ, อี ลัม กาเซา.
3 เบ บอ อึง นา มืก หลึอม อึง เบ นา บอด. เบ บอ กาลาง โฆรห กาโลว กืน หลึอม โฆรห หมาน.
4 อึย เบ อี ซีมา กาโลว, เบ บอ อึง ดี กาลาง โฆรห แตห อึณ เซา ดี น็อห อี.
5 เฌาพรา ยี ดี โบง แตห เบ กาปยาต ลึร เซเซ. อัน เฌา ดี บอ ดึห เลห เบ แคง กาง เบ, แตห เบ วีว เรา โม็ง เบ.
6 เฆ อี มึห น็อห ซืร เฆ ฮี ยึร, เฆ ดี บอ โยว กาเซา บอ วี กาณัห เบ ต็อห,
7 “แตห เบ ยอด เฆ ดูอี อี ตู บึง เฌาพรา, อี น็อห ตาง โกบ กืน โกรวกราม เฆ, อี ต็อห ดี บึง ครัม เฆ.”
8 อี มูห โอว, โอว ปี เฮ นามัน อี อีม เซเซ, อี กอย แคง แวง โฮว เฌาพรา. โอว ดี บึง น็อห ร็อก กาเว เฌาพรา บอ โจว โอว.
9 โอว ดี ดาง ฆูง เฆฌู ดี เฌาพรา บอ โจว โอว โกบ แปะ แฮะ โบง อัน. โอว ดี กาลาง ดี เฆ อี หณึม บึง เฌาพรา ลอง ปี โบง แม เฌา แฮะ บอด แฮะ หมึอม.