1 โอว หมาณ, แตห แม เฌาพรา กาเว โอว, โกบ มึห แม น็อห ร็อก เซเซ. โอว หมาณ, แตห แม เฌา ฆ็อห แวน หมาบ โอว โกบ แฮะ ตาง กาเซา เฆฌู แม.

2 โอว หมาณ, แตห แม เฌา ฆ็อห แวน โตต หมาบ โอว ดอน โมยว, แตห อึณ ปี แม เฌา บาย แวน อี กาดาต, แตห โอว วี ซีงา.

3 โอว แฮะ นับ, โอว แฮะ กาลึบ. โคว, โอว โหลห หมาบ โอว ตี เซเซ.

4 โอว แฮะ ฮอต ลูต แม เฌาพรา. โอว แฮะ ลูต มี แม เฌาพรา. โอว แฮะ โบง อี ฮาย กาเซา ปี ตู อึง แม. โคว อัน ตี เซ แม เฌา ดัม หมาบ ดี โอว, แม โบง อี หมาน อี มูห.

5 ซีณ อาต ฆึอด โอว, โอว แฮะ มึห หมาบ. ซีณ แด มา โอว บาดีก ซันเท ดี โอว, โอว แฮะ ฮอต มึห หมาบ.

6 แม เฌา บอ อึง เซ อี กาลาง โฆรห ซืร, โฆรห หมาน อี เลห แคง น็อห. โคว, โอว หมาณ แม เฌา, แตห แม ดัว อางยาน บอด ดี โอว.

7 โอว หมาณ, แตห แม เฌา บาย แวน หมาบ โอว, แตห อึณ ลูย ซีงา, แตห อึณ ปี แม เฌา แฮะ บาย โดว โอว ตา เดา ฮูโซบ. แตห น็อห โอว ลูย ปี เบรีย.

8 ดอ ตี นี, น็อห โอว แฮะ เซา, ปี กาอาง โอว แฮะ กาลาต. โอว หมาณ, แตห โอว วี ปึอน ดี โทม โฆรห แม อี โบยว ดาคึย. แตห อึณ แตห โอว วี โปลม คัะ ดาคึย.

9 โอว หมาณ, แกวะ แตห แม เฌา โนว หมาบ แปะ แฮะ โบง โอว. แตห อึณ ปี แม บยัด แวน โตต แปะ แฮะ แดม อูน ลอง หมาบ โอว.

10 โอว หมาณ, แตห แม เฌา แตห โอว วี มึห น็อห ลูย, แตห แม เฌา ดัว น็อห กามาย ดี โอว, อี นับ ดี โบง นา หมาน.

11 โอว หมาณ, แกวะ แตห แม ณอน เลห โอว โดง กอย แม. โอว บอ หมาณ, แกวะ แตห น็อห พึอม แม เฌา, เลห แคง น็อห โอว.

12 แตห แม เฌา วี แตห น็อห โอว ดาคึย โกบ แฮะ คยอด แม ดี โอว. แตห โอว มึห น็อห ซี โทม แม เฌา.

13 แม เฌา ฮี จอย โอว ปาย ตี, โอว ดี วี กาลาง แตห เฆ ดูอี ฮาย นับ ลอง ดารา แม, แตห เฆ อี มึห หมาบ วี โหลห หมาบ เฆ บอ หมาณ แตห แม เฌา ฆ็อห แวน.

14 แม เฌา, แม มูห เฌาพรา อี คยอด โอว. โอว หมาณ, แกวะ แตห โอว โลว คัม หมาบ แปะ แฮะ ง็อห ยัม โอว อี เฮา. ปัน ตี โอว ดี วี ต็อห โหมว ลอง โบง แม เฌา นา มูห นา หมาน.

15 อึย แม เฌาพรา, โอว หมาณ, แกวะ แตห โอว กอย หนีม ตู โฆรห. แตห โอว อืบ แม เฌาพรา เซเซ.

16 เซ โอว บอ ซี หลู โมยว อี โดะ ดี เงา, แม เฌา ตู อึง ตู โลว ฌึร ตี.

17 เซ โอว ยี มึห น็อห กลึร โกบ กืน หมาบ โอว, อึณ แบน ปี ดี หลู อี ล็อะ น็อห แม. เซ โอว มึห น็อห เตียม, ตู ปีว หมาบ โอว, แม เฌาพรา ตู แวน โอว.

18 โอว หมาณ, แตห แม เฌา กาเว นอน ฌีโอน, แตห แม เฌา จอย เฆ อี กอย ดี ตี. แตห แม เฌา วี อึณปราย แรง มืง เยรูซาแลม, แตห อึณ วี ซีคยา.

19 แฮะ ฮอต, แม ดี บอ ดาคึย เซ เย หลู ปี หลู อี มูห อี หมาน. บอ ปี หลู อี โดะ ดี เงา, บอ มัก อาโล็ง บอ โดว, เย ดี หลู ดี กาโช็ง หลู ดี แม.