1 อึย แม เฌาพรา, แม เฌา บอ ปี ดาอาง มาว โดง ปึอน โอว กอย ซีคยา. โอว หมาณ, แตห แม เฌา โทม โฆรห ปี ซาคึร โอว. เซ แม เฌา ตู โทม โฆรห ปี ซาคึร โอว, โอว ดี ปี เฆ ดูอี อี แฮะ ฮอต ยัม.

2 ดอ กอย โอว แคง โดง บอด กาเซา บอ กรึบ ซาคึร ดี แม เฌาพรา, โอว หมาณ, แตห แม เฌา โทม โฆรห ปี ซาคึร ปี หมาณ โอว ตี.

3 แกวะ แตห แม เฌา เบลห แวน โอว โดบ เฆ ดูอี ฮาย ดูอี มืก บอ โดบ เฆ ดูอี ตู หมึอม. เฆ บอ นับ ดี กาลาง โฆรห งาม ดี ฆึก เฆ. มาแล, อากยาม อางยาน แคง น็อห เฆ ยี ตู หมึอม.

4 หมาณ, แม เฌา วี โบง เวียะ ดี เฆ แคะ ปี ดึอม โบง เฆ. หมาณ, แม เฌา วี โบง เวียะ แตห อึณ กาดาน หมาบ แคะ ปี ดึอม โบง เฆ ตี. แตห เฆ คัม หมาบ ปี กาอาบ เฆ คัม.

5 เฆ มืร ตู โหลห แปะ แฮะ โบง เฌาพรา, แปะ แฮะ พาน เบลห อัน เฌา. โคว, เฌาพรา ดี ปยาต แตห เฆ ชึม, ตู แตห เฆ วี ยีต ดอ เหมา.

6 โอว อืบ แม เฌาพรา, แม เฌา แฮะ โทม โฆรห ปี ซาคึร ปี หมาณ โอว.

7 แม เฌา แฮะ แตห โปลม แตห แฮณ ดี โอว. อึณ บอ ปี โอว แฮะ มึห มัง ฆ็อง อี แร ซีคยา โอว. น็อห โอว บึง แม เฌา. แม เฌา บอ จอย โอว. โคว, น็อห โอว แฮะ ดาคึย กาเซา, โอว ดี ต็อห โหมว ดาคึย อี อืบ แม เฌาพรา.

8 เฌาพรา บอ แตห แฮณ ดี เฆ ดูอี ปี อึบ อัน. อัน เฌา บอ คยอด วี ปี ร็อห ปี ตึย อัน, แตห อึณ ปี วี ตี แฮะ กอย แคง โดง ซีคยา.

9 หมาณ, แตห แม เฌา คยอด ดูอี ปี อึบ แม. แตห แม เฌา ม็องการา แตห ดี เฆ อี ปี คาฆูน แม. แตห แม เฌา เฮียง เฆ ปี อี เฮียง มาบู. แตห แม เฌา ยอด แมน ลึมลา เฆ เซเซ.