1 แม เฌาพรา, แม แฮะ แตห อึณ บลาง ดี โอว. แม บอ มูห อี คยอด โอว. โอว อาว ฮู มึห ดี โลว โยว อาเซ. แม เฌาพรา มูห อี บัร อาซาก โอว. โคว, อาว ฮู มึห ดี โลว โยว อาเซ.

2 เฆ ดูอี มืก ดูอี ฮาย, เฆ อี มูห รันซู โอว บอ เฆ อี เหรต ดี ง็อห โอว, เฆ ดี วี เกห ชึม โตต.

3 ดับ ดา ซึก ปี บอ แฮะ กอย โรบ โอว, โอว มืร ตู โลว โยว. รันซู โอว ปี บอ กาโฆห กาเซา ดี โอว, น็อห โอว ยี หณึม บึง เฌาพรา.

4 โอว ดี หมาณ ดี แม เฌาพรา อาดา อู โมยว, แตห โอว ปึอน ดี กอย แคง โฮว แม เฌาพรา เซเซ บอ โจว โอว. แตห โอว ยึร แคะ มึห แม เฌา ซาเร, แตห โอว นับ ปี ซี แตห แม เฌา โอว โบง. อึณ มูห ฌึร ตี ปี เหรต โอว.

5 โคว, ดอ กาดูห โอว ดูก, เฌาพรา บอ ดึห เครียง โอว โดง กอย อัน. อึณ ปี, อัน เฌา แฮะ ดึห อูน โอว แคง ทึบ บีก อัน บอ ดึห เบลห โอว แดง ดาอาง มาว อี จา, ตู แตห รันซู โอว ฌัม.

6 ปาย ตี, โอว ดี แป โตต เฆ รันซู โอว อี แฮะ โรบ โอว. โคว, โอว แฮะ โบยว ดาคึย ดี วี หลู ปี ดี หลู แคง โฮว เฌาพรา บอ ต็อห โหมว บอ อืบ อัน เฌา.

7 อึย แม เฌาพรา, โอว หมาณ, แตห แม เฌา ยึร โฆรห ปี ซาคึร โอว. แตห แม เฌา กาเว โอว บอ ดัว ปี หมาณ โอว.

8 โอว บอ นับ แคง น็อห โอว แม เฌาพรา แฮะ ต็อห, “แตห แม กาดึก กาด็อะ ดี โอว.” โอว บอ เวียะ โฆรห แม เฌาพรา แคง น็อห โอว ต็อห, “อึย แม เฌาพรา, โอว ดี กาดึก กาด็อะ ดี แม เฌาพรา.”

9 แม เฌาพรา, แกวะ แวน โอว. แม เฌา ปี บอ แฮะ รู, แกวะ แตห แม เบลห แวน โอว. แม เฌา มูห อี จอย อี คยอด โอว.

10 ฆูณ มา โอว ปี บอ เบลห แวน โอว, แม เฌาพรา ยี ยอด ลึมลา โอว.

11 อึย แม เฌาพรา, โอว หมาณ, แตห แม มาโนว โอว, แตห โอว นับ ดี โบง ปี อึง แม เฌา. แตห อึณ ปี โอว โดบ อึณเตณ อี ฮาว ดาคึย โกบ แฮะ กืน รันซู อี บัร ดี ยอด โอว.

12 โอว หมาณ, แกวะ แตห แม เฌา อาบ โอว ดี รันซู โอว, แกวะ แตห เฆ ปึอน ดี โบง แคะ ปี อึง เฆ ดี โอว. โคว, เฆ บอ กาลาง นา ตู หมาน ลอง โอว. เฆ บอ รีน กาเซา, แตห เฆ ปึอน ดี โบง นา จาว ดี โอว.

13 โอว ยี หณึม โอว ตู ยัม. โอว ดี ยึร ฆูง เฆฌู แม เฌาพรา กาแต เฆ ดูอี อีม.

14 แตห เบ หณึม บึง เฌาพรา. แตห อึณ แบน โปลม แบน แฮณ ดี น็อห เบ, แกวะ แตห เบ มึห น็อห กลึร น็อห ลึร. แตห เบ หณึม บึง เฌาพรา.