1 อึย แม เฌาพรา, โอว ร็อก แม. แม เฌาพรา แฮะ แตห โปลม, แตห แฮณ ดี โอว.

2 แม เฌาพรา ปี ดาอาง มาว โดง ปึอน โอว กอย ซีคยา. แม บอ ปี แรง มืง อี แฮะ แร โอว. แม เฌา แฮะ แตห โอว ลอด. แม เฌา บอ แร บอ ฆ็อง โอว. แม เฌา บอ ปี โดง ปึอน โอว เครียง.

3 ดอน อี แฮะ กาอาบ อืบ แม เฌาพรา. ดอ ซาคึร หมาณ โอว ดี แม เฌา, แม เฌา แฮะ จอย, แตห โอว ลอด ตัะ รันซู โอว.

4 อึณ ปี วัน ตาง แฮะ ฮอต ปัก โอว. อึณ บอ ปี โอว แฮะ กอย แคง อึม อี ฌูห อี แฌว กาเซา, แตห โอว ยัม อาคัร หมาน.

5 อึณ บอ ปี โอว แฮะ ฮอต ยัม, แฮะ ฮอต ฌัม แคง บาเรว.

6 ดอ ฌัม โอว ดูก ตาง กาเซา ตี, โอว บอ ซาคึร, หมาณ เฌาพรา จอย โอว. อัน เฌา อี กอย แคง โฮว บอด, อัน มืร โทม โฆรห โอว. โฆรห ปี ซาคึร โอว ตี บอ ลึห ดี อัน.

7 ดอ อัน ตี กาดาย เฆ นอน บอ รัร บอ ดียูห ดีเยณ ดอน โปละ โกบ แฮะ รู เฌาพรา.

8 อึณ ปี ดัก เงา แฮะ เลห แคง ฆูงมูห อัน. บอ อึณกึร เงา แฮะ กอย แคง โมต อัน, แตห เงา บอ กูห เลห.

9 เฌาพรา บอ แตห เบลณ กายาต, บอ ตัห โลง, แตห อึณอูะ ว็อง กอย ครึม อัน.

10 เฌาพรา บอ ป็อะ อามู อามาด อัน อี จืร เครูบ. อึณ บอ ปี อัน บึณ แดง คูน.

11 อัน เฌา บอ เครียง โดว อัน แคง อับ ว็อง. อัน บอ แตห อึณอูะ อี เฮต กาเซา กอย โรบ อัน.

12 อาโรง เฌาพรา แฮะ บลาง กาเซา. อัน บอ แตห เบรีย เฆ ปลัะ อึณเปลต เลห แคง อึณอูะ อี กาบีด บลาง อัน.

13 เฌาพรา บอ โบง แตห อึณ มึห ฮัม กานัม แคง เบลณ. เฌาพรา อี อึบ โตต ดอน โมยว, อัน บอ แตห อี ยึร โฆรห อัน.

14 อึณ ปี เฌาพรา บอ บัณ บลา อัะ อัน, แตห รันซู อัน กาโชต. อัน บอ เบลห ปลัะ อึณเปลต, แตห เฆ เตา.

15 ดอ อัน ตี เฌาพรา บอ เอห กาลาง โฆรห ตาง อี หมึอม โยว, แตห อึณ ลึห โดง ลึก แคง อึม นัมมูกซารา, แตห อึณ บอ ลึห ดัง กาดาย.

16 เฌาพรา อี กอย นา แดง, อัน บอ โซ็ง โลง แด อัน, ปา โอว. อึณ ปี อัน แฮะ แตห โอว เลห แคง อึม ลึก.

17 อัน เฌา บอ แตห โอว ลอด ตัะ รันซู โอว. อัน แตห โอว เลห ดี ดูอี อี มึห โปลม หลึอม โอว.

18 เฆ แฮะ ต็อห ดี กาโฆห ดอ ดูก หณาบ กาเซา ดี โอว. มาแล, เฌาพรา ยี ฆ็อง ยี แร โอว.

19 เฌาพรา บอ แยต โอว, แตห โอว ฌัม โดง กาว็อห, โดง ซีคยา. โกบ แฮะ ดาคึย น็อห เฌาพรา ดี โอว, อัน บอ จอย โอว.

20 เฌาพรา บอ ดัว อาฆยึร ดี โอว, แตห อึณ กาดาน แคะ มึห โอว น็อห ซืร, น็อห หมาน. อัน เฌา บอ โบง เวียะ ดี โอว แคะ มึห โอว น็อห ซืร น็อห หมาน.

21 โกบ ตู แวน โอว เฌาพรา, โกบ ตู โบง โอว นา มืก นา ฮาย, โกบ แฮะ โดบ ซีคยา โอว เฌาพรา เซเซ, อัน แฮะ วี โบง ฌึร ตี ดี โอว.

22 แคะ ปี ดัม เฌาพรา เย โบง, โอว มืร โหลห เซเซ. โอว มืร ตู แวน ดารา เฌาพรา ดอ เหมา.

23 เฌาพรา แฮะ นับ, อาว มึห อาเซ อี ปึอน ดี กาลาง นา ตู หมึอม ลอง โอว. โอว มืร ซาดีก, แกวะ แตห โอว โบง หมาบ.

24 โคว, เฌาพรา มืร วี โบง แตห อึณ แบน อาฆยึร ดี โอว, แตห อึณ กาดาน แคะ ปี ยึร อัน, แคะ มึห โอว น็อห ซืร, น็อห บอด, แคะ มึห โอว น็อห ลูย, น็อห ซีงา.

25 เฆ อี มึห น็อห ร็อก กาเว, แม เฌาพรา บอ ร็อก กาเว เฆ. เฆ อี ตู มึห อาเซ อี ปึอน กาลาง นา ตู หมึอม ลอง เฆ, แม เฌาพรา มืร ตู กาลาง นา ตู หมึอม ลอง เฆ.

26 เฆ ดูอี อี ซีงา บอด, แม เฌาพรา บอ โบง อี ซีงา บอด ดี เฆ. เฆ อี โบง กาบัห ดี เฌาพรา, เฌาพรา บอ ฌ็อง เฆ.

27 เฆ ดูอี อี มึห น็อห เตียม, เฌาพรา บอ จอย เฆ. เฆ อี ปีคึก ปีจา น็อห เฆ, เฌาพรา ดี วี แตห เฆ โจห เตียม.

28 แม เฌาพรา, อี มูห เฌาพรา ปี กรึบ โอว, แม บอ แตห อึณ บลาง ดี โอว. อี อับ ว็อง, แม เฌา แตห อึณ วี แบน อี บลาง.

29 โอว บึง แม เฌาพรา, แตห โอว บอ ปึอน แป รันซู โอว, แตห โอว บอ ปึอน ดี แดน กาโลห แรง ปี แร เฆ ดี โอว.

30 ปี โบง เฌาพรา ดอน โมยว แฮะ หมาน แฮะ มูห. อาว มึห อี ปึอน แนนัะ. กาดีก ซัดฌา ปี ดัว อัน, อึณ บอ หมาน อาคาคัร. เฆ อี บึง เฌาพรา, เฌาพรา ดี บอ แร บอ ฆ็อง เฆ ดอน อี.

31 แดง เฌาพรา นี, อาว มึห เฌาพรา ปอ อู กาดัง. แดง เฌาพรา กาดัง นี, อาว มึห อี ปึอน บึง แตห เอ ปึอน กอย ซีคยา.

32 เฌาพรา แฮะ แตห โปลม แตห แฮณ ดี โอว. อัน เฌา บอ แยต โอว ฮาว โดบ อึณเตณ ดาคึย.

33 อัน บอ แตห เปลา โอว ครัน ปี เปลา มาฌัะ อี มูห โดว มา. อัน บอ แตห โอว ฮาว กอย ซีคยา แดง นอน จา.

34 เฌาพรา บอ มาโนว โอว, แตห โอว นับ ดี กาโฆห, แตห โอว แป ดี วีต อัะ บ็อง.

35 เฌาพรา แฮะ แร แฮะ ฆ็อง โอว, แตห อึณ คยอด โอว. อัน บอ จอย บอ ฆัม โอว. อัน บอ มูด โลง, โจะ โฮะ โอว, แตห โอว ตาง.

36 แม เฌาพรา บอ โบง อึณเตณ อี กาว็อห, แตห โอว ฮาว ซีคยา, แกวะ แตห เปลา โอว ดีปลาด.

37 โอว บอ คูงครัห ครับ รันซู โอว. อาต หณัม ฮอต โอว ง็อห ยัม โตต เฆ, โอว ตู วี ตัห.

38 โอว บอ ซัด แตห เฆ ยัม, แกวะ แตห เฆ ซี วี ปึอน ดี ยีต. เฆ บอ เกห โตต ดี อาต โอว.

39 แม เฌาพรา แฮะ แตห โปลม, แตห แฮณ ดี โอว. แม แฮะ แตห โอว แป เฆ, แตห เฆ ชึม โตต.

40 แม บอ แตห เฆ รันซู โอว เตา โอว. โอว บอ ง็อห บอ ปยาต เฆ, แตห เฆ ชึม โตต.

41 เฆ บอ แดะ เหรต อี จอย เฆ, ยี ตู มึห อี จอย. เฆ บอ แดะ ซาคึร เฌาพรา, เฌาพรา ยี ตู โทม โฆรห เฆ.

42 โอว บอ โบง ดี เฆ, แตห อึณ ปี อี บลาต กามูน กาดาย แบน กาปูห, วี แตห คูน บูด. โอว บอ แวน เฆ, แตห อึณ ปี อี แวน โณะ อี กอย โคบ อึณเตณ.

43 แม เฌาพรา แฮะ จอย แตห โอว ลอด ตัะ เฆ ดูอี อี กาโฆห กาแคณ ดี โอว. แม เฌา บอ แตห โอว แบน ดา ตาง อี อึบ เฆ ดูอี แบน โมยว แบน โมยว. เฆ ดูอี ปี ตู นับ โอว, เฆ แฮะ วี แบน แดเจณ โอว.

44 ดูอี เฆ ตี, เฆ บอ ยึร โฆรห ปี กาลาง โอว, เฆ วี โทม โดบ อู เฌณ. เฆ ดูอี แบน โมยว แบน โมยว ตี, เฆ บอ ตัห ครูด ตัห โฆม โอว.

45 เฆ ดูอี อาโมยว ตี, เฆ มืร แฮะ ดีหลัห, ดียูห ดีเยณ, เลห ตัห โดง เครียง เฆ.

46 เฌาพรา มูห เฌาพรา อีม เซเซ. โอว บอ อืบ อัน อี แฮะ แร แฮะ ฆ็อง โอว. โอว อืบ มยูก เฌาพรา อี คยอด โอว.

47 อัน เฌา แฮะ โบง นา มูห นา หมาน ดี โอว, วี โบง เวียะ ดี เฆ แคะ ปี โบง เฆ ดี โอว. อัน บอ แตห เฆ ดูอี แบน โมยว แบน โมยว โฆม โอว, แตห โอว อึบ โตต เฆ.

48 เฌาพรา แฮะ จอย แตห โอว ลอด ตัะ รันซู โอว. อัน บอ โจะ โอว, แตห โอว ตาง หลึอม เฆ อี กาโฆห ดี โอว. อัน เฌา บอ จอย แตห โอว ลอด ตัะ เฆ ดูอี มืก ดูอี ฮาย.

49 โคว อัน ตี โอว อืบ มยูก แม เฌาพรา, แตห บอ ดูอี อาโมยว เฮา โทม. โอว ดี บอ ต็อห โหมว อี อืบ แม เฌาพรา, แตห อึณ ลึห แคะ บอด แม.

50 เฌาพรา แตห คูนดีคัม แป รันซู อัน. อัน เฌา บอ ร็อก กาเว เซเซ ดูอี แปะ แฮะ ร็อห แฮะ ตึย อัน. บอ ดี อาดาวีด บอ ดี หลูกหลาน อัน ดอน โจว ดอน ฌาด, เฌาพรา ดี โบง นา หมึอม เซเซ.