1 ซีแง ตี คูนดีคัม อาฮาเซรู บอ ดึห กาง อาฮามาน อี มูห รันซู ดูอี อายูดา ตึอน, วี อาบ ดัว ดี นาง เอซาทา. อาโมวตาเก บอ ปึอน ดี ลึบ กอย แคง โฮว คูนดีคัม. โคว, นาง เอซาทา แฮะ ต็อห ดี คูนดีคัม ลอง มูห ฆาย อู วอแว. 2 คูนดีคัม บอ บูต ซีกานู อี มูห ฌึม อัน ปี ดึห วีว อัน ดี อาฮามาน ตึอน, วี ดัว ดี อาโมวตาเก. นาง เอซาทา บอ วี แตห อาโมวตาเก อึบ โกรว เฆ กาง อาฮามาน ตึอน.

3 วาย ตี, นาง เอซาทา บอ วี ตัห กรึบ ฆึบ ดี เปลา คูนดีคัม บอ ยาม. อัน วี หมาณ, แตห คูนดีคัม แวน อามีง ลอง ดูอี อายูดา อี มูห โฆรห แปะ แฮะ ดัว อาฮามาน อี มูห ดูอี อากาด ตึอน. 4 คูนดีคัม บอ ดึห เลียห อัน โซ็ง ดี อัน, อัน บอ ฮาว ณืร คูนดีคัม. อัน วี ต็อห ดี คูนดีคัม,

5 “เซ แม คูนดีคัม อึง โอว แดเจณ แม นี, เซ โอว แฮะ ล็อะ น็อห แม, เซ แม บอ โพรม, โอว หมาณ แตห แม วี แดม แปะ อามีง ปอ อู พืน, แตห อึณ แวน แปะ อามีง ปี แดม อาฮามาน อี มูห ฆอน อาฮาแมตาซัะ, บอ ดูอี อาโมยว อากาด ตึอน. อึณ มูห อามีง ตึอน อี แตห เฆ ง็อห แวน โตต แคะ กอย ดูอี อายูดา ดอน มาน ดอน มืง ปี อึบ แม คูนดีคัม. 6 โคว, เหมา โอว ดี ปาย ดี คัม, เซ นา ตู หมึอม ตัห ฌัม ดี ดูอี อาโมยว โอว? เหมา โอว ดี ปาย ดี ยอด, เซ บีนอง วอแว โอว ดี ชึม โตต?”

7 นาง เอซาทา แฮะ ฮอต ต็อห ปาย ตี คูนดีคัม อาฮาเซรู วี กาลาง ดี นาง เอซาทา, แตห บอ อาโมวตาเก นับ. อัน ต็อห, “แม ยอด, โกบ แฮะ ต็อห อาฮามาน ดี ง็อห แวน ดูอี อายูดา ตี, โอว แฮะ ฮอต แตห เฆ ดึห กาง อัน ดัว ดี แม, แฮะ แตห บอ เฆ ปัก ฮอย แมง อัน ดี ร็อง จา ตึอน. 8 ดอ ตี นี แตห บาย แดม ราง บาย อาดา เฆ ดูอี อายูดา ตี. แดม แคะ ปี อึง บาย. ดึห ฌึม คูนดีคัม, ดอก. บาย ฮี โบง ปาย ตี, อาว มึห อาเซ อี ปึอน ปยาต แวน อามีง คูนดีคัม โกบ แฮะ ฮอต ดอก ฌึม ตี.”

9 บอ ฌัม มาเฆียน ฮาโอย อี จืร มาเฆียน จีวัน, ดอ ฌัม ซีแง อา ฆึร ดี ฮาโอย, เฆ บอ แดะ ดา จาเร คูนดีคัม, แตห เฆ แดม ปี กาลาง อาโมวตาเก, แตห เฆ ตึย อามีง ตี ดี ดูอี อายูดา, ตึย บอ ดี เฆ อี มูห ดา กาณา อี อึบ ดอน มืง บอ ดี เฆ ดา ตาง อี กอย แคง มืง อู มาย็อห ดี อา ฆึร ดี บู มืง, จูห ดี มืง ฆูลา กอ ฌัม มืง กูซา อี บอ จืร มืง เอทีโอบ. เฆ แดม อามีง ตี, ตา โดว แปะ เฆ ดูอี โมยว เหมา โมยว อัน, โฆรห โมยว เหมา โมยว อัน. บอ เฆ ดูอี อายูดา บอ แดม โดว แปะ เฆ, โฆรห เฆ. 10 เฆ แดม อามีง ตี, แตห อึณ ปี คูนดีคัม อาฮาเซรู แฮะ แดม ราง อัน. เฆ บอ ฮับ จืร อัน, ดอก ฌึม อัน, วี แตห ดาลาม แบน วี แบน วี ป็อะ มังปร็อง, แตห เฆ ฮาว ครัน ครัน, ฮาว ฌัม ดอน นา ดอน โปละ แคง มืง ดอน มืง. มังปร็อง ปี ป็อะ เฆ ตี บอ มูห ซีมา มังปร็อง คูนดีคัม.

11 แคง แปะ ปี แดม เฆ ตี อึณ ต็อห, คูนดีคัม แฮะ ฮอต ควาง เฆ ดูอี อายูดา อี กอย ดอน มาน ดอน มืง แคง กาดาย มืง ปี อึบ อัน, แตห เฆ กาฌูะ, แตห เฆ แร โดว เฆ. เซ อึณ บอ มึห ดา ซึก โมยว เหมา, เซ เฆ ต็อห ดี กาโฆห ดี เฆ ดูอี อายูดา บอ อีบึณ เฆ ฆอน, เฆ ดูอี อายูดา ปึอน ดี วี ง็อห ยัม โตต เฆ, แตห เฆ ชึม โตต, แกวะ ฮู แตห อึณ มึห รันซู เฆ. เฆ ดูอี อายูดา บอ ปึอน ดี พาด ดึห บอ โกรวกราม ดี รันซู เฆ. 12 ดอ มูห มาเฆียน ฆึร ดี ฮาอา อี จืร อาตา ฮี ฌัม ซีแง ฆึร ดี ฮาโอย, เฆ ดี ปึอน ดี โบง ฌึร ตี ดอน โมยว แคง มืง ดอน มืง ปี อึบ คูนดีคัม อาฮาเซรู. 13 แปะ อามีง ตี เฆ บอ กาลาง ดอน นา ดอน โปละ ดี ดูอี ดอน โมยว, แตห เฆ ดอน อี นับ ลอง เฆ ดูอี อายูดา ดี แรน อูน โดว เฆ, แตห เฆ วี โบง เวียะ ดี รันซู เฆ ซีแง ตี.

14 ปาย ตี ดาลาม อี ป็อะ มังปร็อง ตึอน เฆ มืร ปีครัน เฆ ดี ฮาว กาลาง ดอน นา ดอน โปละ. บอ ดี มืง ซูซาน ตึอน, เฆ บอ กาลาง ลอง อามีง ตี.

15 อี มูห อาโมวตาเก ตึอน, ดอ วี เลห อัน แคง โฮว คูนดีคัม อัน บอ ชึบ ดี ตา ครึง ปี ตา คูนดีคัม อี ลูย อี เงียน. อัน แฮะ ชึบ บอ มังฆึม ครีว อี ตาง บอ ซีโตว ตูน อี เรณ แฆ อี มูห กาตัม ลูย. เฆ อี กอย ดี มืง ซูซาน ตึอน บอ โคย กาเซา. 16 น็อห เฆ ดูอี อายูดา มืร บอ ดาคึย. เฆ มืร แฮะ โบยว, แฮะ วี มึห ซาเร. 17 เฆ ดูอี อายูดา อี กอย ดอน มาน ดอน มืง, เฆ บอ นับ ลอง แปะ ตึอน, เฆ บอ โคย. น็อห เฆ มืร ดาคึย กาเซา. เฆ บอ โบง บลอย. อึณ บอ มึห ดูอี กืน ต็อห ดี ลึบ ดูอี อายูดา โกบ โยว เฆ ดูอี อายูดา ดี โบง นา จาว ดี เฆ.