1 อึณ บอ ฌัม มาเฆียน ฆึร ดี ฮาอา อี จืร มาเฆียน อาตา. ดอ ฌัม ซีแง ฆึร ดี ฮาโอย, แฮะ มูห ซีแง ปี ต็อห คูนดีคัม, ดอ ดัว อัน อามีง ลอง ดูอี อายูดา. เฆ อี มูห รันซู ดูอี อายูดา เฆ แฮะ ทาง เฆ ดี แป ดูอี อายูดา ซีแง อัน ตี. แฮะ ฮอต, อึณ บอ วี กาปลูะ. เฆ ดูอี อายูดา บอ วี ปึอน ดี แป ดูอี อี ฌ็อง เฆ. 2 เฆ ดูอี อายูดา ดอน มืง ดอน โปละ เฆ บอ ตัห กาฌูะ, บัร ดี กาโฆห ดี เฆ อี ซี ง็อห เฆ. ปาย ตี ดูอี ดอน มาน ดอน มืง บอ โยว เฆ ดูอี อายูดา. อาว ฮู มึห อี ยัะ ต็อห ดี กาโฆห ดี เฆ. 3 ปัน ตี แคะ กอย ดา ตาง ดอน มาน ดอน มืง บอ เฆ ดา กาณา อี อึบ มืง บอ เฆ อามู อามาด อี กอย รึม โดบ คูนดีคัม, เฆ ดอน อี บอ จอย ดูอี อายูดา โกบ โยว เฆ อาโมวตาเก ตึอน. 4 อาโมวตาเก บอ มึห ปวน แคง โฮว คูนดีคัม. ดูอี ดอน มาน ดอน มืง บอ กาลาง ลอง อาโมวตาเก แฮะ กยัะ แฮะ มูห. ปวน อัน บอ แกร ดี ตาง กาเซา.

5 เฆ ดูอี อายูดา บอ ตา มาปัวะ ลาง เฆ, ง็อห ยัม บอกาเฆลียด รันซู เฆ. เฆ บอ โบง แคะ ปี ซี โบง เฆ ดี ดูอี อี ฌ็อง เฆ. 6 เฆ บอ ง็อห ยัม ดูอี พัน มาย็อห วี ดี มืง ซูซาน ตึอน. 7-10 เฆ บอ ง็อห บอ ฆอน อาฮามาน อี มูห รันซู ดูอี อายูดา ตึอน. ฆอน อีมาย อัน มึห ฆึร วี อี จืร อาบาซันตาลัะ, อาตาลัะโพน, อาซาบาซา, อาปอราซา, อาตาลี, อารีตาซัะ, อาบามาตาซัะ, อารีแซ, อาลีแท บอ อาวาฌาซา. เฆ ง็อห ยัม ปาย ตี, ยี ตู ดึห โกรวกราม เฆ.

11 ซีแง อัน ตี มัง อี บอ วี กาลาง ดี คูนดีคัม แคะ แฮะ ง็อห เฆ ดูอี แคง มืง ซูซาน ตึอน. 12 คูนดีคัม วี ต็อห ดี นาง ฮอคัม เอซาทา, “เฆ ดูอี อายูดา แฮะ ง็อห ยัม ดูอี พัน มาย็อห วี. บอ ฆอน อาฮามาน ฆึร วี ตึอน เฆ แฮะ ง็อห แวน แคง มืง ซูซาน. แคง มาน มืง โอว ดอน โปละ, ตู นับ ปี บอ โบง เฆ. แม นาง, แม บอ โลว มาเซ, แดง ตี แม ซี หมาณ มาเซ, โอว ดี ดัว ดี แม.”

13 นาง เอซาทา วี ต็อห, “โอว หมาณ, แตห แม คูนดีคัม วี ควาง เฆ ดูอี อายูดา อี กอย แคง มืง ซูซาน นี. แคหณา แตห เฆ วี โบง ปี ปี โบง เฆ อาตึร นี, แตห เฆ วี ดึห ฆอน อาฮามาน ฆึร วี ตี, ปัก ฮอย แมง เฆ ดี ร็อง จา.”

14 คูนดีคัม บอ วี ดัว อามีง, จัร เฆ อี กอย ดี มืง ซูซาน แตห เฆ โบง ปาย ตี. แฮะ ฮอต, เฆ บอ ดึห ฆอน อาฮามาน ฆึร วี, ปัก ฮอย แมง เฆ ดี ร็อง จา. 15 ปาย ตี ดอ มูห มาเฆียน อาตา, ซีแง ฆึร ดี อึณพวน, ดูอี อายูดา อี กอย แคง มืง ซูซาน ตึอน วี ตัห กาฌูะ, ปี วี ง็อห ดูอี อี กอย แคง มืง เฆ ปอ โอย มาย็อห วี. เฆ ยี ตู ดึห โกรวกราม เฆ.

16 ดอ อัน ตี เฆ ดูอี อายูดา อี กอย แบน โปละ แบน โปละ แคง มืง ปี อึบ คูนดีคัม ตึอน, เฆ บอ ตัห กาฌูะ แร โดว เฆ, แตห เฆ กอย ดาคึย, แกวะ แตห รันซู เฆ ปึอน ดี ปยาต เฆ. เฆ บอ ง็อห ยัม ดูอี อี ฌ็อง เฆ อาดา บู หมึณ ดี พัน แหรณ วี. เฆ ยี ตู ดึห โกรวกราม เฆ มาเซ. 17 เฆ โบง ปาย ตี ดอ มูห มาเฆียน อาตา ดอ ฌัม ซีแง ฆึร ดี ฮาโอย. บอ วี ฌัม ซีแง ฆึร ดี อึณพวน, เฆ บอ ดีเหลา บอ กอย ดาคึย โบง บลอย. แฮะ มูห ซีแง โบยว ดาคึย เฆ.

18 เฆ ดูอี อายูดา อี กอย แคง มืง ซูซาน ตึอน, เฆ บอ ตัห กาฌูะ ดอ มูห มาเฆียน อาตา, ซีแง ฆึร ดี ฮาโอย บอ ฆึร ดี อึณพวน. บอ ฌัม ซีแง ฆึร ดี อึณพัน, เฆ บอ กอย ดาคึย โบง บลอย, แตห เฆ โบยว ดอน อี.

19 โคว อัน ตี, อี มูห เฆ ดูอี อายูดา อี กอย แคง เรา นา เรต มืง, ดอน ซีนัม เฆ บอ โบง บลอย ดอ มูห มาเฆียน อาตา, ซีแง ฆึร ดี อึณพวน. เฆ บอ โบยว ดาคึย ดอน อี. เฆ บอ ลาย ตึย คอซอง ซีแง ตี.

20 อาโมวตาเก บอ แดม แปะ ตึย ดี เฆ ดูอี อายูดา บอ อี กอย โต็ง บอ อี กอย กาตัด, ดอน มืง ดอน โปละ แคง มืง ปี อึบ คูนดีคัม อาฮาเซรู ตึอน. 21 ดอน ซีนัม ฮี ฌัม มาเฆียน อาตา, ซีแง ฆึร ดี อึณพวน บอ ซีแง ฆึร ดี อึณพัน, อัน แตห เฆ โบง บลอย ตี. 22 โคว, ซีแง ตี แฮะ มูห ซีแง แฮะ ลอด เฆ ดูอี อายูดา ดี รันซู เฆ. อึณ มูห มาเฆียน ดอ แฮะ วี บยอง ดูก เฆ, แบน อี โบยว ดาคึย. ดอ กลึร น็อห เฆ, แฮะ วี แบน โคย, โบง บลอย. อาโมวตาเก แดม แปะ ตี, แตห เฆ บอกาเฆลียด โบง บลอย ดาคึย, ลาย ดัว คอซอง บอ กาซาง โกรวกราม ดี ดูอี ฆีน.

23 เฆ ดูอี อายูดา บอ โบง ปี ปี ดึอม โบง เฆ ซีณ ดอ โฆว อัน. เฆ โบง โดบ ปี แค ปี แดม ตึย อาโมวตาเก ตึอน. 24 อึณ มูห อาฮามาน อี มูห ฆอน อาฮาแมตาซัะ อี มูห ครึร อากาด, อัน แฮะ แบน รันซู ดูอี อายูดา บอกาเฆลียด. อัน แฮะ คราม ดี ง็อห ดูอี อายูดา, กาตาม แตห อัน นับ ซีแง เหมา อัน ดี ง็อห แวน เฆ. 25 คูนดีคัม บอ นับ ลอง อัน ตี, อัน บอ วี โบง อามีง, แตห อาฮามาน วี คัม ปี คราม อัน ดี โบง ดี ดูอี อายูดา, แตห บอ อัน บอ ฆอน อัน วี คัม อี ปัก ฮอย แมง เฆ ดี ร็อง จา ตึอน. 26 โคว, เฆ ต็อห ซีแง ปี โบง เฆ บลอย ตี อัน จืร “บูรีม.” โฆรห “บูรีม” ตี, อึณ เลห “กาตาม.” เฆ โบง ดอน โมยว, แตห อึณ โดบ ปี แดม อูน แคง แปะ ตึอน บอ โกบ อามู ดอน โมยว แปะ แฮะ กาตูณ เฆ ดูอี อายูดา. 27 เฆ แตห อึณ แบน ทูงฆยาม เฆ, แตห บอ โจว เฆ บอ โจว หลูกหลาน เฆ บอ เฆ ดอน อี อี โดบ เฆ โบง บลอย บูรีม ตี ดอน ซีนัม, ฮี ฌัม ซีแง ตี. เฆ บอ โนว ซีคยา อาคราว ตี, ตู แตห เฆ ลูด, เฆ บลืง บลอย ตี. 28 เฆ แตห อี โหลห ซีแง ตี, กอ ฌัม โจว บาน ฆอน เฆ ดอน โจว, แกวะ แตห ดอน ครึร ดอน มืง ดอน เรา ปีว ซีแง บูรีม ตี, แกวะ แตห อึณ หราย กาแต เฆ ดูอี อายูดา, แตห เฆ โหลห ซีแง ตี, แตห กอ ฌัม ดอน โจว ดอน ฌาด.

29 ปาย ตี นาง เอซาทา อี มูห ฆอน อาพีเฮลา บอ อาโมวตาเก อี มูห ดูอี อายูดา ตึอน ฆาย แฮะ แดม แปะ ลอง ซีแง บูรีม ตี, แตห ดอน อี โทม โดบ ปี จัร ฆาย. 30 ฆาย บอ ตึย แปะ ตี ดี ดูอี อายูดา บอกาเฆลียด, อี กอย แคง มืง ปี อึบ คูนดีคัม อาฮาเซรู อี มูห อู มาย็อห ดี อา ฆึร ดี บู มืง, แตห อึณ แบน โฆรห ม็องการา บอ โฆรห อี แตห น็อห เฆ ดาคึย. 31 แปะ ปี แดม ฆาย ตี, แตห เฆ โดบ ซีคยา ซีแง บูรีม ตี, แตห อึณ ปี บลอย ปี โบง เฆ แบน โมยว แบน โมยว อี มูห บลอย ยืน ปี ดี โฮม บอ บลอย ซาคึร เฌาพรา. 32 อามีง ปี แดม นาง เอซาทา บอ ลอง ซีแง บูรีม ตึอน, เฆ บอ แดม อูน ซีคยา แคง บับ, แกวะ แตห อัน ลึร ดอ เหมา.